༢༠༡༣ ཟླ་ ༩ ཚེས་ ༢༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༢༠ རེས་གཟའ་པ་སངས་ཉིན་སྔ་དྲོ་དགུང་གྲངས་ ༩༠ ལ་སོན་པའི་བོད་ནང་ཏར་འཕྲིན་གསར་འཛུགས་གནང་མཁན་ཨིན་ཇིའི་མི་རིགས་སྐུ་ཞབས་རོ་བྷརཊ་ཕོཌ་མཆོག་(Robert W. Ford)འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བརྟེན། ཕྱི་ལོ་ ༢༠༡༣ ཟླ་ ༩ ཚེས་ ༢༦ ཉིན་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པའི་ཉིན་བརྒྱད་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཞིག་བོད་མི་མང་སྤྱི་འཐུས་སྨན་པ་མཁྱེན་རབ་རྒྱ་མཚོ་ལགས་ཀྱིས་སྒྲོགས་སྦྱང་གནང་བའི་ནང་འཁོད་དོན།
སྔོན་གླེང། བོད་གཞུང་དགའ་ལྡན་ཕོ་བྲང་གི་གཞུང་ཞབས་ཀྱི་མཚན་གནས་གནང་བའི་ཕྱི་གླིང་བ་ཐོག་མ་དང་། ཡུན་རིང་བོད་དོན་ཐོག་ཁ་ཞེ་གཉིས་མེད་ཀྱི་རྒྱབ་སྐྱོར་གནང་མཁན་སྐུ་ཞབས་རོ་བྷརཊ་ཕོཌ་ (Robert W. Ford) མཆོག་ད་ལམ་ཕྱི་ལོ་ ༢༠༡༣ ཟླ་ ༩ ཚེས་ ༢༠ ཉིན་དགུང་ལོའི་བབ་ཀྱིས་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག དམ་པ་ཁོང་དབྱིན་ཡུལ་ Staffordshire དུ་ཕྱི་ལོ་ ༡༩༢༣ ཟླ་ ༣ ཚེས་ ༢༧ ཉིན་སྐུ་འཁྲུངས་ཤིང།
དམག་ཆེན་གཉིས་པའི་སྐབས་དབྱིན་ཡུལ་ དང་རྒྱ་གར་ནང་རླུང་འཕྲིན་དང་ཏར་འཕྲིན་རྒྱང་སྲིང་འཕྲུལ་ཆས་ཀྱི་ ཕྱག་ལས་གནང་ཡོད་པ་དང་། ཕྱི་ལོ་ ༡༩༤༥ ལོར་ལྷ་སར་རྒྱ་གར་དབྱིན་གཞུང་གི་དོན་གཅོད་ཁང་དུ་རླུང་ འཕྲིན་དང་ཏར་འཕྲིན་རྒྱང་སྲིང་གི་ལས་དོན་དུ་ཞུགས་ཡོད། སྐབས་དེར་ཁོང་ལ་དགུང་གྲངས་ ༡༡ ཏུ་ཕེབས་པའི་༸རྒྱལ་དབང་སྐུ་ཕྲེང་བཅུ་ བཞི་པ་ཆེན་པོ་མཆོག་དང་མཇལ་འཕྲད་ཀྱི་གོ་སྐབས་དང་པོ་དེ་འཐོབ་ཡོད། ཕྱི་ལོ་ ༡༩༤༥ ལོ་མཇུག་ཏུ་ཁོང་སྒང་ཏོག་ཏུ་གནས་སྤོ་བྱས་ཡོད་པ་དང་།
ཕྱི་ལོ་ ༡༩༤༧ ལོར་རྒྱ་གར་རང་བཙན་ཐོབ་རྗེས་ཁོང་གི་དམིགས་བསམ་ལྟར་བོད་དུ་ཕྱིར་ལོག་བྱས་པས་བོད་གཞུང་གི་གཞུང་ཞབས་མཚན་གནས་ཐོག་བོད་ནང་རླུང་འཕྲིན་དང་ཏར་འཕྲིན་རྒྱང་སྲིང་ལས་ཁུངས་གསར་འཛུགས་ཀྱི་ལས་ གཞིའི་ཐོག་ལས་བཀོད་གནང་བ་བཞིན་བོད་ནང་རླུང་འཕྲིན་དང་ཏར་འཕྲིན་རྒྱང་ སྲིང་གི་ལས་གཞི་ཡོངས་རྫོགས་འགན་འཁུར་རྐང་བཞེས་གནང་སྟེ་བོད་ནང་ཏར་འཕྲིན་གསར་འཛུགས་གནང་བ་མ་ཟད། ཁོང་གིས་བོད་མི་ཁག་གཅིག་ལ་ཏར་འཕྲིན་འཛུགས་རྒྱུའི་ལས་གཞིའི་ཟབ་ སྦྱོང་ཡང་གནང་ཡོད།
ལྷ་སར་ལོ་གཅིག་ཞབས་ཕྱི་ཞུས་རྗེས་གཞུང་གི་བཀོད་མངགས་ལྟར་ལྷ་ས་དང་ཆབ་མདོ་དབར་རྒྱང་སྲིང་མཐུད་རྒྱུ་དང་། བོད་ས་ཡོངས་སུ་རྒྱང་སྲིང་འབྲེལ་མཐུད་ཡོང་ཆེད་ཁོང་སློབ་ཕྲུག་གསུམ་དང་ལྷན་དུ་ཆབ་མདོར་བསྐྱོད། ཕྱི་ལོ་ ༡༩༥༠ ལོར་རྒྱ་ནག་བཙན་འཛུལ་དམག་གིས་ཁོང་ལ་གསང་ཉུལ་དང་དམར་ཤོག་ ལ་འགལ་ཟླའི་དྲིལ་བསྒྲགས་བྱས་ལུགས་ཉེས་འཛུགས་ཀྱིས་འཛིན་བཟུང་བྱས་ཏེ་ལོ་ལྔ་ཙམ་བཙོན་འཇུག་གི་ཉེས་ཆད་བཏང་།
ཕྱི་ལོ་ ༡༩༥༤ ལོར་ཉེས་མེད་ཉེས་འཛུགས་ཀྱིས་ལོ་ ༡༠ བཙོན་འཇུག་གི་ཁྲིམས་ཐག་བཅད་ནའང་ཕྱི་ལོ་ ༡༩༥༥ ལོར་གློད་བཀྲོལ་བཏང་བ་དང་འབྲེལ་རྒྱ་ནག་ནས་ཕྱིར་འབུད་བྱས། ཕྱི་ལོ་ ༡༩༥༧ ལོར་ཁོང་རང་ཉིད་ཀྱི་ཉམས་མྱོང་དང་འབྲེལ་ནས་ ༼བོད་ནང་འཛིན་བཟུང་།༽ ཞེས་པའི་དེབ་གཅིག་བརྩམས་འགྲེམས་གནང་བ་དང། ཕྱི་ལོ་ ༡༩༩༠ ལོར་དེབ་དེ་རང་སླར་ཡང་སྤྱི་ནོར་༸གོང་ས་ ༸སྐྱབས་མགོན་ཆེན་པོ་མཆོག་གིས་ཆེད་བརྗོད་སྩལ་བ་དང་བཅས་དཔར་འགྲེམས་ཞུས།
ཕྱི་ལོ་ ༡༩༥༧ ལོར་དབྱིན་ཡུལ་གྱི་ཕྱི་སྲིད་ལས་ཁུངས་ཀྱི་ལས་བྱེད་ཁོངས་སུ་འཛུལ་ཞུགས་བྱས་པ་དང། ཕྱི་ལོ་ ༡༩༨༣ ལོ་བར་ Vietnam, Indonesia, U.S.A, Morocco, Angola, France, Sweden དང་། མཐའ་མ་སུད་སི་ཇི་ནི་ཝ་རུ་དབྱིན་ཇིའི་གཞུང་གི་གཞུང་ཚབ་བཅས་ཀྱི་འགན་འཁུར་ཞུས། ཕྱི་ལོ་ ༡༩༨༢ ལོར་ཁོང་གིས་གཟེངས་སུ་ཐོན་པའི་ལས་དོན་བསྒྲུབས་པར་བརྟེན་ནས་ Commander of the Order of the British Empire ཞེས་པའི་ཆེས་མཐོའི་གཟེངས་རྟགས་འཐོབ།
ཁོང་ནི་ Tibet Society ཞེས་འཛམ་གླིང་ནང་བོད་དོན་རྒྱབ་སྐྱོར་ཚོགས་པ་ཐོག་མ་དབུ་བརྙེས་མཁན་གྲས་ཤིག་ཡིན་པ་དང་། ད་ལམ་འདས་གྲོངས་སུ་མ་སོང་བར་ཚོགས་པ་དེའི་ཚོགས་གཞོན་མཚན་གནས་ཐོག་འགན་འཁུར་རྒྱུན་མཐུད་གནང་ཡོད་པ་དང་། བོད་དོན་ཐོག་རྩོམ་སྒྲིག་དང་གསུང་བཤད་སོགས་འཛམ་གླིང་ཕྱོགས་གང་སར་གནང་ཡོད། ཁོང་གིས་བོད་རང་བཙན་ཡིན་པའི་གནས་སྐབས་ཀྱི་དཔང་པོ་གཙོ་བོ་ཁོང་རང་ཡིན་སྐོར་ཐེངས་མང་གསུང་མྱོང་ཡོད། ཕྱི་ལོ་ ༡༩༩༦ ཟླ་ ༧ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་དབྱིན་ཡུལ་གྱི་ རྒྱལ་མོ་ Her Majesty Queen Elizabeth མཆོག་མཇལ་འཕྲད་མཛད་རྒྱུའི་ཐོག་གོ་སྒྲིག་ཞུ་སྒོ་ལེགས་ པར་ཞུས་ཡོད།
འདི་ལོ་ཟླ་ ༣ ཚེས་ ༢༡ ཉིན་དབྱིན་ལེནཌ་སྐུ་ཚབ་དོན་གཅོད་ཁང་གི་གོ་སྒྲིག་འོག་ཁོང་གི་གཉེན་ ཉེ་དང་དབྱིན་ཡུལ་ཁུལ་གནས་སྡོད་བོད་མི་རྣམས་ཀྱིས་སྐུ་ཞབས་ Robert Ford མཆོག་དགུང་ལོ་ ༩༠ ལ་ཕེབས་པའི་སྐྱེས་སྐར་སྔ་སྣུར་གྱིས་ཕྱི་ཟླ་ ༣ ཚེས་ ༢༣ ཉིན་སྲུང་བརྩི་ཞུས་ཡོད་པ་དང་། སྐབས་དེར་ཁོང་དེ་སྔོན་བོད་གཞུང་དགའ་ལྡན་ཕོ་བྲང་གི་གཞུང་ཞབས་གནང་མྱོང་བའི་དྲན་རྟེན་ཆེད་དུ་བོད་དངུལ་དངུལ་སྲང་ ༡༠༠ ཐམ་པ་ཕུལ་ཡོད་འདུག
འདི་ལོ་ཟླ་ ༤ ཚེས་ ༡༣ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་ཁོང་ལ་ Light of Truth Award ཞེས་པའི་གཟེངས་བསྟོད་ཕུལ་བ་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གི་ཕྱག་ནས་ཞུ་རྒྱུའི་གོ་སྐབས་འཐོབ་ཡོད། ཁོང་ལ་ཤུལ་ལུས་ནང་མི་ལོ་ ༥༥ རིང་གི་བཟའ་ཟླ་ Monica Tebbett ལགས་དང་། བུ་ ༢ ཕྲུ་གུའི་ཕྲུ་གུ་ ༣ བཅས་ཡོད། ཁོང་ནི་བོད་དང་བོད་མིར་དམིགས་བསལ་འབྲེལ་བ་ཡོད་ཐོག་བོད་དོན་ལ་ཁ་ཞེ་གཉིས་མེད་ཀྱི་རྒྱབ་སྐྱོར་དང་དངོས་སུ་ཕྱག་ལས་ཡུན་རིང་གནང་མཁན་གྱི་སྐྱེ་བོ་མཛད་རྗེས་དང་བཀའ་དྲིན་ཅན་ཞིག་ཡིན།
གྲོས་ཆོད།
སྐུ་གཤེགས་དེ་ཉིད་ཀྱི་མཛད་རྗེས་ལ་ཡི་རངས་ བསྔགས་བརྗོད་ཞུ་རྒྱུ་དང་། དམ་པ་ཁོང་གི་ཕུགས་འདུན་བཟང་པོ་རྣམས་ཡོངས་སུ་འགྲུབ་ཅིང། ཚེ་རབས་ཀུན་ཏུ་བདེ་ནས་བདེ་བར་བགྲོད་པའི་སྨོན་ལམ་ཤུགས་དྲག་ཏུ་ཞུ་རྒྱུ་བཅས་དང་། ཤུལ་ལུས་ལྟོས་བཅས་ནང་མི་རྣམས་ལ་ཐུགས་གསོའི་འཚམས་འདྲི་ཞུ་རྒྱུ་བཅས་ ཀྱི་གྲོས་ཆོད་དུ། ཞེས་སྒྲོགས་སྦྱངས་གནང་གྲུབ་བསྟུན་བོད་མི་མང་སྤྱི་འཐུས་རྣམ་པ་དང་བཀའ་བློན་རྣམ་པས་འདས་པོ་ཁོང་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་གནང་ཡོད་པ་བཅས།།
