༢༠༡༣ ཟླ་ ༡༠ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༡༣ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་མེག་སི་ཀོ་སི་ཊི་གྲོང་ཁྱེར་གྱི་ཨེ་རི་ན་ཀིའོ་ཌ་ཌི་མེག་སི་ཀོ་ Arena Ciudad de Mexico ཞེས་པ་དེར་མང་ཚོགས་ཆིག་ཁྲི་ལྔ་སྟོང་བརྒལ་བར་ལམ་སྟོན་བཀའ་སློབ་སྩལ། དེ་ཡང་སྔ་དྲོ་ཐོག་མར་༸གོང་ས་མཆོག་གིས་ཨེ་རི་ན་ཀིའོ་ཌ་ཌི་མེག་སི་ཀོ་ཞེས་པའི་ཚོགས་ཁང་ནང་དུ་ཆིབས་སྒྱུར་བསྐྱངས་སྐབས་ས་གནས་ནང་པའི་ཆོས་ཚོགས་ཁག་གཉིས་ཀྱི་སྐུ་ཚབ་འཐུས་མི་ཚོར་མཇལ་ཁ་སྩལ་བ་དང་སྦྲགས། དེང་དུས་རབས་ ༢༡ སྐབས་ནང་ཆོས་ལ་ཤེས་ནས་དད་པ་བྱ་རྒྱུ་ཧ་ཅང་གལ་ཆེ་ཡིན་པ་དང་། སྤྱིར་ཆོ་ག་ཕྱག་ལན་དང་གདོན་ལྟ་དབྱངས་སོགས་གལ་ཆེ་ཡིན་ནའང་དེ་ཙམ་གྱིས་ཆོག་ཤེས་མ་བྱས་པར་ནང་པའི་གཞུང་ལ་སློབ་གཉེར་བྱ་རྒྱུ་ཧ་ཅང་གལ་ཆེ་ཡིན་པ་དང་། ལྷག་པར་ཚན་རིག་པ་ཚོས་སེམས་ཀྱི་རྣམ་གཞག་ཐོག་ནང་པའི་གཞུང་ནས་བློ་སྐྱེས་མང་པོ་ལེན་རྒྱུའི་གོ་སྐབས་མཐོང་བཞིན་ཡོད། དེར་བརྟེན་བཀའ་བགྱུར་དང་བསྟན་འགྱུར་སོགས་ནང་ཆོས་ནས་གསུང་པའི་ཚན་རིག་གི་རྣམ་གཞག་དང་། ལྟ་གྲུབ་ཀྱི་རྣམ་གཞག ནང་ཆོས་སོགས་དབྱེ་བ་སོ་སོར་འབྱེད་ནས་ཆོས་ཀྱི་སྐད་ཆ་མིན་པར་ཤེས་ཡོན་ལམ་ལུགས་ནང་སྤྱིར་སྟངས་སློབ་ཚན་དུ་འཇོག་ཐབས་ཆེད་ལས་འཆར་ཞིག་འགྲོ་བཞིན་ཡོད། དེར་བརྟེན་ཆོས་ཚོགས་སོ་སོས་ཀྱང་ལས་འཆར་དེར་ཞབས་འདེགས་ཞུ་ཐུབ་ན་དགེ་ཚན་ཆེན་པོ་ཡོད་སྐོར་སོགས་བཀའ་སློབ་སྩལ།
དེ་རྗེས་མང་ཚོགས་ ༡༥༠༠༠ ལྷག་ལ་བཀའ་སློབ་སྩལ་དོན། ངོས་རང་འདིར་ཡོང་སྟེ་ཁྱེད་ཚོ་མཇལ་རྒྱུ་བྱུང་བ་ཧ་ཅང་དགའ་པོ་བྱུང་། དེར་བརྟེན་ལྷན་ཚོགས་གོ་སྒྲིག་གནང་མཁན་ཚོར་ངོས་ཀྱིས་ཐོག་མར་ཐུགས་རྗེ་ཆེ་ཞུ་རྒྱུ་མ་ཟད། ངོས་ཀྱི་གྲོགས་པོ་རྙིང་པ་སྐུ་ཞབས་རི་ཆ་ཌི་སྒེར་ལགས་ལའང་ཐུགས་རྗེ་ཆེ་ཞུ་རྒྱུ་ཡིན། དེ་རིང་ངོས་ཀྱིས་ཆོས་ལུགས་རིས་མེད་ཀྱི་བཟང་སྤྱོད་སྐོར་སྐད་ཅ་ཤོད་རྒྱུ་ཡིན། ངོས་རང་ནམ་རྒྱུན་མི་སུ་དང་སུ་ཐུག་སྐབས་འགྲོ་བ་མི་གཅིག་པ་ཞིག་ཡིན་བསམ་པའི་ཚོར་སྣང་ཡོང་བཞིན་འདུག
འཛམ་གླིང་མི་འབོར་ཐེར་འབུམ་བདུན་ཡོད་ཁོངས་ནས་ངོས་རང་ཡང་ཆ་ཤས་ཤིག་ཆགས་ཡོད། ང་ཚོ་འགྲོ་བ་མི་རིགས་ཚང་མ་ལུས་སེམས་དང་སེམས་ཚོར་གང་གི་ཆ་ནས་འགྲོ་བ་མི་རིགས་གཅིག་མཚུངས་ཤིག་ཆགས་ཡོད། ང་ཚོ་ཚང་མར་བཟང་ངན་ཇི་འདྲ་ཞིག་བྱས་ཀྱང་ནུས་པ་ལྡན་ཡོད། ཕྱོགས་མཚུངས་ང་ཚོ་ཚང་མ་འདོད་ཆགས། ཞེ་སྡང་། ཁོང་ཁྲོ། དོགས་པ་རྣམ་རྟོག འདོད་རྔམས་སོགས་ཉོན་མོངས་པའི་གཞན་དབང་དུ་འཆིང་ནས་ཡོད། ཉོན་མོངས་པའི་བློ་དེ་དག་གིས་ང་ཚོར་རྙོག་ཁྲ་བཟོ་བཞིན་ཡོད། ཕྱོགས་གཞན་ནས་གལ་ཏེ་ང་ཚོས་གཞན་ལ་བྱམས་པ་དང་བརྩེ་བ། གཞན་གྱི་བདེ་སྡུག་ལ་བསམ་ཤེས་སོགས་བྱས་ཐུབ་ཚེ་ཁོང་ཁྲོ་དང་ཞེ་སྡང་། ཕྲག་དོག་སོགས་སྐྱེས་རྒྱུའི་གོ་སྐབས་མེད། གལ་ཏེ་ངོས་ཀྱིས་ངོས་རང་བོད་པ་ཞིག་དང་ནང་པ་ཞིག་ཡིན་བསམ་པ་དང་ཡང་ན་ངོས་རང་ཏཱ་ལའི་བླ་མ་སྐུ་ཕྲེང་ ༡༤ ཡིན་བསམ་པའི་ཀུན་སློང་སྐྱེ་སྐབས་ང་ཚོའི་དབར་རང་བཞིན་གྱིས་ཁྱད་པར་ཞིག་ཡོང་རྒྱུ་ཡིན། དེས་ཕན་རྒྱུ་མེད་ཁར་ད་དུང་རྙོག་ཕྲ་བཟོ་རྒྱུ་ཆགས་སྲིད། ཚང་མས་བདེ་སྐྱིད་འདོད་པ་ལས་རྙོག་ཕྲ་སུས་ཀྱང་འདོད་ཀྱི་མེད། ང་ཚོ་ཚང་མར་བདེ་བ་སྒྲུབ་རྒྱུ་དང་སྡུག་བསྔལ་སེལ་རྒྱུའི་ཐོབ་ཐང་གཅིག་མཚུངས་སུ་ཡོད། དེང་སྐབས་སྤྱི་ཚོགས་ནང་ཕྱི་དངོས་པོའི་མཐུན་རྐྱེན་ལས་བདེ་བ་ཐོབ་ཐབས་བྱེད་བཞིན་ཡོད། གལ་ཏེ་ཕྱི་དངོས་པོ་ཡར་རྒྱས་ཕྱིན་པ་ལས་བདེ་བ་འཕེལ་བཞིན་ཡོད་ན་ངོས་ཀྱི་གྲོགས་པོ་ཕྱུག་བདག་ཚང་མ་བདེ་སྐྱིད་ལྡན་པ་ཤ་སྟག་ཡིན་རྒྱུ་རེད། ཕྱུག་པོ་དེ་ཙམ་མེད་མཁན་ཚོར་སྙིང་སྟོབས་རྩ་བ་ནསམེད་པ་དེ་འདྲ་ཡིན་རྒྱུ་རེད། འོན་ཀྱང་དེ་འདྲ་རྩ་བ་ནས་མ་རེད། ཕྱུག་པོ་མིན་མཁན་ཚོ་ལའང་རང་ཉིད་ལ་གདེང་སྤོབས་དང་སྙིང་སྟོབས། དེ་བཞིན་སེམས་ནང་བདེ་སྐྱིད་ཀྱི་ཚོར་བ་ཡོད་མཁན་མང་དག་གཅིག་ཡོད། ཅེས་བཀའ་སློབ་སྩལ་བ་དང་སྦྲགས། གློ་བུར་དུ་༸གོང་ས་མཆོག་གིས་ཚོགས་ཁང་གི་བང་རིམ་གསུམ་ཡོད་པ་དེས་གཟུགས་མེད་ཁམས་དང་གཟུགས་ཁམས། འདོད་ཁམས་བཅས་ཁམས་གསུམ་དྲན་གསོ་གཏོང་བྱུང་། ཁམས་གསུམ་པོའི་ནང་ཡོད་པའི་སེམས་ཅན་དེ་དག་ཚང་མས་བདེ་བ་འདོད་པ་བཞིན་བདེ་བ་བསྒྲུབ་རྒྱུའི་ཐོབ་ཐང་ཡོད། ཅེས་ཞལ་ཤོབ་དང་སྦྲགས་བཀའ་སློབ་སྩལ་བ་མ་ཟད། མུ་མཐུད་བཀའ་སློབ་སྩལ་དོན། ང་ཚོར་བདེ་སྡུག་གི་ཚོར་བ་གཉིས་མྱོང་བཞིན་ཡོད། ཅེས་སོགས་ཀྱི་བཀའ་སློབ་སྩལ་གྲུབ་བསྟུན་མང་ཚོགས་ཀྱི་དྲི་བར་བཀའ་ལན་སྩལ།
དེ་རྗེས་ཉིན་གུང་ལྗགས་སྨིན་སྐབས་མེག་སི་ཀོའི་གསར་ཤོག་གྲགས་ཅན་ལ་ཛ་རོ་ཨོ་སི་ཁ་ཝ་ཛོ་སི་ཨོབ་རི་ཕོར་མ་ Lazaro Rios Cavazos of Reforma གསར་འགོད་པའི་ཆེད་དོན་དྲི་བར་བཀའ་ལན་སྩལ། སྐབས་དེར་གསར་འགོད་པས་ལོ་གཉིས་གོང་བོད་རྒྱ་ཞི་མོལ་གནང་རྗེས་དེང་སྐབས་རྒྱ་ནག་དང་འབྲེལ་ལམ་བསྐྱར་གསོའི་ཐད་ཡར་རྒྱས་ཇི་འདྲ་ཡོད་སྐོར་དྲི་བ་ཞུས་པར་༸གོང་ས་མཆོག་གིས་བཟང་ཕྱོགས་ཀྱི་འགྱུར་བ་མེད་ཀྱང་། བཟང་ཕྱོགས་ཀྱི་འགྱུར་བ་འགྲོ་རྒྱུའི་གོ་སྐབས་དང་ནུས་པ་ཧ་ཅང་ཡོད་པ་དང་། ལྷག་པར་རྒྱ་ནག་འགོ་ཁྲིད་གསར་པ་ཚོས་རྒྱུ་མཚན་ལྡན་པ་དང་། དངོས་ཡོད་གནས་ཚུལ་ཐོག་ནས་སྲིད་བྱུས་ལག་བསྟར་བྱ་རྒྱུའི་རྟགས་མཚན་གསལ་པོ་ཡོད་སྐོར་བཀའ་ལན་སྩལ་རྗེས་༸གོང་ས་མཆོག་གིས་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་འཕྲོ་སྐྱོང་མཛད་ཡོད་པ་བཅས།།
