༢༠༠༩ ཕྱི་ཟླ་ ༧ ཚེས་ ༡༥ རེས་གཟའ་ལྷག་པ།
༄༅། །ལྷོ་ཨ་ཕི་རི་ཁའི་བོད་གཞུང་སྐུ་ཚབ་དོན་གཅོད་ཁང་ནས་འདི་གར་གནས་ཚུལ་བཏང་བར་གཞིགས་ན། གངས་ལྗོངས་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་བལྟམས་ཏེ་དགུང་གྲངས་ ༧༤ ཕེབས་པའི་སྐུའི་འཁྲུངས་སྐར་གྱི་དུས་ཆེན་ལྷོ་ཨ་ཕི་རི་ཁའི་བོད་ཀྱི་དོན་གཅོད་ཁང་དུ་ ༢༠༠༩ ཟླ་ ༧ ཚེས་ ༣ ཉིན་དགའ་གུས་ལྡན་པའི་ངང་སྲུང་བརྩི་ཞུས་པའི་མཛད་སྒོའི་ཐོག་མར་ས་གནས་སུ་གནས་སྡོད་བོད་མི་རྣམས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་། 
དེ་རྗེས་བོད་རྒྱལ་ཁབ་དང་མི་རིགས་དོན་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་བའི་གཞིས་ལུས་རྒྱལ་གཅེས་དཔའ་བོ་ཕོ་མོ་རྣམས་ཀྱི་ཆེད་དུ་སྐར་མ་གཅིག་རིང་མྱ་ངན་གུས་འདུད་ཞུས་མཚམས་བོད་གཞུང་སྐུ་ཚབ་དོན་གཅོད་ནས་མཛད་སྒོར་ཕེབས་པའི་སྐུ་མགྲོན་རྣམས་ལ་དགའ་བསུའི་འཚམས་འདྲི་ཞུས་པ་དང་ཆབས་ཅིག་གཏམ་བཤད་གནང་དོན། སྔ་ལོ་པེ་ཅིང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་དང་ཚོགས་མི་རྣམས་ནས་རྒྱ་ནག་གཞུང་གི་འབྲེལ་ཡོད་སྡེ་ཚན་གྱི་དཔོན་རིགས་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་ཤོག་སྤྲད་པ་དེ་ནི་རྒྱ་ནག་གཞུང་ཕྱོགས་ནས་བསྐུལ་མ་བྱས་པ་ཞིག་རེད། འོན་ཀྱང་རྒྱ་ནག་གཞུང་ཕྱོགས་ནས་གལ་ཆེའི་བསམ་འཆར་དེར་ལན་འདེབས་ཚུལ་བཞིན་དུ་བྱ་རྒྱུའི་ཚབ་ཏུ་༸གོང་ས་མཆོག་ལ་མཚན་སྨད་མུ་མཐུད་ཞུ་མུས་དང་།
དེ་མཚུངས་རྒྱ་ནག་གཞུང་གིས་བོད་ནང་དངོས་ཡོད་ཀྱི་དཀའ་ངལ་ཇི་ཡོད་ལ་ངོས་ལེན་བྱེད་རྒྱུའི་ཚབ་ཏུ་བོད་མི་རྣམས་སྐྱིད་པོ་ཡོད་ཚུལ་སོགས་དྲང་བདེན་མ་ཡིན་པའི་གཏམ་བཤད་རྒྱལ་སྤྱིའི་སྟེང་ཨུ་ཚུགས་ཀྱི་བཤད་དང་ཤོད་མུས་ཡིན་པར་བརྟེན་༸གོང་ས་མཆོག་གིས་རྒྱལ་སྤྱིའི་གསར་འགོད་པ་དང་བརྒྱུད་ལམ་ཁག་ནས་བོད་ནང་བསྐྱོད་དེ་དངོས་བདེན་གནས་སྟངས་ཞིབ་དཔྱོད་དགོས་པའི་འབོད་སྐུལ་ཞུས་ཡོད་ཅེས་དང་། དེང་བོད་ནང་གི་བོད་མི་རྣམས་འཇིགས་སྐྲག་ཁོ་ནའི་འོག་གནས་མུས་མ་ཟད།
ཞི་རྒོལ་ནང་འཛུལ་ཞུགས་ཀྱིས་འཛིན་བཟུང་དོ་དམ་འོག་ཡོད་པའི་བོད་མི་རྣམས་ལ་རྒྱ་ནག་གི་ཁྲིམས་ཁང་ནས་ཁྲིམས་གཅོད་དྲག་པོ་གཏོང་མུས་ཡིན་པ་སོགས་མདོ་དོན་བོད་ནང་བོད་མིའི་གནས་སྟངས་ཡར་རྒྱས་གང་ཡང་ཕྱིན་མེད་སྟབས། ད་རེས་དུས་ཆེན་གྱི་གོ་སྐབས་བཟུང་སྟེ་འཛམ་གླིང་དབུ་ཁྲིད་གཙོས། སྲིད་གཞུང་། གྲོས་ཚོགས་ཁག་ནས་བོད་ཀྱི་དཀའ་རྙོག་སེལ་ཕྱིར་རྒྱ་ནག་གཞུང་ལ་མུ་མཐུད་གནོན་ཤུགས་སྤྲོད་དགོས་པ་དང་། རྒྱལ་སྤྱིའི་གསར་འགོད་དང་བརྒྱུད་ལམ་ཁག་ནས་རྒྱ་ནག་གཞུང་གིས་སྙོན་གཏམ་གང་བཤད་ཀྱི་རྗེས་སུ་མ་འབྲང་བར་བོད་ནང་དངོས་བདེན་གནས་སྟངས་ཞིབ་སྤྱོད་ཡོང་བའི་འབོད་སྐུལ་གཏམ་བཤད་ཞུས་མཚམས་མཛད་བཅར་ཞུ་མཁན་གྱི་སྐུ་མགྲོན་དུ་ཕྱི་སྲིད་ལས་ཁུངས་ཀྱི་སྐུ་ཚབ། རྒྱལ་ཡོངས་དང་མངའ་སྡེའི་གྲོས་ཚོགས་འཐུས་མི། མཐོ་སློབ་ཁག་གི་མཁས་དབང་། ནང་པའི་ཆོས་ཚོགས་ཁག་གི་འཐུས་མི། སྦར་མ་རང་དབང་ལས་འགུལ་ཚོགས་པའི་སྐུ་ཚབ། གསར་འགོད་པ། ཡུན་རིང་ངོ་ཤེས་གྲོགས་འདྲིས་ཅན་བཅས་མི་གྲངས་ ༦༠ རྣམས་ལ་གུང་ཚིགས་སྟབས་བདེ་ཞིག་འདེགས་འབུལ་ཞུས་ཏེ་མཛད་སྒོ་ལེགས་གྲུབ་བྱུང་ཡོད་པའི་གནས་ཚུལ་དུ།
