༢༠༡༣ ཟླ་ ༡༡ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༧ རེས་གཟའ་ཕུར་བུའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་དུ་ཝི་ཏི་ནམ་ Vietnam གྱི་ལས་དོན་འདྲ་མིན་ནང་འཛིན་སྐྱོང་ཐོག་སྤྱི་ཁྱབ་འགན་འཛིན་གྱི་འགན་འཁྱེར་མཁན་(CEOs) དང་སྒྱུ་སྩལ་བ། དེ་བཞིན་ཤེས་ལྡན་པ་བཅས་ཁྱོན་མི་གྲངས་ ༧༡ ཡོད་ཁོངས་ཕལ་མོ་ཆེ་བུད་མེད་ཡིན་པ་རྣམས་ལ་བཟང་སྤྱོད་སྐོར་དང་ནང་ཆོས་ངོ་སྤྲོད་མཛད་དོན། ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཆགས་ཡོད། ཀླད་ཁམས་ཚན་རིག་པ་ཞིག་གིས་ལྟ་སྐབས་བོད་མི་དང་ཝི་ཏི་ནམ་མི་རིགས་གཉིས་ཀྱི་ཀླད་པར་ཁྱད་གང་ཡང་མེད་པ་མ་ཟད། ང་ཚོའི་སེམས་ཚོར་དང་ཤེས་རབ་དེ་དག་གཅིག་མཚུངས་ཡིན། དེར་བརྟེན་རང་ཉིད་དཀའ་ངལ་གྱི་གནས་སྟངས་ཇི་འདྲ་ཞིག་ནང་ལྷུང་ཡོད་ཀྱང་དེའི་ཐོག་ཞིབ་ཚགས་བསམ་བློ་གཏོང་རྒྱུའི་ནུས་པ་ང་ཚོར་ལྡན་ཡོད།
དེང་སྐབས་སྤྱི་ཚོགས་ནང་ཕྱི་དངོས་པོའི་ཐུན་སྐྱེས་དང་དཔལ་འབྱོར་ཡར་རྒྱས་ཐོག་གཙོ་འཛིན་བྱས་པ་མ་ཟད། ཤེས་ཡོན་ལམ་ལུགས་ཀྱི་དགོས་པའང་དེའི་ཕྱོགས་སུ་དམིགས་ཡོད། དེར་བརྟེན་སྤྱི་ཚོགས་ནང་བཟང་སྤྱོད་མ་འདེང་པའི་དཀའ་ངལ་འཕྲད་བཞིན་ཡོད། ཅེས་བཀའ་སློབ་སྩལ་བ་དང་སྦྲགས། ༸གོང་ས་མཆོག་གིས་ཚོགས་བཅར་བ་ཁག་ཅིག་ལ་དྲི་བ་མཛད་པ་བརྒྱུད་ཝི་ཏི་ནམ་ཡུལ་ནང་འདས་པའི་ལོ་ ༣༠།༤༠ རིང་དཔལ་འབྱོར་ཡར་རྒྱས་ཧ་ཅང་ཕྱིན་ཡོད་པ་མ་ཟད། ཡུལ་དེར་འབྲི་ཀློག་ཤེས་མཁན་གྱི་མི་འབོར་བརྒྱ་ཆ་ ༩༥། ཟིན་པ་དང་། སྒོར་ཐེར་འབུམ་བདག་པོ་གཉིས་ཙམ་ཡོད་པ་ར་སྤྲོད་མཛད། གཞན་ཡང་སྐབས་དེར་༸གོང་ས་མཆོག་གིས་དེང་སྐབས་ལྐོག་ཟ་རུལ་སུངས་གི་དཀའ་ངལ་འདི་སྐྲན་ནད་ལྟར་འཛམ་གླིང་སྤྱི་ཚོགས་མཐོ་དམའ་ཚང་མའི་ནང་དཀའ་ངལ་ཧ་ཅང་བཟོ་བཞིན་ཡོད་པ་དེས་དཀའ་ངལ་ཚང་མ་མི་མང་སྐྱོ་བོ་ཚོས་མྱོང་བཞིན་ཡོད་པ་དང་། ལྐོག་ཟའི་དཀའ་ངལ་དེ་དག་གཙོ་བོ་བཟང་སྤྱོད་མ་འདེང་པའི་ཐོག་ནས་ཡོང་བཞིན་ཡོད་པར་བརྟེན་གཞོན་སྐྱེས་ཚོར་དྲང་བདེན་སོགས་བཟང་སྤྱོད་ཀྱི་རིན་ཐང་གལ་ཆེ་ཡིན་པའི་ལམ་སྟོན་ བྱས་པ་བརྒྱུད་ལྐོག་ཟ་འགོག་ཐབས་བྱེད་དགོས་པ་ལས།
དེ་ལྟར་མིན་ན་དཀའ་ངལ་འདི་མུ་མཐུད་གནས་རྒྱུ་ཡིན་པར་བརྟེན་མགོན་པོ་གང་ཉིད་མཆོག་གིས་དེང་དུས་ཤེས་ཡོན་སློབ་གསོའི་ལམ་ལུགས་ནང་དུ་ནང་སེམས་བརྒྱུད་དང་འབྲེལ་བའི་བཟང་པོའི་རིན་ཐང་དེ་དག་གོང་མཐོར་གཏོང་ཐབས་བྱ་རྒྱུ་ཧ་ཅང་གལ་ཆེ་ཡིན་པ་དགོངས་བཞིན་པ་དང་། དེང་སྐབས་སྤྱི་ཚོགས་ནང་འཕྲད་བཞིན་པའི་དཀའ་ངལ་མང་དག་ཅིག་མིས་བཟོས་པར་བརྟེན་དཀའ་ངལ་སེལ་རྒྱུའི་ཐབས་ལམ་ཡང་མིས་འཚོལ་ཐུབ་པ་དང་། འཚོལ་དགོས་པ་ཞིག་ཆགས་ཡོད་སྐོར་དང་། ཕྱོགས་མཚུངས་གོ་ལའི་གནམ་གཤིས་འགྱུར་ལྡོག་གི་དཀའ་ངལ་བཅས་ནི་དེང་སྐབས་འཛམ་གླིང་ནང་ཛ་དྲག་ཧ་ཅང་ཆེ་བའི་དཀའ་ངལ་ཞིག་ཡིན་པར་བརྟེན་མགྱོགས་མྱུར་དཀའ་ངལ་དེ་དག་ལ་ང་ཚོས་གདོང་ལེན་བྱེད་དགོས་པ་ནི་དུས་ཀྱི་དགོས་མཁོ་ཆགས་ཡོད་སྐོར་སོགས་བཀའ་སློབ་སྩལ་གྲུབ་རྗེས་དྲི་བ་ཁག་ཅིག་ལ་བཀའ་ལན་སྩལ།
དེ་རྗེས་༸གོང་ས་མཆོག་གིས་ནང་པ་སངས་རྒྱས་པས་བདག་མེད་ཁས་ལེན་ཚུལ་དང་ཕྱི་རོལ་པས་བདག་རྟག་པ་རང་བྱུང་འདོད་པ་འགོག་ཐབས། དེ་བཞིན་བཅོམ་ལྡན་འདས་ཀྱིས་སྡུག་བསྔལ་བདེན་པ་སོགས་བདེན་བཞིའི་རྣམ་གཞག་སྐོར་བཀའ་སློབ་སྩལ། ༸གོང་ས་མཆོག་གིས་སང་ཉིན་མུ་མཐུད་བཀའ་སློབ་སྩལ་གནང་མཛད་རྒྱུ་ཡིན་འདུག
