༢༠༠༩ ཕྱི་ཟླ་ ༧ ཚེས་ ༢༤ རེས་གཟའ་པ་སངས།
ཕྱི་ལོ་ ༢༠༠༩ ཟླ་ ༧ ཚེས་ ༦ ཉིན་རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་༸རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་འཁོར་བསྒྱུར་གྱི་རྣམ་པར་རོལ་པ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་ ༧༤ ཕེབས་པའི་འཁྲུངས་སྐར་དུས་ཆེན་ཁྱད་པར་ཅན་གྱི་ཉིན་མོར་གངས་ལྗོངས་འཛིན་མའི་ཁྱོན་དུ་གནས་པའི་རྩམ་ཟན་སྐྱེ་བོ་མཆོག་དམན་མཐའ་དག་དང་། ལྷག་པར་བཙན་བྱོལ་དུ་གནས་པའི་བོད་མི། དེ་བཞིན་དྲང་བདེན་དང་ཞི་བདེར་དགའ་བའི་འཛམ་གླིང་མི་མང་ས་ཡ་མང་པོས་སྐུའི་འཁྲུངས་སྐར་རྟེན་འབྲེལ་གྱི་བྱེད་སྒོ་སྣ་ཚོགས་ཤིག་སྤེལ་གྱི་ཡོད་པ་དེ་བཞིན་ཨོ་སི་ཊོ་ལི་ཡའི་ནང་དུའང་༸གོང་ས་མཆོག་གི་སྐུའི་འཁྲུངས་ཉིན་མོ་སྲུང་བརྩི་ཞུ་བ་དང་སྦྲགས་རྒྱ་བོད་མཐུན་གྲོགས་ཚོགས་པ་གསར་དུ་འགོ་ཚུགས་པ། ཨོ་སི་ཊོ་ལི་ཡའི་གཞུང་མང་གཉིས་ནས་དེར་གནས་སྡོད་བོད་མི་རྣམས་ལ་རྒྱབ་སྐྱོར་གང་ལེགས་གནང་བར་ཐུགས་ཆེ་ཞུའི་མཛད་སྒོ་ཚོགས་ཡོད་པ་རེད།
དེ་ཡང་མཛད་སྒོར་སྐུ་མགྲོན་ཨོ་སི་ཊོ་ལི་ཡར་བཅའ་བཞུགས་བོད་གཞུང་སྐུ་ཚབ་དོན་གཅོད་ཨ་ཏི་ཤ་ལགས་དང་། ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་སྐུ་ཞབས་ Colleen Hartland and Ms Jenny Mikakos,Mr Frank Ruanje དེ་བཞིན་རྒྱ་ནག་མང་གཙོའི་ལས་འགུལ་ཚོགས་པའི་ཚོགས་མི་ member of the Coalition of the Chinese Democratic Movement in Melbourne, Tian An Mien Times ཞེས་པའི་རྒྱ་ཡིག་ཚགས་དཔར་གྱི་སྤྱི་ཁྱབ་རྩོམ་སྒྲིག་པ། ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པ་ཁག་བཅས་ནས་མཛད་སྒོར་བཅར་ཡོད་པ་རེད། ཐོག་མར་དགེ་བཤེས་དཀོན་མཆོག་ཚེ་རིང་ལགས་ཀྱི་ཞལ་འདོན་དབུ་ཚུགས་ཀྱིས་དེར་བཞུགས་གྲྭ་བཙུན་རྣམས་ནས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་པའི་གསོལ་འདེབས་སྨོན་ལམ་ཞུས་གྲུབ་མཚམས་རྟེན་འབྲེལ་མཚོན་སླད་བོད་ཆོལ་ཁ་གསུམ་གྱི་གཞས་སྣ་ཁག་ཀྱང་འཁྲབ་སྟོན་ཞུས།
དེ་རྗེས་ཝིག་ཊོ་རི་ཡའི་བོད་མི་ཚོགས་པའི་འགོ་ཁྲིད་བསམ་གྲུབ་ཚེ་རིང་ལགས་དང་དྲུང་ཆེ་སྐལ་བཟང་དབང་མོ་ལགས་གཉིས་ཀྱིས་མཛད་སྒོ་དབུ་འཛུགས་གནང་ཐོག་དེར་བཅར་བ་རྣམས་ལ་བཀྲིས་བདེ་ལེགས་ཀྱི་འཚམས་འདྲི་ཞུས་པ་དང་ཆབས་ཅིག་མཛད་རིམ་རྣམས་སྒྲོགས་སྦྱང་ཞུས་བསྟུན་གསུང་གསལ། ༸གོང་ས་༸སྐྱབས་མགོན་ཆེན་པོ་མཆོག་ནས་བོད་གངས་ཅན་ལྗོངས་ཀྱི་ཁྱད་པར་ཅན་གྱི་ཆོས་དང་རིག་གཞུང་ད་བར་འཛིན་སྐྱོང་གནང་བ་མ་ཟད། འགྲོ་བ་མིའི་རིན་ཐང་གོང་སྤེལ་གཏོང་རྒྱུར་སྐུ་ངལ་འཛད་མེད་བསྐྱོན་དང་སྐྱོན་མུས་ཡིན་པ་ནི་འཛམ་གླིང་འདིར་གནས་པའི་སྐྱེ་བོ་ཀུན་གྱི་མཐོང་གསལ་ཡིན། དེ་བཞིན་རྒྱ་གར་གཞུང་ནས་བོད་མི་རྣམས་སྐྱབས་བཅོལ་དུ་ལོ་ ༥༠ རིང་གནས་སྡོད་ཆོག་པ་ཙམ་མ་ཟད་སྔ་བར་ཕྱི་གསུམ་དུ་ཐུགས་ཁུར་གནང་བ་ཐུགས་རྗེ་ཆེ་ཞུའི་གསུང་བཤད་གྲུབ་མཚམས་ཨོ་སི་ཊོ་ལི་ཡའི་འཐུས་མི་སྐུ་ཞབས་ Jenny Mikakos ལགས་ནས་གསུང་བཤད་གནང་དོན།
ང་རང་མཛད་སྒོར་མཉམ་ཞུགས་བྱེད་རྒྱུའི་མགྲོན་ཤོག་གནང་བར་ཐུགས་རྗེ་ཆེ་ཞུ་རྒྱུ་མ་ཟད། རང་ཉིད་དང་ཨོ་སི་ཊོ་ལི་ཡའི་བོད་ཀྱི་གྲོགས་པོའི་ཚོགས་པ་དབར་འབྲེལ་ལམ་ཆེན་པོ་ཡོད། རང་ཉིད་སྒེར་ནི་སྤྱིར་འགྲོ་བ་མིའི་ཐོབ་ཐང་ལ་གུས་བརྩི་ཞུས་མཁན་ཞིག་ཡིན་པ་དང་། ཡང་སྒོས་བོད་ཀྱི་གནད་དོན་ཐོག་བསམ་ཤེས་བྱེད་མཁན་ཡང་ཡིན་སྐོར་སོགས་ཀྱི་འགྲེལ་བརྗོད་གནང་ཡོད། སྐུ་ཚབ་དོན་གཅོད་ཨ་ཏི་ཤ་ལགས་ཀྱིས་མཛད་སྒོར་ཕེབས་པའི་སྐུ་མགྲོན་བོད་དོན་རྒྱབ་སྐྱོར་ཚོགས་པ་ཁག་དང་། ཨོ་སི་ཊོ་ལི་ཡའི་ཆབ་སྲིད་ཚོགས་པ་རྣམས་ཀྱི་དཔལ་འབྱོར་དང་དུས་ཚོད་སོགས་བེད་སྤྱད་དེ་འདི་ལ་ཆེད་ཕེབས་གནང་བར་ཐུགས་རྗེ་ཆེ་ཞུའི་གསུང་བཤད་ཀྱང་གནང་བ་དང་ཆབས་ཅིག་རྒྱ་བོད་མཐུན་གྲོགས་ཚོགས་པ་འགོ་འབྱེད་དང་། དེ་བཞིན་ཚོགས་པའི་འཐུས་མི་རྣམས་ལ་ཚོགས་པ་གཉིས་དབར་གྱི་འབྲེལ་བ་ལམ་ལྷོང་ཡོང་སླད་ཁ་བཏགས་ཀྱང་གནང་བ་བཅས་ཀྱི་གནས་བསྡུས་སུ།
