༢༠༡༠ ཟླ་ ༨ ཚེས་ ༢༠ རེས་གཟའ་པ་སངས།
སྐུ་ཞབས་རོ་ལན་ཀོ་ཤི་མཆོག་གིས་གསུང་བཤད་གནང་བཞིན་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༩ ཉིན་ཡུ་རོབ་ཀྱི་རྒྱལ་ཁབ་ཇར་མ་ནིའི་ཧེ་སིའི་མངའ་སྡེའི་རྒྱལ་ས་ཝེ་སི་བྷ་ཌེན་ (Wiesbaden) ནང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་དོན་ལྔར་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ངང་ཞུས་ཡོད། སྐབས་དེར་ཧེ་སིའི་མངའ་སྡེའི་སྲིད་བློན་སྐུ་ཞབས་རོ་ལན་ཀོ་ཤི་ (Roland Koch) མཆོག་དང་སྐུ་ཚབ་དོན་གཅོད་ཚེ་བརྟན་བསམ་གྲུབ་ཆོས་སྐྱབས་པ་རྣམ་གཉིས་སྐུ་མགྲོན་གཙོ་བོ་ཡིན་འདུག མཛད་སྒོ་གོ་སྒྲིག་གནང་མཁན་གྱི་ཚོགས་པ་དེ་ (Frende Fur Einen Frrund) ཞེས་པ་དེ་ཡིན་པ་དང་དུས་སྟོན་མཛད་སྒོའི་སྐབས་ཇར་མན་ཕྱི་སྲིད་གཞུང་ཚབ་ལས་ཁུངས་ཀྱི་གནད་ཡོད་མི་སྣ་དང་ཇར་མན་བཟོ་གྲྭ་ཁག་གི་ཚོགས་གཙོ་སོགས་ཀྱང་ལྷན་ཞུགས་གནང་འདུག
སྐུ་ཚབ་དོན་གཅོད་མཆོག་གིས་གསུང་བཤད་གནང་བཞིན་པ།
མཛད་སྒོའི་ཐོག་མར་ས་གནས་བོད་རིགས་ཚོས་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་ལམ་གསུང་འདོན་གནང་ཡོད། སྐབས་དེར་སྐུ་མགྲོན་གཙོ་བོ་སྐུ་ཞབས་རོ་ལན་ཀོ་ཤི་མཆོག་གིས་གསུང་བཤད་གནང་དོན། དེ་རིང་རྣམ་པ་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དགུང་གྲངས་དོན་ལྔར་ཕེབས་པའི་འཁྲུངས་སྐར་གྱི་དགའ་སྟོན་མཛད་སྒོར་མཉམ་ཞུགས་གནང་བ་དེས་བོད་དོན་ལ་རྒྱབ་སྐྱོར་ཡོད་པའི་རྣམ་པ་གསལ་པོ་མཚོན་བཞིན་ཡོད།
ས་གནས་བོད་རིགས་ཚོས་གླུ་གར་ལ་རོལ་བཞིན་པ།
མཛད་སྒོ་འདི་རྒྱ་ཕྱོགས་ནས་ལྟ་བཞིན་ཡོད་པ་མ་ཟད། བོད་ནང་དུ་བོད་མི་ཚོས་ཀྱང་ལྟ་བཞིན་ཡོད། ང་ཚོས་གཙིགས་ཆེར་འཛིན་པའི་མང་གཙོ་དང་འགྲོ་བ་མིའི་ཐོབ་ཐང་ལ་སོགས་པའི་ལྟ་གྲུབ་དེ་དག་བོད་ལྟ་བུའི་ས་ཁུལ་ནང་དུའང་ལག་བསྟར་ཡོང་རྒྱུར་ང་ཚོས་རྒྱབ་སྐྱོར་ཞུ་དགོས་ཞེས་གསུངས་ཡོད་པ་མ་ཟད། ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་གནས་པའི་སྨོན་ལམ་ཡོད་ཅེས་གསུངས་འདུག ཕྱོགས་མཚུངས་སྐུ་ཚབ་དོན་གཅོད་ཚེ་བརྟན་བསམ་གྲུབ་ཆོས་སྐྱབས་པ་མཆོག་གིས་སྐབས་དེར་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེ་དང་བཟོད་བསྲན། འཚེ་མེད་ཞི་བ། ཕན་ཚུན་གུས་བརྩི་བཅས་ད་ལྟ་ང་ཚོའི་རྒྱལ་རབས་ལོ་རྒྱུས་ཐོག་དུས་ཚོད་གཉན་འཕྲང་ཆེ་བའི་སྐབས་འདིར་དམིགས་བསལ་གལ་གནད་ཆེན་པོ་ཆགས་ཡོད།
མཛད་སྒོའི་སྐབས་སྐུ་མགྲོན་རྣམ་པ།
༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྟག་ཏུ་མི་རྣམས་ཕན་ཚུན་ཧ་ཅང་གཅིག་ལ་གཅིག་རྟེན་དགོས་པའི་དུས་སྐབས་འདིར་ཀུན་ཁྱབ་འགན་ཁུར་གྱི་བསམ་བློ་གཏོང་དགོས་སྐོར་གྱི་བཀའ་སློབ་དེས་འཛམ་གླིང་ནང་མཚན་སྙན་ཧ་ཅང་ཐོབ་ཡོད། ཕྱི་ལོ་ ༢༠༠༢ ལོར་བོད་རྒྱ་གྲོས་མོལ་སླར་གསོ་བྱུང་ཡོད། ༸གོང་ས་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཐོབ་ཆེད་བོད་རྒྱ་མི་རིགས་གཉིས་སྨན་དབུ་མའི་ལམ་གྱི་སྲིད་བྱུས་གཞི་རྩར་འཛིན་བཞིན་ཡོད་པ་ལས་རང་བཙན་རྩོད་ལེན་མཛད་ཀྱི་མེད། འོན་ཀྱང་རྒྱ་ནག་གཞུང་ཕྱོགས་ནས་བཟང་ཕྱོགས་ཀྱི་རྣམ་འགྱུར་གང་ཡང་བསྟན་མེད།
ས་གནས་བོད་རིགས་ཚོས་གཡག་འཁྲབ་བཞིན་པ།
༸གོང་ས་མཆོག་ཇར་མན་ནང་ད་བར་ཐེངས་ ༣༥ ཙམ་ཆིབས་སྒྱུར་བསྐྱངས་པ་དེས་ཡུ་རོབ་རྒྱལ་ཁབ་ནང་ནས་ཆིབས་སྒྱུར་བསྐྱངས་ཐེངས་མང་ཤོས་ཀྱི་རྒྱལ་ཁབ་གཅིག་ཆགས་ཡོད། དེས་ཇར་མན་མི་མང་ཚོས་༸གོང་ས་མཆོག་དང་བོད་ཀྱི་གནད་དོན་ཐོག་རྒྱབ་སྐྱོར་དང་དོ་སྣང་ཇི་ཙམ་གནང་གི་ཡོད་པ་མཚོན་བཞིན་ཡོད་ཅེས་གསུངས་ཡོད་པ་མ་ཟད། སྐུ་ཚབ་དོན་གཅོད་མཆོག་གིས་མཛད་སྒོ་གོ་སྒྲིག་ཚོགས་ཆུང་ལ་ཐུགས་རྗེ་ཆེ་ཞུས་པ་དང་སྦྲགས་སྐུ་ཞབས་རོ་ལན་ཀོ་ཤི་མཆོག་ལ་གསུང་དོན། སྐུ་ཉིད་ཀྱིས་ང་ཚོར་མཛའ་བརྩེའི་འདུ་ཤེས་དང་རྒྱབ་སྐྱོར་གནང་བར་ང་ཚོ་ས་གནས་བོད་རིགས་ཚོས་བོད་མི་ཚང་མའི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་རྗེས་དྲན་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང། མཛད་སྒོའི་མཐའ་མར་ས་གནས་བོད་རིགས་ཚོས་གཡག་འཁྲབ་སྟོན་ཞུས་འདུག་པ་བཅས།།
