༢༠༡༣ ཟླ་ ༡༡ ཚེས་ ༡༢ རེས་གཟའ་མིག་དམར།
ས་གནས་ཡུལ་མི་ཚོས་འདས་པོའི་ནང་མི་ཚོར་གདུང་སེམས་མཉམ་སྐྱེ་གནང་བཞིན་པ།
༄༅། །འདི་གར་ཚངས་དབྱངས་རྒྱ་མཚོ་ལགས་ཀྱིས་གནས་ཚུལ་བཏང་གནས་ནང་འཁོད་དོན། ཁ་སང་སྟེ་ཟླ་འདིའི་ཕྱི་ཚེས་ ༡༡ ཉིན་གྱི་ཕྱི་དྲོའི་དུས་ཚོད་ ༥ ཡས་མས་སུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་པ་ཇོ་ནང་ཨ་སྐྱོང་དགོན་པའི་གྲྭ་བ་ཚེ་རིང་རྒྱལ་ལགས་ཟི་ལིང་སྨན་ཁང་དུ་ཁྱེར་བཞིན་པའི་ལམ་བར་ནས་འདས་གྲོངས་སུ་གྱུར་ཡོད་པའི་གནས་ཚུལ་ཐོན་འདུག
དེ་ཡང་ས་གནས་ནས་འབྲེལ་བརྗོད་བྱེད་དོན་ལྟར་ན། ཁ་སང་དགོང་མོའི་དུས་ཚོད་བཅུ་བ་ཡས་མས་སུ་རྒྱལ་གཅེས་དཔའ་པ་ཨ་སྐྱོང་དགོན་པའི་གྲྭ་བ་ཚེ་རིང་རྒྱལ་ལགས་ཟི་ལིང་སྨན་ཁང་དུ་ཁྱེར་བཞིན་པའི་ལམ་བར་ནས་མཚན་མོའི་བོད་ནང་གི་དུས་ཆུ་ཚོད་ ༡༡ ཡས་མས་སུ་སྐུ་གྲོངས་ཡོད་པ་དང་། ཁོང་སྐུ་མ་གྲོངས་སྔོན་ལ་ཁོང་གིས་ “ངས་དེ་རིང་རང་ལུས་མེར་བསྲེགས་བཏང་དོན་ནི་གཞིས་བྱེས་བོད་མི་མཉམ་འཛོམས་ཡོང་བའི་ཆེད་དུ་ཡིན། ཁྱེད་ཅག་གིས་ཀྱང་བོད་མི་ནང་ཁུལ་མཐུན་སྒྲིལ་བྱ་རྒྱུ་དང་། བོད་ཀྱི་སྐད་དང་ཡི་གེ། དེ་བཞིན་དུ་ཡུལ་སྲོལ་གོམ་གཤིས་སོགས་ལ་བདག་པོ་ཡག་པོ་རེ་རྒྱབ་རྒྱུ་ནི་ངའི་རེ་བ་ཉག་ཅིག་ཡིན། དེ་ལྟར་བྱས་ན་གཞིས་བྱེས་བོད་མི་མཉམ་འཛོམས་བྱུང་ཐུབ་གི་རེད།” ཞེས་སོགས་གསུང་ཡོད་འདུག
ཁོང་སྐུ་གྲོངས་རྗེས་མཚན་མོ་ཆུ་ཚོད་ ༡༢ ཙམ་ལ་སྐུ་ཕུང་རང་དགོན་དུ་གདན་འདྲེན་ཞུ་ཐུབ་པ་བྱུང་འདུག་ལ། ཇོ་ནང་ཨ་སྐྱོང་དགོན་པའི་གྲྭ་བ་དང་། དེ་བཞིན་དུ་པད་ཡག་དགོན་པ་དང་། སྒོ་མང་དགོན་པ་བཅས་ཀྱི་གྲྭ་བ་བཅས་ཁྱོན་གྲྭ་བ་རྒྱ་ཕྲག་གཉིས་ལྷག་ཇོ་ནང་ཨ་སྐྱོང་དགོན་དུ་འཛོམས་ནས་ཕོ་ལུང་དང་བསྔོ་སྨོན་གསུང་བ་དང་། དེ་རིང་ཡང་གྲྭ་བ་བརྒྱ་ཕྲག་ལྷག་ཅིག་གིས་མུ་མཐུད་དུ་ཇོ་ནང་ཨ་སྐྱོང་དགོན་པར་མཆོད་འབུལ་གསུང་དང་གསུང་བཞིན་པ་རེད་འདུག
ཁ་སང་ཁོང་གིས་རང་ལུས་མེར་བསྲེགས་གནང་བཞིན་པའི་སྐབས་སུ་ས་གནས་རང་ནས་མཐོང་མཁན་མི་མི་སྣས་གནས་ཚུལ་མཁོ་སྤྲོད་བྱས་དོན་ལྟར་ན། ཁོང་གིས་པདྨ་རྫོང་གི་དཀྱིལ་དུ་ཨར་འདམས་གྱིས་བཟོས་པའི་མེ་ཏོག་པདྨ་འདབས་བརྒྱད་ཆེན་པོ་ཞིག་ཡོད་པ་དེའི་ཡར་ནང་ནས་རང་ལུས་མེར་བསྲེགས་བཏང་ཏེ་རྫོང་སྲིད་གཞུང་གི་ཕྱོགས་སུ་གོམ་པ་བཅུ་ཙམ་རྒྱུག་ཡོད་པ་དང་། སྐབས་དེར་ཁོང་གིས་ “རྒྱལ་བ་བསྟན་འཛིན་རྒྱ་མཚོ་མཁྱེན།” ཞེས་ཐེངས་བཅུ་ཕྲག་ལྷག་ལ་འབོད་ཀྱིན་ཡོད་པ་གསལ་བོ་གོ་སོང་ཟེར།
དེ་རིང་མགོ་ལོག་པདྨ་རྫོང་ཐོག་ཏུ་དམག་མི་འགྲེམ་འཇོག་གིས་རྫོང་གི་ཟམ་ཆེན་དང་། སྒོ་ཆེན་སོགས་སུ་དམ་དྲག་ཤུགས་ཆེར་བྱེད་བཞིན་ཡོད་ཀྱང་། ཨ་སྐྱོང་དགོན་པ་སོགས་སུ་ད་སྐབས་ད་དུང་དམ་དྲག་བྱས་མི་འདུག་ཟེར།
