༢༠༡༣ ཟླ་ ༡༠ ཚེས་ ༡༧ རེས་གཟའ་པ་སངས།

༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༡༠ ཚེས་ ༡༢ ནས་ ༡༦ བཅས་ཉིན་གྲངས་ལྔའི་རིང་ལྷོ་ཨ་མི་རི་ཀའི་གླིང་ཕྲན་རྒྱལ་ཁབ་མེཀ་སི་ཁོའི་ Mexico ནང་གི་གྲོང་ཁྱེར་ཆེ་གྲས་ཁག་གསུམ་གྱི་ནང་ཆོས་འབྲེལ་དང་མང་ཚོགས་བཀའ་སློབ། དེ་བཞིན་ཆོས་ལུགས་མཐུན་སྒྲིལ་ལྷན་ཚོགས་དང་། གསར་འགོད་པ་དང་མཇལ་འཕྲད་སོགས་ཀྱི་མཛད་འཕྲིན་ཁག་ལེགས་པར་གྲུབ་རྗེས། ཕྱི་ཚེས་ ༡༧ ཉིན་ཨ་རིའི་གྲོང་ཁྱེར་ནེའུ་ཡོཀ་ཏུ་༸ཞབས་སོར་བདེ་བར་འཁོད་ཡོད། སྐབས་དེར་ས་གནས་བོད་མི་ཚོས་༸གོང་ས་མཆོག་ལ་གྲོ་སོ་ཕྱེ་མར་འདེགས་འབུལ་ཞུས་ཏེ་སྲོལ་རྒྱུན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད།
དེ་ཡང་མཛད་འཆར་ལྟར་ན་༸གོང་ས་མཆོག་གིས་གྲོང་ཁྱེར་ནེའུ་ཡོཀ་ནང་རྟེན་གཞི་བྱས་པའི་བྷི་ཀོན་ (Beacon Theater) ཚོགས་ཁང་ཆེན་མོའི་ནང་ཕྱི་ཚེས་ ༡༨ ནས་ཉིན་གྲངས་གསུམ་རིང་ཁུལ་དེའི་མང་ཚོགས་ལ་ཤེས་རབ་སྙིང་པོ་དང་དཀོན་མཆོག་གསུམ་རྗེས་སུ་དྲན་པའི་མདོ། དེ་བཞིན་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལིའུ་དགུ་པ་སོགས་ཀྱི་ཆོས་འབྲེལ་སྩལ་རྒྱུ་མ་ཟད། ཐུབ་པ་དམ་ཚིག་གསུམ་བཀོད་ཀྱི་བཀའ་དབང་སྩལ་རྒྱུ་ཡིན་འདུག ཕྱི་ཚེས་ ༢༠ ཉིན་གྱི་ཕྱེད་ཡོལ་མང་ཚོགས་ལ་འཚེ་མེད་ཞི་བའི་ཕན་ཡོན་ (The Virtue of Nonviolence) ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་ཡིན་འདུག་པ་བཅས།།