༢༠༡༣ ཟླ་ ༡༠ ཚེས་ ༡༨ རེས་གཟའ་པ་སངས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༣ ཟླ་ ༡༠ ཚེས་ ༡༦ ཉིན་ལྷོ་ཨ་མི་རི་ཀའི་གླིང་ཕྲན་མེཀ་སི་ཁོའི་ཛ་ཀ་ཊེ་ཀ་ Zacatecasམངའ་སྡེའི་ནང་རྟེན་གཞི་བྱས་པའི་ཨེན་ཊི་གོ་ཊེམ་ལོ་ཌེ་སན་ཨ་གུ་སི་ཊི་ན་ (Antiguo Templo de San Agustina) ཞེས་དེ་སྔ་ཡེ་ཤུའི་ཆོས་ཁང་ཡིན་པ་དང་། ཕྱིས་སུ་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ངོས་འཛིན་ཐོབ་པའི་རིག་གཞུང་དང་སྒྱུ་རྩལ་བསྟི་གནས་ཁང་ UN World Heritage Site ཞིག་ཏུ་གྱུར་བ་དེར་ཡི་ཤུའི་ཆོས་ལུགས་ཀྱི་ཆོས་དཔོན་མོན་སེ་ནོར་ས་གི་ཕེ་རེ་ཏོ་ནོ་རེ་ག་བྷར་སེ་ལོ་ (Monsenor Sigifredo Noriega Barcelo) མཆོག་གིས་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་ཏེ་ཆོས་ལུགས་མཐུན་སྒྲིལ་སྐོར་གྱི་བགྲོ་གླེང་ལྷན་ཚོགས་སུ་བཀའ་སློབ་སྩལ་ཡོད། སྐབས་དེར་ཐོག་མར་སློབ་ཕྲུག་ཁག་ཅིག་ནས་༸གོང་ས་མཆོག་ལ་རོལ་དབྱངས་ཀྱི་ལམ་ནས་ཕེབས་བསུ་གཟབ་རྒྱས་ཞུས་པ་དང་སྦྲགས། ཡི་ཤུའི་ཆོས་ལུགས་ཀྱི་ཆོས་དཔོན་མོན་སེ་ནོར་ས་གི་ཕེ་རེ་ཏོ་ནོ་རེ་ག་བྷར་སེ་ལོ་མཆོག་གིས་༸གོང་ས་མཆོག་ཚོགས་ཁང་ནང་གདན་འདྲེན་ཞུས་ཡོད།

དེ་རྗེས་ཆོས་དཔོན་མཆོག་གིས་མང་ཚོགས་ལ་ངོ་སྤྲོད་གསུང་བཤད་གནང་སྐབས་འཛམ་གླིང་ནང་ལས་མ་རུང་པ་གསོག་མཁན་མང་དག་གཅིག་ཡོད་པར་བརྟེན་ང་ཚོ་ཚང་མ་མཉམ་རུབ་ཐོག་ནས་ཡ་རབས་བཟང་སྤྱོད་གོང་འཕེལ་གཏོང་ཐབས་དགོས་རྒྱུ་ཧ་ཅང་གལ་ཆེ་ཆགས་ཡོད་པ་དང་། མང་ཚོགས་རྣམས་ཀྱིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་བཀའ་སློབ་ཉན་རྒྱུར་སྒུག་ནས་ཡོད་ཚུལ་སྙན་སྒྲོན་ཞུས་པ་དང་སྦྲགས། ༸གོང་ས་མཆོག་ལ་བཀའ་སློབ་སྩལ་རྒྱུའི་གསོལ་འདེབས་ཞུས་པ་བཞིན་སྐབས་དེར་མགོན་པོ་གང་ཉིད་མཆོག་གིས་སྐུ་བཞེངས་ཐོག་ནས་བཀའ་སློབ་སྩལ་དོན། ཆོས་གྲོགས་ཕོ་མོ་ཚོ། ངོས་རང་དེ་རིང་འདིར་བཅར་ཐུབ་པར་ཧ་ཅང་དགའ་པོ་བྱུང་། སྐུ་ཉིད་མཆོག་གིས་ད་ལྟ་གསུངས་པའི་བཀའ་མོལ་དེ་ཚོ་དངོས་ཡོད་གནས་ཚུལ་ཞིག་ཡིན་པར་བརྟེན་ང་ཚོ་ཚང་མས་དེའི་ཐོག་བསམ་བློ་ངེས་པར་དུ་གཏོང་དགོས། ཕྱིའི་ངོ་གདོང་ཙམ་ལ་ལྟ་སྐབས་ཕྱི་དངོས་པོའི་ཡར་རྒྱས་བརྗོད་སྐབས་ཡིད་དུ་འོང་བ་ཞིག་མངོན། འོན་ཀྱང་ནང་དོན་ལ་ཕར་ཞིབ་ཕྲ་དཔྱད་སྐབས་མི་དྲང་པ་དང་ཤུ་ཞོག་བཏང་བ། ལྐོག་ཟ་རུལ་སུངས། དེ་བཞིན་རྙོག་ཕྲ་མང་དག་གཅིག་ཡོད་པ་དེ་དག་གིས་ང་ཚོར་དུས་རྟག་ཏུ་སེམས་འཁྲལ་བཟོ་བཞིན་ཡོད། ཕྱོགས་གཞན་ཞིག་ནས་ཆོས་ལ་མཚོན་ན་ཆོས་ནི་སེམས་རྒྱུད་ལ་ཞི་བདེ་ཡོང་རྒྱུའི་རྒྱུ་གཙོ་བོ་ཆགས་ཡོད། སེམས་ནང་གི་ཞི་བདེ་ཟེར་བ་དེ་འཕྲུལ་ཆས་ཀྱིས་བཟོ་རྒྱུ་མེད། སེམས་ནང་གི་ཞི་བདེ་ཟེར་བ་དེ་བྱམས་བརྩེའི་ཉམས་ལེན་ལས་ཡོང་ཐུབ། དེར་བརྟེན་དུས་རབས་ ༢༡ སྐབས་འདིར་ཕྱི་དངོས་པོའི་འཛུགས་སྐྲུན་གྱི་ཡར་རྒྱས་དང་ལྷན་ཆོས་ལའང་ལས་འགན་གལ་ཆེན་པོ་ཞིག་ཡོད། ཆོས་པ་ཚོས་ལྷག་བསམ་རྣམ་དག་ཐོག་ནས་ཆོས་ཉམས་ལེན་བྱེད་དགོས། དགོན་པ་དང་ལྷ་ཁང་སོགས་ཀྱི་ནང་རང་ཉིད་གྲལ་འགོར་སྡོད་སྐབས་རྩ་བ་ཆེན་པོ་ཡིན་བསམ་པའི་ཚོར་སྣང་ཡོང་སྲིད། འོན་ཀྱང་ལྷ་ཁང་ནས་ཕྱིར་ཐོན་མ་ཐག་བཟང་སྤྱོད་ཀྱི་བསམ་བློ་དོར་བ་ཡིན་ན་དགོས་པ་གང་ཡང་བྱུང་མེད། ཆོས་ནང་གསུང་པའི་བྱམས་པ་དང་བརྩེ་བ། བཟོད་བསྲན། དྲང་བདེན་སོགས་བཟང་པོའི་རིན་ཐང་དེ་དག་ཉིན་རེའི་མི་ཚེའི་ནང་ཉམས་ལེན་གནང་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། དེ་འདྲ་བྱུང་བ་ཡིན་ན་སྤྱི་ཚོགས་ནང་བཟང་ཕྱོགས་ཀྱི་འགྱུར་བ་ཡོང་ངེས་ཡིན། ཞེས་སོགས་ཀྱི་བཀའ་སློབ་སྩལ། དེ་རྗེས་༸གོང་ས་མཆོག་གིས་གསར་འགོད་པ་ཁག་ཅིག་ལ་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུ་བཅས་མགོན་པོ་གང་ཉིད་མཆོག་གི་སྐུ་ཚེའི་མཛད་འགན་གཉིས་སྐོར་དང་ལྷག་པར་༸གོང་ས་མཆོག་བོད་མི་ཞིག་ཡིན་པའི་ཆ་ནས་བོད་ཀྱི་རིག་གཞུང་དང་འབྲེལ་བའི་བོད་བརྒྱུད་ནང་བསྟན་སྲུང་སྐྱོབས་ཆེད་ཐུགས་བརྩོན་མཛད་བཞིན་ཡོད་སྐོར་བཀའ་སློབ་སྩལ་བ་དང་སྦྲགས། གསར་འགོད་པའི་དྲི་བར་བཀའ་ལན་སྩལ། དེ་རྗེས་༸གོང་ས་མཆོག་གིས་སྒྱུ་རྩལ་བ་དང་གཞུང་འབྲེལ་མིན་པའི་ཚོགས་པ་འདྲ་མིན་གྱི་སྐུ་ཚབ་སོགས་སྐུ་མགྲོན་མི་གྲངས་ ༢༥༠ བརྒལ་བ་དང་ལྷན་ཉིན་གུང་ལྗགས་སྨིན་མཛད། དེ་རྗེས་༸གོང་ས་མཆོག་གིས་ཛ་ཀ་ཊེ་ཀ་སིའི་ཚོགས་ཁང་ཆེན་མོའི་ Zacatecas Convention Center ནང་མང་ཚོགས་ ༤༢༠༠ བརྒལ་བར་བཀའ་སློབ་སྩལ། ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་གིས་མེཀ་སི་ཀོའི་ནང་ཉིན་ལྔའི་མཛད་འཕྲིན་སྐྱོང་སྐབས་མི་གྲངས་ ༤༢༠༠༠ བརྒལ་བར་བཀའ་སློབ་སྩལ་ཡོད། ཕྱི་ཚེས་ ༡༧ ཉིན་༸གོང་ས་མཆོག་ཨ་རིའི་གྲོང་ཁྱེར་ནིའུ་ཡོཀ་ New York ཏུ་ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།