༢༠༠༩ ཕྱི་ཟླ་ ༧ ཚེས་ ༦ རེས་གཟའ་ལྷག་པ།
༄༅། །བོད་རྒྱལ་ལོ་ ༢༡༣༦ རབ་བྱུང་བཅུ་བདུན་པའི་ས་གླང་ཕྱི་ལོ་ ༢༠༠༩ ཕྱི་ཟླ་ ༧ ཚེས་ ༦ ཉིན་གངས་ལྗོངས་བོད་རྒྱལ་ཁབ་ཆེན་པོའི་ཆོས་སྲིད་གཉིས་ཀྱི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འགྲོ་བ་ལྷ་དང་བཅས་པའི་དགོན་དཔུང་དུ་སྐུ་བལྟམས་ཏེ་དགུང་གྲངས་ ༧༤ ཧྲིལ་པོར་ཕེབས་པའི་སྐུའི་འཁྲུངས་སྐར་གྱི་དུས་ཚིགས་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་སྲུང་བརྩི་ཞུས་ཡོད། 
དེ་ཡང་སྔ་དྲོ་ཆུ་ཚོད་ ༧ པའི་ཐོག་བཞུགས་སྒར་ལྷ་རྒྱལ་རིར་སྐུ་ཁམས་དང་མཐུན་པའི་སྐུ་རླུང་དར་འཛུགས་དང་། དར་ཆེན་ལ་ན་བཟའ་སྒྲོན་འབུལ་གནང་རྗེས་ཁྲོ་བོ་ཁམས་གསུམ་དབང་འདུས་དང་། བསྟན་སྲུང་དམར་ནག་གཉིས་ཀྱི་སྤྱན་སྔར་སྐུ་བཅར་རྣམ་གྲྭ་དགེ་འདུན་བཞིས་རྒྱགས་རྔན་ལྷ་བསངས་དང་། གནས་ཆུང་དགེ་འདུན་བརྒྱད་ནས་དཀར་ཕྱོགས་སྐྱོང་བའི་ལྷ་སྲུང་མཐུ་བོ་ཆེ་རྣམས་ཀྱི་དབུ་འཕང་དགུང་ལ་འདེགས་པའི་འཕྲིན་སྐུལ་གཟབ་རྒྱས་གནང་། གཞུང་ཞབས་ལས་བྱེད་ཆེ་ཕྲ་ཆུང་གསུམ་དང་། རྡ་སའི་ཁུལ་གནས་སེར་སྐྱ་མང་ཚོགས་བཅས་ནས་ན་བཟའ་གཟབ་འཕྱོར་དང་བཅས་བསངས་མཆོད་ཀྱི་ཞལ་འདོན་འུར་འདོན་གྲུབ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་དང་དཀར་ཕྱོགས་སྐྱོང་བའི་ལྷ་སྲུང་རྣམས་ཀྱི་དབུ་འཕང་དགུང་ལ་འདེགས་པའི་ལྷ་རྒྱལ་འཐེན་རྗེས་སྔ་དྲོའི་ཆོས་ཕྱོགས་ཀྱི་མཛད་འཆར་ཁག་གྲུབ།
དངོས་གཞིའི་མཛད་སྒོ་སྔ་དྲོའི་ཆུ་ཚོད་ ༩།༠༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ཞབས་སོར་འཁོད་སྐབས་བོད་གཞུང་ཟློས་གར་ཚོགས་པས་རྔ་རོལ་དང་བཅས་གདན་ཞུས་ཀྱིས་བཞུགས་གནས་སུ་འཁོད་བསྟུན་ཟློས་གར་ཚོགས་པས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་མུས་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་སྐབས་ཚང་མས་སྐུ་བཞེངས་གནང་། དེ་རྗེས་དཔལ་ལྡན་བཀའ་བློན་ཁྲི་ཚབ་མཆོག་ནས་སྐུ་དཔར་མཐོང་གྲོལ་རིན་པོ་ཆེར་མལ་རྟེན་གསུམ་འདེགས་འབུལ་ཞུས་རྗེས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་དབུས་དཔལ་ལྡན་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས། བོད་མི་མང་སྤྱི་འཐུས་ཚོགས་གཙོ། ཡབ་གཞིས་སྐུ་འཁོར་རྣམ་པ། བཀའ་བློན་ལས་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་བཅས་ནས་རིམ་བཞིན་རྟེན་འབྱུང་མཇལ་དར་སྒྲོན་འབུལ་གནང་བ་དང་ཆབས་ཅིག་བོད་གཞུང་ཟློས་གར་ཚོགས་པས་དྲུག་བཅུའི་དབྱངས་ལྡན་ཞེས་པའི་བསྟོད་གླུ་ཕུལ།
དེ་ནས་གཞུང་ཞབས་ཞབས་ལོ་ ༢༥ འཁོར་བའི་ལས་བྱེད་རྣམས་ལ་གཞུང་ཞབས་འདེམས་བསྐོ་ལྷན་ཁང་ནས་ལེགས་སྐྱེས་འབུལ་རྒྱུར་འདེམས་ལྷན་དྲུང་ཆེ་སྣང་ས་ཆོས་སྒྲོན་ལགས་ནས་ལོ་རྒྱུས་སྒྲོགས་སྦྱང་གནང་སྟེ་བཀའ་བློན་ཁྲི་ཚབ་མཆོག་ནས་ཁོང་རྣམས་ལ་ལེགས་སྐྱེས་གསོལ་རས་གནང་གྲུབ་རྗེས་བཙན་བྱོལ་བོད་གཞུང་གི་གཞུང་ཞབས་ལས་དོན་གཟེངས་ཐོན་གཟེངས་རྟགས་ཚོགས་ཆུང་གི་ཚོགས་གཙོ་ངམ་དྲུང་བཀྲ་ཤིས་ཕུན་ཚོགས་མཆོག་ནས་ལས་དོན་གཟེངས་ཐོན་གཞུང་ཞབས་ཀྱི་ངོ་སྤྲོད་སྙིང་བསྡུས་སྒྲོགས་སྦྱང་གནང་སྟེ་དཔལ་ལྡན་བཀའ་བློན་ཁྲི་ཚབ་མཆོག་ནས་གཟེངས་རྟགས་གནང་།
༡༽ ཨ་མར་ཨུ་ཇ་ལ་ཞེས་པའི་ཧིན་ཡིག་ཚགས་ཤོག་ཁང་ནས་གོ་སྒྲིག་ཐོག་རྒྱ་གར་ས་གནས་སློབ་ཕྲུག་རྣམས་ནས་༸གོང་ས་མཆོག་གི་སྐུའི་འཁྲུངས་སྐར་ལ་འཚམས་ཞུའི་ཤིས་ཤོག་ཕུལ་བ་ཁག་དང་།
༢༽ འཚེ་མེད་ཞི་བའི་ལྟ་གྲུབ་སྦྱོང་བརྡར་ཁང་ནས། འཚེ་མེད་ཞི་བའི་ལྟ་གྲུབ་དང་འབྲེལ་བའི་ལམ་སྟོན་གནད་ཆེ་གང་མང་ཕྱོགས་བསྒྲིགས་ཀྱིས་དམིགས་བསལ་དྲན་གསོའི་བརྙན་དེབ།
༣༽ ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་ནས། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་རྩོམ་བྲིས་བྱས་པ་གསེར་རྟ་བླ་རུང་ཆོས་ཀྱི་གྲོང་ཁྱེར་དང་། ཆོས་རྗེ་མཁན་པོ་འཇིགས་མེད་ཕུན་ཚོགས་ཀྱི་མཛད་རྣམ་ངོ་སྤྲོད་མདོར་བསྡུས། གསེར་འོད་འཕྲོ་བའི་ཞབས་རྗེས།
༤༽ སྐྱེས་གསར་ཀླུ་སྒྲུབ་ནས། རྒྱ་གར་ནང་པའི་གནས་ཡིག་ཕྱོགས་བསྒྲིགས་ཞུས་པ་བཅས་ཀྱི་དཔེ་དེབ་གསར་ཐོན་ཁག་དཔལ་ལྡན་བཀའ་བློན་ཁྲི་ཚབ་མཆོག་ནས་དབུ་འབྱེད་གནང་གྲུབ་རྗེས་ཨོ་སི་ཊོ་ལི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཅལ་ཌན་སྦཡེ་མཆོག་ནས་གཏམ་བཤད་སྤེལ།
དེ་རྗེས་དཔལ་ལྡན་བཀའ་བློན་ཁྲི་ཚབ་མཆོག་ནས་བཀའ་ཤག་གི་གཏམ་བཤད་སྤེལ་བའི་ནང།
བོད་རྒྱ་འབྲེལ་མོལ་རྒྱུན་འཁྱོང་བྱ་རྒྱུའི་གྲོས་གཞི་ངེས་གཏན་གྱི་བསམ་འཆར་ཕུལ་ཟིན་པ་འདིའི་ཐོག་ང་ཚོའི་ངོས་ནས་འབྲེལ་མོལ་གནང་རྒྱུའི་གོ་སྒྲིག་ཡོད་མུས་ལྟར། རྒྱ་ནག་གཞུང་གིས་བརྡ་ལན་ནམ་བྱུང་དང་བསྟུན་འབྲེལ་མོལ་མུ་མཐུད་བྱ་རྒྱུའི་ཆོད་སེམས་ལ་འགྱུར་བ་མེད།
འཛམ་གླིང་ཁྱོན་ཡོངས་སུ་གནས་པའི་ཞི་བདེ་ལ་དགའ་བའི་མང་ཚོགས་བོད་ཀྱི་རྩ་དོན་དང་ཆོས་རིག་འཛིན་སྐྱོང་བཅས་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་མཐུན་འགྱུར་གནང་མཁན་ཡོངས་ལ་གོ་སྐབས་འདི་བཟུང་སྟེ་འཚམས་འདྲི་དང་ཐུགས་རྗེ་ཆེ་ཞེས་ཞུ་རྒྱུ་ཡིན། ལྷག་པར་སྔ་ལོ་ནས་བཟུང་རྒྱ་རིགས་རྩོམ་པ་པོ་དང་མཁྱེན་ལྡན་བོད་དོན་དང་འབྲེལ་བའི་དྲང་བདེན་གྱི་གཏམ་བཤད་དང་རྩོམ་ཡིག་སྤེལ་མཁན་མང་པོ་བྱུང་བ་རྣམས་ལ་ཡང་བཀའ་དྲིན་རྗེས་དྲན་གྱི་སྒོ་ནས་ལེགས་སོའི་བསྔགས་བརྗོད་ཞུ་རྒྱུ་ཡིན།
དེ་བཞིན་ཨོ་སི་ཀྲེ་ལི་ཡའི་སྲིད་དོན་ཚོགས་པ་རིས་མེད་ཀྱི་གྲོས་ཚོགས་འཐུས་མིའི་ལྷན་ཚོགས་སྐུ་ངལ་འཛེམས་མེད་ཀྱིས་བོད་ཀྱི་བདེན་པའི་རྩ་དོན་ལ་རྒྱབ་སྐྱོར་མཚོན་སླད་༸གོང་ས་མཆོག་གི་འཁྲུངས་ཚེས་དང་བསྟུན་ལྷ་སར་ཆེད་ཕེབས་གནང་བར་སྙིང་ནས་བཀའ་དྲིན་རྗེས་དྲན་དང་དགའ་བསུ་ཞུ་རྒྱུ་ཡིན། ད་རེས་གྲོས་ཚོགས་འཐུས་མི་ལྷན་ཚོགས་ལྷ་སར་ཆེད་ཕེབས་གནང་བ་འདི་ནི་ཨོ་སི་ཀྲེ་ལི་ཡའི་གཞུང་མང་གིས་བོད་མིར་ཐུགས་བརྩེ་དང་རྒྱབ་སྐྱོར་གྱི་ངོ་བོ་གསལ་པོ་མཚོན་པ་མ་ཟད། བྱུང་རབས་ཀྱི་དོན་སྙིང་དང་ལྡན་པ་ཞིག་ཡིན་པར་ངོས་འཛིན་བྱེད་ཀྱི་ཡོད།
ཅེས་སོགས་གཏམ་བཤད་སྤེལ་གྲུབ་རྗེས་བོད་མི་མང་སྤྱི་འཐུས་ཚོགས་གཙོ་མཆོག་ནས་སྤྱི་འཐུས་ཀྱི་གཏམ་བཤད་སྤེལ་བའི་ནང་། ༸གོང་ས་མཆོག་གི་༸སྐུའི་འཁྲུངས་སྐར་ནི་ཕྱི་རྒྱལ་ཁག་ཏུ་ཡོད་པའི་བོད་རིགས་མང་ཚོགས་འདུ་འཛོམས་བྱ་རྒྱུའི་གོ་སྐབས་ཉུང་ཤས་ཡོད་པའི་ནང་ནས་གཅིག་ཡིན་ཞིང་། ད་ལྟའི་ཆར་ཡུལ་ལུང་གསར་པའི་ནང་སྒེར་སོ་སོར་ཡང་འཚོ་ཐབས་ཀྱི་དཀའ་ངལ་ཡོད་རུང་རྒྱུན་དུ་ནས་བོད་མི་ཞིག་ཡིན་པའི་ཆ་ནས་རྩ་དོན་གྱི་འགན་ཁུར་ལ་ཐུགས་སྣང་གནང་གལ་ཆེ། བོད་རིགས་གནས་ཡུལ་ས་གནས་སོ་སོའི་ནང་གི་བོད་རིགས་ཚོགས་པ་ཁག་ཚགས་ཚུད་དང་ནུས་ཤུགས་ཆེ་རུ་གཏོང་བ་དང་འབྲེལ་གཞོན་སྐྱེས་ཚོར་༸རྒྱལ་བ་རིན་པོ་ཆེའི་བཀའ་དགོངས་བཞིན་བཟང་སྤྱོད་དང་། བོད་པའི་སྐད་ཡིག རིག་གཞུང་། ཆོས་བཅས་པའི་སློབ་གསོའི་ལས་འགུལ་སྤེལ་རྒྱུར་ཤུགས་སྣོན་སྐྱོན་དགོས།
གཞན་ཡང་ཕྱི་རྒྱལ་དུ་ཡོད་པའི་བོད་རིགས་ཚོགས་པ་ཚོས་སོ་སོའི་འཚོ་གནས་དྲག་ཙམ་ཕྱིན་རྗེས་རྒྱ་བལ་འབྲུག་གསུམ་ནང་གཞིས་ཆགས་སྐྱོ་བ་ཁག་ལ་རོགས་སྐྱོར་དང་། བོད་ནང་འཕྲོད་བསྟེན་དང་ཤེས་ཡོན་སོགས་དང་འབྲེལ་བའི་ལས་འཆར་ཁག་ལ་རོགས་སྐྱོར་ཐུབ་པ་གནང་དགོས་ཤིང་། ལར་ནས་མ་འོངས་པར་བོད་མི་ཚོར་ཆབ་སྲིད་ཀྱི་རང་དབང་ཇི་ཙམ་ཐོབ་ཀྱང་བོད་མིའི་ཤེས་ཡོན་གནས་ཚད་དང་དཔལ་འབྱོར་གནས་སྟངས་སྐྱོ་པོར་གྱུར་ཚེ་གཞན་གྱི་བྲན་གཡོག་ཏུ་ཚུད་རྒྱུ་ཡིན་པར་གདོན་མི་ཟ་བས་དེ་ལུགས་ཚང་མས་ཡིད་གཟབ་གནང་དགོས།
དེ་རིང་གི་གོ་སྐབས་འདི་བརྒྱུད་ནས་རྒྱ་ནག་གི་འགོ་ཁྲིད་ཚོར་ཞུ་རྒྱུར། ཁྱེད་རྣམ་པས་ད་ལྟའི་འཁྲུལ་སྣང་གི་བསམ་བློ་ནས་ཕྱིར་དོན་ཏེ་དངོས་ཡོད་གནས་སྟངས་གཞིར་བཞག་གིས་བོད་དོན་དཀའ་རྙོག་ཞི་བའི་ཐོག་སེལ་བ་བརྒྱུད་ནས་རྒྱ་ནག་ཙམ་མ་ཡིན་པར་འཛམ་གླིང་ཕྱེད་ཀྱི་ས་ཁུལ་ནང་ཞི་བདེ་དང་། བརྟན་ལྷིང་། འཆམ་མཐུན་ཡོང་རྒྱུར་ནན་བསྐུལ་བྱེད་ཀྱི་ཡོད། རྒྱ་ནག་འགོ་ཁྲིད་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པའི་ཕན་ཚུན་གཉིས་སྨན་གྱི་དགོངས་གཞི་རླབས་ཆེན་ལྡན་པའི་སྐྱེས་བུ་གཅིག་ཡོང་རྒྱུ་མེད་པ་དེ་གསལ་པོ་ཤེས་པའི་ཐོག ད་ལྟའི་གོ་སྐབས་འདི་དམ་འཛིན་མ་ཐུབ་པ་ཡིན་ཚེ་མ་འོངས་རྒྱ་ནག་གི་མི་རབས་གསར་པ་རྣམས་ཀྱིས་ད་ལྟའི་རྒྱ་ནག་གི་འགོ་ཁྲིད་ཚོས་འགན་ཁུར་ཐུབ་མེད་པའི་ལོ་རྒྱུས་ཀྱི་ཉེས་འགན་སྤངས་རྒྱུར་ངེས་པས་དེའི་འགན་ཁྱེད་ཚོས་འཁྱེར་དགོས། ད་ལྟའི་རྒྱ་ནག་འགོ་ཁྲིད་ཚོ་དཔལ་འབྱོར་དང་། དམག་དཔུང་གི་སྟོབས་ཤུགས་ཀྱི་འཁྲུལ་སྣང་ནང་མགོ་འཁོར་བ་ལས། རྒྱལ་ཁབ་ཀྱི་ཆེ་མཐོང་ངོ་མ་དེ་བཟང་སྤྱོད་ཀྱི་ལམ་ནས་མ་གཏོགས་ཐོབ་ཐབས་མེད་པ་དེ་གསལ་པོ་ངོས་འཛིན་གནང་ཐུབ་ཀྱི་མི་འདུག དེས་ན་རྒྱ་ནག་ནང་གཞི་རིམ་འགྲོ་བ་མིའི་ཐོབ་ཐང་ལ་སྲུང་བརྩི་དང་། བོད་དང་གྲངས་ཉུང་མི་རིགས་གཞན་གྱི་མངོན་འདོད་དང་དཀའ་རྙོག་རྣམས་ཞི་བའི་ལམ་ནས་སེལ་རྒྱུ་གལ་འགངས་ཆེན་པོ་ཡིན་པ་བཅས་སོགས་ཀྱི་གཏམ་བཤད་སྤེལ་རྗེས་སྐུའི་འཁྲུངས་སྐར་གྱི་སྲུང་བརྩིའི་སླད་གཞས་སྣ་ཁག་བཅུ་ཁྲབ་སྟོན་གྱིས་མཛད་སྒོ་ཁག་ལེགས་གྲུབ་བྱུང་བ་བཅས་ཀྱི་གནས་བསྡུས་སུ།
