༢༠༠༩ ཕྱི་ཟླ་ ༨ ཚེས་ ༡ རེས་གཟའ་སྤེན་པ།
༸གོང་ས་མཆོག་ལ་ཕ་རན་ཕུར་ཊིར་མངའ་སྡེའི་བློན་ཆེན་རོ་ལན་ཌེ་ཀོ་ཅི་མཆོག་ནས་ཕེབས་བསུ་ཞུ་བཞིན་པ།
༄༅། །ཕྱི་ཟླ་ ༧ ཚེས་ ༢༩ ཉིན་ཇར་མན་ནང་རྟེན་གཞི་བྱས་པའི་ཇར་མན་བོད་ཀྱི་ཁང་པ་དང་། ཇར་མན་ནང་ཆོས་མཉམ་འབྲེལ་མཐུན་ཚོགས། ཝི་ཏི་ནམ་ནང་པའི་ཆོས་ཚོགས་སོགས་གཙོ་བོ་ཚོགས་པ་ཆེ་ཁག་གསུམ་གྱིས་གདན་ཞུའི་གསོལ་འདེབས་ཞུས་པ་ལྟར་གྲོང་ཁྱེར་ཕ་རན་ཕུར་ཊིར་༸ཞབས་སོར་འཁོད་སྐབས་མངའ་སྡེ་དེའི་བློན་ཆེན་རོ་ལན་ཌེ་ཀོ་ཅི་ (Roland Koch) མཆོག་གིས་གཙོ་གྱུར་འོག་དཔོན་རིགས་ཁག་གཅིག་ནས་ཕེབས་བསུ་གཟབ་རྒྱས་ཞུས་ཡོད།
༸གོང་ས་མཆོག་ལ་བོད་པའི་སྲོལ་རྒྱུན་རྣམ་པའི་ཐོག་ནས་ཕེབས་བསུ་གཟབ་རྒྱས་ཞུ་བཞིན་པ།
དེ་མཚུངས་ས་གནས་བོད་རིགས་དང་དད་ལྡན་མང་ཚོགས་རྣམས་ནས་བོད་པའི་སྲོལ་རྒྱུན་རྣམ་པའི་ཐོག་ནས་ཕེབས་བསུ་གཟབ་རྒྱས་ཞུས་ཡོད་པ་རེད། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་མགྲོན་ཁང་དུ་༸ཞབས་སོར་འཁོད་མ་ཐག་མངའ་སྡེའི་བློན་ཆེན་མཆོག་དང་ལྷན་ཆུ་ཚོད་ཕྱེད་ཀ་ལྷག་ཙམ་རིང་ཟུར་དུ་མཇལ་མོལ་གནང་རྗེས་གསར་འགོད་ལྷན་ཚོགས་བསྐྱངས་གནང་བ་དེའི་ཐོག་བརྒྱུད་ལམ་འདྲ་མིན་གྱི་གསར་འགོད་པ་བརྒྱ་དང་སུམ་ཅུ་ལྷག་ཙམ་ཞིག་འདུ་འཛོམས་བྱུང་ཡོད།
༸གོང་ས་མཆོག་དང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་རོ་ལན་ཌ་ཀོ་ཅི་རྣམ་གཉིས་ནས་གསར་འགོད་ལྷན་ཚོགས་སྐྱོང་བཞིན་པ།
༸གོང་ས་མཆོག་ཐེངས་འདིར་ཕ་རན་ཕུར་ཊིར་ཆིབས་སྒྱུར་གནང་དགོས་དོན་གཙོ་བོ་ནི་གདན་ཞུའི་ཚོགས་པ་གསུམ་ནས་མཛད་འཆར་བཟོས་པ་བཞིན་ཉིན་གཉིས་རིང་གསུང་ཆོས་གནང་རྒྱུ་དང་། ཉིན་གཉིས་མི་མང་རྣམས་ལ་བཀའ་སློབ་སྩལ་རྒྱུའི་ཆེད་དུ་ཕེབས་སྐོར་བཀའ་སྩལ་ཡོད།
ཕ་རན་ཕུར་ཊིའི་གྲོང་སྡེ་ལས་ཁུངས་ཀྱི་སྤྱི་ཁྱབ་པ་མཁས་དབང་ལྕམ་སྐུ་པི་ཊ་ར་རོ་ཐ་མཆོག་ནས་༸མགོན་པོ་གང་ཉིད་མཆོག་གི་བཞུགས་གནས་མགྲོན་ཁང་དུ་ཕེབས་བསུ་ཞུས་པ།
སྐབས་དེར་ཇར་མན་བྱིས་པའི་བརྙན་འཕྲིན་ལེ་ཚན་གྱི་རང་ལོ་བཅུ་གཉིས་ལ་སོན་པའི་གསར་འགོད་པ་བུ་མོ་ཞིག་གིས་༸གོང་ས་མཆོག་དུས་རྒྱུན་དུ་ཐུགས་བྲེལ་ཆེན་པོ་ཡོད་ནའང་ཐུགས་ཁོམ་པའི་སྐབས་སུ་ག་རེ་གནང་གི་ཡོད་དམ། ཞེས་ཞུས་པར་༸གོང་ས་མཆོག་ནས། ང་དུས་ཚོད་ཁོམ་པ་ཡོད་སྐབས་སྒོམ་རྒྱག་གི་ཡོད། དེ་ནི་ཕྱེད་ཀ་སྒོམ་དང་ཕྱེད་ཀ་གཉིད་ཉལ་གྱི་ཡོད་པ་འདྲ་པོ་རེད། ཅེས་བཀའ་ལན་ཕེབས་ཡོད། ཡང་བུ་མོ་ཆུང་ཆུང་དེས། སྐུ་ཉིད་རྒྱ་གར་དུ་བཞུགས་ཡོད་པས་ཕ་ཡུལ་དྲན་གནང་གི་འདུག་གམ། ཞེས་བཀའ་འདྲི་ཞུས་པར་༸གོང་ས་མཆོག་ནས། འདས་པའི་ལོ་ངོ་ལྔ་བཅུའི་རིང་ང་ཚོ་བོད་མི་བཙན་བྱོལ་དུ་གྱར་ཏེ་རང་ཡུལ་མེད་པའི་མི་འཁྱམས་ལྟ་བུ་ཞིག་རེད། ཡིན་ནའང་རྒྱ་གར་གཞུང་གིས་ང་ཚོ་ཕ་ཡུལ་ཤོར་བའི་བོད་མི་ཚོར་གནས་ཚང་གཡར་བ་ཙམ་མ་ཟད་ཐུགས་ཁུར་ཆེ་བཞེས་གནང་དང་གནང་མུས་ཡིན་པ་འདིར་བཀའ་དྲིན་རྗེས་དྲན་སླད་འདི་ལོ་བཙན་བྱོལ་བོད་མི་ཚོས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་བའི་ལོ་ཞེས་པ་ཞིག་སྲུང་བརྩི་ཞུ་མུས་ཡིན། ཞེས་སོགས་ཀྱི་བཀའ་ལན་མཛད་ཡོད།
ཐེངས་འདི་༸གོང་ས་མཆོག་ཇར་མན་ཡུལ་དུ་ཆིབས་སྒྱུར་བསྐྱངས་ཐེངས་ ༣༥ ཡིན་འདུག ཕྱི་ཟླ་ ༧ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༩ ཐོག་ཕ་རན་ཕུར་ཊིའི་གྲོང་སྡེ་ལས་ཁུངས་ཀྱི་སྤྱི་ཁྱབ་པ་མཁས་དབང་ལྕམ་སྐུ་པི་ཊ་ར་རོ་ཐ་ (Dr PetraRoth) མཆོག་ནས་མགོན་པོ་གང་ཉིད་མཆོག་གི་བཞུགས་གནས་མགྲོན་ཁང་དུ་ཆེད་བཅར་གྱིས་མཇལ་མོལ་ཞུས་ཡོད་པ་མ་ཟད་གསུང་ཆོས་གནང་ཡུལ་ཕ་རན་ཕུར་ཊི་རྩེད་ཐང་ཆེན་མོར་གདན་ཞུ་མཛད་ཡོད། ༸གོང་ས་མཆོག་ནས་ཆུ་ཚོད་ ༩།༣༠ ཐོག་སྒོམ་རིམ་བར་པའི་གསུང་ཆོས་བཀའ་དྲིན་ཆེ་བ་མ་སྩལ་བའི་སྔོན་དུ་གྲོང་སྡེ་ལས་ཁུངས་ཀྱི་སྤྱི་ཁྱབ་མཆོག་ནས་ཆོས་ཞུ་བ་མི་གྲངས་ ༨༠༠༠ བརྒལ་བ་བཅར་ཡོད་པའི་མདུན་ལ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕ་རན་ཕུར་ཊིར་༸ཞབས་སོར་འཁོད་པ་ནི་གྲོང་ཁྱེར་འདིའི་གཟི་བརྗིད་དང་ཆེ་མཐོང་ཞིག་ལ་ངོས་འཛིན་ཞུ་བཞིན་ཡོད་སོགས་དང་། དེ་རིང་ནས་བཟུང་ཉིན་བཞིའི་རིང་༸སྐྱབས་མགོན་ཏཱ་ལའི་བླ་མ་མཆོག་གི་གསུང་ཆོས་ཞུ་བར་བཅར་མཁན་མི་གྲངས་སྟོང་ཕྲག་མང་པོར་ངས་དགའ་བསུ་ཞུ་བཞིན་ཡོད། སྐུ་ཉིད་མཆོག་གིས་དུས་རྟག་ཏུ་ཆོས་ལུགས་ཕན་ཚུན་མཐུན་ལམ་ཟབ་ཏུ་གཏོང་རྒྱུའི་རླབས་ཆེན་མཛད་འཕྲིན་སྐྱོང་བཞིན་པར་ངས་དམིགས་བསལ་དགའ་བསུ་ཞུ་བཞིན་ཡོད། བོད་ཀྱི་དབུ་ཁྲིད་༸སྐྱབས་མགོན་ཏཱ་ལའི་བླ་མ་མཆོག་ནས་བོད་ཀྱི་དཀའ་རྙོག་དེ་ཞི་བའི་ལམ་ནས་སེལ་ཐབས་མུ་མཐུད་ནས་གནང་བ་ནི་འཛམ་གླིང་སྤྱི་དང་ཡང་སྒོས་ཇར་མན་ཡོངས། ལྷག་དོན་ང་ཚོའི་གྲོང་ཁྱེར་ནང་མིག་དཔེ་འོས་པའི་རླབས་ཆེན་མི་སྣ་ཞིག་ཡིན། དེ་བཞིན་སྐུ་ཉིད་མཆོག་ནས་གང་ཟག་མང་པོའི་སེམས་ཀྱི་དྲི་བར་བསླབ་བྱ་གྱ་ནོམ་པ་སྩལ་ཏེ་ཁོང་ཚོའི་སེམས་ནང་བརྟན་ལྷིང་དང་སྤོབས་སེམས་སྤེལ་བཞིན་ཡོད་ཅེས་སོགས་ཀྱི་ཕེབས་བསུའི་གསུང་བཤད་གནང་ཡོད། ཡང་ཁོང་ནས་གསུང་དོན། བོད་ཀྱི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་སེལ་ཐབས་ཆེད་སྐུལ་ངལ་འཛེམ་མེད་བསྐྱོན་དང་སྐྱོན་མུས་ཡིན་པ་མ་ཟད་ཞི་བདེ་རྩོད་ལེན་གནང་མཁན་གྱི་མཚོན་རྟགས་ཤིག་ཀྱང་ཡིན་སྐོར་གྱི་གསུང་བཤད་གནང་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་སློབ་དཔོན་ཆེན་པོ་ཀ་མ་ལ་ཤཱི་ལས་མཛད་པའི་སྒོམ་རིམ་བར་པའི་གསུང་ཆོས་དབུ་འཛུགས་བཀའ་དྲིན་ཆེ་བ་བསྐྱངས་ཡོད་པ་རེད།
གསུང་ཆོས་གྲུབ་རྗེས་༸གོང་ས་མཆོག་གི་བཞུགས་གནས་མགྲོན་ཁང་དུ་ཇར་མན་དབུས་གཞུང་གི་དཔལ་འབྱོར་མཉམ་འབྲེལ་དང་འཛུགས་སྐྲུན་བློན་ཆེན་ལྕམ་སྐུ་ཧི་ཌི་མ་རི་ཝི་སི་ཛོུ་རི་ཀ་ཛེ་ཨུལ་ (Federal Minister for Economic Cooperation & Developemnt,Mrs.Heidemarie Wieczorek Zeul)མཆོག་རྒྱལ་ས་བྷར་ལིར་ནས་ཆེད་མངགས་མཇལ་ཞུར་བཅར་ཏེ། ཞུ་དོན། ད་ཆ་བོད་ནང་དཀའ་ངལ་ཆེན་པོ་ཡོད་སྟབས་བོད་ཀྱི་ཆོས་དང་རིག་གཞུང་སྐོར་ལ་སེམས་འཚབ་ཡོད་སྐོར་སོགས་ཞུས། སྐབས་དེར་༸གོང་ས་མཆོག་ནས་དེང་སྐབས་བོད་ཀྱི་གནས་སྟངས་ཛ་དྲག་ག་ཚོད་ཆགས་པའི་སྐོར་གསུང་མོལ་ཡང་གནང་ཡོད།།
