༢༠༡༣ ཟླ་ ༡༠ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་དི་ལླཱིར་ཆིབས་སྒྱུར་གྱིས་ཉེ་ཁྲིས་སུ་ཡོད་པའི་ཧར་ཡ་ན་མངའ་སྡེའི་གྲོང་ཁྱེར་གུར་གྷ་ཝོང་ Gurgaon དུ་གོ་ལའི་འཕྲོད་བསྟེན་ལྷན་ཚོགས་ Global Spa and Wellness Summit ནང་ཆིབས་སྒྱུར་བསྐྱངས་ཏེ་བཀའ་སློབ་སྩལ། ཕྱི་ཚེས་ ༧ ཉིན་དི་ལླཱི་ནས་མཁའ་བརྒྱུད་ཨ་རིར་ཆིབས་སྒྱུར་གྱིས། ཨེ་མོ་རི་གཙུག་ལག་སློབ་གཉེར་ཁང་ཆགས་ཡུལ་གྱི་གྲོང་ཁྱེར་ (Atlanta) ཨེ་ཊ་ལན་ཊར་༸ཞབས་སོར་འཁོད་ཡོད། ཁུལ་དེར་མགོན་པོ་གང་ཉིད་མཆོག་གིས་ཨེ་མོ་རི་གཙུག་ལག་སློབ་གཉེར་ཁང་དུ་ཚན་རིག་དང་བྱམས་བརྩེ་ལྟ་གྲུབ་སྐོར་ལ་བགྲོ་གླེང་མཛད།
ཕྱི་ཚེས་ ༨ ཉིན་རྒྱབ་ཤེས་རིག་དང་སློབ་གསོའི་ཐོག་ཕྱག་ལས་གནང་མཁན་གྱི་མཁས་པ་མང་དག་གཅིག་དང་ལྷན་ཤེས་ཡོན་སློབ་སྦྱོང་སྤྲོད་ཕྱོགས་ནང་ཆོས་ལུགས་དང་མ་འདྲེས་པའི་ཐོག་ནས་ཡ་རབས་སྤྱོད་བཟང་གི་ཐབས་ལམ་བསྟེན་ཚུལ་སྐོར་ལ་བགྲོ་གླེང་མཛད། ཕྱི་ཚེས་ ༩ ཉིན་གྱི་སྔ་དྲོ་ཨེ་མོ་རི་གཙུག་ལག་སློབ་གཉེར་ཁང་གི་ཆེས་ཁྱད་དུ་འཕགས་པའི་སློབ་དཔོན་གྱི་མཚན་གནས་རྗེས་འབྲེལ་གྱི་ཐོག་ནས་དགེ་ལས་སློབ་མ་རྣམས་ལ་ཆོས་ལུགས་དང་མ་འདྲེས་པའི་ཐོག་ནས་ཡ་རབས་སྤྱོད་བཟང་གོང་འཕེལ་གཏོང་སྟངས་སྐོར་བཀའ་སློབ་སྩལ། དེ་བཞིན་༸གོང་ས་མཆོག་གིས་བོད་རྒྱ་མི་རིགས་འཆམ་མཐུན་གོང་འཕེལ་གྱི་ལས་གཞི་ China-Tibet Initiative དང་འབྲེལ་བའི་བོད་རྒྱ་མི་རིགས་ཁག་གཅིག་ལ་བཀའ་སློབ་སྩལ།
ཕྱི་ཚེས་ ༡༠ ཉིན་ཨེ་མོ་རིའི་གཙུག་ལག་སློབ་ཁང་དུ་པཎ་ཆེན་བློ་བཟང་ཆོས་རྒྱན་གྱིས་མཛད་པའི་དགེ་ལྡན་ཕྱག་རྒྱ་ཆེན་མོའི་ཆོས་འབྲེལ་སྩལ། ཕྱི་ཚེས་ ༡༡ ཉིན་མགོན་པོ་གང་ཉིད་མཆོག་ལྷོ་ཨ་མི་རི་ཀའི་གྲོང་ཁྱེར་མེཀ་སི་ཁོའི་ Mexico City ནང་གསར་འགོད་པ་ཁག་གཅིག་དང་ལྷན་མཇལ་འཕྲད་དང་། ཕྱི་ཚེས་ ༡༢ ཉིན་ལྷོ་ཨ་རིའི་མེཀ་སི་ཁོའི་གྲོང་ཁྱེར་གྱི་ (Arena Ciudad de Mexico) ཞེས་པའི་ཚོགས་ཁང་ཆེན་མོའི་ནང་མང་ཚོགས་བཞི་སྟོང་བརྒལ་བར་རྒྱལ་སྲས་ཞི་བ་ལྷས་མཛད་པའི་སྤྱོད་མཇུག་ཆེན་མོའི་ཆོས་འབྲེལ་སྩལ། ཕྱི་ཚེས་ ༡༣ ཉིན་མང་ཚོགས་ ༡༥༠༠༠ བརྒལ་བར་བཀའ་སློབ་སྩལ་ཡོད་པ་མ་ཟད། ཉིན་གུང་ལྗགས་སྨིན་སྐབས་མེག་སི་ཀོའི་གསར་ཤོག་གྲགས་ཅན་ལ་ཛ་རོ་ཨོ་སི་ཁ་ཝ་ཛོ་སི་ཨོབ་རི་ཕོར་མའི་ Lazaro Rios Cavazos of Reforma གསར་འགོད་པའི་ཆེད་དོན་དྲི་བར་བཀའ་ལན་སྩལ། དེ་བཞིན་ (National Geographic) ཞེས་པའི་དུས་དེབ་ཀྱི་རྩོམ་སྒྲིག་པ་ལྕམ་སྐུ་ Fernanda Gonzalez Vilchisལགས་ཀྱིས་བཅར་འདྲིར་བཀའ་ལན་སྩལ་ཡོད།
དེ་རྗེས་གྲོས་ཁྱེར་དེའི་ཨེ་རི་ན་ཚོགས་ཁང་ཆེན་མོའི་ནང་ཆིབས་སྒྱུར་བསྐྱངས་ཏེ་ མགོན་པོ་གང་ཉིད་མཆོག་དང་ལྷན་ཚོགས་ཁང་དེའི་ནང་ལྷན་ཞུགས་གནང་མཁན་ཆོས་ལུགས་འདྲ་མིན་གྱི་དབུ་ཁྲིད་རྣམས་དང་ལྷན་མཇལ་འཕྲད་མཛད་ཡོད། སྐབས་དེར་གྲོང་ཁྱེར་དེའི་ཁུལ་གྱི་སློབ་གྲྭ་ཁག་གི་དགེ་ལས་སློབ་ཕྲུག་དང་ཕ་མ་བཅས་ཁྱོན་མི་གྲངས་ ༡༢༠༠༠ བརྒལ་བར་ཤེས་ཡོན་སློབ་གསོའི་ཁྲོད་ཆོས་དང་མ་འདྲེས་པའི་བཟང་པོའི་ཡོན་ཏན་གོང་ མཐོར་གཏོང་ཐབས་ཀྱི་བརྗོད་གཞིའི་ཐོག་བཀའ་སློབ་སྩལ།
ཕྱི་ཚེས་ ༡༤ ཉིན་གྱི་ཕྱི་དྲོ་མགོན་པོ་གང་ཉིད་མཆོག་མེཀ་སི་ཁོའི་སྲིད་འཛིན་ཟུར་པ་སྐུ་ཞབས་ཝིན་སེནཊ་ཕོཀ་སི་ Vicente Fox མཆོག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། མེཀ་སི་ཁོ་ནས་མཁའ་ལམ་བརྒྱུད་རྒྱལ་ཁབ་དེའི་གོ་ཝ་ན་ཧུ་ཝ་ཏོ་(Guanajuato)མངའ་སྡེའི་གྲོང་ཁྱེར་ལི་ཨོན་ (Leon) ནང་ཆིབས་སྒྱུར་གྱིས།
ཕྱི་ཚེས་ ༡༥ ཉིན་ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མེཀ་སི་ཁོའི་སྲིད་ འཛིན་ཟུར་པའི་གཟིམ་ཤག་ཏུ་མཇལ་མོལ་གྲུབ་མཚམས། གསར་དུ་བཞེངས་པའི་སྲིད་འཛིན་ཟུར་པ་ཝེ་སིན་ཏི་ཕོཀ་སིའི་སྦྱོང་བརྡར་དང་དཔེ་མཛོད། འགྲེམས་སྟོན་ཁང་བཅས་ཡོད་པའི་བསྟི་གནས་ཁང་དུ་ཆིབས་སྒྱུར་བསྐྱངས་ཏེ་དྲན་ཐོའི་ ནང་མཚན་རྟགས་བཀོད། དེ་རྗེས་སྲིད་འཛིན་ཟུར་པ་མཆོག་གིས་ངོ་སྤྲོད་གསུང་བཤད་གནང་གྲུབ་བསྟུན་མགོན་ པོ་གང་ཉིད་མཆོག་གིས་མང་ཚོགས་ ༦༠༠༠ བརྒལ་བར་བྱམས་བརྩེ་ལག་བསྟར་བྱེད་ཕྱོགས་ཐད་བཀའ་སློབ་སྩལ། ཉིན་གུང་ལྗགས་སྨིན་གྲུབ་བསྟུན་༸གོང་ས་མཆོག་གིས་མེཀ་སི་ཁོའི་སྲིད་འཛིན་ཟུར་པ་སྐུ་ཞབས་ཕོག་སི་མཆོག་གིས་ཨེ་ཛི་ཊེ་ཁ་ TV Azteca ཞེས་པའི་བརྙན་འཕྲིན་བརྒྱུད་ལམ་ཐོག་བཅར་འདྲིར་དང་ལེན་མཛད་ཡོད།
ཕྱི་ཚེས་ ༡༦ ཉིན་༸གོང་ས་མཆོག་མེཀ་སི་ཁོའི་གྲོང་ཁྱེར་ལི་ཨོན་ནང་གི་མཛད་འཕྲིན་ཁག་ལེགས་པར་ གྲུབ་རྗེས། ཉིན་དེའི་ཕྱི་དྲོར་རྒྱལ་ཁབ་དེའི་མངའ་སྡེ་ཛ་ཀ་ཊེ་ཀས་ནང་༸ཞབས་སོར་བདེ་བར་འཁོད་འདུག སྐབས་དེར་གནམ་ཐང་དང་བཞུགས་གནས་གསོལ་སྒྲོན་ཁང་བཅས་སུ་མངའ་སྡེའི་སྲིད་སྐྱོང་ མཆོག་གི་སྐུ་ཚབ་དང་གནད་ཡོད་མི་སྣ། དེ་བཞིན་གོ་སྒྲིག་ཚོགས་ཆུང་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
ཕྱི་ཚེས་ ༡༦ ཉིན་གྱི་ཕྱི་དྲོར་མངའ་སྡེ་ཛ་ཀ་ཊེ་ཀས་ནང་གོང་ས་མཆོག་གིས་ཡེ་ཤུའི་ཆོས་ལུགས་ཀྱི་ཆོས་དཔོན་ (Monsenor Sigifredo Noriega Barcelo) མཆོག་གིས་གོ་སྒྲིག་ཞུས་པའི་ཆོས་ལུགས་ཕན་ཚུན་དབར་གྱི་བགྲོ་གླེང་ཐོག་ལྷན་ཞུགས་དང་། དེ་ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་མངའ་སྡེ་དེའི་ནང་རྟེན་གཞི་བྱས་པའི་ཀོན་ཝེན་ཤན་(Conventon Center)བསྟི་གནས་ཁང་དུ་མང་ཚོགས་ ༥༠༠༠ བརྒལ་བར་བདེ་སྐྱིད་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ། དེ་བཞིན་གསར་འགོད་པ་དང་ལྷན་མཇལ་འཕྲད་མཛད།
རྒྱས་ཞུས་ཡོད།
ཕྱི་ཚེས་ ༡༨ ཉིན་ནས་ཉིན་གྲངས་གསུམ་རིང༸གོང་ས་མཆོག་གིས་གྲོང་ཁྱེར་ནེའུ་ཡོཀ་ནང་རྟེན་གཞི་བྱས་པའི་བྷི་ཀོན་ (Beacon Theater) ཚོགས་ཁང་ཆེན་མོའི་ནང་ཁུལ་དེའི་མང་ཚོགས་ལ་ཤེས་རབ་སྙིང་པོ་དང་། དེ་བཞིན་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལིའུ་དགུ་པ་སོགས་ཀྱི་ཆོས་འབྲེལ་སྩལ་ཡོད་པ་མ་ཟད། ཐུབ་པ་དམ་ཚིག་གསུམ་བཀོད་ཀྱི་བཀའ་དབང་སྩལ། གཞན་ཡང་མང་ཚོགས་ལ་འཚེ་མེད་ཞི་བའི་ཕན་ཡོན་ (The Virtue of Nonviolence) ཞེས་པའི་བརྗོད་གཞིའི་ཐོག་བཀའ་སློབ་དང་མང་ཚོགས་ཀྱི་དྲི་བར་བཀའ་ལན་མཛད། ཕྱི་ཚེས་ ༢༡ ཉིན་༸གོང་ས་མཆོག་གིས་རྒྱ་རིགས་རྩོམ་པ་པོ་དང་ལྷན་དུ་རྒྱ་ནག་གི་བཟང་སྤྱོད་སྐོར་བགྲོ་གླེང་མཛད།
ཕྱི་ཚེས་ ༢༣ ཉིན་༸གོང་ས་མཆོག་གིས་པོ་ལེན་ཌིའི་རྒྱལ་ས་ཝར་སོའི་ Warsaw ནང་འཚོགས་བཞིན་པའི་ནོ་བེལ་ཞི་བདེའི་གཟེངས་རྟགས་བཞེས་མཁན་རྣམ་པའི་ཞི་བདེའི་ལྷན་ཚོགས་ཐེངས་ ༡༣ པར་ 13th Nobel Peace Laureates’ Summit ཆིབས་སྒྱུར་དང། དེ་བཞིན་ཡུལ་དེའི་རྒྱལ་ཡོངས་རླུང་འཕྲིན་ Polish Television གྱི་གསར་འགོད་པ་སྐུ་ཞབས་ཇེག་ཀེཀ་ཛ་ཀོ་ཝས་ཀི་ Jackec Zakowsk ལགས་ཀྱིས་ཆེད་དོན་དྲི་བར་བཀའ་ལན་མཛད་ཡོད་པ་མ་ཟད། པོ་ལེན་ཌི་གྲོས་ཚོགས་ཀྱི་འཐུས་མི་དང་ལྷན་མཇལ་འཕྲད་མཛད། གཞན་ཡང་བོད་དོན་རྒྱབ་སྐྱོར་ཚོགས་པའི་ཚོགས་མི་དང་བོད་རིགས་ལ་མཇལ་ཁ་སོགས་ཁུལ་དེའི་མཛད་འཕྲིན་རྣམས་ཡོངས་སུ་ལེགས་གྲུབ་ཀྱིས་རྒྱ་གར་ལ་ཆིབས་ཞལ་བསྒྱུར།
ཕྱི་ཟླ་ ༡༠ ཚེས་ ༢༥ ཉིན་སྔ་དྲོ་ཆུ་ཚོད་ ༡༡ ཡོལ་ཙམ་ལ་༸གོང་ས་མཆོག་ག་གྷལ་གནམ་ཐང་དུ་༸ཞབས་སོར་འཁོད་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཆིབས་འགྲོ་བརྒྱུད་བཞུགས་སྒར་ཕོ་བྲང་དུ་༸ཞབས་སོར་འཁོད་སྐབས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་གིས་དབུས་ཁྲིམས་ཞིབ་པ་གཞན་གཉིས་དང། བཀའ་བློན་རྣམ་པ། དེ་བཞིན་གཞུང་ལམ་གཡས་གཡོན་དུ་དད་ལྡན་མི་མང་བརྒྱ་ཕྲག་མང་པོས་དྲི་སངས་གདུག་སྤོས་དང་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས།།
