༢༠༡༣ ཟླ་ ༡༢ ཚེས་ ༦ རེས་གཟའ་པ་སངས།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། བོད་ཤར་ཕྱོགས་ཁམས་ནགས་ཤོད་འབྲི་རུ་རྫོང་གི་ན་གཞོན་གླུ་པ་མགོན་པོ་བསྟན་འཛིན་ལགས་དང་འཕྲིན་ལས་ཚེ་དཀར་ལགས་གཉིས་འཛིན་བཟུང་བྱས་པའི་གནས་ཚུལ་ཐོན་འདུག
དེ་ཡང་འབྲི་རུ་རྫོང་ཤག་ཆུ་གྲོང་རྡལ་སེབ་ཁྲ་གྲོང་ནས་ཡིན་པའི་ཁྱིམ་དུ་ཕ་མ་གཉིས་དང་བཟའ་ཟླ་ཕྲུ་གུ་ཡོད་པའི་རང་ལོ་ ༢༥ ལ་སོན་པ་བོད་རིགས་ན་གཞོན་གླུ་པ་མགོན་པོ་བསྟན་འཛིན་ལགས་ཀྱིས་སྔ་ཕྱིར་བོད་མི་རིགས་ཀྱི་ལས་དབང་དང་འབྲེལ་བའི་ཆེད་སྒྲིག་འོད་སྡེར་མང་པོ་འགྲེམས་སྤེལ་བྱས་ཡོད་པར་བརྟེན་རྒྱ་ཆེའི་མི་དམངས་ཚོས་དགའ་བསུ་གང་ལེགས་ཐོབ་འདུག དེས་རྐྱེན་པས་རྒྱ་གཞུང་གིས་ཉེ་སྔོན་ནས་འཛིན་བཟུང་གི་བཀའ་རྒྱ་བཏང་ཡོད་པ་ལྟར། ཁོང་ཕྱི་ལོ་ ༢༠༡༣ ཟླ་ ༡༡ ཚེས ༣༠ དགོང་མོར་ལྷ་ས་ནས་གློ་བུར་དུ་འཛིན་བཟུང་བཙན་འཁྲིད་བྱས་པའི་གནས་ཚུལ་ཐོན་འདུག མགོན་པོ་བསྟན་འཛིན་ལགས་ཀྱི་ཆེད་བསྒྲིགས་གླུ་གཞས་ལས་བོད་མི་རིགས་ཀྱི་སྐད་ཡིག་དར་སྤེལ་སྐོར་དང་མི་རིགས་སློབ་གསོའི་སྐོར་སྙན་པའི་གླུ་དབྱངས་ལ་དྲངས་ཏེ་བོད་ཀྱི་སྤྱི་ཚོགས་ལ་འཕྲིན་བསྐུར་གྱི་ཚུལ་དུ་བསྲིངས་ཡོད། ད་ལྟའི་ཆར་ཁོང་གིས་འགྲེམས་སྤེལ་བྱས་པའི་ཆེད་བསྒྲིགས་རྣམས་བོད་ཀྱི་སྤྱི་ཚོགས་ཡོངས་ལ་ཁྱབ་ཡོད་ལ། དེ་ལས ༼ གངས་ཅན་བོད་ལ་ལོ་གསར་ག་ན་ཡོད།༽ ཅེས་པ་དེ་ཁྱབ་ཆེ་ཤོས་ཡིན་འདུག
དེ་བཞིན་ཁྱིམ་དུ་ཨ་མ་དབྱངས་ཅན་སྒྲོལ་དཀར་དང་བཟའ་ཟླ་ཕྲུ་གུ་ཡོད་པའི་རང་ལོ་ ༢༢ ལ་སོན་པ་ཁམས་ནགས་ཤོད་འབྲི་རུ་རྫོང་འབྲི་རུ་ཤང་སེར་ཁང་གྲོང་ནས་ཡིན་པའི་གཞོན་སྐྱེས་གླུ་པ་འཕྲིན་ལས་ཚེ་དཀར་ལགས་ཟླ་བ་སྔོན་མའི་ཚེས་ ༢༠ ཡས་མས་ཤིག་ལ་ནག་ཆུ་ས་ཁུལ་དུ་རླངས་འཁོར་ཁ་ལོ་བའི་ལག་ཁྱེར་ལེན་སའི་སློབ་གྲྭར་སོང་ཡོད་པའི་སྐབས་གློ་བུར་དུ་འཛིན་བཟུང་བཙན་འཁྲིད་བྱས་འདུག ཁོང་འཛིན་བཟུང་བྱེད་དགོས་པའི་རྒྱུ་རྐྱེན་ནི་ ༼ མཐུན་སྒྲིལ་གྱི་ཨ་ལོང་།༽ སོགས་བོད་མི་རིགས་ཀྱི་བདེ་སྡུག་དབྱངས་སུ་གྱེར་བའི་ཆེད་བསྒྲིགས་འགའ་ཞིག་འགྲེམས་སྤེལ་བྱས་པས་རེད་འདུག
མགོན་པོ་བསྟན་འཛིན་ལགས་ཀྱིས་བཏང་བའི་༼ གངས་ཅན་བོད་ལ་ལོ་གསར་ག་ན་ཡོད། ༽ ཅེས་པའི་གཞས་ཚིག་འདི་ལྟར། །གངས་ཅན་བོད་ལ་ལོ་གསར་གང་ན་ཡོད། །གངས་སེང་ད
ཀར་མོ་གངས་ལ་འགྱིང་ཐག་རིང་། །གངས་རིའི་དཔའ་བོ་གངས་ཕྱིར་འཁོད་ཐབས་བྲལ། །གངས་བུ་རྒོད་པོ་གངས་སླད་སྐྱིད་ཐབས་དབེན། །གངས་ཅན་བོད་ལ་ལོ་གསར་གང་ན་ཡོད། །གངས་རིའི་རྩེ་ནས་ཁྱི་རྒན་ཀུ་ཅོ་འདོན། །གངས་རིའི་སྐེད་ནས་སྤྱང་མོས་ངུ་ཟུག་འཐེན། །གངས་རིའི་འདབས་ནས་ཝ་མོས་གཡོ་གར་འཁྲབ།
།གངས་ཅན་བོད་ལ་ལོ་གསར་གང་ན་ཡོད། །གངས་རིའི་སྙིང་ཁྲག་དྲོན་མོ་ས་ལ་གཏོར། །གངས་རིའི་རླུང་རྟ་དཀར་པོ་ཆུ་ལ་བསྐྱུར། །གངས་རིའི་ཚེ་སྲོག་དམར་པོ་མེ་ལ་སྤར། །གངས་ཅན་བོད་ལ་ལོ་གསར་གང་ན་ཡོད། །གངས་རིའི་ངུ་སྐད་རྒྱལ་ཁམས་ཡོངས་ལ་ཁྱབ། །གངས་རིའི་མིག་ཆུས་འཛམ་གླིང་བསྐོར་བ་བརྒྱབ། །གངས་རིའི་ན་ཟུག་ས་སྟེང་སུ་ཡིས་ཚོར། །གངས་ཅན་བོད་ལ་ལོ་གསར་གང་ན་ཡོད། །གངས་རིའི་གཟི་བྱིན་སྨུག་སྤྲིན་ནག་པོ་བསྒྲིབས། །གངས་རིའི་ལང་ཚོ་དུས་ཀྱི་ཉི་མས་ཟས། །གངས་རིའི་འཇིག་རྟེན་ཕལ་ཆེར་འཇིག་ལ་ཉེ། །གངས་ཅན་བོད་ལ་ལོ་གསར་གང་ན་ཡོད། །གངས་རིའི་ཐོབ་ཐང་གཞན་དབང་འོག་ན་ཡོད། །གངས་རིའི་རང་དབང་མནར་གཅོད་ཁྲོད་ན་ལུས། །གངས་ཕྲུག་རྣལ་མའི་སེམས་ཤིག་ཡོད་རྒྱུ་ན། །གངས་ཅན་བོད་ལ་ལོ་གསར་གང་ན་ཡོད། །
