༢༠༡༣ ཟླ་ ༩ ཚེས་ ༡༩ རེས་གཟའ་ཕུར་བུ།
༄༅། །ཡུ་རོབ་མཐུན་ཚོགས་དང་ཇར་མ་ནི་ལ་སོགས་པའི་རྒྱལ་ཁབ་ཁག་གཅིག་གིས་སྐུ་ཚབ་རྣམས་ནས་ཕྱི་ལོ་ ༢༠༡༣ ཟླ་ ༩ ཚེས་ ༡༧ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱ་ནག་གཞུང་གིས་བོད་ནང་ལ་དྲག་གནོན་དང་། ལྷག་པར་བོད་མིས་རང་ལུས་མེར་སྲེག་སྐོར་གྱི་གནད་དོན་ཐོག་ཐུགས་འཚབ་ཀྱི་རྣམ་པ་ཤུགས་ཆེ་བཏོན་པ་དང་སྦྲགས། རྒྱ་ནག་གཞུང་གིས་མང་ཚོགས་ཀྱི་སྨྲ་བརྗོད་དང་འདུ་འཛོམས་རང་དབང་སོགས་ལ་བརྩི་བཀུར་ཞུ་དགོས་ཀྱི་ཡོད་པ་མ་ཟད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་མཆོག་ཁུལ་དེར་འཚམས་གཟིགས་ཆེད་གཏོང་དགོས་པའི་སྐུལ་མ་ཞུས་འདུག
དེ་ཡང་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐོག་གོང་ཚེས་ཉིན་མཉམ་འབྲེལ་རྒྱལ་ཚོགས་ཀྱི་ཐུགས་སྣང་དགོས་པའི་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་ཁག་གཅིག་གི་ཐོག་ཚོགས་མི་རྒྱལ་ཁབ་སོ་སོའི་སྐུ་ཚབ་དང་། གཞུང་འབྲེལ་མ་ཡིན་པའི་སྐུ་ཚབ་རྣམས་ཀྱིས་གསུང་བཤད་གནང་སྐབས། ཡུ་རོབ་མཐུན་ཚོགས་ཀྱི་སྐུ་ཚབ་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང། ལྷག་པར་བོད་མི་གནས་སྡོད་ས་ཁུལ་དང་ཤིན་ཅང་སོགས་ཀྱི་ནང་འབྱུང་བཞིན་པའི་ཞི་རྒོལ་ལ་དྲག་གནོན་བྱེད་བཞིན་པའི་གནད་དོན་ཐོག་བློ་འཚབ་ཤུགས་ཆེ་ཡོད་སྐོར་གསུངས་པ་དང་ཆབས་ཅིག རྒྱ་ནག་གཞུང་གི་ལྐོག་ཟ་རུལ་སུངས་ལ་གདོང་ལེན་དང་ཁྲིམས་ལུགས་དབང་སྒྱུར་གྱི་གནས་བབ་སྲ་བརྟན་བཏང་བ་དང་དུས་མཚུངས་ཡུལ་དེའི་ནང་གྲངས་ཉུང་མི་རིགས་ཀྱི་སྨྲ་བརྗོད་རང་དབང་དང་འདུ་འཛོམས་རང་དབང་སོགས་ཡར་རྒྱས་གཏོང་དགོས་ཀྱི་རེད། ཅེས་གསུངས་འདུག
དེ་བཞིན་སྐབས་དེར་ཇར་མན་གཞུང་གི་སྐུ་ཚབ་ཀྱིས་ཉེ་ལམ་རྒྱ་གཞུང་ནས་བོད་མི་ཁག་གཅིག་ལ་རང་ལུས་མེར་སྲེག་དང་འབྲེལ་ཡོད་བསྙད་འདོགས་ཀྱིས་སྲོག་ཐོག་ཉེས་ཆད་ཧ་ཅང་ལྗིད་པོ་འགལ་བའི་དོན་གནད་ཐད་ཇར་མན་ངོས་སེམས་འཚབས་ཧ་ཅང་ཆེན་པོ་བྱེད་བཞིན་ཡོད། ང་ཚོས་རྒྱ་གཞུང་ལ་འགྲོ་བ་མིའི་ཐོབ་ཐང་ནང་གི་ཡོངས་ཁྱབ་གསལ་བསྒྲགས་ནང་འཁོད་པའི་འབྲུ་དོན་དང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་འཁོད་པ་བཞིན་རང་ཉིད་ཀྱི་མི་མང་དབར་གྱི་འགྲོ་བ་མིའི་གཞི་རྩའི་ཐོབ་ཐང་ལ་བརྩི་བཀུར་དགོས་པ་དང་། ལྷག་པར་བོད་མི་ཚོའི་ཆོས་དད་རང་དབང་ལ་གུས་བརྩི་ཞུས་པའི་ཐོག་བོད་མི་རྣམས་ཀྱི་རང་ལུས་མེར་སྲེག་ལ་འཇུག་དགོས་པའི་རྒྱུ་རྐྱེན་གཙོ་བོ་ཇི་ཡིན་གསལ་རྟོགས་ཐུབ་པ་བྱས་ཏེ་དེ་དག་རྩ་བ་ནས་སེལ་དགོས་པའི་འབོད་སྐུལ་བྱ་རྒྱུ་ཡིན།
དེ་བཞིན་གནད་དོན་དང་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་མཆོག་མི་རིང་བར་རྒྱ་ནག་ལ་འཚམས་གཟིགས་སུ་ཕེབས་ཐུབ་རྒྱུའི་ཆེད་རྒྱ་གཞུང་ནས་ཆོག་མཆན་གནང་སྐྱོང་ཡོང་བའི་འབོད་སྐུལ་མུ་མཐུད་ནས་ཞུ་རྒྱུ་ཡིན་ཞེས་གསུངས་འདུག གཞན་ཡང་ཨ་རི་གཞུང་གི་སྐུ་ཚབ་ངོས་ནས་རྒྱ་གཞུང་གིས་བོད་མི་དང་ཡུ་གུར་མི་རིགས་ཀྱི་ཆོས་དང་རང་དབང་ལ་དྲག་གནོན་དང་། ལྷག་པར་དྲ་རྒྱ་དང་གསར་འགོད་རང་དབང་ལ་དྲག་གནོན་བྱེད་བཞིན་པའི་གནད་དོན་གླེང་སློང་གནང་འདུག་པ་མ་ཟད། ཅེཀ་སྤྱི་མཐུན་རྒྱལ་ཁབ་དང་དབྱིན་ཡུལ། ཨོ་སི་ཊེ་རི་ཡ་སྐུ་ཚབ་རྣམས་ཀྱི་དེ་མཚུངས་གསུང་བཤད་གནང་བ་དང་ཆབས་ཅིག་ངལ་རྩོལ་བསྒྱུར་བཀོད་ཀྱི་ལམ་ལུགས་ཡང་མེད་པ་བཟོ་དགོས་པའི་སྐུལ་མ་ཡང་ཞུས་ཏེ་ཚོགས་འདུ་དེའི་ཐོག་རྒྱལ་ཚོགས་ཀྱི་ངོས་འཛིན་ཡོད་པའི་གཞུང་འབྲེལ་མ་ཡིན་པའི་ཚོགས་པའི་སྐུ་ཚབ་ཁག་ནས་གཅིག་ཀྱང་འབྲེལ་ཡོད་གསུང་བཤད་གནང་ཡོད་པ་ལྟར།
Helsinki foundation for Human rights ཞེས་པའི་ཚོགས་པའི་སྐུ་ཚབ་ཏུ་བོད་མི་ངག་དབང་ཆོས་འཕེལ་ལགས་ཀྱིས་མཉམ་ཞུགས་དང་འབྲེལ་གསུང་བཤད་གནང་སྐབས། འགྲོ་བ་མིའི་ཐོབ་ཐང་གི་ཚོགས་ཆུང་གི་ཚོགས་གཙོ་མཆོག་ད་ལྟ་ཡང་རྒྱ་ནག་ཏུ་ཕེབས་ཐུབ་མེད་པ་མ་ཟད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འདྲ་མིན་གྱི་སྐུ་ཚབ་བཅུ་གཉིས་ནས་ད་བར་རྒྱ་གཞུང་ལ་རྒྱལ་ཁབ་དེའི་ནང་ཕེབས་སྐྱོད་ཆོག་པའི་འབོད་སྐུལ་ཞུས་ཡོད་ཀྱང་། ད་བར་རྒྱ་ནག་གིས་བཟང་ཕྱོགས་ཀྱི་བརྡ་ལན་སྤྲད་མེད་ལུགས་འགྲེལ་བརྗོད་གནང་བ་དང་འབྲེལ། བོད་མི་གཞས་པ་ཤ་བོ་བསྟན་འཛིན་ལགས་འཛིན་བཟུང་དང་སྒྲོལ་མ་སྐྱབས་ལགས་སུ་སྲོག་ཐོག་ཉེས་ཆད། ཤར་རོང་པོ་དགོན་པ་སྒོ་བརྒྱབ་པ། ༸གོང་ས་མཆོག་གི་སྐུའི་འཁྲུངས་སྐར་སྲུང་བརྩི་ཞུ་མཁན་ལ་མེ་མདའ་བརྒྱབ་པ། རྒྱ་གཞུང་གི་གཏེར་ཁ་སྔོག་འདོན་གྱི་ལས་གཞིར་ངོ་རྒོལ་བྱེད་མཁན་བོད་མི་རྣམས་ལ་དྲག་གནོན་བྱས་པ་སོགས་བོད་ནང་གི་གནས་ཚུལ་ཁག་གཅིག་ལུང་འདྲེན་གནང་འདུག་པ་བཅས།།
