༢༠༡༠ ཟླ་ ༨ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༧ གྱི་ཕྱེད་ཡོལ་ཆུ་ཚོད་ ༡༢།༣༥ ཐོག་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་པ་ཏི་ཀུལ་བོད་ཁྱིམ་ལག་ཤེས་སློབ་གྲྭ་ཆིབས་སྒྱུར་སྐྱོང་སྐབས་སློབ་ཕྲུག་ཚོས་བཀྲ་ཤིས་ཞོལ་པ་འཁྲབ་སྟོན་དང་ཕེབས་བསུའི་གླུ་དབྱངས་ཀྱི་མཆོད་པ་དང་སྦྲགས་སློབ་གྲྭའི་ཚོགས་ཁང་དུ་གདན་འདྲེན་ཞུས། དེ་རྗེས་༸གོང་ས་མཆོག་གིས་སློབ་ཕྲུག་དང་རྒན་འཁོགས་ཚོར་བཀའ་སློབ་ལམ་སྟོན་བཀའ་དྲིན་ཆེ་བ་ཕེབས་དོན། ང་ཚོ་བོད་མི་རྣམས་ཡུལ་གྱར་ཆགས་ཏེ་ལོ་ངོ་ལྔ་བཅུ་ང་གཅིག་ལྷག་འགྲོ་བཞིན་ཡོད། ང་ཚོ་བོད་མི་རྣམས་ཡུལ་གྱར་བ་ཆགས་དགོས་པའི་རྒྱུ་མཚན་དེ་བོད་ནང་རྒྱ་མིའི་དབང་སྒྱུར་འོག་ཐོག་མར་གྲོས་མཐུན་བཞག་སྟེ་བོད་མིར་དམིགས་བསལ་ཐོབ་ཐང་ཡོད་པ་རེད། འོན་ཀྱང་དེ་དག་ཁ་བདེན་ཚིག་བདེན་བྱས་མེད་པར་བརྟེན་མཐར་འུ་ཐུག་ཐབས་ཟད་ངང་ནས་ངོ་རྒོལ་བྱེད་རྒྱུ་ཞིག་ཆགས་ཡོད། དེ་ལྟ་བུའི་གནས་སྟངས་ཐོག་ནས་མཐར་ལྷ་ས་སོགས་ཀྱི་ནང་གནས་ཚུལ་ལྷག་སྟེ་ང་ཚོ་བཙན་བྱོལ་བ་ཆགས་པ་རེད། བོད་ནང་ལོ་ ༥༡ དེའི་རིང་ལ་རྒྱ་མིས་མུ་མཐུད་ནས་དྲག་གནོན་བྱེད་རྒྱུ་ཞིག་དང་། བོད་ཀྱི་ཆོས་དང་རིག་གཞུང་ཞེས་འབུར་དུ་ཐོན་ནས་ཡོད་པ་དེ་དག་ལ་དམིགས་བསལ་སྡང་ཟུག་བྱེད་རྒྱུ་ཞིག་ཡོད་པ་དེ་འདྲ་རེད། དེར་བརྟེན་ང་ཚོ་བཙན་བྱོལ་ལ་ཡོད་པ་ཡུལ་གྱར་དུ་སོང་བ་དེ་དག་གིས་སོ་སོ་རང་མགོ་གང་ཐོན་བྱས་ཏེ་བསམ་བློ་བཏང་བ་ཞིག་མ་རེད། གཞི་ལུས་རྒྱ་ཆེའི་མི་མང་གིས་རེ་འདུན་དེ་ང་ཚོའི་ཕྲག་པར་སླེབས་ཡོད། དེ་བཞིན་ང་ཚོ་ཚང་མའི་སོ་སོའི་ལུས་འདི་མ་དོར་བར་དུ་བོད་པ་ཆགས་ཡོད། འཛམ་གླིང་ས་ཕྱོགས་འདྲ་མིན་ནང་འགྲོ་རྒྱུ་ཡོང་གི་རེད། ཡིན་ནའང་འཛམ་གླིང་ས་ཕྱོགས་གང་དུ་གནས་ཀྱང་བོད་པ་ཆགས་ཡོད་པས་ང་ཚོ་བོད་པའི་མི་རིགས་ཀྱི་ཞེན་ཁོག་བྱེད་རྒྱུ་དང་མི་རིགས་ཀྱི་ཐོབ་ཐང་རྩོད་རྒྱུ་དེ་ཚང་མའི་སེམས་ནང་བཅང་དགོས་པ་ཡིན། སྐབས་བབ་ཀྱི་གལ་ཆེ་ཤོས་དེ་ང་ཚོ་གཞོན་སྐྱེས་འདི་དག་དེང་དུས་ཀྱི་ཤེས་ཡོན་དང་བོད་རང་ཉིད་ཀྱི་ཕ་མེས་ནས་ཡོད་པའི་དངོས་སུ་སངས་རྒྱས་པའི་ཆོས་དང་འདྲེས་པའི་རིག་གཞུང་། གོམས་གཤིས། གཞན་དང་མི་འདྲ་བ་ཞིག་ཡོད་པ་རེད། དེ་རིང་ཁ་སང་དངོས་ཡོད་ཀྱི་གནས་ཚུལ་ལ་བལྟས་པ་ཡིན་ནའང་། བོད་ནང་སྡུག་པོ་དེ་ལྟ་བུ་ཞིག་མྱང་གི་ཡོད་པ་རེད། འོན་ཀྱང་རྩ་བའི་མི་གཤིས་བཟང་པོ་ཡིན་པ། རྫུན་མི་ཤོད་མཁན་དེ་འདྲ་ཞིག་ཡིན་པ། དེ་རིང་སང་བོད་ནང་ཕྱི་རྒྱལ་ལྟ་སྐོར་འགྲོ་མཁན་ཚོ་ལྟ་ཅི་སྨོས་རྒྱ་མིའི་ནང་ནས་བློ་གཟུ་བོར་གནས་པ་ཚོས་བོད་པ་ཞེས་བརྗོད་སྐབས་གཤིས་རྒྱུད་འཇམ་པོ་དང་། སེམས་པ་བཟང་པོ། འཛུམ་མུལ་མུལ་ཞིག་རྒྱ་མི་ཚོས་ཀྱང་མཐོང་བཞིན་འདུག འདི་ལྟ་བུ་ཞིག་ང་ཚོར་ཡོང་རྒྱུ་དེ་བོད་པའི་ལོ་ངོ་སྟོང་ཕྲག་རིང་སངས་རྒྱས་པའི་ཆོས་དང་འདྲེས་ཏེ་ཡོད་པའི་གོམས་གཤིས་ཤིག་ཡོད་པ་དེའི་འབྲས་བུ་རེད། དེ་ནི་སྒེར་སོ་སོའི་མི་ཚེ་སྐྱེལ་རྒྱུར་ཡང་ཕན་གྱི་ཡོད། སྤྱི་ནས་བརྗོད་ན་བྱམས་བརྩེ་ལྡན་པའི་སྤྱི་ཚོགས་ཤིག་བྱུང་ན་དེ་ནི་དགོས་རྒྱུ་ཞིག་རེད། འཛམ་གླིང་གང་སར་ཞི་བདེ་དགོས་ཀྱི་ཡོད་བརྗོད་ཀྱི་ཡོད། འཚེ་བ་བྱེད་རྒྱུ་མེད་སྐོར་འཛམ་གླིང་གང་སར་བརྗོད་ཀྱི་ཡོད། དེ་ནི་འཚེ་བ་མ་ཡོང་བ་ཤོག་ཅེས་བརྗོད་པས་ཕན་གྱི་མེད། སེམས་ཀྱི་ནང་ནས་འཚེ་བ་མ་འདོད་པ་ཞིག་དགོས་ཀྱི་ཡོད། དེ་ནི་སངས་རྒྱས་པའི་ཆོས་ཀྱི་ནང་ནས་ང་ཚོ་ཚང་མའི་ཁ་རྒྱུན་ལ་ཡོད་པ་ལྟར། མ་གྱུར་སེམས་ཅན་ཐམས་ཅད་ཅེས་ཟེར་གྱི་ཡོད། མ་རྒན་སེམས་ཅན་ཐམས་ཅད་ཅེས་ཟེར་བཞིན་ཡོད། སེམས་ཅན་སུ་ལ་ཡིན་ཡང་འཚེ་བ་མི་བྱེད་རྒྱུ་དང་། ཐ་ན་འབུ་ཞིག་ཡིན་ཡང་དེར་འཚེ་བ་མི་བྱེད་རྒྱུ་དེ་ང་ཚོའི་གོམས་གཤིས་ལ་ཡོད། དེ་དཔེ་མི་སྲིད་པའི་བཟང་པོ་རེད། དེ་ལྟ་བུའི་གོམས་གཤིས་ཡོད་པ་དང་ལྷན་དེང་དུས་ཀྱི་ཤེས་ཡོན་ཡོད་པ། དེང་དུས་ཀྱི་ཤེས་ཡོན་མེད་ན་རྒྱ་མིས་ང་ཚོར་མཐོང་ཆུང་ག་ཚོད་བྱེད་ཀྱི་མི་འདུག་གམ། བོད་པ་ཞེས་བརྗོད་སྐབས་རྗེས་ལུས་གང་ཡང་ཤེས་ཀྱི་མ་རེད་ཅེས་དང་། རྒྱ་མིས་ཆོས་ཀྱི་གནས་ཚུལ་ཤེས་ཀྱི་མ་རེད། རྒྱ་མིས་རྩིས་རྒྱག་ས་དེ་དེང་དུས་ཀྱི་ཤེས་ཡོན་འཇོག་གི་ཡོད། དེ་བོད་པར་མེད་ཙང་མཐོང་ཆུང་ཁྱད་གསོད་བྱེད་ཀྱི་འདུག དེར་བརྟེན་ང་ཚོ་བཙན་བྱོལ་བ་ཆགས་ཏེ་དེང་དུས་ཀྱི་ཤེས་ཡོན་སློབ་སབྱོང་བྱེད་རྒྱུའི་ཐོག་ལ་ང་ཚོས་རིག་པ་བསྒྲིམས་ནས་སློབ་གྲྭ་ཁག་བཙུགས་ཏེ་ལོ་ལྔ་བཅུ་ཙམ་སོང་བ་རེད། གྲུབ་འབྲས་ཡག་ཐག་ཆོད་ཐོན་ཡོད། བོད་མི་ཁྲི་ཕྲག་མང་པོ་ཞིག་གིས་དེང་དུས་ཀྱི་ཤེས་ཡོན་གྱི་གཞི་རྩ་ཡོད་པ་ཆགས་ཡོད། ད་དུང་ཁྱེད་ཚོ་མི་རབས་གསར་པ་ཡོང་གིན་ཡོང་གིན་ལ་དེང་དུས་ཀྱི་ཤེས་ཡོན་ཡོད་པ་བོད་རང་ཉིད་ཀྱི་རིག་གཞུང་དང་གོམས་གཤིས་དེ་དག་ཡོད། བོད་ཀྱི་རིག་གཞུང་དང་གོམས་གཤིས་ཞེས་པ་རྩ་བ་ཐུག་ས་དེ་སངས་རྒྱས་ཀྱི་ཆོས་རེད། སངས་རྒྱས་ཀྱི་ཆོས་ཞེས་པ་འདི་ལས་སླ་པོ་ཞིག་མིན། ཆོས་ལུགས་གཞན་དག་བཞིན་དུ་སོ་སོའི་སྐྱབས་གནས་ལ་མཆོད་པ་ཞིག་ཕུལ། སྐྱབས་གནས་དེར་སྨོན་ལམ་རྒྱག་གིན་སྡོད་རྒྱུ་དེ་འདྲ་ཞིག་རེད་མི་འདུག སངས་རྒྱས་པའི་ཆོས་ཞེས་པ་འདི་ནུབ་ཕྱོགས་ཀྱི་མཁས་པ་དེ་འདྲས་བརྗོད་ཀྱི་ཡོད། སངས་རྒྱས་པའི་ཆོས་འདི་སྤྱིར་བཏང་གི་ཆོས་རི་ལི་ཇོན་ཟེར་བའི་དབྱིན་ཇིའི་ཚིག་འདི་མ་རེད། ཅེས་བརྗོད་ཀྱི་ཡོད། སངས་རྒྱས་ཀྱི་ཆོས་འདི་རི་ལི་ཇོན་མ་རེད་ཆོས་མ་རེད་འདི་ནི་སེམས་ཀྱི་ཚན་རིག་ཅིག་ཡིན། ཞེས་བརྗོད་ཀྱི་འདུག དེ་ཡང་སེམས་ཁམས་རིག་པའི་ཚན་རིག་ཅིག་རེད་མ་གཏོགས་འདི་དད་པ་བྱེད་པའི་ཆོས་དེ་རེད་མི་འདུག བརྗོད་ཀྱི་འདུག དེ་རིང་ཁ་སང་ནུབ་ཕྱོགས་པའི་ཚན་རིག་པ་དངོས་གནས་དྲང་གནས་མཁས་པ་སྐད་གྲགས་ཡོད་པ་དེ་འདྲས་བོད་ཀྱི་ནང་ཆོས་ནང་ནས་མིའི་བསམ་བློའི་འགྲོ་སྟངས་དང་མིའི་སེམས་ཞི་བདེ་བཟོ་རྒྱུ་དེ་ཚོའི་ཐོག་དོ་སྣང་དམིགས་བསལ་བྱེད་ཀྱི་འདུག ངོས་ལ་ཆ་བཞག་ན་འདས་པའི་ལོ་ངོ་སུམ་ཅུ་ལྷག་ཙམ་རིང་ལ་ཚན་རིག་པ་མཁས་པ་དང་ལྷན་དུ་བགྲོ་གླེང་ཧ་ལམ་ལོ་ལྟར་ཡོང་བཞིན་ཡོད། དགའ་པོ་ཞེ་དྲག་བྱེད་ཀྱི་འདུག སྔ་མོ་ཨཡེ་སི་ཏན་དང་དེ་བཞིན་ཚན་རིག་མཁས་པ་ཚོས་བརྗོད་ཡོད་པ་རེད། ཚན་རིག་དང་ཆོས་མཉམ་དུ་འགྲོ་ཐུབ་མཁན་དེ་ནང་པའི་ཆོས་གཅིག་པུ་རེད་འདུག་ཅེས་བརྗོད་ཡོད། དེར་བརྟེན་སངས་རྒྱས་པའི་ཆོས་ཞེས་པ་འདིར་དངོས་ཡོད་གནས་ཚུལ་དང་འབྲེལ་བའི་བསམ་བློ་གཏོང་རྒྱུ་ཡོད་པ་ཆགས་ཡོད། དེར་བརྟེན་ང་ཚོ་ཕ་མེས་ནས་སངས་རྒྱས་པའི་ཆོས་པ་ཡིན་ཞེས་སྨོན་ལམ་རྒྱག་རྒྱུ་དང་འདོན་པ་ཚིག་གཅིག་གཉིས་འདོན་རྒྱུ། གཟུངས་སྔགས་འདྲེན་འདོད་རྒྱུ་འདིས་འགྲིག་གི་མེད་ལ་འདེང་གི་ཡང་མེད། གཟུངས་སྔགས་འདྲེན་རྒྱུ་དང་། སྨོན་ལམ། དེ་བཞིན་འདོན་པ་འདོན་རྒྱུར་སྔོན་ལོ་ངོས་ལ་འབྲས་ལྗོངས་ནས་ཡོང་བའི་འབྲས་ལྗོངས་པ་ངོས་ཀྱི་ངོ་ཤེས་ཤིག་ཐུག་བྱུང་། ཁོང་གིས་འབྲས་ལྗོངས་ཀྱི་དཔེ་མཛོད་ཁང་ཞིག་གི་ནང་སློབ་ཕྲུག་ཕོ་གསར་དེ་འདྲ་ལྟ་སྐོར་ལ་ཡོང་སྟེ་སངས་རྒྱས་པའི་ཆོས་ཞེས་པ་འདི་གང་འདྲ་ཞིག་རེད་དམ། ནང་གི་ཕ་མར་སྐད་ཆ་དྲིས་པས་འདོན་པ་འདོན་རྒྱུ་དང་ཞབས་བརྟན་བྱེད་རྒྱུ་དེ་རེད་ཅེས་བརྗོད་ཀྱི་འདུག དེ་ང་ཚོས་ཤེས་ཀྱི་མེད་ཟེར་གྱི་འདུག་ཅེས་བརྗོད་ཀྱི་འདུག བྱས་ཙང་ང་ཚོས་སངས་རྒྱས་པའི་ཆོས་ཞེས་པ་འདི་འདོན་པ་འདོན་རྒྱུ་དང་ད་དུང་སངས་རྒྱས་པའི་ཆོས་ཞེས་བརྗོད་སྐབས་རྔ་ཞིག་བརྡུངས་འབུག་དཀྲོལ་འཆམ་རྒྱག་རྒྱུ་དེ་འདྲ་ཞིག་ལ་སངས་རྒྱས་པའི་ཆོས་ཞེས་བརྗོད་ན་རྦད་དེ་ནོར་བ་རེད། སངས་རྒྱས་པའི་ཆོས་ཞེས་པ་འདི་སེམས་ཀྱི་འགྲོ་སྟངས་དེ་གང་འདྲ་ཞིག་ཡོད། འཛམ་གླིང་འདི་གང་འདྲ་ཆགས་པ་རེད་དམ། འཛམ་གླིང་འདིའི་སྟེང་མིའི་འགྲོ་བ་གཙོ་བོར་གྱུར་བའི་སྲོག་ཆགས་དེ་རྣམས་ཇི་ལྟར་ཆགས་པ་དེ་བཞིན་འཇིག་གི་ཡོད་དམ། ཚན་རིག་པས་བརྗོད་པ་རྣམས་ནང་པ་སངས་རྒྱས་པའི་གཞིའི་གནས་སྐབས་སུ་དེ་དག་ཡོད་པ་རེད། གཏིང་ཟབ་པོ་ཞེ་དྲག་རེད་འདུག དེར་བརྟེན་ང་ཚོས་ཤེས་ན་གཞིའི་རྣམ་གཞག་མང་པོ་ཞིག་འགྲེལ་བརྗོད་བྱས་པའི་ཐོག་ཕྱོགས་བསྡོམས་གང་བྱེད་ཀྱི་ཡོད་དམ་བརྗོད་ན། སེམས་འདུལ་དགོས་རེད་ཅེས་ཕྱོགས་བསྡོམས་ཤིག་ཡོང་གི་ཡོད། ཚན་རིག་པ་ཚོས་གཞིའི་གནས་ཚུལ་དེ་དག་ཞིབ་ཚགས་བྱས་ཏེ་བཙལ་བ་མ་གཏོགས་ཕྱོགས་བསྡོམས་བྱས་མེད། ཕྱོགས་བསྡོམས་བྱེད་སྐབས་ཆོས་དང་འབྲེལ་བ་ཆགས་ཀྱི་ཡོད། ཡང་འཛམ་གླིང་གི་ཆོས་ལུགས་གཞན་ཚོས་སེམས་འདུལ་དགོས་རེད་ཅེས་བརྗོད་ཀྱིས་ཡོད་ཀྱང་སེམས་འདུལ་སྟངས་དེ་སྨོན་ལམ་བརྒྱབ་ནས་འདུལ་བ་རེད་མ་གཏོགས་སེམས་ཀྱི་འགྲོ་སྟངས་གང་འདྲ་ཡིན་པ་དེ་ཞིབ་ཕྲ་འགྲེལ་བརྗོད་བྱས་པའི་ཐོག་ནས་གཏན་ལ་འབེབ་རྒྱུ་དེ་སུ་གཅིག་ལའང་མེད། ང་ཚོ་བོད་ཀྱི་རིག་གཞུང་གང་ལ་བརྟེན་པའི་སངས་རྒྱས་པའི་ཆོས་ཞེས་པ་འདིར་སློབ་སབྱོང་བྱས་ཏེ་ཡིད་འཕྲོག་ཐུབ་པ་ཞིག་དང་ཤེས་པའི་ཐོག་ནས་དད་པ་ཐོབ་པ་ཞིག་བྱུང་ན་གཏན་པོ་ཡོང་གི་རེད། དྭགས་པོ་གྲྭ་ཚང་ལ་སྐད་ཆ་བྱུང་། ནང་པའི་ཆོས་ངོ་སྤྲོད་བྱེད་དགོས་པ་དང་ནང་པའི་ཆོས་ཀྱི་མི་ཚེ་འདིར་ཕན་གྱི་ཡོད་པ་ཞིག་ངོ་འཕྲོད་ན་དོ་སྣང་བྱེད་ཀྱི་རེད། ནང་པའི་ཆོས་ཞེས་པ་འདི་དགོན་པའི་ནང་འཛུལ་ཞུགས་བྱས་ཏེ་ལུས་ཀྱི་རྟགས་རྣམས་བརྗེས། ཆང་འཐུང་མི་ཆོག་པ་སོགས་ཁྲིམས་མང་པོ་ཞིག་བཤད་ནས་བསྡད་ན་སུས་ཡིད་ཆེས་ཀྱི་རེད་དམ། ཚུར་ཕྱོགས་འདིར་བསམ་བློ་གཏོང་རྒྱུ་ཡོད་པ་ཞིག་བྱུང་ན་ཡིད་འཕྲོག་གི་རེད། ཡིད་འཕྲོག་ན་དོན་གཉེར་ཡོང་གི་རེད། དོན་གཉེར་བྱུང་ན་འབད་བརྩོན་བྱེད་ཀྱི་རེད། དེ་འདྲ་ཡིན་དུས་ང་ཚོའི་སངས་རྒྱས་པའི་ཆོས་འདི་ཡག་པོ་ཞིག་ཤེས་དགོས་རྒྱུ་ཧ་ཅང་གལ་ཆེན་པོ་རེད་འདུག ཅེས་སོགས་ཀྱི་བཀའ་སློབ་བཀའ་དྲིན་ཆེ་བ་སྩལ་ཡོད།པ་ཏི་ཀུལ་བོད་ཁྱིམ་ལག་ཤེས་སློབ་གྲྭའི་ནང་སློབ་ཕྲུག་གྲངས་ ༢༠༠ དང་རྒན་གསོའི་རྒན་འཁོགས་རྣམས་པ། དེ་བཞིན་མི་མང་བཅས་ཁྱོན་བསྡོམས་མི་གྲངས་ ༣༠༠ བརྒལ་བར་ཐུགས་བརྩེ་ཆེན་པོས་གཟིགས་སྐོར་དང་བཀའ་སློབ་སྩལ་བ་མ་ཟད། སློབ་ཕྲུག་ཚོས་བྲིས་པའི་ལྷ་བྲིས་ཀྱི་རི་མོར་གཟིགས་ཞིབ་དང་མཇུག་ཏུ་བོད་ནས་ཡོང་བའི་སློབ་ཕྲུག་ཁག་གཅིག་གིས་རང་གི་གཉེན་ཉེ་མང་དག་ཅིག་རྐྱེ་རྒུ་མདོའི་ས་ཡོམ་གོད་ཆག་འོག་རྐྱེན་འདས་སུ་གྱུར་བ་ཚོའི་ཆེད་དམིགས་ཏེ་བཞེངས་པའི་ཡོད་པར་མཚན་རྟགས་དང་ཐུགས་སྨོན་དེ་བཞིན་འདས་པོ་ཚོའི་ཆེད་དུ་སློབ་སབྱོང་ཡག་པོ་བྱེད་དགོས་ཞེས་སོགས་ཀྱི་བཀའ་སློབ་ཀྱང་སྩལ་གྲུབ་རྗེས་གདན་ས་གསུམ་དགའ་ལྡན་ཐེག་མཆོག་གླིང་ལ་ཆིབས་༸ཞལ་བསྒྱུར།།
