༢༠༡༣ ཟླ་ ༨ ཚེས་ ༢༨ རེས་གཟའ་ལྷག་པ།

སྲིད་སྐྱོང་མཆོག་དང་སི་ཨེ་ཊལ་གྲོང་ཁྱེར་གྱི་སྤྱི་ཁྱབ་སྐུ་ཞབས་མ་ཨེཀ་མེཀ་གྷིན་ལགས་ནས་སྣང་གསལ་ཞལ་ཕྱེ་གནང་བཞིན་པ།

༄༅། །ཕྱི་ལོ་ ༢༠༡༣ ཟླ་ ༨ ཚེས་ ༢༤ དང་ ༢༥ བཅས་ཉིན་གྲངས་གཉིས་རིང་ཨ་རིའི་ཝ་ཤིང་ཊོན་མངའ་སྡེའི་བོད་རིགས་སྤྱི་མཐུན་ཚོགས་པས་གོ་སྒྲིག་ཐོག ཨ་རིའི་སི་ཨེ་ཊལ་(Seattle)གྲོང་ཁྱེར་ནང་བོད་ཀྱི་དུས་སྟོན་ཐེངས་ ༡༨ པ་ཚོགས་ཡོད། སྐབས་དེར་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་གླུ་གར་དང་བཀྲ་ཤིས་ཞོལ་པ་འཁྲབ་སྟོན། དེ་བཞིན་བོད་ཟས་དང་བོད་མིའི་བཟོ་རིགས་འདྲ་མིན་བཤམ་སྟོན་གནང་སྟེ་བོད་ཀྱི་ངོ་བོ་དང་བོད་མི་རིགས་ཀྱི་ཁྱད་ནོར་ཁག་མང་ཚོགས་ལ་བསྟན་འདུག

དེ་ཡང་བོད་ཀྱི་དུས་སྟོན་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་སི་ཨེ་ཊལ་གྲོང་ཁྱེར་གྱི་སྤྱི་ཁྱབ་སྐུ་ཞབས་མ་ཨེཀ་མེཀ་གྷིན་(Mike McGinn) ལགས་དང། དེ་བཞིན་སི་ཨེ་ཊལ་བསྟི་གནས་ཁང་གི་ངེས་སྟོན་པ་སྐུ་ཞབས་རོ་བྷ་ཊི་ནི་ལམ་སི་Robert Nellams ལགས་བཅས་ཆེད་ཕེབས་གནང་འདུག ཐེངས་འདིའི་དུས་སྟོན་ཐོག་གོ་སྒྲིག་པའི་ངོས་ནས་བོད་ཀྱི་གཞས་པ་ཁག་གཅིག་ཆེད་དུ་གདན་ཞུས་ཀྱིས་མང་ཚོགས་ལ་བོད་ཀྱི་རིག་གཞུང་གི་གཞས་སྣ་ཁག་གཅིག་འཁྲབ་གཏོང་གནང་ཡོད་པ་མ་ཟད། མང་ཚོགས་ལ་བོད་པའི་སྒོར་གཞས་སློབ་སྟོན་དང། ལྷག་པར་བོད་ཟས་ལ་ཁྱད་ལས་པ་དང་ཞིབ་འཇུག་གནང་མཁན་ཟུར་ཁང་དབྱངས་ཅན་ལགས་ཀྱིས་བོད་ཀྱི་ཐུན་མོང་མ་ཡིན་པའི་ཟས་རིགས་ཁག་ངོ་སྤྲོད་གནང་བ་དང་ཆབས་ཅིག བོད་ཀྱི་རྩམ་པ་བཟོ་སྟངས་སྐོར་སོགས་མང་ཚོགས་ལ་ངོ་སྤྲོད་གནང་འདུག

ཕྱི་ཚེས་ ༢༤ ཉིན་གྱི་ཕྱི་དྲོ་སྲིད་སྐྱོང་མཆོག་གིས་ཁུལ་དེའི་བོད་རིགས་མང་ཚོགས་དང་གསོལ་ཚིགས་ལྷན་བཞེས་གནང་བ་དང་འབྲེལ། བཀའ་ཤག་སྐབས་ ༡༤ པའི་གཞུང་འཛིན་ལས་དོན་དང་། ཡང་སྒོས་བོད་མིའི་སྒྲིག་འཛུགས་ཀྱི་གསར་འཛུགས་གནང་བའི་བོད་མི་མཁས་ལས་པ་དང་བླངས་ཞབས་ཞུའི་ལས་གཞིའི་སྐོར་ངོ་སྤྲོད་གནང་སྟེ། ཕྱི་རྒྱལ་དུ་ཡོད་པའི་བོད་རིགས་ན་གཞོན་ཚོས་ལས་གཞི་འདིའི་ནང་དུས་ཚོད་རིང་ཐུང་ལ་མ་ལྟོས་པར་ལས་གཞི་འདིའི་ནང་འཛུལ་ཞུགས་དགོས་པའི་སྐུལ་མ་ཡང་གནང་ཡོད། དེ་བཞིན་སྲིད་སྐྱོང་མཆོག་གིས་མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད་པ་བཅས།།