༢༠༡༣ ཟླ་ ༩ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༠ རེས་གཟའ་མིག་དམར་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་རྒྱལ་ཁབ་ལ་ཏི་ཝི་ཡའི་ནང་མཛད་འཕྲིན་རྒྱ་ཆེ་སྐྱོང་བཞིན་པའི་སྐབས་དང་བསྟུན། ༸གོང་ས་མཆོག་གིས་རི་ག་གསར་ཤོག་དུས་དེབ་དུས་བབ་ (The Riga Time) ཅེས་པའི་གསར་འགོད་པ་སྐུ་ཞབས་ཨར་ནི་སི་རི་ཏུབ་ Arnis Ritups ལགས་ཀྱི་ཆེད་དོན་དྲི་བར་བཀའ་ལན་སྩལ། སྐབས་དེར་ཁོང་གིས་༸གོང་ས་མཆོག་ལ་སེམས་ཀྱི་རང་བཞིན་རྟོགས་ཡོད་སྐོར་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་ཉིན་རེའི་ཉམས་ལེན་གཙོ་བོ་སེམས་ཀྱི་རང་བཞིན་ལ་དཔྱད་པ་མཛད་རྒྱུ་ཡིན་སྐོར་བཀའ་ལན་སྩལ། དེ་རྗེས་ཁོང་གིས་༸གོང་ས་མཆོག་འཕགས་པ་སྤྱན་རས་གཟིགས་སྐུ་ངོ་མ་ཡིན་མིན་གྱི་དྲི་བ་ཞུས་པར། ༸གོང་ས་མཆོག་གིས་བཀའ་ལན་སྩལ་དོན།
ངོས་རང་བྱང་ཆུབ་སེམས་དཔའ་ཡིན་བསམ་པའི་རློམ་སེམས་ནམ་ཡང་སྐྱེ་མྱོང་མེད། འཕགས་པ་འཇིག་རྟེན་དབང་ཕྱུག་ལྟ་བུར་མཚོན་ན་ངའི་མགོན་སྐྱབས་ཆགས་ཡོད། ཅེས་བཀའ་ལན་སྩལ་བ་དང་སྦྲགས། སྐུ་མདུན་སྐུ་གོང་མ་སྐུ་ཕྲེང་དང་པོ་ནས་བདུན་པའི་བར་གྱི་སྐུའི་ཡོན་ཏན་ལ་བསྔགས་བརྗོད་མཛད། སྐུ་ཕྲེང་དེ་དག་ཁྲོད་ནས་མང་པོ་ཞིག་རྒྱུད་ལ་རྟོགས་པ་འཁྲུངས་ཡོད་པ་དང། སྐུ་སྒེར་ལྟ་བུར་མཚོན་ན་སྐུ་ཚེའི་ནང་མཛད་རྗེས་གལ་ཆེ་ཤོས་ཤིག་ཚན་རིག་པ་དང་བགྲོ་གླེང་དབུ་འཛུགས་མཛད་རྒྱུ་མ་ཟད། ད་བར་ནང་ཆོས་དང་དེང་དུས་ཚན་རིག་དབར་བགྲོ་གླེང་ཐེངས་མང་གོ་སྒྲིག་ཞུ་གནང་མཛད་ཐུབ་པ་དེ་ཡིན་སྐོར་བཀའ་ལན་སྩལ། སྐབས་དེར་བེམ་གཟུགས་ལས་ཤེས་པ་སྐྱེ་མ་ཐུབ་པའི་རྒྱུ་མཚན་ཇི་ཡིན་གྱི་དྲི་བ་ཞུས་སྐབས་༸གོང་ས་མཆོག་གིས་ཤེས་པའི་རྒྱུན་དེ་ཤེས་པ་དང་ངོ་བོ་གཅིག་པ་ཞིག་ཡོད་དགོས་པ་ལས་དེ་དང་ངོ་བོ་ཐ་དད་བེམ་གཟུགས་ཤེས་པའི་ངོ་བོར་འགྱུར་མི་ཐུབ་པའི་བཀའ་ལན་སྩལ།
བཀའ་དྲིའི་ལས་རིམ་གྲུབ་མཚམས་གཟུགས་མཐོང་བརྙན་འཕྲིན་པི་བྷི་ཀེ་ PBK TV གསར་འགོད་པ་སྐུ་ཞབས་ཇུར་གི་སི་ལིབ་ནེཀ་སི་ Jurgis Liepniecs ལགས་ཀྱི་དྲི་བར་བཀའ་ལན་སྩལ་ཡོད། དེ་ནས་༸གོང་ས་མཆོག་གིས་གླེང་སྟེགས་སྒོར་མོའི་ལྷན་ཚོགས་སུ་ཆིབས་སྒྱུར་བསྐྱངས་ཏེ་གོ་ལའི་སྤྱི་ཚོགས་ནང་ཞི་བདེའི་ལམ་བུ། The Path to Peace and Happiness in a Global Society ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། དེང་སྐབས་གོ་ལའི་སྤྱི་ཚོགས་འདིའི་ནང་ས་མཚམས་ཀྱི་འབྲེལ་བ་མེད། དཔེར་ན། གོ་ལའི་གནམ་གཤིས་འགྱུར་ལྡོག་ལ་མཚོན་ན། གོ་ལའི་ཚ་དྲོད་འཕེལ་བའི་དཀའ་ངལ་དེས་འཛམ་གླིང་ཁྱོན་ཡོངས་ལ་དཀའ་ངལ་བཟོ་བཞིན་ཡོད། ཁྱེད་ཚོ་དང་ང་ཚོ། ཞེས་བཅོས་མའི་ས་མཚམས་བཟོས་པར་བརྟེན། འཁྲུག་རྩོད་དང་ཕན་ཚུན་དམག་འཐབ་ཀྱི་རྒྱུ་རྐྱེན་ཆགས་བཞིན་ཡོད། ཅེས་སོགས་ཀྱི་བཀའ་ལན་སྩལ།
ཉིན་དགུང་ལྗགས་སྨིན་གྲུབ་བསྟུན། ལ་ཏི་ཝི་ཡའི་གྲོས་ཚོགས་འཐུས་མི་ Latvian Parliamentarians བོད་དོན་ལ་གདུང་སེམས་མཉམ་སྐྱེ་གནང་མཁན་རྣམས་དང་༸གོང་ས་མཆོག་མཇལ་འཕྲད་མཛད། སྐབས་དེར་གྲོས་ཚོགས་འཐུས་མི་རྣམས་ཀྱིས་བོད་དོན་ཐོག་ཁོང་རྣམས་ཀྱིས་དུས་རྟག་ཏུ་བོད་ཀྱི་ཐུན་མིན་ཆོས་དང་རིག་གཞུང་སྲུང་སྐྱོབ་ཆེད་རྒྱབ་སྐྱོར་ཞུས་དང་ཞུ་མུས་ཡིན་སྐོར་༸གོང་ས་མཆོག་ལ་སྙན་སྒྲོན་ཞུས་པ་མ་ཟད། དེང་སྐབས་དུས་ཚོད་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པའི་སྤྱི་ཚོགས་ནང་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་གིས་མིའི་བཟང་པོའི་རིན་ཐང་གོང་མཐོར་གཏོང་གནང་མཛད་པར་བཀའ་དྲིན་ཆེ་ཞུས་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་དོན།
བཀུར་འོས་གྲོས་ཚོགས་ཀྱི་འཐུས་མི་དང་བོད་དོན་རྒྱབ་སྐྱོར་བ་རྣམ་པ་ཚོས་ངོས་ལ་མགྲོན་འབོད་གནང་བར་བཀའ་དྲིན་ཆེ་ཞུ་རྒྱུ་ཡིན། འདས་པའི་མི་ལོ་ ༥༠ ལྷག་ཙམ་རིང་ངོས་ཀྱིས་བོད་མིའི་སྤྱི་ཚོགས་དེ་བཞིན་མང་གཙོའི་སྤྱི་ཚོགས་ཤིག་ཏུ་འགྱུར་རྒྱུར་ཞབས་འདེགས་ཕྲན་བུ་ཞུས་ཡོད་པའི་ངོས་འཛིན་ཞུས་ཆོག དེར་བརྟེན་ཕྱི་ལོ་ ༢༠༡༡ ལོར་ངོས་ཀྱིས་བོད་མིའི་ཆབ་སྲིད་ཀྱི་ལས་འགན་ནས་རྒས་ཡོལ་ཆ་ཚང་ཞུ་ཐུབ་པ་རེད། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཆགས་རྒྱུར་ཆོད་སེམས་བརྟན་པོ་ཡོད། དེ་ལྟར་བྱས་ཚེ་བོད་དེ་བཞིན་དེང་རབས་ཀྱི་དཔལ་ཡོན་ལྡན་པའི་སྤྱི་ཚོགས་ཤིག་བསྐྲུན་ཐུབ་རྒྱུར་ཁེ་ཕན་ཡོད། འོན་ཀྱང་ཁྱེད་ཚོ་ལྟར་བོད་མི་ཚོ་ལའང་རང་གི་ཐུན་མིན་སྐད་དང་ཡི་གེ་ཡོད། ཁྱེད་ཚོས་ཇི་ཙམ་རང་གི་ཐུན་མིན་སྐད་ཡིག་ལ་བརྩེ་བ་ཡོད་པ་བཞིན་བོད་མི་ཚོས་ཀྱང་དེ་མཚུངས་རང་གི་ཐུན་མིན་སྐད་ཡིག་དེ་དག་ལ་ཧ་ཅང་གཙིགས་ཆེར་འཛིན་བཞིན་ཡོད། ཕྱོགས་མཚུངས་ནང་པ་སངས་རྒྱས་པའི་གཞུང་འགྲེལ་བཤད་མཐིལ་ཕྱིན་པ་ཞིག་རྒྱག་དགོས་ཚེ་བོད་ཡིག་ལས་ལྷག་པའི་སྐད་རིགས་དེང་སྐབས་འཛམ་གླིང་འདིའི་ནང་བརྙེད་རྒྱུ་མེད། ང་ཚོའི་དམིགས་ཡུལ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་ལྟར་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་སྤྲད་པ་དེ་ལག་བསྟར་བྱེད་དགོས་རྒྱུ་དེ་ཡིན། ཞེས་བཀའ་སློབ་སྩལ་བ་དང་སྦྲགས།
༸གོང་ས་མཆོག་གིས་བོད་ཀྱི་ཁོར་ཡུག་དང་བོད་བརྒྱུད་ནང་བསྟན། རྒྱ་ནག་ནང་སྤྱི་ཚོགས་དྲང་བདེན་དང་ཁྲིམས་ཀྱི་དབང་བསྒྱུར་འོག་འགྲོ་ཐུབ་པ་བྱ་རྒྱུ་གལ་ཆེ་ཡིན་སྐོར། བོད་མི་ཚོར་ཆོས་དད་དང་འགྲོ་བ་མིའི་ཐོབ་ཐང་དགོས་གལ་ཆེ་སྐོར། དེ་བཞིན་གལ་ཏེ་བོད་ལ་མིང་དོན་མཚུངས་པའི་རང་སྐྱོང་གི་གནས་བབ་ཅིག་སྤྲོད་ཐུབ་ཚེ་རྒྱ་དཀར་ནག་གཉིས་དབར་བར་བཞུགས་ཡོང་རྒྱུར་ཕན་རླབས་ཡོད་པ་དང། དེ་འདྲ་བྱུང་ན་ས་མཚམས་སུ་དྲག་དམག་ཕོན་ཆེ་ཡོད་པ་དེ་དག་ཇེ་ཉུང་དུ་བཏང་སྟེ། ཞི་བདེའི་ཁོར་ཡུག་བཟང་པོ་ཞིག་བསྐྲུན་རྒྱུར་ཁེ་ཕན་ཡོད་སྐོར་སོགས་ཀྱི་གནད་དོན་ཐོག་བཀའ་སློབ་སྩལ། དེ་རྗེས་གྲོས་ཚོགས་འཐུས་མི་རྣམས་ཀྱིས་༸གོང་ས་མཆོག་དང་ལྷན་སྐུ་དཔར་སྒྲོན། མཛད་སྒོ་གྲུབ་བསྟུན་༸གོང་ས་མཆོག་གིས་ཨུ་རུ་སུའི་ནང་པ་ཁག་གཅིག་ལ་མཇལ་ཁ་དང་བཀའ་སློབ་སྩལ། ཕྱི་ཚེས་ ༡༡ ཉིན་༸གོང་ས་མཆོག་ལུ་ཐེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།
