༢༠༠༩ ཕྱི་ཟླ་ ༧ ཚེས་ ༡༦ རེས་གཟའ་ཕུར་བུ།
༄༅།། ༢༠༠༩ ཕྱི་ཟླ་ ༧ ཚེས་ ༡༤ ཕྱེད་ཡོལ་ཆུ་ཚོད་ ༣ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དེ་བཞིན་སྤྱི་འཐུས་རྒྱུན་ལས་རྣམས་ནས་སྔ་ལོ་ ༢༠༠༨ ཕྱི་ཟླ་ ༣ ཚེས་ ༡༠ ནས་བཟུང་བོད་ཆོལ་ཁ་གསུམ་ཁྱོན་ཡོངས་སུ་ཞི་རྒོལ་གྱི་སྒེར་ལངས་གནང་སྐབས་རྒྱ་གཞུང་གི་དྲག་ཆས་ཉེན་རྟོག་དམག་མིས་བོད་མིའི་ཐོག་དེང་དུས་ཀྱི་གོ་མཚོན་བེད་སྤྱོད་ཀྱིས་བོད་མི་ཞི་རྒོལ་བ་མང་པོ་ཞིག་དམར་གསོད་དང་། རྨས་སྐྱོན། 
བཙོན་འཇུག་བྱས་ཏེ་ཉིན་མཚན་འཁྱོལ་དཀའ་བའི་མནར་གཅོད་གྱིས་བཙོན་དོང་ནང་སྡུག་བསྔལ་མྱོང་དགོས་བྱུང་ཡོད་ལ་ཡང་མང་པོ་ཞིག་འཛིན་བཟུང་གིས་བཀའ་རྒྱར་འཇིགས་སྐྲག་གིས་ལོ་ཧྲིལ་པོ་རི་ལ་ཡིབ་སྡོད་བྱས་ཏེ་སྡོད་དགོས་བྱུང་ཡོད་པའི་ཁྲོད་ནས་ཁག་གཅིག་དང་དེ་མཚུངས་ཞི་རྒོལ་ནང་མཉམ་ཞུགས་གནང་མཁན་རྒྱལ་གཅེས་པ་བཅས་ཁྱོན་བོད་ནས་བཙན་བྱོལ་དུ་འབྱོར་བའི་མི་གྲངས་ ༢༠ ལ་གོང་ཚེས་ཉིན་སྤྱི་འཐུས་ཚོགས་གཙོ་མཆོག་དང་ཚོགས་གཞོན་སོགས་ནས་བོད་མངགི་སྤྱི་འཐུས་ཀྱིས་ཚབ་ཞུས་ཏེ་འཚམས་འདྲི་གནང་ཡོད།
དེ་ཡང་ཐོག་མར་རྒྱལ་གཅེས་ཁོང་རྣམས་ནས་རང་ཉིད་ངོ་སྤྲོད་མདོར་བསྡུས་རེ་ཞུས་རྗེས་ཁོང་རྣམ་པའི་དགོངས་ཚུལ་དང་དཀའ་ངལ་གང་། དེ་བཞིན་རེ་བ་གང་ཡིན་པ་བཅས་ཞུས་ཡོད། དེ་རྗེས་བོད་མི་མང་སྤྱི་འཐུས་ཚོགས་གཙོ་མཆོག་ནས་འཚམས་འདྲིའི་གསུང་བཤད་གནང་དོན། ཕྱི་ལོ་༡༩༤༩ ནས་རྒྱ་ནག་གིས་བོད་ལ་དཔུང་འཇུག་བྱས་ཏེ་ ༥༡ ལ་བཙན་འོག་ཏུ་ཆིངས་ཡིག་དོན་ཚན་ ༡༧ བཞག་སྟེ་ལོ་ངོ་བརྒྱད་ཙམ་མཉམ་གནས་བྱས་ཀྱང་མཐར་བཙན་འཛུལ་གྱི་གདོང་རིས་རྗེན་པ་ཐོན་སྟབས་༸གོང་ས་མཆོག་གིས་དབུས་བོད་མི་མང་པོ་ཞིག་རྒྱ་གར་དུ་སྐྱབས་བཅོལ་ལ་ཡོང་དགོས་བྱུང་ཡོད། དེ་ལྟར་རྒྱ་གར་དུ་བཙན་བྱོལ་འབྱོར་བའི་བོད་མི་རྣམ་པ་དང་༸གོང་ས་མཆོག་གི་བཀའ་དྲིན་ལ་བརྟེན་བཙན་བྱོལ་དུ་གྱར་ནས་ལོ་ངོ་ལྔ་བཅུ་སོང་ཡོད་ཀྱང་འདི་གར་གང་ས་ཅི་ཐད་ནས་ཡར་རྒྱས་མི་དམན་པ་ཞིག་བྱུང་ཡོད། ཁྱེད་ཚོ་མི་རབས་གསར་པ་རྣམས་ཀྱིས་ཀྱང་བོད་མི་རིགས་དང་རྒྱལ་ཁབ་ཀྱི་ལས་དོན་བསྒྲུབས་དང་སྒྲུབ་བཞིན་ཡོད།
ལྷག་པར་ ༢༠༠༨ ལོར་བོད་ཆོལ་གསུམ་ཁྱོན་ཡོངས་ནས་རྒྱ་གཞུང་གི་གཡོན་ཐལ་ཆེ་བའི་སྲིད་བྱུས་ལ་སེམས་ཤུགས་ཆེན་པོས་ཞི་རྒོལ་བྱས་ཁོངས་སུ་ཁྱེད་རྣམ་པ་ཡང་ཡོད་པ་རེད། དེར་བརྟེན་ཁྱེད་རྣམས་ནས་༸གོང་ས་མཆོག་གི་བཀའ་གསུང་ཅི་སྒྲུབ་ཞུ་རྒྱུ་དང་། དེ་བཞིན་སྔར་གྱི་དམ་བཅའ་རྒྱུན་འཁྱོངས་བྱེད་གལ་ཆེན་པོ་ཡིན་ཞེས་སོགས་ཀྱི་གསུང་བཤད་གྲུབ་མཚམས་སྤྱི་འཐུས་ཚོགས་གཙོ་དང་ཚོགས་གཞོན་རྒྱུན་ལས་བཅས་ནས་རང་ཉིད་ངོ་སྤྲོད་གནང་རྗེས་རྒྱལ་གཅེས་པ་རྣམ་པར་དཀའ་ངལ་དང་བསམ་ཚུལ་ཇི་ཡོད་བརྗོད་རྒྱུའི་གོ་སྐབས་གནང་ཡོད་སྟབས་རྒྱལ་གཅེས་པ་ཚེ་དབང་དོན་གྲུབ་ལགས་ནས་བསམ་ཚུལ་བརྗོད་གསལ། རང་ཉིད་ལ་མཚོན་ན་འདི་ག་བཙན་བྱོལ་དུ་འབྱོར་རྗེས་བཙན་བྱོལ་བོད་གཞུང་ནས་གང་ས་ཅི་ཐད་ནས་སྣེ་ལེན་དང་རོགས་སྐྱོར་གནང་བྱུང་། མ་འོངས་པར་ཡང་བོད་རྒྱལ་ཁབ་ཀྱི་ཆེད་དུ་ལས་དོན་སྒྲུབ་ནས་འདི་གར་བློ་གཏད་བཅོལ་མཁན་རྣམས་ལ་དེ་མཚུངས་རོགས་རམ་གནང་རྒྱུའི་འབོད་སྐུལ་ཞུ་གི་ཡོད་ཅེས་ཞུས་རྗེས་ཚོགས་གཙོ་མཆོག་ནས་བོད་མི་མང་སྤྱི་འཐུས་ལྷན་ཁང་གི་ཚབ་ཞུས་ཏེ་ཁོང་རྣམས་ལ་ཐུགས་གསོ་མཚོན་སླད་མཇལ་དར་དང་བོད་མིའི་སྐྱིད་སྡུག་མཉམ་མྱོང་ཞེས་པའི་དེབ་རེ་ཡང་གནང་བ་བཅས་ཀྱི་གནས་བསྡུས་སུ།
