༢༠༡༣ ཟླ་ ༩ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་ཁུལ་དུ་མཛད་འཕྲིན་ཉིན་མཐའ་མའི་སྐབས་ཇར་མ་ནིའི་གྲོང་ཁྱེར་ཧ་ནོ་ཝར་རྟེན་གཞི་བྱས་པའི་ཝི་ཏི་ནམ་ནང་པའི་དགོན་པ་ཝེན་གྷི་ཡག་ཝི་ཏི་ནམ་ Vien Giac དུ་ཆིབས་སྒྱུར་བསྐྱངས་ཏེ་བཀའ་སློབ་སྩལ་དོན། ངོས་རང་ཝི་ཏི་ནམ་ནང་པའི་དགོན་པ་འདིར་བཅར་རྒྱུ་བྱུང་བར་ཧ་ཅང་དགའ་པོ་བྱུང། ལོ་རྒྱུས་ཀྱི་ཐོག་སྟོན་པ་སངས་རྒྱས་བཅོམ་ལྡན་འདས་ཀྱི་རྗེས་འབྲང་པའི་ཁྲོད་ནས་པཱ་ལིའི་སྲོལ་རྒྱུན་འཛིན་མཁན་རྣམས་བསླབ་པ་རྒན་གྲས་སུ་རྩི་བཞིན་ཡོད་པ་དང་། ལེགས་སྦྱར་གྱི་སྲོལ་རྒྱུན་འཛིན་མཁན་ཁོངས་ནས་རྒྱ་ནག་དང་། ཝེ་ཏི་ནམ། ཀོ་རི་ཡ། ཉི་ཧོང་བཅས་བསླབ་པ་རྒན་པའི་གྲས་ཆགས་ཡོད། བོད་ནང་དུ་ནང་ཆོས་ཕྱིས་སུ་དར་བར་བརྟེན་ང་ཚོ་སློབ་ཕྲུག་གཞོན་པ་ཡིན་པའི་ཆ་ནས་བསླབ་པ་རྒན་པ་ཚོར་གུས་བརྩི་ཞུ་གི་ཡོད། སྟོན་པ་མྱ་ངན་ལས་འདས་ནས་ལོ་ངོ་ ༢༥༠༠ ལྷག་ཕྱིན་ཟིན་ནའང་འཛམ་གླིང་ས་ཕྱོགས་གང་སར་ཡོད་པའི་སློབ་མ་རྣམས་ཀྱིས་སྟོན་པའི་གསུང་ཉམས་སུ་ལེན་བཞིན་ཡོད། འདི་ནི་དགའ་སྤོབས་སྐྱེ་འོས་པ་ཞིག་ཡིན།
དུས་རབས་ ༢༡ ནང་ཕྱི་དངོས་པའི་འཕྲུལ་རིགས་ཐོག་ཧ་ལས་པའི་ཡར་རྒྱས་ཕྱིན་ཡོད་ཀྱང་དེས་ང་ཚོ་རྩ་མེད་བཟོ་རྒྱུའི་རྒྱུར་ཡང་འགྲོ་སྲིད། ནང་སེམས་རྒྱུད་ལ་ཞི་བདེ་ཐོབ་ཆེད་ང་ཚོས་ནང་སེམས་ཀྱི་རིན་ཐང་ལ་དོ་སྣང་མང་ཙམ་སྤྲོད་དགོས། དེ་ལྟར་བྱུང་བ་ཡིན་ན་ང་ཚོས་ཕྱི་དངོས་པོའི་འཛུགས་སྐྲུན་དེ་མཐུན་ཕྱོགས་སུ་སྤྱོད་ཐུབ། ཝེ་ཏི་ནམ་དམག་འཁྲུག་སྐབས་དེང་དུས་ཀྱི་མཚོན་ཆ་བེད་སྤྱོད་བྱས་པར་བརྟེན་མི་མང་ཚོས་དཀའ་སྡུག་ཚད་མེད་མྱངས་དགོས་བྱུང་ཡོད།
དེང་སང་འཛམ་གླིང་གི་ས་ཕྱོགས་གང་སར་ཞི་བདེ་དོན་གཉེར་ཤུགས་ཆེ་བྱས་པ་ལས་འཚེ་བར་མི་འདོད་པའི་རྣམ་འགྱུར་ཤུགས་ཆེ་འཐོན་བཞིན་ཡོད། དམག་འཁྲུག་དང་དྲག་སྤྱོད་ལ་ངོ་རྒོལ་གྱི་ལས་འགུལ་སྤེལ་ཤུགས་ཆེ་རུ་ཕྱིན་ཡོད། ཆོས་ལུགས་ཚང་མས་བྱམས་པ་དང། བརྩེ་བ། བཟོད་བསྲན། བསླབ་ཁྲིམས་སྲུང་རྒྱུ་དེ་དག་ད་ལྟའི་དུས་སྐབས་འདིར་འབྲེལ་བ་ཆེན་པོ་ཆགས་ཡོད། དེར་བརྟེན་འཛམ་གླིང་ནང་ཞི་བདེ་ཡོང་ཆེད་ཆོས་ལུགས་ཚང་མར་འགན་འཁྲི་ཡོད་པ་མ་ཟད། ཆོས་ལུགས་ཕན་ཚུན་དབར་མཐུན་སྒྲིལ་དང་གུས་བརྩི་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
བཅོམ་ལྡན་འདས་ཀྱིས་རྟེན་འབྲེལ་ལ་གཞི་བཅོལ་ནས་བདེན་བཞིའི་རྣམ་གཞག་གསུངས་ཡོད། ལེགས་སྦྱར་སྐད་ཡིག་ནང་གསུངས་པའི་ནང་ཆོས་ཉམས་ལེན་པ་ཚོས་ཤེ་རབ་སྙིང་པོ་འདོན་སྲོལ་ཡོད། ཤེས་རབ་སྙིང་པོའི་ནང་གཟུགས་སྟོང་པའོ། སྟོང་པ་ཉིད་གཟུགས་སོ། ཞེས་གསུངས་ཡོད། ནང་པ་སངས་རྒྱས་པས་སྡུག་བསྔལ་གྱི་རྩ་བ་མ་རིག་པ་གསུངས་ཡོད། སྟོན་པས་གསུངས་པའི་སྟོང་པ་ཉིད་ཅེས་པ་དེས་གང་ཡང་མེད་པའི་གོ་དོན་མིན་པར་ཆོས་རྣམས་རང་བཞིན་གྱི་གྲུབ་པས་སྟོང་བ་ཡིན་པའི་དོན་ཡིན།
སྟོན་པ་སངས་རྒྱས་བཅོམ་ལྡན་འདས་ཀྱིས་གསུང་པའི་རྟེན་འབྲེལ་གྱི་རྣམ་གཞག་ལ་བསམ་བློ་བཏང་ནས་གོ་བ་རྙེད་སྐབས་མ་རིག་པའི་བློ་ཤུགས་ཆུང་དུ་ཕྱིན་ནས་ཆོས་རྣམས་ཀྱི་གནས་ལུགས་མཐར་ཐུག་རྟོགས་ཐུབ་རྒྱུ་ཡིན། ཞེས་སོགས་ཀྱི་བཀའ་སློབ་སྩལ་གྲུབ་མཚམས་དྲི་བ་ཁག་གཅིག་ལ་བཀའ་ལན་སྩལ། དེ་རྗེས་༸གོང་ས་མཆོག་ཧ་ནོ་ཝར་གནམ་ཐང་བརྒྱུད་རྒྱ་གར་དུ་ཆིབས་སྒྱུར་བསྐྱངས་ཡོད།
