༢༠༡༣ ཟླ་ ༡༡ ཚེས་ ༢༦ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དཔལ་སྤུངས་ཤེས་རབ་གླིང་དགོན་དུཆེད་ཕེབས་ཀྱིས་དགེ་འདུན་རྣམས་ལ་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྲིད་སྐྱོང་མཆོག་གདན་ས་དཔལ་སྤུངས་ཤེས་རབ་གླིང་དུ་ཕེབས་འབྱོར་སྐབས་ཤེས་རབ་གླིང་འདུས་སྤྱི་ནས་ཕེབས་བསུ་གཟབ་རྒྱས་ཞུས་ཡོད། དེ་ནས་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་དང་སྲིད་སྐྱོང་མཆོག་གིས་གཙུག་ལག་ཁང་གི་རྟེན་གཙོའི་མདུན་སྣང་གསལ་ཞལ་ཕྱེ་གནང་བ་དང་སི་ཏུ་རིན་པོ་ཆེ་མཆོག་དང་སྲིད་སྐྱོང་མཆོག་ནས་གདན་ས་དཔལ་སྤུངས་ཤེས་རབ་གླིང་གི་རྒྱུད་གྲྭའི་ལོ་འཁོར་རིག་གནས་ཡིག་རྒྱུགས་ཀྱི་སྦྱངས་འབྲས་ལེགས་ཐོན་རྣམས་ལ་བྱ་དགའ་གནང་ཡོད།
དེ་རྗེས་བྱམས་མགོན་སི་ཏུ་རིན་པོ་ཆེ་མཆོག་གིས་བླང་དོར་གསུང་བཤད་གནང་གྲུབ་མཚམས། སྲིད་སྐྱོང་མཆོག་གིས་གསུང་བཤད་གནང་དོན། ངས་དམ་འབུལ་ཞུས་རྗེས་བླ་ཆེན་ཁག་གི་ཚོགས་ཆེན་འཚོགས་གཏན་འཁེལ་ཡོད། ཚོགས་འདུ་མ་ཚོགས་གོང་ང་རང་༸གོང་ས་མཆོག་གི་གཟིམ་ཆུང་དུ་ཆེད་བཅར་ཞུས་ཏེ་བླ་ཆེན་ཁག་གི་ཚོགས་འདུར་ག་རེ་བཤད་དགོས་མིན་བཀའ་འདྲི་དགོངས་སྐོར་ཞུས་སྐབས། མགོན་པོ་གང་ཉིད་མཆོག་གིས་ཁྱེད་རང་གི་ཆོས་ཤེས་ཀྱི་མེད་སྟབས་ཆབ་སྲིད་ཀྱི་ལས་བསྡོམས་བཤད་ན་ཡག་གི་རེད་ཅེས་བཀའ་སློབ་ཕེབས་བྱུང། སི་ཏུ་རིན་པོ་ཆེ་མཆོག་གིས་སི་ཏུ་པཎ་ཆེན་དུས་རབས་ ༡༨ སྐབས་དཔལ་སྤུངས་ཤེས་རབ་གླིང་ཕྱག་བཏབ་ཡོད་སྐོར་བཀའ་གནང་བ་དང་འབྲེལ། སྤྱི་ཡོངས་ཀྱི་ནང་ཆོས་སྐོར་ལའང་ཞིབ་ཕྲ་གསུངས་པར་བརྟེན།
ངོས་རང་དེ་ལས་ལྷག་པ་ཞིག་བརྗོད་རྒྱུ་མེད། བོད་ཀྱི་སྐྱེས་ཆེན་དམ་པ་མང་པོ་ཞིག་གིས་སྐུ་ལས་བསྐྱོན་པའི་བཀའ་དྲིན་ལ་བརྟེན་བོད་ནང་དུ་ནང་ཆོས་དར་འཕེལ་བྱུང་ཡོད། ང་ཚོ་སོ་སོའི་ལུང་པ་ཤོར་ཏེ་རྒྱ་གར་ནང་བཙན་བྱོལ་དུ་འབྱོར་རྗེས་ད་ལྟའི་ཆར་འཛམ་གླིང་ནང་ངོམས་སུ་ཆོག་པའི་ནང་པའི་ཆོས་དང། བོད་ཀྱི་སྐད་ཡིག རིག་གཞུང་ཕུན་སུམ་ཚོགས་པ་ཞིག་ཡོད། ད་ལྟའི་ཆར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་མཛད་འཕྲིན་སྐྱོང་བཞིན་ཡོད། ནང་ཆོས་བརྒྱུད་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་ཡོད་པར་བརྟེན་བོད་དོན་ཐོག་དོ་སྣང་དང་འབྲེལ་བོད་པར་རྒྱབ་སྐྱོར་བྱེད་བཞིན་ཡོད། དེར་བརྟེན་ཆོས་དང་རིག་གཞུང་། སྐད་ཡིག་རྩ་ཆེན་ཞིག་ཡོད་པ་དེ་དག་ང་ཚོས་མི་ཉམས་རྒྱུན་འཛིན་གནང་དགོས་རྒྱུ་གལ་ཆེན་པོ་རེད། དེ་བཞིན་རིན་པོ་ཆེ་མཆོག་གིས་ཕྱི་ལོ་ ༡༩༧༥ ལོར་ས་ཆ་འདིར་གཟིགས་ཞིབ་གནང་རྫེས་དཔལ་སྤུངས་ཤེས་རབ་གླིང་འདི་གསར་འཛུགས་གནང་འདུག དེ་ནས་བཟུང་ད་བར་སངས་རྒྱས་ཀྱི་བསྟན་པ་སྤྱི་དང་། ལྷག་པར་བཀའ་བརྒྱུད་ཀྱི་ཐུན་མོང་མིན་པའི་དབང་ལུང་ཁྲིད་གསུམ་མི་ཉམས་གོང་འཕེལ་གནང་ཡོད། ཤེས་རབ་གླིང་ལ་ད་ལྟའི་ཆར་བཤད་གྲྭ་དང་སྒྲུབ་གྲྭ དཔེ་མཛོད། དེ་བཞིན་སྨན་གྱིས་གཙོས་ལས་གཞི་ཁག་མང་པོ་ཞིག་སྤེལ་བཞིན་འདུག བསླབ་པ་སློབ་གཉེར་ལ་ཆ་བཞག་ན་ད་ལྟ་ལག་འཁྱེར་དང་ཨང་ཀི་རག་སྟངས་ལ་ལྟ་སྐབས་ཧ་ཅང་ཡག་པོ་གནང་གི་ཡོད་པ་གསལ་པོ་རེད། དེར་བརྟེན་ཤེས་རབ་གླིང་དུ་རིན་པོ་ཆེ་མཆོག་གིས་གཙོས་འདིར་འགན་འཁྱེར་མཁན་ཚང་མར་བསྔགས་བརྗོད་དང་སྦྲགས་ཐུགས་རྗེ་ཆེ་ཞུ་རྒྱུ་ཡིན།
དེ་བཞིན་བོད་མི་རྣམས་རྒྱ་གར་ནང་འབྱོར་ཏེ་ལོ་ངོ་ལྔ་བཅུ་ང་གསུམ་ལྷག་ཕྱིན་ཡོད། བཀའ་ཤག་སྐབས་བཅུ་བཞི་པའི་ལྟ་གྲུབ་གསུམ་གྱི་སྐོར་ལ་ཞུས་ན། ཆིག་སྒྲིལ། གསར་གཏོད། རང་ཁ་རང་གསོ་བཅས་ཡིན། ད་ལྟའི་ཆར་ཆོས་ཕྱོགས་ཀྱི་ཐོག་ནས་གཟིགས་ན་དགོན་སྡེ་ཁག་མང་ཆེ་བས་བཀའ་ཤག་གི་ལྟ་གྲུབ་གསུམ་སྒྲུབ་བཞིན་པ་ལྟ་བུ་རེད། དགོན་པར་ཆོལ་ཁ་གསུམ་དང་ཧི་མ་ལ་ཡའི་རི་རྒྱུད་ཀྱི་གྲྭ་བཙུན་སུ་ཞིག་ཕེབས་ཀྱང་དབྱེ་འབྱེད་མེད་པར་ཆིག་སྒྲིལ་གྱི་རྣམ་པ་ཐོག་ནས་ཕེབས་ཀྱི་ཡོད། གསར་གཏོད་ནི་ཞུ་མ་དགོས་པ་རེད། དགོན་པ་ཁག་གི་ཚོགས་ཁང་དང་གཞིས་ཆགས་ཁག་གི་ཚོགས་ཁང་ལ་བལྟས་ན་ཕྱག་ལས་གནང་ཕྱོགས་ཐོག་ཡིན་ནའང་གསར་གཏོད་གནང་རྒྱུའི་ཐོག་འབད་བརྩོན་གནང་གི་ཡོད་པ་གསལ་པོ་རེད། རང་ཁ་རང་གསོ་ལྟ་བུ་མཚོན་ན་བོད་མིའི་སྒྲིག་འཛུགས་ཐོག་སྤྱི་ཡོངས་ཀྱི་ལོ་རེའི་སྔོན་རྩིས་ཀྱི་ནང་བརྒྱ་ཆ་བཞི་ལས་ལྷག་པ་ཆོས་ཕྱོགས་ཐོག་གནང་གི་མེད།
དེར་བརྟེན་གཡུང་དྲུང་བོན་གྱིས་གཙོས་དགོན་སྡེ་ཁག་མང་ཆེ་བ་རང་ཁ་རང་གསོ་ཡིན་པ་ཧ་ཅང་གསལ་པོ་རེད། ཤེས་རབ་གླིང་ཡིན་ནའང་ཆིག་སྒྲིལ་དང། གསར་གཏོད། རང་ཁ་རང་གསོའི་ཐོག་ནས་བསྐྱོད་ཀྱི་ཡོད་པར་ངོས་འཛིན་བྱེད་ཀྱི་ཡོད། ཅེས་དང། ལྷག་པར་སྲིད་སྐྱོང་མཆོག་གིས་༸གོང་ས་མཆོག་གིས་ཤེས་ཡོན་གལ་ཆེར་བརྩིས་གནང་མཛད་དེ་སློབ་སྦྱོང་བྱེད་དགོས་པའི་བཀའ་སློབ་ཕེབས་ཀྱི་ཡོད་པ་བཞིན། ཤེས་རབ་གླིང་གི་དགེ་འདུན་པ་རྣམས་ནས་སློབ་གཉེར་ཐོག་ཧུར་ཐག་གནང་དགོས་པའི་རེ་སྐུལ་ཞུ་བཞིན་ཡོད། དེ་བཞིན་སྲིད་སྐྱོང་མཆོག་གིས་བཀའ་ཤག་གི་ངོས་ནས་ཀྱང་ཤེས་ཡོན་གལ་ཆེར་རྩི་བཞིན་ཡོད་སྐོར་དང། ཤེས་རིག་ལས་ཁུངས་ཀྱི་མཐོ་སློབ་སློབ་ཡོན་སྐོར། ཕྱི་རྒྱལ་ཡུལ་གྲུ་ཁག་ཏུ་ཕྱོགས་ཕེབས་གནང་དགོས་དོན་སོགས་ཀྱི་སྐོར་གསུང་བཤད་གནང་ཡོད་པ་བཅས།།
