༢༠༠༩ ཕྱི་ཟླ་ ༧ ཚེས་ ༣༠ རེས་གཟའ་ཕུར་བུ།
གྲོང་སྡེ་ལས་ཁུངས་ཀྱི་སྤྱི་ཁྱབ་མ་ལྕམ་སྐུ་ཧན་ན་གོ་རོན་ཀི་ཝ་ཁ་ཛ་ཝལ་ཊ་ཛ་མཆོག་ནས་༸གོང་ས་མཆོག་ལ་ཆེ་བསྟོད་གཟེངས་རྟགས་འབུལ་བཞིན་པ།
ཕྱི་ཚེས་ ༢༩ ཉིན་པོ་ལན་ཌིའི་རྒྱལ་ས་ཝར་སོའི་སྙན་གྲགས་ཅན་གྱི་ཕོ་བྲང་རོ་ཡལ་ཁ་སི་ཊལ་ Royal Castle ཞེས་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཝར་སོར་གྲོང་ཁྱེར་གྱི་ཆེ་བསྟོད་མི་སེར་ཕྱག་འཁྱེར་འབུལ་བཞེས་བསྐྱངས་ཡོད། ཆེ་བསྟོད་མི་སེར་གྱི་ཕྱག་འཁྱེར་ཕུལ་བའི་མཛད་སྒོར་གྲོང་སྡེ་ལས་ཁུངས་ཀྱི་སྤྱི་ཁྱབ་ མ་ལྕམ་སྐུ་ཧན་ན་གོ་རོན་ཀི་ཝ་ཁ་ཛ་ཝལ་ཊ་ཛ་ Hanna Gronkiewicz-Waltz མཆོག་ནས།
པོ་ལན་ཌི་གཞུང་གི་ལས་བྱེད་དང་། གྲོས་ཚོགས་ཀྱི་འཐུས་མི། ཚོགས་པ་ཆེ་ཁག་གི་འགོ་ཁྲིད་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། པོ་ལན་ཌིའི་ནང་ཡོད་བོད་མི་ཉུང་ཤས་བཅས་འདུས་པའི་ ལྷན་ཚོགས་ཐོག་ཝར་སོར་གྲོང་ཁྱེར་གྱི་ཆེ་བསྟོད་མི་སེར་ཕྱག་འཁྱེར་འབུལ་ལམ་ཞུ་རྒྱུ་བྱུང་བ་ནི་གཟི་བརྗིད་ཅིག་ལ་ངོས་འཛིན་ཞུ་བཞིན་ཡོད། ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ནི་དེང་སྐབས་སུས་ཀྱང་མངའ་ཁོངས་སུ་བསྡུ་མི་ཐུབ་པའི་ཝར་སོར་གྲོང་ཁྱེར་གྱི་མི་སེར་ཆགས་པ་དེ་ནི་འདི་གའི་མང་ཚོགས་ལ་སྤོབས་སེམས་ཆེན་པོ་ཞིག་སྐྱེས་བྱུང་ཞེས་སོགས་དགའ་ཚོར་ཆེན་པོའི་ངང་ནས་གསུང་བཤད་
༸གོང་ས་མཆོག་ལ་ཆེ་བསྟོད་ཕྱག་འཁྱེར་ཕུལ་གྲུབ་རྗེས་སྲིད་འཛིན་ཟུར་པ་སྐུ་ཞབས་ལེ་སི་ཝེལ་ས་མཆོག་ནས་འཚམས་འདྲི་ཞུ་བཞིན་པ།
གནང་ཡོད། ཁོང་གིས་ད་དུང་ཕྱི་ལོ་ ༢༠༠༩ འདི་ནི་པོ་ལན་ཌིར་རང་བཙན་ཐོབ་ནས་མི་ལོ་ཉི་ཤུ་འཁོར་གྱི་ཡོད་པའི་འགྲེལ་བརྗོད་དང་སྦྲགས་༸གོང་ས་མཆོག་གི་ཞི་བའི་རླབས་ཆེན་གྱི་མཛད་རྗེས་ཁག་ལ་ཆེ་བསྟོད་ཆེན་པོ་ཞུས་ཡོད་པ་རེད། དེ་བཞིན་ཝར་སོར་གྲོང་སྡེ་ལྷན་ཁང་གི་ཚོགས་གཙོ་མཆོག་ནས་མཛད་སྒོའི་ཐོག་གསུང་བཤད་གནང་གསལ། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནས་རང་གི་མི་མང་དང་རྒྱལ་ཁབ་ཆེད་དུ་རང་དབང་འཐབ་རྩོད་གནང་བཞིན་པ་དེ་ནི། འདས་པའི་ལོ་ངོ་ཉི་ཤུའི་རིང་པོ་ལན་ཌིའི་ཡུལ་མི་ཚོས་རང་དབང་ལོངས་སུ་སྤྱོད་བཞིན་པ་འདི་ལྟ་བུ་ཞིག་ཐོབ་ཐབས་གནང་མཁན་གྱི་མི་སྣ་ཞིག་ལ་ང་རང་ཝར་སོར་གྲོང་སྡེ་ལྷན་ཚོགས་ཀྱི་འཐུས་མིི་ཡིན་པའི་ཆ་ནས་འདས་པའི་ལོ་རྒྱུས་ནང་དཀའ་སྡུག་ཚད་མེད་མྱོང་བ་ཡོད་པ་གཞི་བྱས་ཏེ་ང་ཚོས་མགོན་པོ་གང་ཉིད་ལ་གུས་བརྩི་དང་ཆེ་མཐོང་ཞུ་རྒྱུ་ནི་པོ་ལན་ཌིའི་ཡུལ་མི་ཚོས་རང་འཁྲི་བཟང་པོའི་འོས་འགན་ཞིག་རེད། ཅེས་འགྲེལ་བརྗོད་གནང་ཡོད།
ཝར་སོར་གྲོང་ཁྱེར་དུ་ཆེ་མཐོང་གི་མཚན་བསྟོད་མི་སེར་ཕྱག་འཁྱེར་འབུལ་བའི་མཛད་སྒོར་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་དགྱེས་ཚོར་ཆེན་པོའི་སྒོ་ནས་བཀའ་སློབ་ཕེབས་དོན། ད་རེས་ངོས་ལ་རླབས་ཆེན་གྱི་གྲོང་ཁྱེར་འདིའི་ཆེ་མཐོང་མི་སེར་ལག་འཁྱེར་འདི་ལྟ་བུ་ཞིག་གནང་བ་ནི་གཟི་བརྗིད་ཅིག་ལ་ངོས་འཛིན་ཞུ་བཞིན་ཡོད། དེ་བཞིན་པོ་ལན་ཌིའི་མི་མང་རྣམས་ཀྱིས་འདས་པའི་ལོ་རྒྱུས་ནང་ཇར་མན་ན་ཛི་གཞུང་དང་རུ་སུ་དམར་པོའི་གཞུང་གིས་དབང་སྒྱུར་འོག་དཀའ་ངལ་ཆེན་པོ་ཇི་ཙམ་འཕྲད་མིན་ལ་མ་ལྟོས་པར་པོ་ལན་ཌིའི་ཡུལ་མི་རྣམས་ཀྱི་སྙིང་སྟོབས་དང་ཆོད་སེམས་བརྟན་བཟུང་ཐུབ་པ་དེ་ནི་ཧ་ཅང་བསྔགས་བརྗོད་འོས་པ་ཞིག་ཡིན། དེ་བཞིན་པོ་ལན་ཌི་གཞུང་མང་ཡོངས་ནས་ད་བར་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་དང་གདུང་སེམས་མཉམ་སྐྱེ་གནང་བར་ཐུགས་རྗེ་ཆེ་ཞུ་གནང་བ་དང་སྦྲགས་ཡུལ་དེའི་མང་ཚོགས་རྣམས་ནས་སོ་སོའི་བཟང་ཕྱོགས་ཀྱི་ནུས་ཤུགས་གང་ཐུབ་འདོན་དགོས་རྒྱུ་དང་། དེ་ཡང་གཙོ་བོ་སེམས་བཟང་པོ་བྱེད་དགོས་པའི་སྐུལ་མ་ཡང་གནང་ཡོད། སྐབས་འདིར་ད་དུང་མགོན་པོ་གང་ཉིད་ནས་གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་ལ་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་རྩོད་བཞིན་ཡོད་སྐོར་དང་རྒྱལ་སྤྱིའི་ཚོགས་སྡེ་ཡོངས་ལ་རྒྱ་ནག་དེ་བཞིན་འཛམ་གླིང་མང་གཙོའི་གླེང་སྟེགས་སུ་འཁྲིད་རྒྱུའི་འགན་ཡོད་སྐོར་སོགས་ཀྱི་བཀའ་སློབ་སྩལ་ཡོད།
༸གོང་ས་མཆོག་ལ་ཆེ་མཐོང་མི་སེར་གྱི་མཚན་བསྟོད་ཕྱག་འཁྱེར་ཕུལ་བའི་མཛད་སྒོར་གྲོང་ཁྱེར་དེའི་ས་གནས་གཞུང་གི་གནད་ཡོད་དབུ་ཁྲིད་རྣམས་དང་། གྲོས་ཚོགས་ཀྱི་འཐུས་མི་རྣམ་པ། གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་སྐུ་མགྲོན་ཁག དེ་བཞིན་ཡུལ་དེའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལེ་སི་ཝེལ་ས་ (Lech Walesa) མཆོག་དང་། དེ་བཞིན་སྲིད་བློན་ཟུར་པ་ཊ་ཏུར་མ་ཛུ་ཝི་ཀི་མཆོག་ཀྱང་ཆེད་ཕེབས་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌིའི་མཛད་འཕྲིན་ཁག་ཡོངས་སུ་ལེགས་གྲུབ་རྗེས་ཉིན་དེའི་ཕྱི་དྲོ་ཇར་མན་གྲོང་ཁྱེར་ཕ་རན་ཕུར་ཊིར་ཆིབས་ཞལ་བསྒྱུར།༸༣༨༥༣ཀ
