༢༠༡༣ ཟླ་ ༡༠ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༩ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨེ་མོ་རིའི་གཙུག་ལག་སློབ་ཁང་Emory University གི་གེ་ཇེན་དྲན་རྟེན་ཚོགས་ཁང་ Glenn Memorial Auditorium ཞིག་ཏུ་ཆིབས་སྒྱུར་བསྐྱངས་སྐབས་གཙུག་ལག་སློབ་གྲྭའི་གཙོ་འཛིན་སྐུ་ཞབས་ཇེམ་སི་ཝག་ནར་ President James Wagner མཆོག་གིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་༸གོང་ས་མཆོག་གིས་བོད་རྒྱ་མི་རིགས་འཆམ་མཐུན་གོང་འཕེལ་གྱི་ལས་གཞི་ China-Tibet Initiative དང་འབྲེལ་བའི་རྒྱ་རིགས་ཁག་གཅིག་ལ་བཀའ་སློབ་སྩལ་ཡོད། སྐབས་དེར་རྒྱ་རིགས་སློབ་ཕྲུག་གཅིག་གིས་ཐོག་མའི་འཆར་རྒྱ་རིགས་སློབ་མ་དྲུག་གིས་བོད་རིགས་དང་ཐུག་ནས་ཕན་ཚུན་འཆམ་མཐུན་གོང་འཕེལ་གཏོང་རྒྱུའི་ཁས་ལེན་བྱས་ཀྱང་ཕྱིས་སུ་རྒྱ་རིགས་སློབ་མ་ ༨༠ ཡིན་ལས་གཞི་དེར་རྒྱབ་སྐྱོར་ཞུས་ཡོད་སྐོར་དང་། ཕན་ཚུན་ངོ་ཤེས་ཐོག་ནས་དཀའ་རྙོག་སེལ་རྒྱུ་གལ་ཆེ་ཤོས་ཡིན་པ་དང་། རྒྱ་རིགས་དེ་དག་གིས་ལས་གཞི་དེས་སློབ་ཕྲུག་ནང་ཕན་ཚུན་དཀའ་རྙོག་སེལ་རྒྱུའི་ཐབས་ལམ་མིག་དཔེ་འོས་པ་ཞིག་ཆགས་རྒྱུ་ཡིན་སྐོར་༸གོང་ས་མཆོག་ལ་སྙན་སྒྲོན་ཞུས་ཡོད། སྐབས་དེར་༸གོང་ས་མཆོག་གིས་ལས་གཞི་འདི་དང་འབྲེལ་བའི་སློབ་མ་ ༥༠ ལྷག་ཙམ་འདུ་འཛོམས་བྱུང་བ་རྣམས་ལ་བཀའ་སློབ་སྩལ་དོན། ང་ཚོར་བཟང་ཕྱོགས་ཀྱི་བསྒྱུར་བ་གཏོང་རྒྱུའི་གོ་སྐབས་ནམ་བྱུང་སྐབས་གོ་སྐབས་དེ་ངེས་པར་དུ་བླང་ཐུབ་པ་དགོས།
ཕྱོགས་གཞན་ནས་དཀའ་ངལ་ཇི་ཙམ་ཆེ་ནའང་འཚེ་བ་མེད་པའི་ཐབས་ལམ་བརྒྱུད་ནས་དཀའ་ངལ་དེ་དག་སེལ་ཐུབ་པ་བྱེད་དགོས། ཞེས་བཀའ་སློབ་སྩལ་བ་དང་སྦྲགས། དེ་སྔ་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་རྒྱལ་ས་པེ་ཅིང་དུ་མའོ་ཙེ་ཏུང་གིས་གཙོས་རྒྱ་ནག་གི་ཆེས་མཐོའི་དཔོན་རིགས་ཚོ་དང་མཇལ་འཕྲད་གྲུབ་མཚམས་ཕྱི་ལོ་ ༡༩༥༥ ལོའི་དབྱར་དུས་སྐབས་བོད་དུ་ཕྱིར་ཆིབས་སྒྱུར་བསྐྱངས་སྐབས་ཐུགས་ནང་གདེང་ཚོད་དང་རེ་བ་ཧ་ཅང་འཁྲུངས་ཡོད་ཀྱང་།
དེ་རྗེས་ཕྱི་ལོ་ ༡༩༥༦ །༡༩༥༧ ལོར་བོད་མིའི་མངོན་འདོད་དང་བོད་མིའི་དངོས་ཡོད་གནས་ཚུལ་དང་མི་འཚམ་པའི་བཅོས་བསྒྱུར་གྱི་སྲིད་བྱུས་བཙན་དབང་འོག་ལག་བསྟར་བྱས་པར་བརྟེན་ཕྱི་ལོ་ ༡༩༥༩ ལོར་ལྷ་སར་བོད་མི་ཚོས་རྒྱ་ནག་གཞུང་ལ་ཞི་བའི་སྒེར་ལངས་བྱས་པར་བརྟེན་༸གོང་ས་མཆོག་བྲོས་བྱོལ་དུ་ཆིབས་སྒྱུར་བསྐྱངས་དགོས་ཐུག་པ་དང་། ཕྱི་ལོ་ ༡༩༨༠ ལོར་ཧུ་ཡོ་པང་སྐབས་གུ་ཡངས་སྲིད་བྱུས་ཐོག་རེ་བ་ཞིག་བྱུང་ཡང་མཐར་དེ་ཡང་མེད་པར་གྱུར་ཡོད། ཅེས་སོགས་ཀྱི་བཀའ་སློབ་སྩལ་བ་མ་ཟད། དབུ་མའི་ལམ་གྱི་སྲིད་བྱུས་ཀྱི་བྱུང་རིམ་སྐོར་བཀའ་སློབ་སྩལ། དེ་རྗེས་དྲི་བ་ཁག་གཅིག་ལ་བཀའ་ལན་སྩལ། སྐབས་དེར་རྒྱ་རིགས་ཤིག་གིས་བོད་རིགས་དང་རྒྱ་རིགས་སློབ་མ་ཚོས་ཕན་ཚུན་བློ་སྐྱེས་ལེན་རྒྱུ་ཇི་ཡོད་ཀྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ངོས་ནས་ཤེས་མ་སོང་། འོན་ཀྱང་གཙོ་ཆེ་ཤོས་ནི་བོད་མི་ཚོ་རྒྱ་མི་རིགས་ལ་ངོ་རྒོལ་བྱེད་མཁན་མིན། ཞེས་བཀའ་ལན་སྩལ་ཡོད།།
