༢༠༡༣ ཟླ་ ༡༡ ཚེས་ ༢ རེས་གཟའ་སྤེན་པ།
༄༅། །ལོ་སྔོན་མའི་རྒྱའི་ལོ་སར་ཉིན་ཁམས་བྲག་མགོ་རུ་མི་མང་གིས་ཞི་རྒོལ་བྱས་པའི་གནས་ཚུལ་བྱུང་རྗེས། རྒྱ་གཞུང་ཉེན་རྟོག་པ་འབྲོག་སར་ཡོང་སྟེ་མེ་མདའ་བརྒྱབ་ནས་ཡེ་ཤེས་བསམ་འགྲུབ་ལགས་དང་གྲྭ་ཡེ་ཤེས་རིག་གསལ་ལགས་གཉིས་དམར་གསོད་བཏང་བ་དང་། ཁོང་གཉིས་ཀྱི་སྤུན་མཆེད་ཡོན་ཏན་བཟང་པོ་འཇུ་བཟུང་བཙན་འཁྲིད་བྱས་མཐར། ས་གནས་མང་ཚོགས་ཀྱི་ཞུ་གཏུགས་རིམ་ཞུས་བརྒྱུད་རང་ཁྱིམ་དུ་བཟང་བཙོན་འོག་གློད་ཡོད་ཀྱང་། ད་ལྟའི་ཆར་ཁོང་གི་གཟུགས་པོ་ནད་གཅོང་ཆགས་ཡོད་སྟབས། ཤུལ་ལུས་ནང་མི་རྣམས་ཀྱི་འཚོ་བར་དཀའ་ངལ་འཕྲད་ཉེན་ཡོད་འདུག རྒྱ་གཞུང་གིས་ཉེས་མེད་ཉེས་འཛུགས་ཀྱིས་
དེ་ཡང་ཕྱི་ལོ་ ༢༠༡༢ ཟླ་ ༡ ཚེས་ ༡༣ སྟེ་རྒྱའི་ལོ་སར་ཉིན། བོད་མདོ་ཁམས་བྲག་མགོ་རྫོང་ཐོག་ཏུ་བོད་མིའི་ཞི་རྒོལ་ལ་རྒྱ་གཞུང་གིས་ཡ་ང་བའི་དམར་གསོད་དྲག་གནོན་བྱས་པ་མ་ཟད། ལོ་དེའི་ཕྱི་ཟླ་ ༢ ཚེས་ ༩ ཉིན་རྒྱ་གཞུང་དྲག་ཆས་ཉེན་རྟོག་པ་རྣམས་ནོར་བ་འབྲོག་སར་ཕྱིན་ཏེ། ཡེ་ཤེས་བསམ་འགྲུབ་ཀྱི་ཁང་ཁྱིམ་གྱི་མཐའ་སྐོར་རྗེས་ནང་མིའི་ཐོག་གང་བྱུང་མེ་མདའ་བརྒྱབ་ནས། དེ་སྔོན་བྲག་མགོའི་ཞི་རྒོལ་ཁྲོད་རྨས་སྐྱོན་ཕོག་མཁན་གྲྭ་ཡེ་ཤེས་རིག་གསལ་ལགས་དང་། ཁོང་གི་སྤུན་མཆེད་ཡེ་ཤེས་བསམ་འགྲུབ་གཉིས་དམར་གསོད་བྱས་ཡོད་ལ། སྐབས་དེར་སྤུན་མཆེད་ཡོན་ཏན་བཟང་པོར་མེ་མདས་བརྒྱབ་སྟེ་རྨས་རྗེས་འཇུ་བཟུང་བཙན་ཁྲིད་ཀྱིས་བཀག་ཉར་དང་། རང་ལོ་ ༧༠ ཙམ་ཡིན་པའི་ཁོ་ཚོའི་ཨ་མ་སངས་ལྷ་དང་བྱིས་པ་ལྔ་ལའང་མེ་མདས་བརྒྱབ་སྟེ་རྨས་པ་མ་ཟད། རྗེས་སུ་ཡོན་ཏན་བཟང་པོར་མི་བསད་ལག་དམར་བ་ཡིན་པའི་བསྙོན་འཛུགས་བྱས་ནས་སྲོག་ཁྲིམས་གཅོད་རྩིས་བྱས་ཡོད་ཀྱང་། ས་གནས་མང་ཚོགས་ཀྱིས་དྲང་བདེན་མིན་པའི་ཁྲིམས་གཅོད་དེར་ཞུ་གཏུགས་རིམ་པར་བྱས་པར་བརྟེན།
ཕྱི་ལོ་ ༢༠༡༣ ཟླ་ ༤ ཚེས་ ༢༡ ཁོང་ཕྱིར་གློད་དེ་རང་ཁྱིམ་དུ་ལོ་གསུམ་རིང་བཟང་བཙོན་གྱི་ཚུལ་དུ་བཀག་ཉར་འོག་ སྡོད་དགོས་བྱུང་ཡོད་པ་རེད། ཡིན་ནའང་། རྒྱ་གཞུང་གིས་ཁ་པར་དང་དྲ་རྒྱའི་བརྒྱུད་ལམ་ཁག་ལ་དམ་དྲག་ཤུགས་ཆེན་བྱེད་བཞིན་ པའི་རྐྱེན་གྱིས། སྐབས་དེའི་ཞིབ་ཕྲའི་གནས་ཚུལ་རིགས་ཤེས་རྟོགས་ཐུབ་ཁག་པོ་ཆགས་ཡོད། ཉེ་སྔོན་བོད་ནས་རྒྱ་གར་ལ་བཙན་བྱོལ་དུ་འབྱོར་མཁན་ཞིག་གིས་གནས་ཚུལ་དེའི་སྐོར་བརྗོད་དོན།
རྒྱ་གཞུང་དྲག་ཆས་ཉེན་རྟོག་པ་བྲག་མགོ་ནོར་བའི་འབྲོག་སར་འོངས་སྟེ། གྲྭ་ཡེ་ཤེས་རིག་གསལ་དང་ཁོའི་སྤུན་མཆེད་ཡེ་ཤེས་བསམ་འགྲུབ་གཉིས་དམར་གསོད་དང་། ཡོན་ཏན་བཟང་པོར་མེ་མདས་བརྒྱབ་སྟེ་རྨས་སྐྱོན་བཟོས་རྗེས་བཙན་འཁྲིད་ཀྱིས་གར་ སོང་ཆ་མེད་དུ་གནས་ཚུལ་དེ་བྱུང་རྗེས། ཉིན་ ༡༥ ཙམ་གྱི་རྗེས་སུ་ཡོན་ཏན་བཟང་པོ་མ་ཤི་བར་དར་རྩེ་མདོའི་སྨན་ཁང་ཞིག་ཏུ་ཡོད་རབས་གོ་ཐོས་བྱུང་ཡང་། ཁོང་གི་གཟུགས་པོའི་གནས་སྟངས་ངོ་མ་ཅི་ཡིན་ཤེས་རྟོགས་བྱུང་མེད། དེ་ནས་ཉིན་ ༢༠ ཙམ་གྱི་རྗེས་སུ་ཁོང་དར་རྩེ་མདོ་ཡི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་ཤེས་ཡོད། ཡིན་ན་ཡང་། ཁོང་ལ་ཁྲིམས་ཐོག་ནས་ཉེས་འཛུགས་དང་བཙོན་འཇུག་ཁྲིམས་ཐག་བཅད་ཡོད་མེད། ད་དུང་གཟུགས་གཞིའི་གནས་སྟངས་སོགས་གང་འདྲ་ཆགས་མིན་ཤེས་རྟོགས་མེད་པར་ལུས་ཤིང་། དེ་ནས་ཟླ་བ་གཅིག་ཙམ་གྱི་རྗེས་སུ་དར་རྩེ་མདོ་ཡི་མི་མང་ཁྲིམས་ཁང་ནས་ཡོན་ཏན་བཟང་པོའི་ཁྱིམ་དུ་ཡི་གེ་ཞིག་འབྱོར་བའི་ནང་། ཡོན་ཏན་བཟང་པོས་རྒྱལ་ཁབ་ཀྱི་ལས་དོན་ལ་འགོག་རྐྱེན་བཟོས་ཏེ་མི་མང་ཉེན་རྟོག་པ་ལ་མེ་མདའ་བརྒྱབ་ནས་གཅིག་བསད། གཞན་གཉིས་རྨས་པ་དང་། གཞན་ད་དུང་ཁོང་གི་ཁྱིམ་དུ་འགད་རྫས་དང་མེད་མདའ་རིང་ཐུང་གསུམ་རྙེད་ཡོད་པར་བརྟེན། ཁོང་ལ་སྲོག་ཐོག་གི་ཁྲིམས་ཐག་བཅད་ཡོད་པས་ཁྱིམ་མི་རྣམས་ལ་བསམ་འཆར་ཡོད་ཚེ་ཉིན་བཅོ་ལྔའི་ནང་ཚུད་ཞུ་གཏུགས་བྱ་དགོས་པའི་བཀའ་བཏང་ཡོད་འདུག
