༢༠༠༩ ཕྱི་ཟླ་ ༧ ཚེས་ ༨ རེས་གཟའ་ལྷག་པ།
༄༅། །རྒྱ་གར་གྱི་བདེ་སྲུང་བློན་ཆེན་ཟུར་པ་དང་བོད་དོན་རྒྱབ་སྐྱོར་བ་སྐུ་ཞབས་ George Ferandes མཆོག་དང་། ཁོང་གི་ཕྱག་རོགས་ Jaya Jaitley དང་ Ajay Singh རྣམས་རྡ་སར་ཕེབས་ཡོད་པ་དང་སྟབས་བསྟུན། ཕྱི་ལོ་ ༢༠༠༩ ཕྱི་ཟླ་ ༧ ཚེེས་ ༢ དགོང་དྲོ་ཆུ་ཚོད་ ༥ །༣༠ ཐོག་གཞུང་འབྲེལ་མ་ཡིན་པའི་ཚོགས་པ་ལྔས་ཐེག་ཆེན་ཆོས་གླིང་གཙུག་ལག་ཁང་གི་དུས་འཁོར་ལྷ་ཁངདུ་མི་མང་རྣམས་ལ་གཏམ་བཤད་གནང་རྒྱུའི་ལས་རིམ་ཞིག་གོ་སྒྲིག་ཞུས་ཡོད།
དེ་ཡང་ཐོག་མར་དབུས་བུད་མེད་ཚོགས་པའི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ནས་ངོ་སྤྲོད་གནང་གསལ། སྐུ་ཞབས་ George Fernandes མཆོག་ནི་རྒྱ་གར་གྱི་བདེ་སྲུང་བློན་ཆེན་སོགས་ཀྱི་ལས་གནས་ལ་བཞུགས་པའི་སྐབས་སུ་བོད་དོན་ལ་ཐུགས་སྣང་ཆེར་བཞེས་ཀྱིས་རྒྱབ་སྐྱོར་གནང་མཁན་ཞིག་ཡིན་པ་མ་ཟད། ད་ལྟའང་མུ་མཐུད་རྒྱབ་སྐྱོར་གནང་མུས་ཡིན་པ་སོགས་ཀྱི་ངོ་སྤྲོད་གཏམ་བཤད་གནང་གྲུབ་རྗེས་ Jaya Jaitley ལགས་ཀྱིས་གཏམ་བཤད་གནང་དོན། ང་རང་ལ་མཚོན་ན་ཐོག་མར་ཆབ་སྲིད་ཀྱི་ལས་དོན་ནང་འཛུལ་ཞུགས་བྱེད་སྐབས་སྐུ་ཞབས་ George Fernandes མཆོག་ནས་ལམ་སྟོན་དང་སྐུལ་མ་ཟབ་མོ་གནང་བར་བརྟེན་ནས་སྤྱིར་འཛམ་གླིང་གི་གནད་དོན་དང་ཡང་སྒོས་བོད་དོན་ལ་དོ་སྣང་དང་རྒྱབ་སྐྱོར་བྱེད་རྒྱུའི་བསམ་བློ་སྐྱེས་བྱུང་།དུས་དེ་ནས་བཟང་བོད་དོན་སྐོར་ལ་ལས་འགུལ་གང་འདྲ་ཞིག་སྤེལ་ཡང་མཉམ་ཞུགས་བྱེད་མཁན་ཞིག་ཡིན་སྐོར་སོགས་ཀྱི་གཏམ་བཤད་གནང་།
དེ་རྗེས་ Ajay Singh ལགས་ནས་གཏམ་བཤད་གནང་དོན། འགའ་ཞིག་གིས་བོད་རྒྱལ་ཁབ་ཆུང་ཆུང་འདི་ལྟ་བུ་ཞིིག་ནས་རྒྱ་ནག་སྟོབས་ཆེན་རྒྱལ་ཁབ་ལ་འཐབ་རྩོད་བྱེད་རིན་མེད་ཅེས་ཤོད་མཁན་ཡོད་ཀྱང་ངའི་ངོས་ནས་བོད་དོན་ལ་ངོས་འཛིན་དང་འགྲེལ་བརྗོད་བྱེད་སྟངས་དེ་རིགས་ལ་རྩ་བ་ནས་མོས་མཐུན་མེད། དཔེར་ན། ༡༩༥༩ ལོར་༸གོང་ས་མཆོག་རྒྱ་གར་དུ་ཆིབས་སྒྱུར་བསྐྱངས་རྗེས་དེའི་སྐབས་བོད་དོན་འཐབ་རྩོད་ལ་རྒྱབ་སྐྱོར་གནང་མཁན་ཡོད་ཀྱང་དེང་སྐབས་དང་བསྡུར་ན་ཁྱད་པར་ཆེན་པོ་ཕྱིན་ཡོད། ད་ལྟའི་ཆར་འཛམ་གླིང་འདིར་བོད་དོན་ལ་དོ་སྣང་དང་རྒྱབ་སྐྱོར་བྱེད་མཁན་མི་མང་ཁྲི་ཕྲག་མང་པོ་ཡོད། དེ་བཞིན་རང་ཉིད་ནས་ཀྱང་བོད་དོན་ལ་རྒྱབ་སྐྱོར་མུ་མཐུད་ཞུ་རྒྱུའི་དམ་བཅའ་བཞག་ཡོད་སོགས་ཀྱི་གཏམ་བཤད་གནང་གྲུབ་མཚམས་སྐུ་ཞབས་ George Fernandes མཆོག་ནས་ང་ཚོ་ལ་རྒྱལ་ཁ་ཐོབ་ཀྱི་རེད། ཅེས་པའི་གླུ་གཞས་འགོ་འཛུགས་ཀྱིས་གཏོང་སྐབས་དེར་འཛོམས་པའི་མི་མང་ཚང་མས་སྐུ་བཞེངས་ཐོག་མཉམ་དུ་བཏང་། དེ་རྗེས་ཚོགས་པ་ལྔའི་སྐུ་ཚབ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་དབང་འོད་འབར་ལགས་ནས་ཁོང་རྣམས་ལ་ཐུགས་རྗེ་ལེགས་འབུལ་གྱིས་ཕྱག་རྟགས་ཕུལ་གྲུབ་མཚམས་གཞོན་ནུའི་ཟུང་དྲུང་བསྟན་འཛིན་ནོར་བཟང་ལགས་ནས་ཐུགས་ཆེ་ཞུའི་གཏམ་བཤད་གནང་།
ད་རེས་ཁོང་རྣམ་པའི་གཏམ་བཤད་ཀྱི་འདུ་འཛོམས་ལ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་། བོད་ཀྱི་བུད་མེད་ཚོགས་པའི་ཚོགས་གཙོ། གཞུང་འབྲེལ་མ་ཡིན་པའི་ཚོགས་པ་ལྔའི་འགན་འཛིན་དང་ལས་བྱེད། དེ་བཞིན་ཉེ་འཁོར་དུ་གནས་པའི་སེར་སྐྱ་མིང་མང་རྣམས་མཉམ་ཞུགས་གནང་ཡོད་པ་བཅས་ཀྱི་གནས་བསྡུས་སོ།
