༢༠༡༣ ཟླ་ ༡༠ ཚེས་ ༡༦ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༣ ཟླ་ ༡༠ ཚེས་ ༡༢ ཉིན་བོད་ཁམས་དཀར་མཛེས་ཁུལ། དཔལ་ཡུལ་རྫོང་ཁོངས་
སུ་ཡོད་པའི་སྔ་འགྱུར་རྙིང་མ་པའི་མ་དགོན་ཆེན་པོ་དྲུག་གི་ཡ་གྱལ་དཔལ་ཡུལ་མ་དགོན་གྱི་བཤད་གྲྭའི་ནང་སློབ་གཉེར་བྱེད་བཞིན་པ་ཁམས་ནག་ཆུ་ས་ཁུལ། སོག་རྫོང་གི་དགེ་འདུན་པ་སྐལ་བཟང་ཆོས་དར་ལགས་དཔལ་ཡུལ་རྫོང་གི་ཁྲོམ་ལ་འགྲོ་སྐབས་གློ་བུར་དུ་རྒྱ་མིའི་ཉེན་རྟོག་པས་འཛིན་བཟུང་བྱས་ཡོད་འདུག
ཁོང་གི་ཕ་ཡུལ་ཁམས་སོག་རྫོང་ཅུང་པ་དཀར་སྨད་ཡུལ་ཚོའི་གྲོང་ཚོ་དགུ་པ་ནས་ཡིན་པ་དང་། ཁོང་གི་ཕའི་མིང་ལ་ནོར་སྲུང་དང་། ཁོང་ཅུང་པ་ཉི་མ་གླིང་གི་གྲྭ་པ་རེད་འདུག ཕྱི་ལོ་ ༢༠༠༤ ལོར་དཔལ་ཡུལ་མ་དགོན་གྱི་བཤད་གྲྭར་ཞུགས་ནས་སློབ་སྦྱོང་གནང་བཞིན་ཡོད་པ་དང་ལོ་རྗེས་མ་སློབ་དཔོན་འཛིན་གྲྭ་སློབ་མཐར་ཕྱིན་རྒྱུ་ཡིན་པ་རེད།
དེང་སང་དཔལ་ཡུལ་ཕྱོགས་ལ་བོད་ལྗོངས་ཀྱི་གསང་བའི་ཉེན་རྟོག་པ་མང་པོ་ཡོད་འདུག་ལ། ཁོང་མ་བཟུང་བའི་སྔ་དྲོར་ཁོང་བཞུགས་མིན་འདྲི་མཁན་གྲྭ་ཆས་གྱོན་པ་ཞིག་དང་མི་ལོ་ན་རྒན་པ་གཅིག་བཅས་སླེབས་ཡོད་འདུག དེའི་ཕྱི་དྲོར་གནས་ཚུལ་དེ་བྱུང་རྗེས། དགེ་འདུན་པ་དང་བཙུན་མ་རྣམས་ཀྱིས་ཤེས་འཕྲལ་རྫོང་ཉེན་རྟོག་པའི་སྒོ་ཁར་མཚན་མོ་ཆུ་ཚོད་དང་པོ་ཡས་མས་བར་དགེ་འདུན་པ་སྐལ་བཟང་ཆོས་དར་ལགས་གློད་བཀྲོལ་དགོས་པའི་ངོ་རྒོལ་དང་སྐད་འབོད་བྱས་ཀྱང་ཕན་ཐོགས་གང་ཡང་བྱུང་མེད། ངོ་རྒོལ་སྐབས་མི་ཁག་གཅིག་ལ་རྨས་སྐྱོན་བྱུང་སྟེ་སྨན་ཁང་དུ་འཁྱེར་དགོས་པའི་གནས་ཚུལ་ཡང་བྱུང་ཡོད་འདུག
རྫོང་ཉེན་རྟོག་པས་བརྗོད་པ་ལྟར་ན་གྲྭ་པ་དེ་བོད་ལྗོངས་ཉེན་རྟོག་པས་ཁྲིད་སོང་ལ། ད་ལྟ་ཆབ་མདོར་སླེབས་ཟིན་པ་རེད་ཅེས་བརྗོད་ཡོད་འདུག གནས་ཚུལ་འགྲེལ་བརྗོད་པས་གསུངས་པར་གཞིགས་ན། ཁོང་གི་ཁ་པར་དེ་ཡང་འཕྲོག་སོང་བས་དེའི་ནང་ཚོགས་པ་མི་ཉུང་བ་ཞིག་ཡོད་པས་ཁོང་ཚོས་བེད་སྤྱོད་ཇི་ལྟར་སྤྱད་ཡོང་སྙམ་ཏེ་ང་ཚོ་བློ་འཚབ་ཆེན་པོ་འདུག་ཟེར།
ཁམས་སོག་རྫོང་ཅུང་པ་ཉི་མ་གླིང་དགོན་པ་ནི་རབ་བྱུང་བཅུ་གཅིག་མེ་རྟ་ཕྱི་ལོ་ ༡༦༦༦ ཁམས་པ་ཉི་མ་གྲགས་པས་ཕྱག་བཏབ་ནས་ཉི་མ་གླིང་འོད་གསལ་སྒྲུབ་སྡེ་ཞེས་མཚན་གསོལ། ཉི་མ་གྲགས་པས་དགོན་ཁག་བཅུ་གཉིས་ཕྱག་བཏབ་པ་ནང་གི་གཅིག་ཡིན་པ་དང་། ཆོས་ལུགས་རྙིང་མ་ཡིན་འདུག་པ་བཅས།།
