༢༠༡༣ ཟླ་ ༡༡ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༡ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བཞུགས་སྒར་རྡ་སར་རྟེན་གཞི་བྱས་པའི་ལྷ་སྤྱི་ཚོགས་ཞབས་ཞུ་ཁང་གི་ཚོགས་ཁང་དུ་རྩོམ་པ་པོ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས་རྩོམ་སྒྲིག་གནང་བའི་དཔེ་དེབ་༼བོད་མིའི་སྙིང་སྟོབས་དྲག་པོས་གནོན་མི་ཐུབ་༽ཅེས་པའི་དབྱིན་ཡིག་ཐོག་འགྲེལ་བརྗོད་ཡོད་པའི་པར་རིགས་དཔེ་དེབ་འདོན་ཐེངས་ ༡༢ པ་དབུ་འབྱེད་གནང་ཡོད།
དེ་ཡང་གོང་ཚེས་ཉིན་དཔེ་དེབ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་གཙོས་བོད་མི་མང་སྤྱི་འཐུས་ག་ཟི་ཚེ་རིང་པོ་ལགས་དང་།སྤྱི་འཐུས་ཀརྨ་ཆོས་འཕེལ་ལགས། གསར་འགོད་པ། ཕྱི་རྒྱལ་བ་བཅས་ཁྱོན་མི་གྲངས་ ༢༠ བརྒལ་བ་འདུ་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གྲུབ་མཚམས། བོད་རྒྱལ་ཁབ་དང་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་ཡོངས་ལ་གདུང་སེམས་མཉམ་སྐྱེ་དང་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས།
དེ་ནས་རྩོམ་པ་པོ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས་པར་རིགས་ཀྱི་ལམ་ནས་དཔེ་དེབ་རྩོམ་སྒྲིག་གནང་དགོས་པའི་དམིགས་ཡུལ་ནི་དེང་སང་མི་ཚང་མ་ལས་བྲེལ་ཆེ་བར་བརྟེན། དེབ་འདི་པར་རིགས་ཀྱི་ལམ་ནས་བོད་ཀྱི་དངོས་ཡོད་ལོ་རྒྱུས་དེ་དག་ཤེས་རྟོགས་ཡོང་ཐབས་དང། ལྷག་པར་རྒྱ་ནག་གཞུང་གིས་བོད་ཀྱི་ལོ་རྒྱུས་སྐོར་འཁྱོག་བཤད་བྱས་པ་དེ་དག་ལ་པར་རིགས་ཀྱི་ལམ་ནས་འགྲེལ་བརྗོད་བྱས་ཏེ་ཁུངས་སྐྱེལ་ར་སྤྲོད་གསལ་པོ་བཟོས་ཏེ་དཔེ་དེབ་ཕྱོགས་སྒྲིག་གནང་བ་ཞིག་ཡིན་སྐོར་དང་། དེ་བཞིན་དེབ་འདི་རྒྱ་གར་དང་ཕྱི་རྒྱལ་མཐོ་སློབ་ཁག གཞུང་ཚབ་ཁག་བཅས་ལ་འབུལ་འཆར་ཡོད་པ་དང། གཞན་ཡང་བོད་པའི་སློབ་གྲྭ་ཁག་གི་ནང་བོད་ཀྱི་དངོས་ཡོད་ལོ་རྒྱུས་ཤེས་རྟོགས་ཆེད་འབུལ་འཆར་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས།
སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཆོག་གིས་དཔེ་དེབ་དབུ་འབྱེད་གནང་བ་དང་ཆབས་ཅིག་གསུང་བཤད་གནང་དོན། རྩོམ་པ་པོ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས་ལོ་གཉིས་ལྷག་ཙམ་སྐུ་ལས་བསྐྱོན་ནས་བོད་ཀྱི་སྤྱི་ཡོངས་ལོ་རྒྱུས་དང་འབྲེལ། དེ་བཞིན་བོད་མི་རྣམས་བཙན་བྱོལ་དུ་བསླེབས་རྗེས་བོད་ནང་གི་གནས་ཚུལ་གང་བྱུང་ཡོད་མེད་སྐོར་གྱི་དཔེ་དེབ་རྩོམ་སྒྲིག་གནང་བར་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། ང་ཚོ་བོད་ཀྱི་སྤྱི་ཡོངས་ཀྱི་གནད་དོན་དང་འབྲེལ་བའི་ཐོག་ནས་བལྟས་ན་རྒྱལ་སྤྱིའི་ཐོག་དེང་སང་གི་དུས་ཚོད་འདིར་བོད་ཀྱི་གནད་དོན་འདི་རྒྱལ་སྤྱིའི་རང་བཞིན་ཅན་དང་རྒྱལ་སྤྱིའི་ཐོག་ནས་དོ་སྣང་བསླེབས་སའི་གཞིའང་ཆགས་ཡོད།
རྒྱལ་སྤྱིའི་ནང་དངོས་ཡོད་གནས་ཚུལ་གང་ཡིན་མིན་དང། གནས་ཚུལ་དེའི་འབྱུང་ཁུངས་ཇི་ཆགས་སྐོར་རྩད་གཅོད་བྱེད་རྒྱུར་རྩོམ་པ་པོ་དང། ཉམས་ཞིབ་པ། གསར་འགོད་པ་ཚོར་ཁུངས་འཛིན་སའི་གཞི་དགོས་རྒྱུ་གལ་ཆེན་པོ་ཆགས་ཡོད་དུས། ང་ཚོའི་མཁཤས་པ་ཁག་ཅིག་གིས་གསུངས་ཡོད། རྒྱའི་ལོ་རྒྱུས་དེ་རྒྱའི་ཡིག་ཚང་དང་འབྲེལ་བ་ཆེ་བ་དང་། རྒྱའི་མཁས་པ་ཚོས་བཤད་པ་དེ་དག་བདེན་ཆེ་བ་ཡོད། བོད་ཀྱི་ལོ་རྒྱུས་ནི་བོད་པའི་ཡིག་ཚང་དང་བོད་ཀྱི་མཁས་པ་ཚོས་བཤད་པ་དེ་དག་བདེན་ཆེ་བ་ཡོད། དེར་ང་ཚོས་བརྩི་བཀུར་བྱེད་དགོས་ཞེས་བཤད་སྲོལ་ཡོད།
འོན་ཀྱང་དེང་སང་གི་གནས་སྟངས་ལ་བལྟས་ན་བརྒྱུད་ལམ་འདྲ་མིན་གྱི་ཐོག་གནས་ཚུལ་ཁ་ཤས་ངོ་མ་ནས་རྫུན་མ་བཟོ་རྒྱུ་དང་རྫུན་མ་ནས་ངོ་མ་བཟོ་རྒྱུ་སོགས་ཡོང་བཞིན་ཡོད་སྟབས། མི་མང་པོ་ཞིག་འཁྲུག་ཐེབས་རྒྱུའི་གཞི་རྩ་ཆགས་ཀྱི་ཡོད། དེར་བརྟེན་འདི་ལྟ་བུའི་དུས་སྐབས་སུ་གྲྭ་བག་གྲོ་ལགས་ཀྱིས་སྐུ་ལས་མང་པོ་ཞིག་བསྐྱོན་ནས་འདི་ལྟ་བུའི་དེབ་ཕྱོགས་སྒྲིག་གནང་ཐུབ་པ་དང། ལྷག་པར་པར་རིགས་མང་པོ་ཞིག་བསྡུ་ཉར་ཐུབ་འདུག གནའ་སྔ་མོ་ཡིན་ན་ལོ་རྒྱུས་དེ་དག་ཡི་གེ་རང་དང་གནའ་རྫས་སོགས་ལ་རྟོག་ཞིབ་བྱེད་ཀྱི་ཡོད། དེང་སང་མཚོན་ན་པར་རིགས་ཀྱི་ཕྱོགས་ལ་དོ་སྣང་ཤུགས་ཆེ་བྱེད་བཞིན་ཡོད།
དཔེར་ན། པར་གྱི་ལོ་དུས་དང་པར་གྱི་འགྲེལ་བཤད་རྒྱག་ཐུབ་ན་ཡིག་འབྲུ་ཁྲི་གཅིག་གཉིས་ལས་པར་གཅིག་གི་ཐོག་ནས་ཚོར་བ་སྤྲད་ཐུབ་རྒྱུ་དང་ལོ་རྒྱུས་དཔང་རྟགས་བྱེད་ཐུབ་རྒྱུའི་གཞི་རྩ་ཞིག་འཛིན་བཞིན་ཡོད། དེར་བརྟེན་ལོ་རྒྱུས་ཐོག་ནས་པར་རིགས་འདི་འདྲ་ཕྱོགས་སྒྲིག་བྱེད་ཐུབ་པ་ཧ་ཅང་ཡག་པོ་བྱུང་འདུག ཅེས་གསུངས།
དེ་བཞིན་ཚོགས་གཞོན་མཆོག་གིས་བོད་དོན་བདེན་མཐའ་གསལ་ཐབས་སུ་གྲོས་མོལ་ལས་གཞན་པའི་ཐབས་ལམ་མེད་སྐོར་གསུང་དོན། བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་ད་ལྟའི་གནས་ཚུལ་ལ་དཔག་པའི་ཐོག་ནས་རྒྱ་གཞུང་དང་གཉིས་སྨན་དབུ་མའི་ལམ་གྱི་སྒོ་ནས་གྲོས་མོལ་གནང་ནས་ད་ལྟ་བར་གནས་སྟངས་མུ་མཐུད་འགྲོ་རྒྱུ་ཡིན།། འབྱུང་འགྱུར་དེའི་ཐོག་འཛིན་སྐྱོང་བཀའ་ཤག་དང་གྲོས་ཚོགས་ཀྱི་ངོས་ནས་མུ་མཐུད་ཆོད་སེམས་བརྟན་པོའི་ཐོག་ཆ་ཤས་ལེན་ཐུབ་རྒྱུར་འབད་བརྩོན་གནང་བཞིན་ཡོད། ང་ཚོའི་འབད་བརྩོན་གནང་ས་དེ་སྐད་ཆ་བཤད་པའི་ཐོག་ནས་འགྲོ་དགོས་རེད་མ་གཏོགས་དེ་ལས་གཞན་པའི་ཐབས་ལམ་མེད་པར་བརྟེན། ང་ཚོའི་སྐད་ཆ་བཤད་ས་དེ་རྒྱ་ནག་གཞུང་ཆགས་ཡོད། རྒྱ་གཞུང་གི་འགོ་ཁྲིད་བརྩིས་ན་མི་རབས་མང་པོ་ཞིག་བརྗེ་རེས་བྱས་ནས་སྤྱི་ཡོངས་གནས་ཚུལ་ཐོག་བལྟས་ནས་འགྱུར་བ་ཏན་ཏན་ཕྱིན་ཡོད།
རྒྱ་ནག་གི་རྩོམ་པ་པོ་ཁག་ཅིག་གིས་རྒྱ་ནག་གི་དབང་འཛིན་པ་ཚོས་འགྱུར་བ་གཏོང་རྒྱུར་ཁོང་ཚོར་ཡིད་ཆེས་དེ་ཙམ་མེད། མི་མང་གི་གོ་རྟོགས་ཤུགས་ཆེ་རུ་ཕྱིན་ན་དེའི་ཐོག་ནས་འགྱུར་བ་འགྲོ་ཐུབ་རྒྱུའི་རེ་བ་བྱེད་བཞིན་ཡོད་ཅེས་གསུངས་བཞིན་ཡོད། དེ་བཞིན་ཉམས་ཞིབ་པ་ཁག་ཅིག་གིས་ལོ་བཅུ་ཉི་ཤུའི་ནང་རྒྱ་ནག་ནང་ཏན་ཏན་འགྱུར་བ་འགྲོ་གི་རེད་ཅེས་བཤད་ཀྱི་ཡོད། འགྱུར་བ་ཕྱིན་པ་ཙམ་གྱི་བོད་ཀྱི་གནད་དོན་དེ་གཙང་མ་ཆགས་ཀྱི་ཡོད་མེད་ཐེ་ཚོམ་རེད། དེར་བརྟེན་དེ་དང་མཉམ་ང་ཚོས་གོ་སྐབས་འཛིན་རྒྱུ་དང་གོམ་པ་མདུན་སྤོས་བྱེད་ཐུབ་རྒྱུར་ང་ཚོས་ད་ལྟ་ནས་གྲ་སྒྲིག་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
སྒྲིག་འཛུགས་ཙམ་མིན་པར་གཞུང་འབྲེལ་མིན་པའི་ཚོགས་སྐྱིད་ཁག་དང་།ལྷག་པར་མི་སྒེར་སོ་སོ་ནས་ཆབ་སྲིད་ཀྱི་གནད་དོན་ཐོག་དོ་སྣང་བྱས་ན་ཏན་ཏན་འགྱུར་བ་འགྲོ་ཐུབ་པ་ཞིག་དང། བསམ་བློ་གསར་པ་བསླེབ་ཐུབ་རྒྱུ་དང་བསམ་བློ་གསར་པ་དེའི་ཐོག་ནས་དཀའ་ངལ་སེལ་རྒྱུ་དེ་འདྲ་ཏན་ཏན་ཡོང་གི་རེད་བསམས་ཀྱི་འདུག ཅེས་སོགས་ཀྱི་གསུང་བཤད་གནང་ཡོད། དེ་རྗེས་རྩོམ་པ་པོས་དཔེ་དེབ་ཕྱོགས་སྒྲིག་གནས་སྐབས་མཐུན་འགྱུར་གནང་མཁན་ཡོངས་ལ་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།
