༢༠༡༣ ཟླ་ ༨ ཚེས་ ༢༩ རེས་གཟའ་ཕུར་བུ།

༄༅། །རྒྱ་གར་རྒྱལ་ས་དིལླིར་རྟེན་གཞི་བྱས་པའི་རྒྱ་གར་བའི་དེང་དུས་གླུ་དབྱངས་རུ་ཁག་ Indian rock band ཞིག་གིས་རང་དབང། Freedom ཞེས་པའི་གླུ་གཞས་ཕྱོགས་སྒྲིག་གིས་བརྙན་འཕྲིན་ཞིག་གསར་བཟོ་གནང་བ་བརྒྱུད་བོད་དོན་ལ་རྒྱབ་སྐྱོར་གྱི་རྣམ་པ་ཤུགས་ཆེ་བསྟན་ཡོད། དེ་ཡང་རུ་དཔོན་སྐུ་ཞབས་ཨར་ཇུན་ Arjun ལགས་སུ་བོད་མིའི་སྒྲིག་འཛུགས་ཀྱི་ཕྱི་དྲིལ་དྲ་བརྙན་ཚན་པས་བཅར་འདྲི་ཞུ་སྐབས་ཁོང་གིས་གསུང་དོན། ང་ཚོས་ལས་འགུལ་འདི་འདྲ་ཞིག་སྤེལ་དགོས་དོན་གཙོ་བོ་ནི་རྒྱ་ནག་གཞུང་གིས་བོད་མི་ཚོར་གདུག་རྩུབ་དང་མནར་གཅོད་ཧ་ཅང་བཏང་བར་བརྟེན། བོད་མིས་རང་ལུས་མེར་སྲེག་གི་ལམ་ནས་ངོ་རྒོལ་བྱས་པའི་གནས་ཚུལ་མཐོང་སྐབས། ང་ཚོས་ཀྱང་བོད་མི་ཚོའི་དཀའ་ངལ་ལ་གདུང་སེམས་མཉམ་སྐྱེ་ཞུ་རྒྱུ་དང་རྒྱ་ནག་གི་སྲིད་བྱུས་དེར་ངོ་རྒོལ་མཚོན་ཆེད་རང་དབང་། ཞེས་པའི་གླུ་གཞས་ཕྱོགས་སྒྲིག་གིས་བརྙན་འཕྲིན་འདི་གསར་བཟོ་བྱས་པ་ཡིན། དེར་བརྟེན་ང་ཚོས་གླུ་གཞས་འདི་བརྒྱུད་ནས་བོད་ནང་དུ་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་དང་བྱེད་བཞིན་པའི་གནས་སྟངས་དེ་ཕྱིར་བསྒྲགས་བྱས་པ་བརྒྱུད་བོད་དོན་ལ་རྒྱབ་སྐྱོར་སྔར་བས་ཤུགས་ཆེ་བ་ཐོབ་རྒྱུའི་དོན་དུ་དམིགས་པ་ཞིག་ཡིན། ང་ཚོའི་གླུ་གཞས་འདི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ཕྱག་རྟགས་ཀྱི་ཚུལ་དུ་འབུལ་ལམ་ཞུ་རྒྱུ་ཡིན། རང་དབང་ནི་སྐྱེ་འགྲོ་ཀུན་གྱི་ཐོབ་ཐང་ཞིག་ཆགས་ཡོད། དེར་བརྟེན་ཉིན་གཅིག་བོད་མི་ཚོར་ཡང་རང་དབང་ཐོབ་རྒྱུར་ང་ཚོས་རེ་བ་ཞུ་བཞིན་ཡོད། འཛམ་གླིང་ནང་བཟང་ཕྱོགས་ཀྱི་འགྱུར་བ་གཏོང་རྒྱུར་གླུ་གཞས་ཀྱི་ནུས་པ་ཤུགས་ཆེ་སྤྲོད་ཐུབ། ང་ཚོས་བཞུགས་སྒར་དུ་བོད་དོན་ཆེད་གཞས་སྣ་འཁྲབ་སྟོན་གོ་སྒྲིག་བྱེད་འཆར་ཡོད། ཅེས་གསུངས་འདུག རང་དབང་གླུ་གཞས་བརྙན་འཕྲིན་དེ་ཕྱི་ལོ་ ༢༠༡༣ ཟླ་ ༧ ནང་འགྲེམས་སྤེལ་གནང་འདུག