༢༠༡༣ ཟླ་ ༡༠ ཚེས་ ༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༢ རེས་གཟའ་ལྷག་པའི་སྔ་དྲོ་ཆུ་ཚོད་ ༩ ཐོག་བཀའ་ཤག་ཚོགས་ཁང་དུ་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་དི་ Mahatma Gandhi མཆོག་གི་སྐུའི་འཁྲུངས་སྐར་གྱི་ཉིན་མོ་ཐེངས་ ༡༤༤ སྲུང་བརྩི་ཞུ་བ་དང་སྟབས་བསྟུན། གསར་འགོད་པའི་དྲི་བ་ཞིག་དང་འབྲེལ་ནས་གཞིས་བཞུགས་བོད་རིགས་སྤུན་ཟླ་ཚོས་བོད་དོན་འཐབ་རྩོད་གནང་སྐབས་འཚེ་མེད་ཞི་བའི་ཐབས་ལམ་ཐོག་སྔར་རྒྱུན་བཞིན་ཆོད་སེམས་བརྟན་པོའི་ཐོག་ནས་ཤར་བསྐྱོད་གནང་ཆེད་འབོད་སྐུལ་ཞུས་ཡོད། དེ་ཡང་ཕྱི་ལོ་ ༢༠༠༧ ཟླ་ ༦ ཚེས་ ༡༥ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་སྐབས་ལོ་ལྟར་ཕྱི་ཟླ་ ༡༠ ཚེས་ ༢ ཉིན་བདག་ཉིད་ཆེན་པོ་གྷན་དི་མཆོག་ལ་གུས་འདུད་མཚོན་ཆེད་ཉིན་དེར་རྒྱལ་སྤྱིའི་འཚེ་མེད་ཞི་བའི་ཉིན་མོར་ Day of Non-violence སྲུང་བརྩི་ཞུ་རྒྱུའི་གྲོས་ཆོད་བཞག་ཡོད། སྲིད་སྐྱོང་མཆོག་གིས་མུ་མཐུད་གསུང་དོན། དེ་རིང་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་དི་མཆོག་གི་སྐུའི་འཁྲུངས་སྐར་གྱི་ཉིན་མོ་ཡིན་པར་བརྟེན་ང་ཚོས་བདག་ཉིད་ཆེན་པོ་ཁོང་ལ་སྙིང་ཐག་པ་ནས་གུས་འདུད་ཚད་མེད་ཞུ་རྒྱུ་མ་ཟད། རྒྱ་གར་གཞུང་མང་གཉིས་ཀྱིས་ད་བར་བོད་མི་ཚོར་རྒྱབ་སྐྱོར་དང་མཐུན་རྒྱུར་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། བོད་མི་ཚོས་འཚེ་མེད་ཞི་བའི་ལམ་ནས་བོད་དོན་འཐབ་རྩོད་ལམ་ལྷོང་ལྡན་པའི་ངང་རྒྱུན་ཁྱོངས་བྱེད་བཞིན་ཡོད་པ་མ་ཟད།

ང་ཚོས་དེ་རིང་གི་དུས་ཚིགས་ཁྱད་པར་ཅན་འདི་དང་སྟབས་བསྟུན་འཚེ་མེད་ཞི་བའི་ལམ་ལ་མུ་མཐུད་ཆོད་སེམས་བརྟན་པོས་རྒྱུན་སྐྱོང་བྱ་རྒྱུ་ཡིན། རྒྱལ་སྤྱིའི་གནས་སྟངས་ལ་གཞིགས་ན་ད་བར་རྒྱལ་ཁབ་བཞི་བཅུ་ལྷག་ཙམ་གྱིས་འཚེ་མེད་ཞི་བའི་ལམ་ནས་བདན་མཐའ་གསལ་ཐུབ་པ་བྱུང་ཡོད། དེར་བརྟེན་འཚེ་བ་མེད་པའི་ལམ་ལ་རྟེན་པའི་འཐབ་རྩོད་དེར་རྒྱལ་ཁ་ཐོབ་རྒྱུ་ཡིན་པའི་རྣམ་པ་གསལ་པོ་མཐོང་བཞིན་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ཉེ་ལམ་བཀའ་སློབ་ཕེབས་པའི་ནང་མགོན་པོ་གང་ཉིད་མཆོག་སྐུ་འཚོ་བཞུགས་སྐབས་དབུ་མའི་ལམ་གྱི་སྲིད་བྱུས་ཐོག་ནས་བོད་ཀྱི་གནད་དོན་སེལ་ཐུབ་རྒྱུ་ཡིན་པའི་བཀའ་སློབ་བཟང་པོ་ཕེབས་ཡོད། ངོས་ཀྱིས་གཞིས་བྱེས་བོད་མི་ཡོངས་ལ་བོད་དོན་བདེན་མཐའ་མ་གསལ་བར་འཐབ་རྩོད་དེ་འཚེ་མེད་ཞི་བའི་ཐབས་ལམ་རྒྱུན་སྐྱོང་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུང་སྟེ་བདག་ཉིད་ཆེན་པོ་གྷན་དི་མཆོག་གི་འཁྲུངས་སྐར་དང་རྒྱལ་སྤྱིའི་འཚེ་མེད་ཞི་བའི་ཉིན་མོ་སྲུང་བརྩི་གཟབ་རྒྱས་ཞུས་ཡོད།།