༢༠༠༩ ཕྱི་ཟླ་ ༧ ཚེས་ ༢༩ རེས་གཟའ་ལྷག་པ།
ཕྱི་ལོ་ ༢༠༠༩ ཟླ་ ༧ ཚེས་ ༣ ནས་ཕྱི་ཟླ་ ༨ ཚེས་ ༧ བར་དུ་ཕྱི་རྒྱལ་ཡུལ་ཁག་དྲུག་ནས་སླེབས་པའི་བོད་རིགས་སློབ་ཕྲུག་གྲངས་ ༧༣ ལ་རྡ་སྟེང་བོད་ཁྱིམ་སློབ་གྲྭ་དང་བྱང་ཨ་རིའི་བོད་གཞུང་སྐུ་ཚབ་དོན་གཅོད་ཟུང་ནས་དབྱར་ཁའི་གུང་གསེང་དང་སྟབས་བསྟུན་རྡ་སྟེང་བོད་ཁྱིམ་དུ་བོད་པའི་ཡ་རབས་གོམས་གཤིས་རྣམས་སློབ་སྦྱོང་བྱེད་སླད་གོ་སྒྲིག་ཞུས་ཡོད་པར་མཉམ་ཞུགས་གནང་ཡོད། དེ་དག་ལ་རང་གཞུང་དཔལ་ལྡན་བཀའ་ཁྲི་མཆོག་ནས་གསུང་བཤད་གནང་རྒྱུའི་ལས་རིམ་ཞིག་གོ་སྒྲིག་ཞུས་པ་ལྟར་ཕྱི་ལོ་ ༢༠༠༩ ཟླ་ ༧ ཚེས་ ༢༨ གི་ཕྱེད་ཡོལ་ཆུ་ཚོད་ ༢།༣༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་སློབ་ཕྲུག་རྣམས་ལ་བཀའ་ཁྲི་མཆོག་ནས་གསུང་བཤད་གནང་གསལ།
ཁྱེད་རང་ཚོ་ལུང་པ་དང་སློབ་གྲྭ་གསར་པ་ཞིག་ལ་སླེབས་སྐབས་དཀའ་ལས་ཁག་པོ་ཡོད་ངེས་རེད། ཡིན་ནའང་ཁྱེད་རྣམས་བོད་པ་ཞིག་ཡིན་པའི་ཆ་ནས་རང་གི་མི་རིགས་དང་རིག་གཞུང་ལ་གཅེས་སྐྱོང་བྱེད་རྒྱུ་དེ་ནི་ལྡོག་ཏུ་མེད་པའི་ལས་འགན་ཞིག་རེད། དེ་མཚུངས་སོ་སོའི་ནང་མི་དང་སྐད་ཆ་ཤོད་སྐབས་ཀྱང་བོད་སྐད་རྒྱག་རྒྱུ་ཙམ་མ་ཟད། དུས་རྟག་ཏུ་བོད་མི་རིགས་ཀྱི་ཐུན་མོང་མ་ཡིན་པའི་ཡ་རབས་གོམས་གཤིས་བཟང་པོ་དེ་དག་རྒྱུན་འཛིན་བྱེད་རྒྱུ་ནི་ཤིན་ཏུ་གལ་ཆེན་པོ་ཡིན། དེ་བཞིན་བཙན་བྱོལ་བོད་གཞུང་དང་བཙན་བྱོལ་སྤྱི་ཚོགས་སྐོར་ལ་ཤེས་རྟོགས་བྱེད་དགོས་པ་ནི་ཧ་ཅང་གལ་ཆེན་པོ་ཡིན་སོགས་ཀྱི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བར་ལན་འདེབས་ཀྱང་གནང་བ་ཡོད་པ་བཅས་ཀྱི་གནས་བསྡུས་སུ།།
