༢༠༡༣ ཟླ་ ༡༡ ཚེས་ ༡༨ རེས་གཟའ་ཟླ་བ།
༄༅། །འདི་ག་ལས་ཁུངས་ཀྱི་ཆེད་གཉེར་གསར་འགོད་པ་པདྨ་ཚེ་རིང་ལགས་ཀྱིས་ཉི་ཧོང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡༡ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་གི་རྒྱལ་ས་ཊོག་ཁྱོའི་ མེ་གྷུ་རོ་ Meguro གྲོང་ཁྱེར་ཁུལ་དུ་རྟེན་གཞི་བྱས་པའི་ཡ་ཀུ་མོ་བུ་མོའི་འབྲིང་རིམ་སློབ་གྲྭརYakumo Girls Hig School ༸ཞབས་སོར་འཁོད་སྐབས། སློབ་གྲྭའི་སློབ་སྤྱི་མཆོག་གིས་གཙོས་དགེ་ལས་སློབ་ཕྲུག་རྣམས་དང་། འབྲེལ་ཡོད་ཕ་མ་བཅས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་པ་མ་ཟད། སློབ་ཕྲུག་ཚང་མའི་ལག་ཏུ་བོད་ཀྱི་རྒྱལ་དར་ཆུང་ཆུང་རེ་ཐོགས་ནས་ཕེབས་བསུ་ཞུས་ཡོད། དེ་ནས་སློབ་གྲྭའི་ཚོགས་ཁང་ནང་ཆིབས་སྒྱུར་བསྐྱངས་ཏེ་༸གོང་ས་མཆོག་གིས་འཚེ་བ་མེད་པའི་འཛམ་གླིང་ཞིག་བསྐྲུན་ཐབས་སུ་གཞོན་སྐྱེས་ཚོར་འགན་གང་འདྲ་ཡོད་སྐོར་བཀའ་སློབ་སྩལ་ཡོད།
སྐབས་དེར་༸གོང་ས་མཆོག་གིས་འདས་ཟིན་པའི་མི་གསོད་ཁྲག་སྦྱོར་གྱི་དུས་རབས་ཉི་ཤུ་པ་ནས་སློབ་གསོ་བླངས་ཏེ་དུས་རབས་ ༢༡ པ་འདི་བཞིན་འཚེ་བ་མེད་པའི་དུས་རབས་ཤིག་བསྐྲུན་ཐབས་བྱེད་དགོས་པ་དང་། འཚེ་མེད་ཞི་བའི་དུས་རབས་ཞེས་པ་ནི་དཀའ་ངལ་རིགས་ཡོངས་རྫོགས་ཕན་ཚུན་བགྲོ་གླེང་ལམ་ནས་སེལ་ཐབས་བྱེད་དགོས་པའི་བླང་དོར་བཀའ་སློབ་དང་། དེ་བཞིན་ཉི་ཧོང་དང་འཇར་མན་གཉིས་འཛམ་གླིང་དམག་ཆེན་གཉིས་པའི་སྐབས་དཀའ་སྡུག་ཧ་ཅང་མྱངས་ཡོད་ཀྱང་། ད་ལྟའི་གནས་སྟངས་ལ་གཟིགས་ཚེ་དེ་སྔ་དམག་ཆེན་སྐབས་གཏོར་བཤིག་བཏང་བའི་ཤུལ་ཙམ་མཐོང་རྒྱུ་མེད་པ་མ་ཟད། རྒྱལ་ཁབ་དེ་གཉིས་འཛམ་གླིང་ནང་ཆེས་ཡར་ཐོན་ཅན་གྱི་ཁོངས་སུ་ཚུད་ཐུབ་པ་དེ་གཙོ་བོ་དཀའ་ངལ་ཇི་འདྲ་ཞིག་འཕྲད་ཀྱང་མིའི་སྙིང་སྟོབས་ནམ་ཡང་མ་ཞུམ་པར་དཀའ་ངལ་ལ་ཆོད་སེམས་བརྟན་པོས་གདོང་ལེན་བྱས་པར་བརྟེན་ནས་བྱུང་བ་ཞིག་ཡིན་པ་དང་། དེར་བརྟེན་དུས་རབས་ ༢༡ དེ་འཚེ་བ་མེད་པའི་དུས་རབས་ཤིག་ཏུ་འགྱུར་རྒྱུའི་བཟང་ཕྱོགས་ནས་རེ་བ་རྒྱག་མི་ཆོག་པ་གཏན་ནས་མེད་ཅེས་བཀའ་སྩལ།
མཐར་མགོན་པོ་གང་ཉིད་མཆོག་གིས་འཕྲུལ་ཆས་ཐོག་ཡར་ཐོན་ཅན་གྱི་རྒྱལ་ཁབ་ཉི་ཧོང་ལྟ་བུའི་ནང་ཨིན་སྐད་ཐོག་ཤུགས་བརྒྱབ་ནས་རྒྱལ་ཁབ་གཞན་ལ་ཞབས་འདེགས་གྲུབ་རྒྱུར་འབད་བརྩོན་བྱེད་དགོས་པའི་ལམ་སྟོན་བཀའ་སློབ་ཡང་སྩལ་ཡོད། འདི་ག་གསར་འགོད་པས་སློབ་གྲྭའི་སློབ་སྤྱི་མཆོག་ལ་བཅར་འདྲི་ཞུས་པར་ཁོང་གིས་སློབ་གྲྭའི་དགེ་ལས་ཡོངས་ནས་༸གོང་ས་༸སྐྱབས་མགོན་ཆེན་པོ་མཆོག་སློབ་གྲྭར་ཆིབས་སྒྱུར་བཀའ་དྲིན་མཛད་པར་དགའ་ཚོར་ཆེན་པོ་བྱུང་ཡོད་སྐོར་འགྲེལ་བརྗོད་གནང་དོན། དེ་རིང་ཡ་ཀུ་མོ་ཤེས་ཡོན་བསྟི་གནས་ཁང་འདིར་བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ཁུལ་འདིར་ཆིབས་སྒྱུར་བཀའ་དྲིན་བསྐྱངས་པར་ང་ཚོ་ཉི་ཧོང་པ་ཚོར་དགའ་ཚོར་ཧ་ཅང་ཆེན་པོ་ཐོབ་བྱུང་། ཁོང་ནི་ཆོས་ཕྱོགས་ཀྱི་དབུ་ཁྲིད་དང་བོད་མིའི་དབུ་ཁྲིད་ཙམ་མ་ཟད། འཛམ་གླིང་ཡོངས་སུ་སྐྱེ་བོ་ཀུན་གྱིས་མིག་དཔེ་འོས་པའི་དབུ་ཁྲིད་ཅིག་ཆགས་ཡོད། དེར་བརྟེན་འཛམ་གླིང་ཞི་བདེའི་དད་དཔོན་མཆོག་དེ་རིང་ཞོགས་པ་ང་ཚོའི་སློབ་གྲྭར་ཆིབས་སྒྱུར་བསྐྱངས་ཐུབ་པར་ང་ཚོ་དགེ་ལས་སློབ་ཕྲུག་ཡོངས་རྫོགས་ཧ་ཅང་དགའ་སྤོབས་ཐོབ་པ་ཞིག་བྱུང་སོང་། ཞེས་གསུངས་བྱུང་། དེ་རིང་གི་མཛད་འཕྲིན་བསྐྱངས་ཡུལ་ཡ་ཀུ་མོ་བུ་མོའི་འབྲིང་རིམ་སློབ་གྲྭ་འདི་ཐོག་མར་ཕྱི་ལོ་ ༡༩༣༨ ལོར་གསར་འཛུགས་གནང་བ་ཞིག་ཡིན་པ་དང་། འཛིན་རིམ་བཅུ་གཉིས་བར་འདུག་པ་མ་ཟད། ད་ལྟའི་ཆར་སློབ་ཕྲུག་གྲྭངས་ ༩༥༠ ཡོད་འདུག
