༢༠༡༣ ཟླ་ ༡༠ ཚེས་ ༢༢ རེས་གཟའ་མིག་དམར།
བསྟན་འཛིན་རང་གྲོལ་ལགས།
༄༅། །ཕྱི་ལོ་ ༢༠༡༣ ཟླ་བ་ ༡༠ ཚེས་ ༡༨ ཉིན་ཁམས་འབྲི་རུ་རྫོང་ཤག་ཆུ་ཤང་གྲོང་ཚོ་བཞི་པའི་རང་ལོ་ ༣༤ ཡིན་པའི་བསྟན་འཛིན་རང་གྲོལ་ལགས་གློ་བུར་དུ་རྒྱ་ནག་གཞུང་གི་ཉེན་རྟོག་མི་སྣས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་འདུག ཕྱི་ཚེས་ ༡༩ ཉིན་འབྲི་རུ་རྫོང་ཤག་ཆུ་གྲོང་རྡལ་སྲིད་གཞུང་སྒོ་འགྲམ་དུ་དགོ་ཆུ་ནས་ཡིན་པའི་མི་བཞི་བཅུ་ཙམ་གྱིས་བསྟན་འཛིན་རང་གྲོལ་ལགས་གློད་བཀྲོལ་དགོས་པའི་འབོད་སྐུལ་བྱས་པ་དང་། དེ་ནས་གྲོང་ཚོ་ལྔ་ཙམ་གྱི་མི་བརྒྱ་ཕྲག་བརྒལ་བ་ཞིག་གིས་ཉམ་ཆུང་བོད་རིགས་མི་དམངས་ལ་མ་ཉེས་ཁ་གཡོགས། སྐད་ཆ་བདེན་པ་དང་གནས་ལུགས་གང་ཡང་བཤད་ས་མེད་པར་ལམ་སེང་རྒྱལ་ཁབ་ཀྱི་རྩ་ཁྲིམས་དང་ཁྲིམས་འགལ་སོང་ཟེར་ནས་མ་ཉེས་ཁ་གཡོགས་རྐྱང་རྐྱང་མ་བྱེད་རོགས།
གང་བྱུང་དུ་མི་དམངས་ལ་དཀའ་ངལ་མི་སྤྲད་པའི་རེ་བ་ཡོད། ང་ཚོ་ལ་ག་དུས་ཡིན་ནའང་ཡང་ཁ་བྲལ་བྱེད་མི་རུང་ཟེར། དོན་ངོ་མ་སྲིད་གཞུང་དང་མི་དམངས་ཀྱི་བར་ལ་ཁ་བྲལ་གཏོང་མཁན་ནི། ཁྱེད་ཚོའི་ཁྲིམས་དྲང་པོ་མེད་པ་དང་། དབང་ཆ་གཅིག་བསྡུས་བྱས་ནས་སྤྱི་དམངས་ལ་རང་དབང་མི་སྟེར་བའི་སྲིད་གཞུང་འདི་པས། ང་ཚོས་རྒྱལ་ཁབ་ཁ་བྲལ་གྱི་ལས་འགུལ་སྤེལ་མེད་ལ། མི་སེར་ལ་ཐུབ་ཚོད་དེ་བས་བཏང་མེད། ང་ཚོ་འདི་རུ་རྔན་པ་ལེན་དུ་ཡོང་མེད་ལ།ང་ཚོ་འདི་རུ་ཅ་ལག་ཉོ་རུ་བསླེབས་མེད། ང་ཚོས་འདི་རུ་སྲིད་གཞུང་གིས་ཁྲིམས་དྲང་བདེན་སྐྱོང་རོགས་ཞེས་འབོད་སྐུལ་ཞུ་རུ་བསླེབས་ཡོད། ང་ཚོ་ལ་རང་དབང་དགོས་པར་ཁས་ལེན་གྱི་ཡོད་ན། ང་ཚོ་ལ་བསམ་བློ་ཞིག་གཏོང་རོགས་ཞེས་འབོད་སྐུལ་ཞུས་འདུག
གནས་ཚུལ་འདི་ལྷག་རྗེས། ཕྱི་ཚེས ༢༠ དགོང་མོར་ས་གནས་སྲིད་གཞུང་ནས་འགོ་ཁྲིད་འགའ་བསླེབས་ནས། ཁྱོད་ཚོ་ནི་སྒོ་ང་བྲག་ལ་བརྡབས་མཁན་དང་གཅིག་པ་རེད། ང་ཚོས་ལྔ་བཅུ་ང་དགུ་དང་དྲུག་ཅུ་རེ་དགུ་ནང་བཞིན་བཟོ་གི་ཡིན་ཞེས་བོད་མི་དེ་དག་གི་གདོང་ལ་མཛུབ་མོ་བཙུགས་ནས་སྡིགས་ར་བཏང་བ་དང་ས་གནས་བོད་མི་བཅུ་འཇུ་བཟུང་བྱས་ཡོད་འདུག དེ་དག་ནི་ཞོ་དར་ལགས། རྡོར་རྒྱལ་ལྷ་མོ་ལགས། སྐལ་བཟང་རྣམ་གྲོལ་ལགས། སྨན་རྒྱལ་ལགས། བཟང་མོའི་བུ་སོགས་ཡིན་པ་རེད།
དེ་མིན་གྱི་མི་དེ་དག་རེ་རེ་བཞིན་མཛུབ་ཐེལ་བརྒྱག་ཏུ་བཅུག་ནས་མར་བཏང་སོང་། དམག་མི་ཧ་ཅང་མང་པོ་འབྱོར་ནས་ཚྭ་ལུང་མདོ་སོགས་འབྲོག་པའི་མི་གཅིག་ཀྱང་ཤག་ཆུ་ཤང་དུ་ཡར་མར་འགྲོར་མི་བཅུག་པར་བཀག་འགོག་བྱེད་བཞིན་ཡོད་འདུག
