༢༠༡༣ ཟླ་ ༩ ཚེས་ ༡༧ རེས་གཟའ་མིག་དམར།
༄༅། །རྒྱ་ནག་གཞུང་གིས་རྫ་དབོན་པོ་དགོན་པའི་དགེ་འདུན་པ་གསུམ་ལ་ལོ་གཅིག་ནས་བཞིའི་བར་བཙོན་འཇུག་ཁྲིམས་ཆད་བཏང་འདུག བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༢ ཟླ་ ༡༠ དང་ ༡༢ བཅས་སྔ་ཕྱིར་ཟི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་རྫ་ཆུ་ཁ་རྫ་སྨད་ཤང་། རྫ་དབོན་པོ་དགོན་དགའ་ལྡན་བཤད་སྒྲུབ་དར་རྒྱ
ས་གླིང་གི་དགེ་འདུན་པ་ ༩ འཛིན་བཟུང་བྱས་ཏེ་ད་བར་ར་རྔ་དང་རོང་བྲག་བཅས་སུ་བཙོན་འཇུག་བཀག་ཉར་བྱས་ཡོད་པ་མ་ཟད། ཟླ་འདིའི་ཕྱི་ཚེས་ ༩ ཉིན་སྔ་ལོའི་ཕྱི་ཟླ་ ༡༠ པའི་ནང་འཛིན་བཟུང་བྱས་པའི་དགེ་འདུན་པ་ཆོས་དར་ལགས་སུ་ལོ་ ༡ ཁྲིམས་ཆད་དང་། ཟླ་འདིའི་ཕྱི་ཚེས་ ༡༡ ཉིན་སྔ་ལོའི་ཕྱི་ཟླ་ ༡༢ པའི་ཚེས་ ༡༥ ཉིན་འཛིན་བཟུང་བྱས་ཏེ་དགེ་འདུན་པ་བསོད་ནམས་ཆོས་དར་ལགས་དང་བསོད་ནམས་མགོན་པོ་ལགས་གཉིས་ལ་ལོ ༤ རེའི་བཙོན་འཇུག་ཁྲིམས་ཐག་བཅད་འདུག
དེ་བཞིན་རང་ལོ་ ༢༧ ཡིན་པའི་སྐྱབས་བྷེ་ལགས་དང་། རང་ལོ་ ༢༥ ཡིན་པའི་བློ་བཟང་མི་འཁྲུགས་ལགས་གཉིས་ལ་ཁག་ཐེག་དཔང་མི་བཞག་སྟེ་གློད་བཀྲོལ་ཐོབ་ཡོད་ཀྱང་། ལོ་ ༣ རིང་ཆབ་སྲིད་ཀྱི་ཁེ་དབང་དང་ཐོབ་ཐང་མེད་པར་བཟོས་ཡོད་འདུག ཟླ་འདིའི་ཕྱི་ཚེས་ ༡༡ ཉིན་དེ་སྔོན་འཛིན་བཟུང་བཀག་ཉར་བྱས་པའི་དགེ་འདུན་པ་ ༩ ལས། རང་ལོ་ ༢༢ ཡིན་པའི་བློ་བཟང་མཁས་གྲུབ་ལགས་དང་། རང་ལོ་ ༢༠ ཡིན་པའི་བློ་བཟང་ནོར་བུ་ལགས། རང་ལོ་ ༡༩ ཡིན་པའི་བློ་བཟང་དབྱིག་གཉེན་ལགས། རང་ལོ་ ༢༤ ཡིན་པའི་བློ་བཟང་དགེ་འདུན་བཅས་མི་ ༤ གློད་བཀྲོལ་བཏང་ཡོད་འདུག
