༢༠༡༣ ཟླ་ ༡༢ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༩ པས་ནས་བཟུང་བོད་ཤར་ཕྱོགས་ཁམས་ནགས་ཤོད་འབྲི་རུ་རྫོང་དུ་གནས་ཚུལ་རབས་དང་རིམ་པ་མང་པོ་བྱུང་ནས་ད་ལྟའི་ཆར་མི་ཧ་ཅང་མང་པོ་བཙོན་དོང་དུ་ལྷུང་བ་དང་ཉུང་ཤས་ཤིག་ལ་ཁྲིམས་ཆད་དང་རྡུང་རྡེག་གང་འཚམ་བཏང་རྗེས་བཙོན་བཀྲོལ་ཐོབ་མོད་། ཉེ་ཆར་སླར་ཡང་ས་གནས་བོད་མི་ཁ་ཤས་འཛིན་བཟུང་བྱས་ཡོད་པའི་གནས་ཚུལ་ཕྱིར་ཐོན་བྱུང་འདུག ཕྱི་ཟླ་ ༡༡ ཚེས ༡༨ ཉིན་ཁམས་འབྲི་རུ་རྫོང་ཚྭ་ཆུ་ཤང་རྔ་གཡང་གྲོང་ནས་ཡིན་པའི་བློ་བཟང་ཆོས་དབྱིངས་ལགས་དང་ཀུན་མཆོག་ཆོས་འཕེལ་ལགས་གཉིས་འཛིན་བཟུང་བྱས་ཡོད་པ་དང་། བློ་བཟང་ཆོས་དབྱིངས་ལགས་འཛིན་བཟུང་བྱེད་རྐྱེན་ཟླ་བ ༩ པའི་ནང་རྫོང་སློབ་གྲྭའི་ངོ་རྒོལ་དང་འབྲེལ་བ་ཡོད་ལུགས་བཤད་ཡོད་པ་དང་། ཀུན་མཆོག་ཆོས་འཕེལ་ལགས་འབྲི་རུའི་སྐོར་གྱི་གནས་ཚུལ་ཕྱིར་གཏོང་བྱས་ཡོད་པའི་ཉེས་མིང་བཀལ་ཡོད་འདུག དེ་མིན་ཕྱི་ཟླ་ ༩ ཚེས ༢༣ ཉིན་ཁམས་འབྲི་རུ་རྫོང་རབ་བརྟན་དགོན་པའི་གྲྭ་བཟང་བཀྲ་ཤིས་ལགས་སྔགས་རྒྱུན་མཚམས་ལ་བཞུགས་པའི་སྐབས་བཙན་འཁྲིད་བྱས་པ་དང་ཁོང་གི་གློག་ཀླད་དང་ཁ་པར་བཙན་འཕྲོག་བྱས་འདུག
ད་ལྟ་ཁོང་རྣམས་གང་དུ་ཡོད་ཤེས་རྟོགས་མེད་པ་དང་ནང་མི་ཉེ་འབྲེལ་སུ་ཡང་ཐུག་འཕྲད་བྱེད་འཇུག་གི་མེད་པ་རེད། དེ་མིན་ཡང་རྫོང་སྲིད་གཞུང་ནས་འབྲི་རུ་རྫོང་ཁོངས་ནས་དེ་སྔོན་ལྗོངས་ཕྱི་ལོགས་སུ་སློབ་གཉེར་ལ་བསྐྱོད་མྱོང་ཡོད་པའི་སྐྱ་སེར་ཕོ་མོ་ཡོངས་རྫོགས་ཀྱི་མིང་ཐོ་བཀྲམ་ནས་སྲིད་གཞུང་ནས་འདྲི་གཅོད་བྱེད་རྒྱུ་ཡིན་པ་དང་བསམ་བློའི་སློབ་གསོ་རྒྱག་རྒྱུ་ཡིན་པ་རེད་འདུག ཉེ་ཆར་འབྲི་རུ་རྫོང་བཙོན་ཁང་དུ་བཀག་ཉར་བྱས་ནས་གློད་བཀྲོལ་ཐོབ་མ་ཐག་པའི་ས་གནས་བོད་མི་ཡོངས་རྫོངས་ཤང་སོ་སོར་སླར་ཡང་རྒྱལ་གཅེས་བསམ་བློའི་སློབ་གསོ་ཚོགས་ཡོད་འདུག ད་ལྟའི་ཆར་འབྲི་རུ་རྫོང་གི་མི་ཧ་ཅང་མང་པོ་ཞིག་འབྲི་རུ་རྫོང་བཙོན་ཁང་དང་ནག་ཆུ་ས་གནས་བཙོན་ཁང་། དེ་བཞིན་ལྷ་ས་བཙོན་ཁང་བཅས་ལ་བཙོན་འཇུག་བྱས་ཡོད་འདུག་ལ་ས་གནས་སུ་དམ་བསྒྲགས་ཧ་ཅང་ཆེ་བས་བོད་མི་ཚོའི་རྒྱུན་གཏན་འཚོ་བ་དང་འགྲོ་སྐྱོད་ལ་ཧ་ཅང་དཀའ་ངལ་འཕྲད་བཞིན་ཡོད་འདུག
