༢༠༡༣ ཟླ་ ༩ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༢ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་ལི་ཐུ་ནི་ཡའི་གྲོས་ཚོགས་སུ་ཆིབས་སྒྱུར་བསྐྱངས་ཡོད། དེ་ཡང་ཐོག་མར་༸གོང་ས་མཆོག་གིས་སྒྱུ་རྩལ་བསྟི་གནས་ཁང་ Academy of Arts ཚོགས་ཁང་དུ་གསར་འགོད་པའི་དྲི་བར་བཀའ་ལན་སྩལ་ཡོད། སྐབས་དེར་༸གོང་ས་མཆོག་གིས་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་གཏོང་གནང་མཛད་རྒྱུའི་ཐུགས་འགན་གཙོ་བོ་གཉིས་ཀྱི་སྐོར་བཀའ་སློབ་སྩལ་བ་དང་སྦྲགས། གསར་འགོད་པ་ཚོས་ཀྱང་རིན་ཐང་དེ་དག་གལ་ཆེ་ཡིན་པར་ངོས་འཛིན་གྱི་མང་ཚོགས་ཁྲོད་གོ་རྟོགས་སྤེལ་དགོས་སྐོར་བཀའ་སློབ་སྩལ་རྗེས་གསར་འགོད་པ་ཞིག་གིས་བོད་ནང་དུ་བོད་མིས་རང་སྲེག་ལས་འགུལ་སྤེལ་བའི་སྐོར་བཀའ་འདྲི་ཞུས་པར་བཀའ་ལན་སྩལ་དོན།
ཡུལ་དེའི་སྲིད་འཛིན་ཐོག་མ་མཆོག་དང་གྲོས་ཚོགས་ཀྱི་ཚོགས་གཞོན་མཆོག་རྣམ་གཉིས་དང་ལྷན།
འཚེ་བ་ཡིན་མིན་གཙོ་བོ་ཀུན་སློང་ལ་རག་ལུས་ཡོད་པ་ལས་ལུས་ངག་གི་ལས་མིན། ཞེས་སོགས་ཀྱི་བཀའ་ལན་སྩལ་གྲུབ་བསྟུན། ལི་ཐུ་ནི་ཡའི་གྲོས་ཚོགས་ Lithuanian Parliament ནང་ཆིབས་སྒྱུར་བསྐྱངས། སྐབས་དེར་གྲོས་ཚོགས་ཀྱི་ཚོགས་གཞོན་ལྕམ་སྐུ་ཨི་རི་ན་དེ་གུ་ཊེ་ནི་ Irena Degutienne མཆོག་གིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་པ་དང་སྦྲགས། གྲོས་ཚོགས་ཀྱི་ཚོགས་ཁང་ནང་གདན་འདྲེན་ཞུས། དེ་རྗེས་༸གོང་ས་མཆོག་གིས་མཛའ་གྲོགས་རྙིང་པ་དང་ཡུལ་དེར་རང་བཙན་ཐོབ་རྗེས་སྲིད་འཛིན་གྱི་ཐོག་མར་འོས་འདེམས་བྱུང་བ་སྐུ་ཞབས་ཝི་ཡ་ཏུ་ཏ་སི་ལེན་སི་བྷར་གི་སི་ Vytautas Landsbergis མཆོག་དང་མཇལ་སྐབས་ཐུགས་དགྱེས་ཚོར་ཆེན་པོས་མཛའ་བརྩེའི་འཚམས་འདྲི་མཛད། ༸གོང་ས་མཆོག་གིས་གྲོས་ཚོགས་ནང་བོད་ནང་གི་གནས་སྟངས་སྐོར་འགྲེལ་བརྗོད་མཛད་དོན། དྲག་གནོན་ཇི་ཙམ་བྱས་ཀྱང་ངོ་རྒོལ་དེ་བས་ཆེ་རུ་འགྲོ་རྒྱུ་དང་།
ལྷག་པར་བོད་མི་མི་རབས་རྒན་པ་ལས་གཞོན་པ་ཚོ་སེམས་ཤུགས་ཆེ་བ་ལྟ་བུ་འདུག ངོས་རང་ཡུལ་འདིའི་མང་ཚོགས་ལ་རང་བཞིན་གྱི་སེམས་ཐག་ཉེ་བོ་ཡོང་བཞིན་འདུག ཅེས་བཀའ་སློབ་སྩལ་བ་དང་སྦྲགས། དེ་སྔ་ཕྱི་ལོ་ ༡༩༩༡ ལོར་ཡུལ་དེ་དམར་པོའི་དབང་སྒྱུར་ནས་རང་བཙན་ཐོབ་མ་ཐག་མགོན་པོ་གང་ཉིད་མཆོག་ཆིབས་སྒྱུར་བསྐྱངས་སྐབས་མི་མང་ཚོའི་སྙིང་སྟོབས་འབར་བཞིན་པ་གཟིགས་རྗེས་ཆོད་སེམས་དང་བདེན་པའི་ནུས་པ་ཡོད་ན་རྒྱལ་ཁ་ཐོབ་རྒྱུ་ཡིན་པའི་ཐུགས་ལ་སྤོབས་པ་གསར་པ་ཞིག་འཁྲུངས་ཡོད་སྐོར་བཀའ་སློབ་སྩལ། དེ་རྗེས་༸གོང་ས་མཆོག་གིས་ཆོས་ལུགས་ཚང་མར་སེམས་ནང་ཞི་བདེ་བསྐྲུན་རྒྱུའི་ནུས་པ་ཡོད་པར་བརྟེན་ཆོས་ལུགས་ཕན་ཚུན་འཆམ་མཐུན་གོང་འཕེལ་གཏོང་རྒྱུ་ཧ་ཅང་གལ་ཆེ་ཆགས་ཡོད་སྐོར་དང་།
ཡང་༸གོང་ས་མཆོག་གིས་བོད་དོན་ཐོག་བཀའ་སློབ་སྩལ་དོན། འཛམ་གླིང་མཉམ་སྦྲེལ་རྒྱལ་ཚོགས་ནང་བོད་དོན་ཐོག་བཟང་ཕྱོགས་ཀྱི་གྲུབ་འབྲས་ངོ་སོ་ཐོན་པ་ཞིག་མ་ཐོན་སྟབས། ཕྱི་ལོ་ ༡༩༧༤ ལོར་ང་ཚོས་སྔ་ཕྱི་མ་གཏོགས་རྒྱ་ནག་གཞུང་དང་ཐད་ཀར་སྐད་ཆ་བཤད་ནས་ཐབས་ཤེས་བྱ་རྒྱུ་ལས་མེད་སྟབས། ང་ཚོས་མིང་དོན་མཚུངས་པའི་རང་སྐྱོང་གི་གནས་བབ་ཅིག་ཐོབ་རྒྱུའི་དགོས་འདུན་བཏོན་ཚེ་དངོས་ཡོད་གནས་ཚུལ་དང་མཐུན་པ་ཞིག་ཡིན་པའི་བསམ་ཚུལ་བྱུང་ཡོད། དུས་དེ་ནས་བཟུང་རྒྱ་ནག་གི་ལངས་ཕྱོགས་ལ་འགྱུར་བ་སྣ་ཚོགས་ཕྱིན་ཡོད་ཀྱང་བོད་མི་ཚོས་ལངས་ཕྱོགས་དེ་བརྟན་པོར་བཟུང་ཡོད། དེང་སྐབས་རྒྱ་ནག་འགོ་ཁྲིད་གསར་པ་ཚོས་ལྐོག་ཟ་རུལ་སུངས་ཀྱི་གནད་དོན་གཙང་སེལ་བཟོ་ཆེད་འབད་བརྩོན་ཤུགས་ཆེ་བྱེད་བཞིན་པ་ནི་བསྔགས་བརྗོད་འོས་པ་ཞིག་རེད། རྒྱ་ནག་གཞུང་གིས་དངོས་ཡོད་གནས་ཚུལ་དང་མཐུན་པའི་ལངས་ཕྱོགས་བཟུང་རྒྱུ་དེ་ནི་ཆབ་སྲིད་ལ་བཟང་ཕྱོགས་ཀྱི་འགྱུར་བ་ཞིག་ཕྱིན་པའི་མངོན་རྟགས་རེད། དེར་བརྟེན་རྒྱ་ནག་ནང་གི་གནས་སྟངས་ཡར་རྒྱས་འགྲོ་རྒྱུའི་རེ་བ་ཡོད། འོན་ཀྱང་ཆབ་སྲིད་ཀྱི་དགོས་མཁོ་ལ་རྟེན་ནས་རྒྱ་ནག་གི་འགོ་ཁྲིད་མཁྲེགས་འཛིན་པ་ཚོས་ངས་ཁ་བྲལ་རྩོད་བཞིན་ཡོད་པའི་སྐྱོན་བརྗོད་བྱེད་བཞིན་ཡོད། དེར་བརྟེན་ངོས་ལ་རྒྱབ་སྐྱོར་གནང་མཁན་ལུ་ཐེ་ནི་ཡའི་མཛའ་གྲོགས་ཚོ་ཡང་ཁ་བྲལ་ལ་རྒྱབ་སྐྱོར་གནང་མཁན་ཞིག་ཆགས་རྒྱུ་ཡིན་ཡང་དེ་འདྲ་རྩ་བ་ནས་མ་རེད། སྐུ་ཞབས་ལིའུ་ཞའོ་པོས་ Liu Xiaobo གཙོས་རྒྱ་རིགས་མཁས་དབང་དང་ཤེས་ཡོན་མི་སྣ། ལས་འགུལ་བ་མང་དག་ཅིག་གིས་ང་ཚོའི་འཐབ་རྩོད་ལ་རྒྱབ་སྐྱོར་གནང་བཞིན་ཡོད་པར་བརྟེན། རྒྱ་བོད་མི་རིགས་གཉིས་ཕན་ཚུན་གཉིས་སྨན་གྱི་ཐབས་ལམ་ལག་བསྟར་དོན་འཁྱོལ་ཡོང་བའི་རེ་བ་བྱེད་བཞིན་ཡོད། ཅེས་བཀའ་སློབ་སྩལ་བ་དང་སྦྲགས། གྲོས་ཚོགས་ནང་བོད་ཀྱི་རྒྱལ་དར་བསྒྲེངས་པ་དེར་གཟིགས་ནས་མགོན་པོ་གང་ཉིད་མཆོག་དེ་སྔ་ཕྱི་ལོ་ ༡༩༥༤ ལོར་རྒྱ་ནག་ཏུ་ཆིབས་སྒྱུར་བསྐྱངས་སྐབས་རྒྱ་ནག་འགོ་ཁྲིད་མའོ་ཙེ་ཏུང་ Chairman Mao གིས་བོད་ལ་རྒྱལ་དར་ཡོད་མེད་དྲི་བ་ཞུ་སྐབས་༸གོང་ས་མཆོག་གིས་སྐབས་དེར་ཡོད་སྐོར་བཀའ་ལན་སྩལ་རྗེས། མའོས་བོད་ཀྱི་རྒྱལ་དར་དེ་རྒྱ་ནག་གི་རྒྱལ་དར་དང་མཉམ་དུ་སྒྲེང་འཛུགས་བྱས་ན་འགྲིག་ཅེས་བརྗོད་བྱུང་། དེང་སྐབས་བོད་ནང་བོད་ཀྱི་རྒྱལ་དར་སྒྲེང་འཛུགས་བྱས་ཚེ་ཁྲིམས་འགལ་ནག་ཉེས་སུ་ངོས་འཛིན་བྱས་པ་མ་ཟད། བོད་དོན་རྒྱབ་སྐྱོར་བ་ཚོས་བོད་ཀྱི་རྒྱལ་དར་སྒྲེང་འཛུགས་བྱེད་སྐབས་རྒྱ་ནག་གཞུང་གིས་སྐྱོན་བརྗོད་བྱེད་བཞིན་ཡོད། ཅེས་བཀའ་སློབ་སྩལ།
སྐབས་དེར་ཚོགས་བཅར་བ་ཞིག་གིས་ཡུ་རོབ་སྤྱི་མཐུན་ཚོགས་པའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐུ་ཚབ་ EU Commissioner for Human Rights འདི་ལོར་རྒྱ་ནག་ཏུ་ཕེབས་སྐབས་བོད་ནང་དུ་བསྐྱོད་རྒྱུར་འབད་བརྩོན་གནང་རྒྱུའི་ཁས་ལེན་ཡང་གནང་ཡོད་སྐོར་ཞུས་པར། ༸གོང་ས་མཆོག་གིས་བོད་ཀྱི་རྒྱུག་ཆུ་སོགས་ཀྱིས་མི་འབོར་དུང་ཕྱུར་མང་པོའི་འཚོ་བ་དང་ཐད་ཀར་འབྲེལ་བ་ཡོད་སྟབས་ཁོར་ཡུག་གནས་སྟངས་ཛ་དྲག་ཆགས་ཡོད། དེར་བརྟེན་སྐུ་ཚབ་རྣམ་པས་བོད་ཀྱི་ཁོར་ཡུག་ལ་དོ་ཕོག་ཇི་ཙམ་བཟོས་ཟིན་མིན་ཐོག་རྟོག་ཞིབ་གནང་རྒྱུ་ཧ་ཅང་གལ་ཆེ་ཡིན་པ་མ་ཟད། ཡུ་རོབ་སྤྱི་མཐུན་གྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐུ་ཚབ་འཐུས་མི་རྣམས་ནས་བོད་མི་ཞིག་སྐད་སྒྱུར་དུ་ཁྲིད་ནས་རང་ལུས་མེར་སྲེག་གཏོང་ཡུལ་གྱི་ས་གནས་ཁག་དུ་ཕེབས་ཏེ་རང་སྲེག་གཏོང་མཁན་ཚོའི་རྗེས་ཤུལ་གྱིས་མཚོན་འབྲེལ་ཡོད་ཚོར་རང་ལུས་མེར་སྲེག་གཏོང་དགོས་པའི་རྒྱུ་རྐྱེན་གཙོ་བོ་ཇི་ཡིན་ཐོག་ཞིབ་འཇུག་གནང་ཐུབ་ཚེ་དགེ་མཚན་ཧ་ཅང་ཆེན་པོ་ཡོད་སྐོར་ལམ་སྟོན་མཛད།
ལྷན་ཚོགས་གྲོལ་རྗེས་ཝིལ་ནི་སིའི་གྲོང་སྡེའི་སྤྱི་ཁྱབ་པ་ Mayor of Vilnius སྐུ་ཞབས་ཨར་ཏུ་ར་སི་ཛོ་ཀ་སི་ Arturas Zuokas མཆོག་གིས་༸གོང་ས་མཆོག་ཉིན་དགུང་ལྗགས་སྨིན་དུ་གདན་ཞུ་གནང་། སྐབས་དེར་ཡུལ་དེའི་སྲིད་འཛིན་ཟུར་པ་སྐུ་ཞབས་ཝལ་ད་སི་ཨ་དམ་ཀུ་སི་ Valdas Adamkus མཆོག་ཀྱང་ཆེད་ཕེབས་གནང་ཡོད། ལྗགས་སྨིན་གྲུབ་བསྟུན་གྲོང་སྡེའི་སྤྱི་ཁྱབ་པ་མཆོག་གིས་༸གོང་ས་མཆོག་ཝིལ་ནི་སིའི་གྲོང་ཁྱེར་ཚོགས་ཁང་དུ་ Vilnius City Hall གདན་འདྲེན་ཞུས་ཡོད།
