༢༠༡༣ ཟླ་ ༡༡ ཚེས་ ༢ རེས་གཟའ་སྤེན་པ།
རྒོན་མི་སྣ་ ༡༦ གིས་མིང་དང་མཛུབ་ཐེལ་བརྒྱབ་པའི་ཞུ་གཏུགས་ཡི་གེ
༄༅། །རྔ་བ་རྫོང་མཁར་གྲོང་ཁུལ་གྱི་སྡེ་བ་དང་པོའི་ཁྱིམ་ཚང་བཅུ་དྲུག་གི་ས་ཞིང་རྣམས། འདས་པའི་ལོ་ ༢༧ གྱི་ཡར་སྔོན་ནས་བསླུ་ཁྲིད་ཧམ་འཕྲོག་བྱས་རྗེས། ད་ལྟའི་བར་དུ་མང་ཚོགས་ཀྱི་འཚོ་བར་དཀའ་ངལ་རིམ་པར་འཕྲད་དེ། ཉེ་ཆར་ཁྱིམ་ཚང་དེ་དག་གི་རྒན་རྒོན་རྣམས་འུ་ཐུག་ཐབས་ཟད་ཀྱིས་ཕྱི་རུ་ཐོན་ནས། ཤོར་ཟིན་པའི་སོ་སོའི་ས་ཞིང་ཐོག་ནས་གྱོད་ཉལ་ཞི་རྒོལ་བྱེད་དགོས་བྱུང་འདུག
འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༡༩༨༦ ནས་རྔ་པ་རྫོང་གིས་མཁར་གྲོང་ཁུལ་གྱི་སྡེ་བ་དང་པོའི་ཁྱིམ་ཚང་བཅུ་དྲུག་གི་ས་ཞིང་མུའུ་ ༤༠ བསླུ་འཁྲིད་གཡོ་འཕྲོག་བྱས་རྗེས། ཁྱིམ་ཚང་དེ་དག་གི་འཚོ་བའི་ཐད་དཀའ་ངལ་རིམ་པར་འཕྲད་ཡོད་སྟབས། སྔ་ཕྱིར་ཞུ་གཏུགས་རེ་སྐུལ་ཐེངས་ ༥༠ ལྷག་བརྒྱབ་ཡོད་ཀྱང་། ས་གནས་རྒྱ་གཞུང་གིས་སྔར་གྱི་ཁས་ལེན་དེ་དག་སྣང་མེད་དུ་གཡུགས་ནས། ཞིང་པའི་ཁྱིམ་ཚང་དེ་དག་གི་དཀའ་ངལ་རྣམས་མ་སེལ་བར་ད་ལྟའི་བར་ནར་འགྱངས་བྱས་ཡོད་སྟབས། ཕྱི་ལོ་ ༢༠༡༣ ཟླ་ ༩། ཚེས་ ༡༤ ཉིན་ཁྱིམ་ཚང་དེ་དག་གི་རྒན་རྒོན་མི་སྣ་ ༡༦ གིས་མིང་དང་མཛུབ་ཐེལ་བརྒྱབ་པའི་ཞུ་གཏུགས་ཡི་གེ་ཞིག་ས་གནས་ཀྱི་འབྲེལ་ཡོད་སྡེ་ཁག་སོ་སོར་ཕུལ་ཐོག ཕྱི་ཟླ་ ༩ ཚེས་ ༡༧ ནས་མགོ་བརྩམས་ཏེ་ཤོར་ཟིན་པའི་སོ་སོའི་ཞིང་སའི་ཐོག་གུར་ཕུབ་སྟེ་གྱོད་ཉལ་ཞི་རྒོལ་ sit-in demonstrationབྱས་ཡོད་པ་བཅས།།
