༢༠༡༣ ཟླ་ ༡༡ ཚེས་ ༢༢ རེས་གཟའ་པ་སངས།
ཧོར་གཙང་རྟ་མགྲིན་ལགས།
༄༅། །འདི་གར་ཨ་རིག་འགྱུར་མེད་ལགས་དང་ཚངས་དབྱངས་རྒྱ་མཚོ་ལགས་གཉིས་ཀྱིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༢ ཉིན་བཏང་གནས་ནང་འཁོད་དོན། ཉེ་བའི་ལོ་ངོ་འདི་ཚོ་ནི་བོད་ཀྱི་འདས་མ་འོངས་ད་ལྟ་གསུམ་གྱི་ལོ་རྒྱུས་ཁྲོད་དུ་སྔོན་ཆད་མ་བྱུང་ཞིང་། བྱིན་ཆད་འབྱུང་དཀོན་པའི་ཆེས་གཟི་བརྗིད་དང་ཆེས་བླ་ན་མེད་པའི་ལོ་རྒྱུས་ཀྱི་ཤོག་ལྷེ་ཞིག་ཡིན་ཞིང་། ལོ་ངོ་འདི་ཚོར་བོད་མི་བརྒྱ་དང་ཉི་ཤུ་ལྷག་གིས་བོད་མི་རིགས་ཀྱི་ཆེད་དུ་རང་གི་ཤ་ཁྲག་གིས་གྲུབ་པའི་སྐུ་ཕུང་མེ་རུ་བསྒྲོན་ནས་བོད་འདི་ད་ལྟའི་མུན་ནག་གི་གདུབ་རྩུབ་འོག་ནས་གྲོལ་རྒྱུར་ཐུགས་རེ་གནང་ཡོད། བོད་བརྒྱུད་ནང་བསྟན་ཆོས་ལུགས་ཀྱི་ངོས་ནས་བཤད་ན་དལ་བ་བརྒྱད་དང་འབྱོར་བ་བཅུ་ཚང་བའི་མིའི་ལུས་རྟེན་ནི་ཤིན་ཏུ་རྙེད་དཀའ་བ་ཡིན་པ་བོད་མི་རྒན་གཞོན་ཚང་མས་ཤེས་ཀྱིན་ཡོད། བོད་མི་རྣམས་ཀྱིས་རང་སྲེག་འདི་དག་དང་འགྲོགས་ནས་རྒྱལ་གཅེས་དཔའ་བོ་དག་གི་ཤུལ་ལུས་ཀྱི་ནང་མི་བཟའ་ཟླ་བུ་ཕྲུག་དང་གཉེན་ཉེ་ཚན། གྲོགས་གྲོགས་མོ། དེ་བཞིན་གནས་ཚུལ་ཕྱིར་སྒྲག་བྱེད་མཁན་བཅས་ཀྱང་འཇུ་བཟུང་བཙོན་འཇུག་དང་རྣམ་པ་མི་འདྲ་བའི་ཁྲིམས་ཐག་སྣ་ཚོགས་གཅོད་ཀྱིན་ཡོད།
དེ་ཡང་ཉེ་ལམ་སི་ཁྲོན་ཞིང་ཆེན་རྔ་བ་ཁུལ་ཇོ་ནང་འཛམ་ཐང་དགོན་གཙང་གྲྭ་ཚང་གི་དགེ་བསྐོས་ཧོར་གཙང་རྟ་མགྲིན་ལགས་ལ་ལོ་ངོ་བཞི་དང་ཟླ་དྲུག་རིང་གི་བཙོན་འཇུག་ཁྲིམས་ཐག་བཅད་འདུག ཁྲིམས་ཆད་འདི་ནི་སྲོག་ཁྲིམས་བཅད་པའི་སྐུ་ཞབས་སྒྲོལ་མ་སྐྱབས་ལགས་དང་གྲྭ་བློ་བཟང་དགེ་འདུན་ལགས་རྣམ་གཉིས་དང་བསྡུར་ན་ཧ་ཅང་ཡང་མོའི་གྲས་ཡིན་ཡང་། ནག་ཉེས་གང་ཡང་མེད་པའི་དགེ་བསྐོས་རྟ་མགྲིན་ལགས་ལ་མཚོན་ན་དཀའ་སྡུག་གི་ལོ་ཟླ་རིང་བོ་ཞིག་བཙན་གྱིས་གཉའ་བར་བཞག་པ་དང་ཤུལ་ལུས་ནང་མི་དག་ལ་མཚོན་ནའང་ཆེས་བཟོད་པར་དཀའ་བ་ཞིག་ལོས་ཡིན། དགེ་བསྐོས་རྟ་མགྲིན་ལགས་ཀྱིས་དེ་སྔར་འཛམ་ཐང་གཙང་དགོན་པར་གྲྭ་བ་དང་མི་མང་འདུས་ས་ནས་རང་སྲེག་བྱས་པའི་དཔའ་བོ་དཔའ་མོ་རྣམས་ལ་བསྔོ་ཞུ་བྱས་པ་དང་། ས་གནས་དེ་ནས་རང་སྲེག་བྱེད་མཁན་རྣམ་པའི་རོ་ཐོག་ནས་ཆོལ་ཁ་གསུམ་ལ་ནང་འཛིང་མི་བྱེད་པའི་དམ་བཅའ་བྱེད་མཁན་རྣམས་ལ་ (གངས་ལྗོངས་བོད་མིའི་ཕུལ་བྱུང་བུ།) ཞེས་བསྟོད་བསྔགས་བྱས་པར་ “རྒྱལ་ཁབ་ཁ་བྲལ་ལ་ངན་སྐུལ་དང་། བོད་རང་བཙན་གྱི་བསམ་བློར་འུད་སྒྲོག་བྱས་” པའི་ཉེས་མིང་འོག་ཐེངས་འདིའི་ལོ་ངོ་བཞི་དང་ཟླ་དྲུག་གི་ཁྲིམས་ཐག་བཅད་ཡོད
ཇོ་ནང་འཛམ་ཐང་དགོན་ཆེན།
ཁོང་ནི་འཛམ་ཐང་བར་མ་ཡུལ་ཚོ་གཙང་སྡེ་བ་ནས་ཡིན་ལ་ཕྱི་ལོ་ ༢༠༡༣ ལོའི་ཟླ་ ༤ ཚེས་ ༢༤ ཉིན་ཇོ་ནང་འཛམ་ཐང་དགོན་གཙང་གྲྭ་ཚང་གི་ནག་ཟླའི་དུས་མཆོད་ཆེན་མོ་འཚོགས་སྐབས་འཛིན་བཟུང་བྱས། ཐེངས་འདིར་རྒྱ་ནག་གིས་ “རྒྱལ་ཁབ་ཁ་བྲལ་ལ་ངན་སྐུལ་དང་། བོད་རང་བཙན་གྱི་བསམ་བློར་འུད་སྒྲོག་བྱས་” པའི་ཉེས་མིང་འོག་ལོ་ངོ་བཞི་དང་ཟླ་དྲུག་རིང་བཙོན་འཇུག་ཁྲིམས་ཐག་བཅད་པའི་གཙང་བ་འཛམ་ཐང་དགོན་པའི་དགེ་བསྐོས་རྟ་མགྲིན་ལགས་ལ་མཚོན་ན། སྙིང་རྗེ་ཐེབས་རྩ་ཚོགས་པ་ཞིག་གསར་འཛུགས་གནང་མཁན་དང་། ཐེབས་རྩ་ཚོགས་པ་དེས་དབང་བོ་སྐྱོན་ཅན་དང་སློབ་གྲྭ ཆོས་ཚོགས། དགོན་པ། ནད་པ། དབུལ་པོ་སོགས་ལ་རོགས་སྐྱོར་དང་། ཞལ་འདེབས་འབུལ་གྱིན་ཡོད་འདུག
དེའི་སྐོར་ལ་ཁོང་འཛིན་བཟུང་མ་བྱས་གོང་ཁོང་གིས་རང་ཉིད་ཀྱི་སྐད་འཕྲིན་རྒྱབ་ངོས་སུ་བཀོད་དོན། “རྒྱ་ནག་གི་ཆོས་དད་པ་དང་གྲོགས་པོ་འགའ་ཡིས་རོགས་པ་བྱས་ནས། ད་ལོར་ང་རང་རྒྱ་ནག་གི་སྙིང་རྗེ་ཐེབས་རྩ་ཚོགས་པ་འགའ་དང་ངོ་ཤེས་ཆགས་སོང་། དེ་ནི་ང་ལ་མཚོན་ན་ཆེས་དགའ་འོས་པའི་དོན་བཟང་ཞིག་ཡིན་པ་མ་ཟད་མི་ཚེའི་དམིགས་འདུན་རྙེད་པའི་ལམ་ག་དེ་ཡང་ཡིན་ཟེར་ན་ཆོག
ཉེ་ཆར། རྒྱ་ནག་ཏ་ལེན་（大连）གྲོང་ཁྱེར་དུ་གཞན་ཕན། བྱམས་བརྩེ། སྙིང་རྗེ། ཞེས་པའི་བྱ་འགུལ་ཚོགས་འདུ་ཞིག་སྤེལ་བ་ཡིན། བྱ་འགུལ་ཐོག་ཏུ་རང་ཉིད་ཡང་གཙོ་འགན་མི་སྣ་ཆེ་ཤོས་དེ་ཡིན་པས་རང་གི་ཡང་སེམས་ཀྱི་སྐད་ཆ་མང་མང་ཞིག་བཤད་པའི་གོ་སྐབས་ཐོབ་སོང་། བྱ་འགུལ་ལ་ཞུགས་པའི་མི་ཚོགས་ནི་ཡོད་ཚད་ཕྱུག་བདག་དང་ཚོང་པ་འགོ་ཁྲིད་སོགས་ནུས་པ་ཅན་གྱི་མི་སྣ་རྐྱང་རྐྱང་ཡིན་ལ་མི་གྲངས་ཀྱང་ལྔ་བརྒྱ་ཙམ་འདུ་འཚོགས་ཐུབ་པས་བྱ་འགུལ་དེ་རང་ལ་མཚོན་ན་ཆེ་ཤོས་ཤིག་ཡིན་པ་དང་། ཆེས་ཐོག་མའི་རང་གི་གཙོ་སྒྲུབ་བྱས་པའི་སྙིང་རྗེ་ཐེབས་རྩ་ཚོགས་པའི་བྱ་འགུལ་ཞིག་ཡིན་པ་དང་མ་འོངས་པའི་བདག་གི་དམིགས་འདུན་གྱི་སྙིང་རྗེ་ཐེབས་རྩ་ཚོགས་པ་ལ་རེ་བ་སྟེར་བའི་ཡིད་ཆེས་ཀྱི་དོན་རྩ་ཞིག་ཡིན།
སྤྱིར་སྙིང་རྗེ་ཐེབས་རྩ་ཚོགས་པ་ནི། དབང་པོ་སྐྱོན་ཅན་དང་སློབ་གྲྭ ཆོས་ཚོགས། དགོན་པ། ནད་པ། དབུལ་བོ་སོགས་ལ་རོགས་སྐྱོར་དང་། ཞལ་འདེབས་འབུལ་བའི་ཚོགས་པ་ཞིག་ཡིན། དེས་ན་བདག་གི་ཐོག་མའི་བྱ་འགུལ་འདི་ཡིས་ང་ལ་ཟད་མཐའ་མེད་པའི་དགའ་སྤྲོ་སྦྱིན་པར་མ་ཟད། རང་ནུས་ཡོད་ཚད་ཀྱིས་འབད་པ་ཐམས་ཅད་ཀྱིས་གཞན་ལ་རོགས་སྐྱོར་དང་། ཞལ་འདེབས་འབུལ་སྟེ། རབ་ན་མང་མང་ཞིག་ལ་ཕན་པ་སྒྲུབ་རྒྱུ་དང་། ཐ་ན་ཕན་མ་ཐོགས་ཀྱང་གནོད་མི་སྐྱེལ་བའི་དམ་བཅའ་རྙེད་སོང་། དམ་བཅའ་འདི་ནི་ང་རང་སྙིང་རྗེ་ཐེབས་རྩ་ཚོགས་པའི་ཚོགས་མི་ཞིག་གི་ལམ་ཁར་བསྐྱོད་པའི་གོམ་པ་དང་པོ་དེ་ཡིན་ནོ།” ཞེས་སོགས་བཀོད་འདུག
ཡང་ཁོང་ལ་རྒྱ་རིགས་ཆོས་གྲོགས་ཤིག་གིས་“ཁྱོད་ཀྱིས་བོད་མིས་མེར་མཆོད་ལས་འགུལ་འདི་ལ་ལྟ་སྟངས་ག་འདྲ་འཛིན་གྱིན་ཡོད།” ཅེས་དྲིས་པར་ཁོང་གིས་ལན་འདེབས་འདི་ལྟར་གནང་འདུག “རང་ཉིད་ནང་ཆོས་པ་ཞིག་གི་ངོས་ནས་བལྟས་ན་མི་ལུས་འདི་ནི་རྙེད་དཀའ་འཇིག་སླ་བ་ཞིག་ཡིན་པ་ངོས་འཛིན་བྱེད་ཀྱིན་ཡོད། གཞན་དོན་དུ་ལུས་སྦྱིན་པ་གཏོང་བ་དང་། བྱང་སེམས་རྟག་ཏུ་ངུ་ལྟ་བུ་བྱང་ཆུབ་སེམས་དཔའ་ཚོས་དམ་པའི་ཆོས་ཚིག་བཞི་ཞིག་གི་ཆེད་དུ་ཡང་རང་གི་ལུས་ཀྱི་ཟུངས་ཁྲག་གིས་ས་གཞི་ལ་ཆག་ཆག་བཏབ་སྟེ་དགེ་བའི་བཤེས་གཉེན་མཆོད་པར་བྱས་པའི་ལོ་རྒྱུས་སོགས་ཡོད་པ་རེད། འདི་དག་ལ་བལྟས་ན་བཤད་དཀའ་བའི་གསང་བ་ཞིག་རེད་བསམ་གྱིན་ཡོད། ཡིན་ཡང་རྟོགས་པ་མཐོན་པོར་བསླེབས་ཡོད་མེད་དེ་སུ་ཡིས་ཤེས་དཀའ་བ་ཞིག་རེད། རྟོགས་པ་མཐོན་པོར་སླེབས་མེད་ན་ནི་ལུས་སྲོག་བཏང་ན་ཆོས་ལུགས་ཀྱི་ངོས་ནས་བལྟས་ན་ཁེ་ལས་གྱོང་རག་པའི་ཉེན་ཁ་ཡོད་པ་རེད།
བཤད་དཀའ་བ་ཞིག་ལ་གང་ཟག་གི་ཚོད་གང་ཟག་གིས་མི་ཟིན་ཞེས་སངས་རྒྱས་ཀྱིས་གསུངས་ཡོད་པས། རང་ལུས་མེ་ལ་འབུལ་མཁན་ཁོང་ཚོའི་སེམས་ནང་གི་གསང་བ་ངོ་མ་དེ་ངས་ག་ལ་ཤེས། ཡིན་ན་ཡང་ཁོ་ཚོའི་སྙིང་སྟོབས། ལ་རྒྱ། ཆོད་སེམས་དག་ནམ་ཡང་རང་གི་ཡིད་ཀྱིས་སྨོན་གྱིན་ཡོད། ད་དུང་ཡང་རྒྱ་ནག་གི་སྲིད་བློན་ཝུན་ཅ་པོ་ཡིས་ཀྱང་རྒྱལ་ཡོངས་མི་དམངས་འཐུས་མི་ཚོགས་ཆེན་སྟེང་གི་གསར་འགོད་པའི་དྲིས་ལན་སྐབས། ཁོང་བོད་མི་ན་གཞོན་མེ་ལ་ལྕེབས་མཁན་དེ་ཚོར་གདུང་སེམས་མཉམ་བསྐྱེད་ཡོད་སྐོར་བཤད་འདུག་ན། ང་རང་བོད་རིགས་ཤིག་དང་ནང་པ་ཞིག་ཡིན་པའི་ཆ་ནས་ཁོ་ཚོའི་ལས་འགུལ་ལ་གདུང་སེམས་མཉམ་བསྐྱེད་ཡོད་དང་ལོས་ཡོད། ཡིན་ཡང་ངས་ནམ་ཡང་རང་སྲོག་མ་གཅོད་རོགས་ཞུ་དང་ཞུ་བཞིན་ཡོད།”
དེ་བཞིན་ཁོང་ནི་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་གྱི་ཐང་ཀའི་སྐོར་ལ་ཆེད་དུ་ཕྱག་ལས་གནང་མཁན་ཞིག་ཡིན་པར་མ་ཟད། མི་སྣ་མང་བོ་བསྐྱེད་སྲིང་གིས་བོད་ཀྱི་སྲོལ་རྒྱུན་གྱི་ཐང་ཀ་འབྲི་བཞེངས་ཀྱིས་རྒྱ་ནག་སོགས་སུ་ཐེངས་མང་འགྲེམ་སྟོན་དང་དར་སྤེལ་བཏང་ཡོད་འདུག ཡང་ཁོང་གིས་བོད་ཀྱི་ཐུན་མོང་མ་ཡིན་པའི་ཐང་ཀའི་སྐོར་ལ་སྐད་འཕྲིན་ནང་ལྟ་ཚུལ་འདི་འདྲ་ཞིག་བཏོན་འདུག “ཐང་ཀ་ནི་བོད་ཀྱི་བཟོ་དངོས་ཀྱི་གྲུབ་ཆ་གཙོ་བོ་ཞིག་ཡིན་ལ་ཁྱབ་རྒྱ་ཆེ་བ་ཙམ་དུ་མ་ཟད། རིན་ཐང་གཞལ་དུ་མེད་པའི་བཟོ་རིག་པའི་དངོས་པོ་བླ་ན་མེད་པ་ཞིག་ཡིན། བོད་ཀྱི་སྔོན་བྱོན་བླ་ཆེན། གྲུབ་འཛིན། མཁས་དབང་དངོས་དག་གི་ཕྱག་བྲིས་གྲངས་མེད་པ་ཡོད་ལ། བོད་ཀྱི་དགོན་སྡེ་དག་ཏུ་ནང་རྟེན་གཙོ་ཤོས་སུ་བཞུགས་པའི་ཐང་ཀ་མང་པོ་རིན་ཐང་གཞལ་མཐའ་བྲལ་བ་ཡིན་ནོ།
བོད་ཀྱི་ཐང་ཀ་ནི་ལོ་རྒྱུས་རིང་བའི་ཁྱད་ཆོས་ཅན་གྱི་སྒྱུ་རྩལ་རིག་གནས་ཕུན་སུམ་ཚོགས་པ་ཞིག་ཡིན་ལ། དེ་ནི་བོད་རྒྱལ་པོ་ཁྲི་སྲོང་ལྡེའུ་བཙན་གྱིས་བསམ་ཡས་དགོན་པ་བཞེངས་སྐབས་སུ་དར་ཐང་ཆེན་མོ་གསུམ་བཞེངས་པ་སོགས་དང་། རྒྱལ་པོ་སྲོང་བཙན་ཀྱིས་རྒྱ་བཟའ་ཀོང་ཇོ་བོད་དུ་འདྲེན་པ་དང་ལྷན་དུ། ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་ཀྱི་དཔེ། སྨན་དཔྱད་ཆེན་མོ་དང་། རྩིས་ཀྱི་པོར་ཐང་བརྒྱད་ཅུ་རྣམས་ཀྱང་བོད་དུ་དྲངས། ཕན་ཚུན་སློབ་མ་དང་བཟོ་རྩལ་པ་མང་པོ་དར་བ་སོགས་མཚོན། བོད་ཀྱི་ཐང་ཀའི་བཟོ་རྩལ་ནི་དུས་ཚོད་དེ་དག་གི་སྐབས་སོགས་ཀྱི་ཁུངས་བཙན་ལོ་རྒྱུས་ཅན་གྱི་རིག་གནས་གྱ་ནོམ་པ་ཞིག་ཡིན།”
འདི་ལྟར་མི་ལོ་བཞི་དང་ཟླ་དྲུག་རིང་གི་བཙོན་འཇུག་ཁྲིམས་ཐག་བཅད་པའི་འཛམ་ཐང་གཙང་བ་དགོན་གྱི་དགེ་བསྐོས་རྟ་མགྲིན་ལགས་ནི་བོད་མི་རིགས་ཀྱི་སྲོལ་རྒྱུན་རིགས་གནས་ལ་དུང་ཞེན་ཟབ་མོ་བཅིངས་མཁན་ཞིག་དང་། དབང་པོ་སྐྱོན་ཅན་དང། སློབ་གྲྭ ཆོས་ཚོགས། དགོན་པ། ནད་པ། དབུལ་པོ་སོགས་ལ་རོགས་སྐྱོར་དང་། ཞལ་འདེབས་འབུལ་མཁན། བོད་ནང་གི་རང་ལུས་མེར་སྲེག་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་ཡོད་པ་ཕྱི་ལ་སྟོན་མཁན་ཞིག་ཡིན་འདུག
དེ་སྔར་ཁོང་གིས་ཕྱག་རྩོམ་གནང་བའི་རྩོམ་ཐུང་གཉིས་ཏེ་གསུམ་བཅུའི་དུས་དྲན་ཉིན་གྱི་སེམས་ཚོར་ཞེས་པ་རུ། “དེ་རིང་གསུམ་བཅུའི་དུས་ཚིགས་ཡིན། །སྙིང་ལ་ཟུག་པའི་ནད་ཅིག་དྲན། །ཤ་ལ་གཤར་བའི་རྨ་ཞིག་དྲན། །སྤུན་ཟླ་ཤི་བའི་སྡུག་ཅིག་དྲན། །རླུང་དམར་སྤུར་བའི་སྒྲ་ཞིག་དྲན། །ལོ་ལ་བསྙལ་བའི་གྱོད་ཅིག་དྲན།” ཞེས་རང་གི་སེམས་ནང་གི་ན་ཟུག་ཅིག་ཕྱིར་སྒྲག་བྱས་པ་དང་། ལྷ་ས་དང་སྦྱར་བའི་སེམས་ཚོར་ཞེས་པའི་ནང་དུ་ “ལྷ་ས་མ་ཆགས་ལྷ་ས་ཆགས། །ལྷ་ས་ཉེན་ཁའི་གནས་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་གཞན་གྱི་ལག་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་སེམས་ཁུར་གནས་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་དྲག་ཆས་ཁྲོད་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་སོ་ལྟའི་བར་ན་ཆགས། །ལྷ་ས་མ་ཆགས་ལྷ་ས་ཆགས། ལྷ་ས་མིག་ཆུའི་ཁྲོད་ན་ཆགས། །ལྷ་ས་སྨེ་སྔགས་ཁྲོད་ན་ཆགས། །ལྷ་ས་རོ་ཡིས་གང་།ལྷ་ས་ཁྲག་གིས་གང་།ལྷ་ས་འདྲེ་སར་གྱུར།ལྷ་ས་གཡུལ་སར་གྱུར།ལྷ་ས་དུར་སར་གྱུར།” ཞེས་བོད་ཀྱི་རྒྱལ་ས་ལྷ་ས་ནི་ད་ལྟ་ཉེན་ཁའི་གནས་སུ་ཡོད་པ་དང་དགྲ་ལག་ཏུ་ཡོད་པ། དྲག་ཆས་ཁྲོད་ན་ཡོད་པ། དུར་ས་དང་གཡུལ་སར་གྱུར་ཡོད་པ་སོགས་ཉམ་ང་ཆགས་འཇིག་གི་གནས་སུ་ཡོད་པ་གསལ་སྟོན་གནང་འདུག
ད་ལྟའི་ཇོ་ནང་འཛམ་ཐང་དགོན་ཆེན་གྱི་གནས་སྟངས་ནི་ཧ་ཆང་ཉེན་ཁའི་གནས་སུ་ལྷུང་ཡོད་འདུག་ལ། ས་གནས་ཀྱི་ལས་བྱེད་པ་དང་འགོ་ཁྲིད་ཚོས་དགོན་པའི་ལས་སྣེ་དང་གྲྭ་བ་དེ་བཞིན་ལྷ་སྡེའི་གནད་ཡོད་མི་སྣ་མང་པོར་“ཕྱི་སྡོད་བོད་གཞུང་རྫུས་མས་སྔོན་གྱི་གྲུབ་མཐའ་ཁག་གི་འཐབ་རྩོད་ཁོག་ཏུ་བཟུང་ནས། མངོན་གསུམ་འཛེམ་མེད་སྒོས་ཁྱེད་ཚོ་ཇོ་ནང་བ་ལ་གྲུབ་མཐའ་ཞིག་གི་ཐོབ་ཐང་མ་ཟད་མིང་ཙམ་ཡང་སྤྲད་མེད། དེ་ངོས་ཟིན་ཡོད་པའི་ཐོག་ཁྱེད་ཚོར་རང་ཉིད་ལ་ལང་ཕྱོགས་བརྟན་ཅིང་ཁ་ཕྱོགས་མ་ནོར་བ་ཡོད་དགོས་”ཞེས་དང་། ཡང་“པན་ཆེན་སྐུ་འཕྲེང་བཅུ་བ་ནི་ཁྱེད་ཇོ་ནང་པར་མཚོན་ན་བཀའ་དྲིན་ཆེན་པོ་རེད།
ཁོང་གིས་ཁྱེད་ཇོ་ནང་པར་ཆོས་བརྒྱུད་གཅིག་མཚུངས་ཀྱི་ཐོབ་ཐང་སྤྲད་པར་བརྟེན། ད་སྐབས་རྒྱལ་ནང་གི་ནང་པའི་ཆོས་ལུགས་ཀྱི་གྲས་སུ་ཇོ་ནང་པར་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཡོད་པ་འདི་རེད། དེས་ན་ཁྱེད་ཅག་གིས་ངེས་པར་དུ་པན་ཆེན་རིན་པོ་ཆེའི་ཡང་སྤྲུལ་འཛམ་ཐང་དགོན་པར་གདན་འདྲེན་ཞུ་དགོས།” ཞེས་སོགས་སྔ་གཞུག་ཏུ་སློབ་གསོ་གང་མང་བཏང་ཡོད་ཀྱང་། འཛམ་ཐང་དགོན་པའི་གནད་ཡོད་མི་སྣས་དེ་དག་ངོས་ལེན་མ་བྱས་པ་སོགས་ལ་བརྟེན། ཇོ་ནང་འཛམ་ཐང་དགོན་པར་དམག་མི་དང་། ཉེན་རྟོག་པ་འབོར་ཆེན་འགྲེམ་འཇོག་གིས་གཙང་བ་གྲྭ་ཚང་གི་རྟེན་བཞེངས་རྣམས་འཚམས་འཇོག་བྱེད་དུ་བཅུག་པར་མ་ཟད། རྟེན་བཞེངས་གསར་བ་རྣམས་བཤིག་དགོས་པའི་བཙན་བཀའ་བཏང་འདུག
འོན་ཀྱང་དགོན་པའི་འབྲེལ་ཡོད་མི་སྣ་ཁག་གིས་རྒྱ་གཞུང་གི་དཔོན་རིགས་མང་པོར་འབྲེལ་བ་བྱས་ཏེ་ད་བར་དུ་རྟེན་བཞེངས་བྱས་པ་དག་བཤིག་དགོས་བྱུང་མེད། འོན་ཀྱང་ད་བར་དུ་འཛམ་ཐང་དགོན་པའི་གྲྭ་བ་དང་། མི་སྐྱ་ཕོ་མོ་སོགས་ཁྱོན་སྡོམ་མི་གྲངས་བཞི་བཅུ་ལྷག་འཛིན་བཟུང་གིས་བཅར་རྡུང་ཚད་མེད་བཏང་སྟེ་མི་མང་པོ་ནད་པ་ཆགས་སོགས་བཟོ་ཡོད་ལ། མི་མང་པོ་ཞིག་ཟླ་བ་གཉིས་གསུམ་རྗེས་ནས་གློད་བཀྲོལ་བཏང་ཡོད་ཀྱང་། ད་སྐབས་ད་དུང་བཙོན་ཁང་དུ་མི་གྲངས་ཉི་ཤུ་ལྷག་ཡོད་འདུག འོན་ཀྱང་འཛམ་ཐང་རྫོང་ནས་དྲ་ལམ་སོགས་བཀག་འགོག་བྱས་ཏེ་ཟླ་ངོ་བརྒྱད་ལྷག་ཕྱིན་སྟབས་མི་དེ་དག་གི་མིང་དང་ལོ་རྒྱུས་སོགས་རྒྱུས་ལོན་བྱེད་ཐུབ་མེད། ཇོ་ནང་འཛམ་ཐང་དགོན་ཆེན་ནི་ཇོ་ནང་བའི་དགོན་པ་ཆེ་ཤོས་དང་མདོ་སྨད་ཕྱོགས་ཀྱི་ཇོ་ནང་ཆོས་བརྒྱུད་ཀྱི་དགོན་པ་སྔ་ཤོས་ཡིན་ལ། ད་སྐབས་དགོན་པ་དེར་དགེ་འདུན་པ་སུམ་སྟོང་ལྷག་ཡོད་འདུག
