༢༠༡༣ ཟླ་ ༩ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༣ ཉིན་རྡ་ས་གངས་སྐྱིད་བདེ་ལེགས་སྨན་ཁང་གི་ཡང་སྟེང་དུ་བདེ་ལེགས་སྨན་ཁང་གི་གོ་སྒྲིག་ཐོག་སྤྱི་ཚོགས་འཕྲོད་བསྟེན་ཟབ་སྦྱོང་ཐེངས་ཉེར་བརྒྱད་པ་མཇུག་སྒྲིལ་གནང་ཡོད། དེ་ཉིན་ཆུ་ཚོད་ ༡ ཐོག་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་སྐུའི་ཕྱི་ལུགས་སྨན་པ་ས་འདུ་ཚང་ཚེ་བརྟན་ལགས། བོད་མི་མང་སྤྱི་འཐུས་དང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས་གཙོས་བདེ་ལེགས་སྨན་ཁང་གི་སྨན་པ་དང་སྨན་ཞབས་པ་ལས་བྱེད་རྣམ་པ། དགོན་པ་ཁག་ནས་ཟབ་སྦྱོང་ནང་མཉམ་ཞུགས་དགེ་འདུན་པ་བཅས་ལྷན་འཛོམས་ཐོག་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས་བོད་པའི་སྤྱི་ཚོགས་ནང་འཕྲོད་བསྟེན་ཡར་རྒྱས་འགྲོ་བཞིན་པ་དང་དགོན་སྡེ་ཁག་གཅིག་ནས་སྤྱི་ཚོགས་འཕྲོད་ལས་ཟབ་སྦྱོང་དགོས་པའི་འབོད་སྐུལ་བྱུང་བ་བཞིན་གནང་ཡོད་སྐོར་ངོ་སྤྲོད་གསུང་བཤད་གནང་། དེ་རྗེས་ཟབ་ཁྲིད་པ་གཙོ་བོ་འགན་བཞེས་བདེ་ལེགས་སྨན་ཁང་གི་སྤྱི་ཚོགས་འཕྲོད་བསྟེན་གྱི་སྨན་ཞབས་པ་ཚེ་རིང་དཔལ་སྒྲོན་ལགས་ཀྱིས་ཟབ་སྦྱོང་གི་ལས་དོན་ངོ་སྤྲོད་སྙིང་བསྡུས་གནང་གྲུབ་མཚམས་བདེ་ལེགས་སྨན་ཁང་གི་འགན་འཛིན་གྱིས་སྨན་ཞབས་གཉིས་ལ་ཕེབས་སྐྱེལ་གྱི་ཕྱག་རྟགས་གནང་།
དེ་ནས་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་ཀྱིས་སྤྱི་ཚོགས་འཕྲོད་ལས་ཟབ་སྦྱོང་ཐོན་པའི་དགོན་པ་ཁག་གི་དགེ་འདུན་པ་རྣམས་ལ་ཕྱག་འཁྱེར་གནང་གྲུབ་བསྟུན་ལམ་སྟོན་གསུང་བཤད་གནང་བའི་སྙིང་དོན་ནི། སྔོན་མ་བདེ་ལེགས་སྨན་ཁང་ནས་འཕྲོད་བསྟེན་གྱི་ཟབ་སྦྱོང་གནང་སྟེ་ང་ཚོའི་གཞིས་སྒར་ཁག་གིས་གཙོས་སྤྱི་ཚོགས་ལ་དཀའ་ངལ་ཆེ་བའི་སྐབས་སུ་ཕན་ཐོགས་ཆེན་པོ་བྱུང་ཡོད། བར་ལམ་ཞིག་ནས་འཕྲོད་བསྟེན་ཐོག་ཟབ་སྦྱོང་གནང་རྒྱུ་མཚམས་འཇོག་བྱས་ཡོད། ཕྱིས་སུ་ང་ཚོའི་གནས་སྟངས་ཡག་ཏུ་ཕྱིན་པ་དང་ལྷག་པར་བོད་རིགས་ན་གཞོན་འཕྲོད་ལས་པ་ཆེད་ལས་སློབ་སྦྱོང་ཐོན་མཁན་ཇེ་མང་ཕྱིན་སྟབས་ཁོང་རྣམ་པར་འཕྲོད་ལས་སློབ་སྦྱོང་ཚད་མཐོ་པོ་ཡོད་པ་ངོས་འཛིན་ཞུ་གི་ཡོད། འོན་ཀྱང་གྲྭ་ཚང་དུ་དགེ་འདུན་པས་འཕྲོད་བསྟེན་ཕྱག་ལས་གནང་རྒྱུ་དེ་ཐུན་མོང་།
གི་གཟི་བརྗིད་ཞིག་ཆགས་ཀྱི་ཡོད་པར་བརྟེན་བདེ་ལེགས་སྨན་ཁང་ནས་དམིགས་བསལ་གྱི་འགན་བཞེས་ཏེ་ཟབ་སྦྱོང་གནང་བར་ཐུགས་རྗེ་ཞུ་རྒྱུ་དང་། དེ་བཞིན་འདིར་ཕེབས་པའི་དགེ་འདུན་པ་རྣམ་པར་འདི་ནས་ཟབ་ཁྲིད་ཐོབ་པ་དེ་དག་རྨང་གཞིར་བཞག་ཐོག་དོ་སྣང་ཆེན་པོས་ཡར་རྒྱས་འགྲོ་རྒྱུ་ཡོད་པས། དགོན་པ་ཁུངས་སོ་སོར་ཕེབས་རྗེས་ལག་ལེན་བསྟར་ཏེ་མཁན་ལས་དགེ་འདུན་པ་མང་པོར་ཕན་ཐོགས་ཆེན་པོ་བསྒྲུབ་དགོས། ཞེས་སོགས་ཀྱི་གསུང་བཤད་གནང་སྟེ་མཛད་སྒོ་གྲོལ།
ད་ཐེངས་སྤྱི་ཚོགས་འཕྲོད་བསྟེན་གྱི་ཟབ་སྦྱོང་འདི་ཐེངས་ ༢༨ ཡིན་པ་དང་རྒྱ་གར་ལྷོ་ཕྱོགས་གདན་ས་ཁག་དང་བལ་ཡུལ། རྡ་སའི་ཉེ་ཁུལ་དགོན་པ་ཁག་བཅུ་ནས་དགེ་འདུན་པ་བཅས་མི་གྲངས་ ༡༢ ཙམ་མཉམ་ཞུགས་ཀྱིས་ཕྱི་ཟླ་ ༨ ཚེས་ ༡ ནས་འགོ་བཙུགས་ཏེ་དུས་ཡུན་ཟླ་བ་གཅིག་དང་ཕྱེད་རིང་དགེ་འདུན་རྣམས་ལ་མ་བུ་བདེ་སྲུང་གི་འཕྲོད་བསྟེན་ཕུད་པའི་རྒྱུན་གཏན་གྱི་ནད་གཞི་ཛ་དྲག་རིགས་ལ་ཟབ་ཁྲིད་གནང་ཡོད་པ་མ་ཟད། སྔ་དྲོ་སློབ་ཁྲིད་ཀྱི་འཛིན་གྲྭ་དང་ཕྱི་དྲོ་སྨན་ཁང་དུ་ནད་པ་བསྟེན་གཏུག་རིགས་ལ་ལག་བསྟར་དངོས་ཀྱི་ལས་ཀའི་ཉམས་མྱོང་གི་ཟབ་ཁྲིད་གནང་འདུག ཕྱི་ལོ་ ༡༩༨༡ ལོར་འགོ་འཛུགས་ཀྱི་ད་བར་མི་གྲངས་ ༢༧༧ ཙམ་ལ་ཟབ་སྦྱོང་སྤྲད་དེ་བཙན་བྱོལ་བོད་མིའི་སྤྱི་ཚོགས་ནང་དཀའ་ངལ་ཆེན་བའི་དུས་དེར་ཕན་ཐོགས་ཧ་ཅང་ཆེན་པོ་བྱུང་འདུག
