༢༠༡༣ ཟླ་ ༡༠ ཚེས་ ༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༩ ཉིན་གངས་ཅན་སྐྱིད་གཤོངས་ཀྱི་ཉེ་འཁྲིས་དགའ་གདོང་གྲྭ་ཚང་གི་ཁང་པ་ཞིག་ནང་དང་བླང་ཐོག་གཞོན་སྐྱེས་བསྟན་འཛིན་འཇིགས་མེད་ལགས་དང་པཎ་ཆེན་བཟང་པོ་ལགས་གཉིས་ཀྱིས་འགན་ཁུར་འོག་གསར་འཛུགས་གནང་བའི་ (Physiotherapy) ཕྱི་བཅོས་གསོ་ཐབས་ཁང་དེ་བཞིན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་དར་སྐུད་གཅོད་འབྲེག་དང་འབྲེལ་དབུ་འབྱེད་གནང་སོང།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་མཆོག་དང་བདེ་ལེགས་སྨན་ཁང་གི་འགན་འཛིན་དང་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་གཙོས་གསར་འགོད་པ་བཅས་ཁྱོན་མི་གྲངས་ ༡༥ བརྒལ་བའི་དབུས་སུ་སྐུ་མགྲོན་གཙོ་བོ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་ལྷན་མར་མེ་ཞལ་ཕྱེ་གནང་གྲུབ་མཚམས་སྤྱི་འཐུས་ཟླ་བ་ཕུན་སྐྱིད་ལགས་དང་ཁོང་རྣམ་པ་གཉིས་ཀྱིས་རིམ་བཞིན་མཇལ་དར་སྒྲོན་འབུལ་ཞུས་རྗེས་གསོལ་ཇ་འབྲས་སིལ་ཕུལ།
དེ་ནས་ཁོང་རྣམ་གཉིས་ཀྱིས་རང་ཉིད་ངོ་སྤྲོད་དང་འབྲེལ་ལས་གཞི་དེའི་སྔ་ཕྱིའི་བརྒྱུད་རིམ་དང་དེ་ལྟར་གསར་དུ་འཛུགས་དགོས་པའི་དམིགས་ཡུལ་རྣམས་ངོ་སྤྲོད་ཞིབ་འགྲེལ་གནང་། དེ་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ཁོང་རྣམ་པ་གཉིས་ཀྱི་ལྷག་བསམ་རྣམ་དག་ཐོག་ནས་ཕྱི་བཅོས་གསོ་ཐབས་བརྒྱུད་ནས་ནད་གཞི་བཅོས་ཐབས་ཁང་ཞིག་གསར་འཛུགས་གནང་བར་བསྔགས་བརྗོད་ཞུ་རྒྱུ་ཡིན། དེ་བཞིན་ང་ཚོ་བོད་པའི་གཞོན་སྐྱེས་ཚོས་རང་ཉིད་ཀྱི་སློབ་སྦྱོང་བྱས་པའི་གྲུབ་འབྲས་སོ་སོའི་སྤྱི་ཚོགས་ནང་འདོན་ཐུབ་རྒྱུའི་ལྷག་བསམ་ཐོག་ནས་བསྒྲུབ་ཐུབ་ན། གཞུང་དང་འབྲེལ་ཡོད་བ་མེད་ལ་མ་ལྟོས་པར་སྤྱི་ཚོགས་ནང་ཕན་ཐོགས་ཆེན་པོ་ཡོང་ངེས་རེད། ཁྱེད་རྣམ་པ་གཉིས་ལ་ཕྱི་བཅོས་གསོ་ཐབས་ཁང་འཛུགས་ཡུལ་གྱི་ས་ཆ་ཡག་པོ་རག་འདུག གང་ལ་ཞེ་ན། ཉེ་འགྲམ་དུ་བདེ་ལེགས་སྨན་ཁང་དང་སྨན་ཁང་གི་འགན་འཛིན་སོགས་དང་འབྲེལ་བ་བྱ་རྒྱུ་ཡང་སྟབས་བདེ་པོ་ཡོད། དེ་རིང་ང་རང་སྒེར་ངོས་ནས་འདི་གར་བཅར་བ་ཞིག་ཡིན། དེ་རིང་ལས་གཞི་འདི་སྒོ་ཕྱེ་བ་ཙམ་མ་ཡིན་པར་མ་འོངས་པར་རྒྱུན་གནས་ཐུབ་པ་དགོས་རྒྱུ་ཧ་ཅང་གལ་ཆེན་པོ་རེད། སྤྱིར་བཏང་ང་ཚོའི་སྤྱི་ཚོགས་ནང་ལས་གཞི་ལས་སླ་པོའི་ཐོག་ནས་འགོ་འཛུགས་བྱེད་ཀྱི་ཡོད་ཀྱང་མཇུག་སྐྱོང་བྱ་རྒྱུ་ཁག་པོ་བྱེད་ཀྱི་འདུག གོང་དུ་འཕྲོད་བསྟེན་བཀའ་བློན་སོགས་ཀྱི་འགྲམ་དུ་བཅར་སྐོར་གསུངས་སོང། མུ་མཐུད་ཁོང་རྣམ་པའི་དྲུང་ནས་ལམ་སྟོན་ཞུས་ཏེ་ལས་གཞི་རྒྱུན་གནས་ཐུབ་པ་བྱ་རྒྱུ་ཧ་ཅང་གལ་ཆེན་པོ་རེད། ཅེས་གསུང་བཤད་གནང་ཡོད།
དེ་ནས་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་ཁོང་རྣམ་པ་གཉིས་ཀྱིས་གཙོས་གཞོན་སྐྱེས་ཚོས་ལས་དོན་སྤེལ་སྐབས་ང་ཚོའི་སྤྱི་ཚོགས་ནས་རྒྱབ་སྐྱོར་བྱེད་དགོས་རྒྱུ་གལ་འགངས་ཆེན་པོ་ཡིན་སྐོར་སོགས་ཀྱི་གསུང་བཤད་གནང་སྟེ་དབུ་འབྱེད་མཛད་སྒོ་གྲོལ་སོང།
