༢༠༡༣ ཟླ་ ༩ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༨ རེས་གཟའ་ཉི་མའི་ཉིན་གྱི་སྔ་དྲོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཇར་མན་གྲོང་ཁྱེར་གྱི་གནམ་ཐང་དང་། དེ་ནས་ལེ་ཊི་ཝེ་ཡཱའི་ (Latvia) རྒྱལ་ས་རིག་ཏུ་ (Riga Arena)༸ཞབས་སོར་བདེ་བར་འཁོད་སྐབས། ས་གནས་ནང་པ་དང་མི་མང་རྣམས་ཀྱིས་གུས་བསུའི་སྣེ་ལེན་གཟབ་རྒྱས་ཞུས་འདུག དེ་རྗེས་བཞུགས་གནས་མགྲོན་ཁང་ (FG Royal Hotel) ལ་༸ཞབས་སོར་འཁོད་སྐབས་ས་གནས་ནང་པའི་དགེ་འདུན་པ་དང་། ས་གནས་མི་མང་ཡུལ་སྐོར་སྤྲོ་འཆམ་པ། དེ་བཞིན་བོད་མི་སོགས་ནས་བོད་ཀྱི་རྒྱལ་དར་དང་མགོན་པོ་གང་ཉིད་མཆོག་ལྗགས་རྩོམ་མཛད་པའི་ཕྱག་དེབ་ཕྱར་ནས་ཕེབས་བསུ་གཟབ་རྒྱས་ཞུས་འདུག སྐབས་དེར་མགོན་པོ་གང་ཉིད་མཆོག་གིས་ཀྱང་མི་མང་ཚོར་ཐུགས་བརྩེ་བ་ཆེན་པོས་བྱམས་བརྩེའི་འཚམས་འདྲི་མཛད་འདུག
༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༩ ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཐོག་ (Riga Arena ) ཞེས་པའི་ཚོགས་ཁང་ཆེན་མོའི་ནང་མང་ཚོགས་ལ་༼བྱམས་བརྩེ་ལྡན་པའི་རིག་གཞུང་༽ཞེས་པའི་བརྗོད་གཞིའི་ཐོག་བཀའ་སློབ་སྩལ་གྱི་ཡོད་པ་དེ་བཞིན་ཨིན་སྐད་དང་ལེ་ཊི་ཝེ་ཡཱའི་སྐད། དེ་བཞིན་ར་ཤི་ཡའི་སྐད་ཐོག་གསུང་བསྒྱུར་ཞུས་ནས་ཐད་ཀར་རྒྱང་སྲིང་ཞུ་འཆར་ཡོད་འདུག
ལྷག་པར་མགོན་པོ་གང་ཉིད་མཆོག་གིས་ལེ་ཊི་ཝེ་ཡཱའི་མང་ཚོགས་ལ་༼བྱམས་བརྩེ་ལྡན་པའི་རིག་གཞུང་༽ཞེས་པའི་བརྗོད་གཞིའི་ཐོག་བཀའ་སློབ་མ་སྩལ་གོང་གཞོན་སྐྱེས་ཁག་གཅིག་ལ་བྱམས་བརྩེའི་གཟེངས་རྟགས་ (Youth Compassion Award) དང་། ཡུ་རོབ་ཤེས་ཡོན་ལྷན་ཚོགས་ཀྱི་བོད་སྨན་ཚན་པའི་ནང་རྣལ་འབྱོར་ཉམས་ལེན་སློབ་མཐར་ཕྱིན་པ་ (European Academy of Tibetan Medicine and Yoga) རྣམས་ལ་ལག་འཁྱེར་གསོལ་རས་སྩལ་རྒྱུ་ཡིན་འདུག
སྤྱིར་བཏང་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ཁབ་དེའི་ནང་ཕྱི་ལོ་ ༡༩༩༡ དང་ ༢༠༠༡ ལོ་སོ་སོར་ཆིབས་སྒྱུར་བསྐྱངས་ཡོད། ཕྱོགས་མཚུངས་༸གོང་ས་མཆོག་གིས་ཤར་ཡུ་རོབ་ཁུལ་གྱི་རྒྱལ་ཁབ་ (Lithuania) ལི་ཐུ་ཝེ་ནི་ཡ་དང་ཅེཀ་སྤྱི་མཐུན་རྒྱལ་ཁབ། (Czech Republic) ཇར་མན་(Germany)བཅས་ནང་ཉིན་གྲངས་ ༡༢ ཙམ་རིང་མཛད་འཕྲིན་བསྐྱང་གཏན་འཁེལ་འདུག་པ་བཅས། །
