༢༠༠༩ ཕྱི་ཟླ་ ༧ ཚེས་ ༡༣ རེས་གཟའ་ཟླ་བ།
༄༅། །བོད་གཞུང་ཆོས་རིག་ལས་ཁུངས་ནས་ཕྱི་ཟླ་ ༧ ཚེས་ ༡༠ འཁོད་གནས་ནང་གསལ།
༢༠༠༩ ཕྱི་ཟླ་ ༧ ཚེས་ ༦ ཉིན་རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་༸རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་འཁོར་བསྒྱུར་གྱི་རྣམ་པར་རོལ་པ་ས་སྟེང་རྒྱལ་བསྟན་ཡོངས་རྫོགས་ཀྱི་བདག་པོ་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་ ༧༤ ཕེབས་པའི་འཁྲུངས་སྐར་དུས་ཆེན་ཁྱད་པར་ཅན་གྱི་ཉིན་མོར་གངས་ལྗོངས་འཛིན་མའི་ཁྱོན་དུ་གནས་པའི་རྩམ་ཟན་སྐྱེ་བོ་མཆོག་དམན་མཐའ་དག་དང་། ལྷག་པར་བཙན་བྱོལ་དུ་གནས་པའི་བོད་མི། གཞན་ཡང་མཆོག་གསུམ་སྐྱབས་སུ་འཛིན་ཞིང་ལས་འབྲས་ཀྱི་རྣམ་གཞག་ལ་ཡིད་རྟོན་པའི་ནང་པའི་ཆོས་ལུགས་པ། དེ་བཞིན་དྲང་བདེན་དང་ཞི་བདེར་དགའ་བའི་འཛམ་གླིང་མི་མང་ས་ཡ་མང་པོས་གླིང་ལྔ་མཚོ་བཞི་ཡོངས་སུ་འཁྲུངས་སྐར་རྟེན་འབྲེལ་གྱི་བྱེད་སྒོ་སྣ་ཚོགས་ཤིག་སྤེལ་གྱི་ཡོད་པ་དེ་བཞིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་རྭར་སྐུ་མགྲོན་གཙོ་བོར་དཔལ་རྒྱལ་བ་ཀརྨ་པ་རིན་པོ་མཆོག་དབུ་བཞུགས་ཐོག་བོད་གཞུང་ཟློས་གར་ཚོགས་པས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་སྐབས་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་མཆོག་ནས་བོད་རྒྱལ་ཁབ་ཀྱི་རྒྱལ་དར་མཁའ་དབྱིངས་སུ་སྒྲེང་འཛུགས་དང་དེ་བཞིན་རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སོགས་སྒྲོན་འབུལ་གནང་རྗེས་སྐུ་མགྲོན་གཙོ་བོས་དབུས་སྲི་ཞུ་ལས་བྱེད་རྣམས་ནས་མཇལ་དར་ཕུལ་གྲུབ་རྗེས་གཞས་སྣ་ཁག་འཁྲབ་སྟོན་གྱིས་དུས་ཆེན་སྲུང་བརྩི་གཟབ་རྒྱས་ཞུས་གྲུབ་མཚམས་ཆོས་རིག་བཀའ་བློན་མཆོག་ཕྱི་དྲོ་ཆུ་ཚོད་ ༣ པར་རྡ་ས་རིགས་ལམ་སློབ་གཉེར་ཁང་དབུ་བརྙེས་ནས་ལོ་ངོ་ ༣༦ ཧྲིལ་པོ་འཁོར་བའི་དུས་སྟོན་དང་འབྲེལ་དབུ་ཕར་རབ་འབྱམས་པ་རྒྱུགས་འཕྲོད་སློབ་གཉེར་རྣམས་ལ་ཕྱག་འཁྱེར་གནང་རྒྱུའི་མཛད་སྒོར་བཀའ་བློན་མཆོག་སྐུ་མགྲོན་གཙོ་བོར་གདན་ཞུ་ལྟར་ཕེབས་ཆེད་གནང་སྟེ་སློབ་གཉེར་བ་རྣམས་ལ་ཕྱག་འཁྱེར་གནང་བ་དང་ཆབས་ཅིག་བླང་དོར་ཞུ་སྒོའི་ལམ་སྟོན་ཡང་གནང་ཡོད་པ་རེད།
དེ་མཚུངས་ཕྱི་ཟླ་ ༧ ཚེས་ ༩ ཉིན་གོ་པལ་པུར་བོད་ཕྲུག་ཁྱིམ་སྡེའི་ཁང་ཚན་དབར་གྱི་གཞས་སྣ་འགྲན་བསྡུར་ལའང་མགྲོན་གཙོར་གདན་ཞུ་ལྟར་ཕེབས་ཏེ་རྒྱལ་ཁ་ཐོབ་པའི་ཁང་ཚན་དང་། དེ་མིན་འབྲེལ་ཡོད་ཁག་ལ་ལེགས་སྐྱེས་དང་། དེ་བཞིན་དགེ་ལས་སློབ་མ་ཡོངས་ལ་སྤྱི་སྒེར་གྱི་ཞུ་སྒོས་མཚོན་བླང་དོར་ལམ་སྟོན་གནང་བ་བཅས་ཀྱི་གནས་བསྡུས་སུ།
