༢༠༡༣ ཟླ་ ༡༢ ཚེས་ ༢ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཕྱི་ལུགས་སྨན་ཁང་ཨ་པོ་ལོ་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༡༡ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་མགོན་པོ་གང་ཉིད་མཆོག་གིས་ཨ་པོ་ལོ་སྨན་ཁང་གི་སྨན་པ་དང་སྨན་ཞབས་པ། ལས་བྱེད། དེ་བཞིན་ནད་པ་བཅས་ཁྱོན་མི་གྲངས་ ༧༠༠ བརྒལ་བར་ཤེས་རབ་དང་སྙིང་རྗེའི་ (Wisdom of Compassion at Apollo) སྐོར་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། སྤྱིར་བཏང་ངོས་རང་ཡང་སྨན་ཁང་འདིར་ཐེངས་འགའ་ཤས་ལུས་པོ་བརྟག་དཔྱད་བྱེད་པར་ཡོང་མྱོང་ཡོད། སྨན་ཁང་འདིས་སྤྱི་ཚོགས་ལ་ཞབས་འདེགས་ཆེན་པོ་སྒྲུབ་བཞིན་ཡོད། མིའི་ལུས་ཁམས་བདེ་ཐང་ཡོང་ཆེད་ཕྱིའི་སྨན་གལ་ཆེན་པོ་ཡིན་པ་ལྟར། ནང་སེམས་ཞི་བདེས་ལུས་བདེ་ཐང་ཡོང་རྒྱུར་ཕན་གྱི་ཡོད།
དེང་སྐབས་ཚན་རིག་པ་མང་པོས་ཞིབ་འཇུག་བྱས་པའི་གྲུབ་དོན་ལ་སེམས་སྐྱིད་པོ་བྱུང་ན་ལུས་བདེ་ཐང་ཡོང་རྒྱུ་ཕན་གྱི་ཡོད་པར་བརྟེན་ཉིན་རེ་བཞིན་རང་ཉིད་ཀྱི་སེམས་ཞི་བདེ་ཡོང་རྒྱུར་འབད་བརྩོན་བྱེད་དགོས། དུས་ཚོད་ཉིན་རེ་བཞིན་འགྲོ་གི་ཡོད་སྟབས་ང་ཚོར་འགོག་ཐབས་རྩ་བ་ནས་མེད། འདས་པར་གནས་ཚུལ་གང་བྱུང་བ་དེ་དག་ང་ཚོས་བཅོས་ཐབས་མེད། འོན་ཀྱང་མ་འོངས་པ་འབྱུང་འགྱུར་ཡིན་སྟབས། ང་ཚོར་བདེ་སྐྱིད་ལྡན་པའི་སྤྱི་ཚོགས་ཤིག་དང་ཡང་ན་དཀའ་རྙོག་ཆེ་བ་ཇི་འདྲ་ཞིག་བཟོ་མིན་གཞོན་སྐྱེས་ཚོའི་ཕྲག་པར་ཡོད། དེར་བརྟེན་དུས་རབས་ཉེར་པ་འདི་ཞི་བདེ་ལྡན་པའི་དུས་རབས་ཡོང་རྒྱུར་གཞོན་སྐྱེས་ཚོར་འགན་ཁུར་ཆེན་པོ་ཡོད། དེ་བཞིན་འཛམ་གླིང་སྤྱི་ཡོངས་ལ་ལྐོག་ཟ་རུལ་སུངས་ཀྱི་ན་ཚ་གསར་པ་ཞིག་འབྱུང་བཞིན་ཡོད། དེའི་རྒྱུ་རྐྱེན་གཙོ་བོ་ནི་མིའི་ཀུན་སྤྱོད་བཟང་པོ་ཉམས་ཆག་ཏུ་ཕྱིན་པའི་རྟགས་མཚན་ཡིན་པ་མ་ཟད། བདེ་སྐྱིད་དངོས་གནས་དེ་དངུལ་གྱིས་བསྐྲུན་ཐུབ་ཀྱི་མེད་པའི་ངོས་འཛིན་གསལ་པོ་མ་བྱུང་བར་བརྟེན་ནས་ཡོང་གི་ཡོད། དེ་བཞིན་ང་ཚོ་ཚང་མ་འགྲོ་བ་མི་གཅིག་གྱུར་ཡིན་པར་བརྟེན། ཕན་ཚུན་གཅིག་ཕན་གཅིག་རོགས་དང་གཞན་ཕན་ཀུན་སློང་བཟང་པོ་འཁྱེར་ཏེ་བྱམས་སྙིང་རྗེའི་འདུ་ཤེས་འཕེལ་རྒྱས་གཏོང་རྒྱུར་འབད་བརྩོན་ཤུགས་ཆེ་ཙམ་བྱེད་དགོས། འགྲོ་བ་མིའི་རིགས་ལ་སྲོག་ཆགས་གཞན་དང་མི་འདྲ་བའི་ཁྱད་པར་ཅན་གྱི་རྣམ་དཔྱོད་ཅིག་ཡོད་པ་དེའི་ཐོག་ནས་བཟང་ངན་དབྱེ་འབྱེད་ཀྱི་ནུས་པ་ཡོད་སྟབས། རྣམ་དཔྱོད་དེ་བཟང་ཕྱོགས་སུ་བེད་སྤྱོད་བཏང་སྟེ་ཐོག་མར་རང་ཉིད་ཀྱི་ཁྱིམ་ཚང་དང་དེ་ནས་རིམ་བཞིན་སྤྱི་ཚོགས་བརྒྱུད་མཐར་འཛམ་གླིང་འདི་ཞི་བདེ་ལྡན་པ་ཞིག་ཡོང་ཐབས་སུ་འབད་བརྩོན་སྔར་ལྷག་བྱེད་རྒྱུ་གལ་ཆེན་པོ་ཆགས་ཡོད། མ་འོངས་པའི་དུས་རབས་གང་འདྲ་ཆགས་མིན་ནི་ད་ལྟའི་མི་རབས་གཞོན་པ་ཚོའི་ལག་པར་ཡོད་པར་བརྟེན། རྒྱ་གར་གྱི་མི་རབས་གཞོན་པ་ཚོས་སོ་སོའི་ཕ་མེས་ནས་ཡོད་པའི་བཟང་པོའི་ཡོན་ཏན་དེ་དག་གི་བསླབ་བྱ་དང་ཟུང་འབྲེལ་ཐོག་ནས་དེང་དུས་ཀྱི་ཤེས་ཡོན་བེད་སྤྱོད་བྱས་ཏེ་རང་ཉིད་ཀྱི་མི་ཚེ་དོན་ལྡན་གྱི་སྒོ་ནས་བསྐྱལ་ཐབས་བྱེད་དགོས་པ་མ་ཟད། འཛམ་གླིང་མི་དམངས་ལ་ཡང་མིག་དཔེ་བཟང་པོ་ཞིག་བསྐྲུན་ཐུབ་པ་བྱེད་དགོས།
ལྷག་པར་སྨན་པ་དང་སྨན་ཞབས་པ་ཚོས་དུས་རྒྱུན་དུ་ནད་པར་བྱམས་བརྩེས་ཀུན་ནས་བླངས་ཏེ་ལྟ་རྟོག་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན་རང་ཉིད་ཀྱི་ལུས་ཀྱི་དབང་པོ་ཁག་གཅིག་ནད་པ་གཞན་ལ་ཞལ་འདེབས་གནང་མཁན་ཁྱེད་རྣམ་པས་ངོས་རང་ལྟ་བུར་སྐད་ཆ་ཁོ་ན་བཤད་ནས་མ་བསྡད་པར་གཞན་ཕན་ཀུན་ནས་བླངས་ཏེ་ཁ་ཡོད་ལག་ཡོད་ཀྱིས་བཟང་པོའི་ཀུན་སྤྱོད་ལག་བསྟར་གནང་བར་ངོས་ཀྱིས་ཡི་རང་བསྔགས་བརྗོད་བྱེད་རྒྱུ་ཡིན།
ངོས་རང་ཆོས་ཁས་ལེན་མཁན་ཞིག་ཡིན་པའི་ཆ་ནས་ཁྱེད་རང་ཚོའི་བྱེད་བབ་འདི་དགེ་བའི་བྱ་བ་ཞིག་ཏུ་ངོས་འཛིན་པ་དང་ཆབས་ཅིག་འདི་ལྟ་བུའི་བྱ་བཟང་དེ་སེམས་ཅན་གཞན་ལ་ཕན་ཐོགས་ཡོང་རྒྱུའི་བཟང་པོའི་ཀུན་སློང་སྔར་ལྷག་འཁྱེར་དགོས། ཆོས་ཁས་ལེན་མཁན་ཞིག་ཡིན་ན། དེ་ནི་དཀོན་མཆོག་ལ་མཆོད་པ་ཕུལ་བ་ལྟ་བུ་ཆགས་ཀྱི་ཡོད། ཅེས་སོགས་ཀྱི་ལམ་སྟོན་བཀའ་སློབ་སྩལ་ཡོད། དེ་རྗེས་སྨན་ཁང་དེའི་འགན་འཛིན་མཆོག་གིས་མགོན་པོ་གང་ཉིད་མཆོག་སྨན་ཁང་དེར་ཆིབས་སྒྱུར་བཀའ་དྲིན་བསྐྱངས་པར་ཐུགས་རྗེ་ཆེ་ཞུ་རྒྱུའི་གསུང་བཤད་གནང་ཡོད།
