༢༠༡༣ ཟླ་ ༩ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༢༢ ཉིན་ཇར་མན་གྲོས་ཚོགས་སྐབས་བཅོ་བརྒྱད་པའི་འོས་བསྡུའི་སྔོན་ཇར་མན་བོད་དོན་རྒྱབ་སྐྱོར་ཚོགས་པ་སོགས་ཚོགས་པ་གསུམ་གྱིས་ཇར་མན་གྲོས་ཚོགས་ནང་ཡོད་པའི་ཆབ་སྲིད་ཚོགས་པ་ཁག་ལྔ༌ལ་འོས་བསྡུའི་གོང་ཆབ་སྲིད་ཚོགས་པ་སོ་སོའི་བོད་དོན་སྐོར་ལངས་ཕྱོགས་དང་དེང་དུས་བོད་ཀྱི་གནས་སྟངས། བོད་ཀྱི་དཀའ་རྙོག་སེལ་ཐབས། རྒྱ་ནག་གཞུང་དང་འབྲེལ་ལམ་སྐབས་བོད་དོན་གླེང་སློང་བྱེད་དགོས་སྐོར་སོགས་ཀྱི་དྲི་བ་བཅུ་གཅིག་ཕུལ་ཡོད་པར་ཆབ་སྲིད་ཚོགས་པ་སོ་སོ་ནས་ལན་འདེབས་གནང་འདུག དེ་ཡང་གནད་དོན་དེའི་སྐོར་ཇར་མན་བོད་དོན་རྒྱབ་སྐྱོར་ཚོགས་པའི་དྲུང་ཆེ་མཆོག་གིས་བརྒྱུད་ལམ་ཁག་གཅིག་ནང་གསུང་དོན། སྤྱིར་བཏང་ཆབ་སྲིད་ཚོགས་པ་ཚང་མས་བོད་ཀྱི་དངོས་ཡོད་གནས་ཚུལ་ཞིབ་ཕྲ་ཤེས་ཀྱི་འདུག ང་ཚོས་དྲིས་ལན་དེ་དག་ལ་དཔྱད་ཞིབ་བྱས་ཏེ་སྤྱི་ཡོངས་ནས་བརྗོད་ན། ཁོང་ཚོ་ཚང་མའི་ལངས་ཕྱོགས་གཅིག་གྱུར་ལྟ་བུ་རེད་འདུག འོན་ཀྱང་ཡི་ཤུ་མང་གཙོ་ཚོགས་པ་དང་སྤྱི་ཚོགས་ཚོགས་པས་དྲི་བ་ཁག་གཅིག་ལ་ལན་འདེབས་དེ་ཙམ་གསལ་པོ་གནང་མི་འདུག སྤྱི་ཚོགས་མང་གཙོ་ཚོགས་པ་དང་རང་དབང་མང་གཙོ་ཚོགས་པ། ལྗང་ཁུ་ཚོགས་པ་བཅས་ནས་དྲི་བར་ལན་འདེབས་ཁ་གསལ་གནང་བ་ཙམ་མ་ཟད། ང་ཚོའི་རེ་འདོད་ལྟར་ལྷག་སྔར་བོད་དོན་ལ་རྒྱབ་སྐྱོར་བྱེད་རྒྱུའི་རྣམ་པ་བསྟན་འདུག དེ་བཞིན་གྲོས་ཚོགས་དང་སྲིད་གཞུང་གསར་པ་བཙུགས་ནས་ལོ་ཕྱེད་ཀ་ནས་ལོ་གཅིག་ནང་ང་ཚོས་ཆབ་སྲིད་ཚོགས་པ་ཚོར་སླར་ཡང་འབྲེལ་བ་ཞུས་ཏེ་ལན་འདེབས་གནང་བ་དེ་དག་ལག་བསྟར་ག་རེ་གནང་ཐུབ་ཡོད་མེད་ཚོགས་པ་སོ་སོར་སྐད་ཆ་དྲིས་རྩིས་ཡོད་སྐོར་གསུངས་འདུག་པ་བཅས། །
