༢༠༡༣ ཟླ་ ༡༠ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༢༨ ནས་ ༣༡ བར་བོད་མིའི་སྒྲིག་འཛུགས་ཀྱི་བསྟི་གནས་བཞུགས་སྒར་རྡ་ས་གངས་སྐྱིད་དུ་རྟེན་གཞིས་བྱས་པའི་བོད་ཀྱི་དཔེ་མཛོད་ཁང་གི་ཚོགས་ཁང་ནང་བོད་མིའི་སྒྲིག་འཛུགས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གི་གཙོ་སྐྱོང་འོག་ནང་སྲིད་ལས་ཁུངས་ཀྱི་ཁྱབ་ཁོངས་རྒྱ་བལ་འབྲུག་གསུམ་ནང་གནས་འཁོད་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་དགུ་པ་དབུ་འཛུགས་གནང་ཡོད།
དེ་ཡང་ཕྱི་ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩ ཡོལ་ཙམ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་རྣམ་པ། ས་གནས་འགོ་འཛིན་རྣམ་པ། ནང་སྲིད་ལས་ཁུངས་ཀྱི་ལས་བྱེད་པ་རྣམ་པ། དེ་བཞིན་གསར་འགོད་པ་བཅས་ཁྱོན་མི་གྲངས་ ༦༠ བརྒལ་བ་འདུ་འཛོམས་ཐོག སྲིད་སྐྱོང་མཆོག་གིས་ཚོགས་འདུ་དབུ་འབྱེད་ཀྱི་སྣང་གསལ་ཞལ་ཕྱེ་གནང་གྲུབ་བསྟུན། སྲིད་སྐྱོང་མཆོག་གིས་གཙོས་བཀའ་བློན་རྣམ་པས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་ཕུལ། དེ་ནས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གྲུབ་རྗེས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་ཡོངས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས།
དེ་ནས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཚོགས་འདུ་ངོ་སྤྲོད་ཀྱི་གསུང་བཤད་ནང་ས་གནས་འགོ་འཛིན་རྣམ་པས་ཐུགས་འགན་བཞེས་ཕྱོགས་དང་། སྤྱིར་མི་མང་དང་ཡང་སྒོས་ཉམ་ཐག་ཐོག་གཟིགས་རྟོག་གནང་ཕྱོགས་སོགས་ཀྱི་སྐོར་གསུང་བཤད་གནང་བ་དང་ལྷན། ཐེངས་འདིའི་ཚོགས་འདུའི་གྲོས་གཞི་ཁག་ངོ་སྤྲོད་གནང་གྲུབ་རྗེས་སྲིད་སྐྱོང་མཆོག་གིས་ལམ་སྟོན་གསུང་བཤད་གནང་། དེ་ནས་ནང་སྲིད་ལས་ཁུངས་ཀྱི་དྲུང་ཚབ་དོན་གྲུབ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་གྲུབ་རྗེས་ཚོགས་འདུ་དབུ་འབྱེད་ཀྱི་མཛད་སྒོ་གྲོལ། ཐེངས་འདིའི་ཚོགས་འདུ་ཐོག་རྒྱ་བལ་འབྲུག་གསུམ་ནང་གནས་འཁོད་བོད་མིའི་གཞིས་ཆགས་ཁག་གི་ས་གནས་འགོ་འཛིན་ཁྱོན་གྲངས་ ༤༢ མཉམ་ཞུགས་གནང་ཡོད་པ་དང།
ཚོགས་འདུའི་སྐབས་གཤམ་གསལ་གྲོས་གཞི་ཁག་གི་ཐོག་བཀའ་བསྡུར་གནང་རྒྱུ་ཡིན་འདུག
༡༽ འཛིན་སྐྱོང་ཚོགས་འདུ་ཐེངས་བརྒྱད་པའི་གྲོས་ཆོད་ཁག་གི་ཐོག་ལག་བསྟར་ཇི་གནང་དང། ལག་བསྟར་མ་ཐུབ་པ་དེ་དག་གི་རྒྱུ་མཚན། སླད་ལག་ལེན་འཁེལ་གཞི་ཇི་བྱེད་སྐོར་གནས་ཚུལ་སྙིང་བསྡུས་རེ་ས་གནས་འགོ་འཛིན་སོ་སོས་ཚོགས་ཐོག་སྙན་སེང་ཞུ་རྒྱུ།
༢༽ བཀའ་ཤག་གི་ལྟ་གྲུབ་རང་ཁ་རང་འཚོ་ཐུབ་ཐབས་རྩ་འཛིན་ཐོག་ད་ཡོད་ཉམ་ཐག་ཞིབ་འཇུག་དང་བལྟ་སྐྱོང་བྱེད་ཕྱོགས་ཀྱི་སྲིད་བྱུས་ལམ་སྟོན་ལ་བསྐྱར་ཞིབ་ཇི་དགོས་སྐོར།
༣༽ ས་གནས་སོ་སོའི་ཁྱབ་ཁོངས་མི་འབོར་གྲངས་ཐོ་རྩ་འཛིན་འཕེར་ངེས་འབྱུང་ཆེད་ས་གནས་སོ་སོའི་མི་འབོར་གྲངས་ཐོ་བསྡུ་ལམ་ཞིབ་ཚགས་སུ་གཏོང་ཕྱོགས། བཙན་བྱོལ་བོད་མིའི་མི་འབོར་འཕེལ་ཚད་ཡར་རྒྱས་གཏོང་ཕྱོགས་ཀྱི་ཐབས་ལམ་སྐོར།
༤༽ གནས་ཡུལ་སྲིད་གཞུང་ནས་བོད་མིའི་གཞིས་ཆགས་སམ་སྡོད་སྒར་ཆེད་བོགས་གཡར་གནང་བའི་ས་ཆའི་བདག་འཛིན་ཡིག་ཆ་ཞུ་ལེན་བདག་ཚགས་དང། ས་ཆ་བདག་བེད་ཚུལ་ལྡན། གཞིས་ས་བདག་འཛིན་གནང་སྒོ་ལེ་ཤོར་མེད་པ་གནང་ཕྱོགས་ཇི་དགེའི་སྐོར།
༥༽ས་གནས་འགོ་འཛིན་ལས་ཁུངས་ཁྱབ་ཁོངས་ལས་བྱེད་ནང་ཁུལ་ལས་བགོས་འཁོས་སྙོམས་དགོས་གནད་ལྟར་གནང་ཕྱོགས་སྐོར།
༦༽ཕྱོགས་མཐའི་ས་གནས་འགོ་འཛིན་ལས་ཁུངས་ཁག་གི་རྒྱུན་གྲོན་རང་འཚོ་དང། ས་གནས་ཀྱི་འཛུགས་སྐྲུན་ལས་འཆར་ཁག་གི་དགོས་དངུལ་ས་གནས་རང་ནས་ཐབས་ཤེས་ཐུབ་ཐབས་འབད་རྩོལ་གནང་ཕྱོགས་ཇི་དགེའི་སྐོར།
༧༽ས་གནས་འགོ་འཛིན་ལས་ཁུངས་སོ་སོའི་ལོ་འཁོར་ལས་བསྡོམས་སུ་ལོ་འཁོར་གཅིག་གི་རིང་ལས་དོན་གནད་ཆེ་ཇི་གནང་དང། ལས་དོན་གང་ཞིག་བསྒྲུབ་ཐབས་འབད་རྩོལ་ཐབས་ཤེས་ལྷོད་མེད་ཞུས་ཀྱང་བསྒྲུབ་མ་ཐུབ་པའི་རྒྱབ་ལྗོངས་གནས་ཚུལ་ལས་བསྡོམས་སུ་ཆ་ཚང་བ་འགོད་འབུལ་ཐུབ་པ་ཡོང་ཆེད་ས་འགོ་རྣམས་ནས་ཉིན་དེབ་རེ་འབྲི་ཉར་གནང་ལམ་གཏོད་ཕྱོགས་སྐོར།
༨༽ ས་གནས་སུ་ལས་དོན་བསྒྲུབ་རྒྱུར་ཐབས་ཤེས་འབད་རྩོལ་གནང་བར་དབུས་ནས་རྒྱུས་མངའ་ལམ་སྟོན་དང་མགོན་སྐྱོར་རམ་འདེགས་གནང་སྒོ་ཡར་རྒྱས་གཏོང་ཐབས་སྐོར།
༩༽ ས་གནས་ནས་དབུས་ལས་ཁུངས་སུ་ཡར་རྒྱས་འཛུགས་སྐྲུན་གྱི་འཆར་གཞི་འབུལ་སྟངས་རྩ་འཛིན་ལམ་སྟོན་ཡོད་པ་དེ་དག་ས་གནས་ནས་ལས་འཆར་འབུལ་སྐབས་ལག་ལེན་ཇི་བཞིན་འཁེལ་གྱི་མེད་པའི་གནས་སྟངས་སླད་ཚགས་ཚུད་དུ་གཏོང་ཕྱོགས་དང། དེ་སྔ་གཅིག་བསྡུས་ཡར་རྒྱས་འཆར་གཞི་བཞི་པའི་ཁོངས་སུ་ལག་བསྟར་མ་ཐུབ་གང་ཞིག་ད་ལྟའང་ས་གནས་དགོས་ངེས་ཅན་རིགས་ལག་ལེན་བསྟར་ཕྱོགས་སྐོར།
༡༠༽ ས་གནས་འགོ་འཛིན་རྣམ་པས་ལས་ཁུངས་ཀྱི་སྔོན་རྩིས་བཟོ་སྒྲིག་གནང་སྐབས་མཉམ་ཞུགས་ཆ་བཞེས་ཟབ་ཙམ་གནང་རྒྱུ་དང། སྔོན་རྩིས་སྟངས་འཛིན་དང་རྩིས་ཞིབ་སྙན་ཐོར་ཐུགས་ཞིབ་ནན་ཟབ་གནང་རྒྱུ། བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲ་ཚོགས་ཆུང་སྐབས་ལྔ་པའི་སྙན་ཐོ་ཁག་ལ་ལན་འདེབས་གསལ་བཤད་ཞུ་སྒོའི་སྐོར་གྱི་ཐོག་བཀའ་བསྡུར་གནང་རྒྱུ་ཡིན་འདུག་པ་བཅས།།
