༢༠༡༣ ཟླ་ ༡༡ ཚེས་ ༢༨ རེས་གཟའ་ཕུར་བུ།

༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༢༦ ཉིན་བྷེལ་ཇམ་རྒྱལ་ས་བྷར་སེལ་ Brussels དུ་རྟེན་གཞི་བྱས་པའི་ཡུ་རོབ་དཔལ་འབྱོར་དང་སྤྱི་ཚོགས་བདེ་དོན་ལྷན་ཁང་ EESC གི་ཚོགས་གཙོ་སྐུ་ཞབས་ཧེན་རི་མ་ལོ་སེ་ Henri Malosse མཆོག་གིས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ལ་སྣེ་ལེན་དང་མཇལ་འཕྲད་ཞུས་ཡོད། མཇལ་འཕྲད་སྐབས་ཚོགས་གཙོ་མཆོག་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སེམས་འཚབ་དང་གདུང་སེམས་མཉམ་སྐྱེའི་རྣམ་པ་ཤུགས་ཆེ་བསྟན་གནང་བ་མ་ཟད། རྒྱ་ནག་གཞུང་གིས་བོད་མིའི་ངོ་བོ་མཚོན་པའི་བོད་མིའི་སྒྲིག་འཛུགས་ཀྱི་སྐུ་ཚབ་དང་ལྷན་གྲོས་མོལ་བརྒྱུད་ནས་བོད་ཀྱི་གནད་དོན་སེལ་རྒྱུ་ཧ་ཅང་གལ་ཆེ་ཆགས་ཡོད་སྐོར་གསུངས་ཡོད། ཕྱོགས་མཚུངས་ཕྱི་དྲིལ་བཀའ་བློན་མཆོག་གིས་ཡུན་རིང་ལུས་པའི་བོད་ཀྱི་གནད་དོན་སེལ་ཆེད་ཡུ་རོབ་སྤྱི་མཐུན་སྒྲིག་འཛུགས་ནས་དོན་དམ་གྱི་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་ཡོད། ཐེངས་འདིར་ཕྱི་དྲིལ་བཀའ་བློན་མཆོག་གིས་ཡུ་རོབ་དཔལ་འབྱོར་དང་སྤྱི་ཚོགས་བདེ་དོན་ལྷན་ཁང་གི་ཚོགས་མི་ལྕམ་སྐུ་ཨ་ནེ་མ་རི་ཡ་སིག་མུན་ Anne-Marie Sigmund མཆོག་དང་བྷེ་ཏ་རེ་སི་ Béatrice Ouin མཆོག དེ་བཞིན་སྐུ་ཞབས་ཐོ་མ་སི་ཇོན་སོན་མཆོག་བཅས་དང་མཇལ་འཕྲད་གནང་ཡོད།