༢༠༠༩ ཕྱི་ཟླ་ ༧ ཚེས་ ༢ རེས་གཟའ་ཕུར་བུ།
༄༅། །༢༠༠༩ ཕྱི་ཟླ་ ༦ ཚེས་ ༢༧ ཉིན་ཁམས་འཇོ་མདའ་རྫོང་པདྨ་ཤང་དང་། གནས་མདོ་ཤང་གཉིས་ཀྱི་སྡེ་ཁོངས་སུ་གཏོགས་པའི་སྟག་ལུང་དགོན་པར་རྒྱལ་གཅེས་རིང་ལུགས་ཀྱི་སློབ་གསོ་སྤེལ་སྟབས་གྲྭ་པ་གཅིག་ཀྱང་དགོན་པར་སྡོད་མཁན་མེད་པར་ཟླ་གཅིག་ལྷག་ཕྱིན་པར་བརྟེན། ས་གནས་རྒྱ་གཞུང་འབྲེལ་ཡོད་ཚན་པས་པདྨ་སྨད་པའི་སྡེ་ནང་ཡོད་པའི་ཤང་གི་ལས་བྱེད་བོད་མི་འགྱུར་མེད་མགོན་པོ་དང་། རྒྱལ་ཚང་རྡོ་རྗེ་གཉིས་ནས་ལས་དོན་བསྒྲུབ་མེད་པའི་ཉེས་མིང་འོག་རྒྱ་དམག་གིས་འཛིན་བཟུང་བྱས་ཏེ་སྐྱབས་ཆེ་དགོན་ཕྱོགས་སུ་ཁྲིད་བཞིན་པའི་སྐབས་ས་གནས་བོད་མི་ ༢༠ ཙམ་ནས་ལམ་ཁ་བཀག་སྟེ་རྒྱ་དམག་དང་འཁྲུག་འཛིང་བྱས་རྐྱེན་བོད་མི་ཁག་གཅིག་ལ་རྨས་སྐྱོན་ཕོག་ཡོད་པ་མ་ཟད། ལྷག་པར་རང་ལོ་ ༤༧ སོན་པའི་ནོར་ལྷ་དང་། རང་ལོ་ ༤༤ ཙམ་དུ་སོན་པའི་མགོན་པོ་དར་རྒྱས་གཉིས་ལ་རྨས་སྐྱོན་ཚབས་ཆེ་ཕོག་རྗེས་གང་དུ་ཁྲིད་ཡོད་མེད་ཤེས་རྟོགས་མེད་པར་གྱུར་ཡོད། དེ་དག་གི་ཁོངས་ནས་འཛིན་བཟུང་བྱས་པའི་བོད་མི་ཁག་གཅིག་གི་མིང་གཞུང་ཤེས་རྟོགས་བྱུང་བར། ༡༽རྨུ་ཚ་ཚང་ཚེ་བརྟན། ༢༽རིས་ཆུང་ཉི་གྲགས། ༣༽བསམ་འཕེལ་ནོར་བུ། ༤༽ཨོ་ཡོ་ཚེ་རིང་། ༥༽བྱམས་པ། ༦༽ག་དགེ་བཅས་ཡིན་འདུག གཞན་རྣམས་མིང་ཤེས་རྟོགས་བྱུང་མེད། སྤྱིར་བཏང་སྐྱབས་ཆེ་དགོན་དུ་རྒྱ་དམག་གཏན་སྡོད་བྱས་ཏེ་ཟླ་བ་གཅིག་ལྷག་འགྲོ་གི་ཡོད། གོང་གསལ་ཁོང་རྣམས་འཛིན་བཟུང་བྱས་རྗེས་སྟག་ལུང་དགོན་གྱི་ཡུལ་སྡེ་ནོར་མ་རུ་བ་དང་། པདྨ་སྨད་པའི་ཕྱོགས་ཀྱི་མི་མང་པོ་འདུ་འཛོམས་ཀྱིས་བོད་མི་གང་བྱུུང་འཛིན་བཟུང་བྱས་པ་གློད་བཀྲོལ་ཡོང་ཐབས་ཞུ་བསྐུལ་བྱས་ཡོད་ཀྱང་། རྒྱ་དམག་གིས་མེ་མདའ་གང་བྱུང་འཕངས་ཏེ་བཀག་འགོག་བྱས་ཡོད་འདུག་ དེ་མིན་ས་གནས་དེའི་ཁོངས་ཀྱི་གནས་མདོ་ཆུས་ཁོངས་ཀྱི་དུད་ཚང་མི་རེ་བསྡུ་སྐོང་གིས་༸གོང་ས་མཆོག་དང་། རྒྱལ་བ་ཀརྨ་པ། སྐྱབས་ཆེ་དགོན་པ་བཅས་ལ་དགག་པ་རྒྱག་དགོས་སྐོར་བཤད་ཡོད།
ཚེས་ ༢༩ ཉིན་འཇོ་ཕུ་དགོན་པའི་ཉེ་འགྲམ་གྱི་ས་ཆ་ཞིག་རྒྱ་གཞུང་འབྲེལ་ཡོད་ཚན་པར་དགོས་སྐོར་བཤད་པར་མི་མང་ ༥༠༠ ཙམ་གྱིས་དགོན་པའི་ས་ཆ་བཙན་འཕྲོག་བྱས་ན་མི་འགྲིག་པའི་སྐོར་སྐད་འབོད་བྱས་པར་རྒྱ་དམག་ཁྱོན་ཆེ་ཡོང་སྟེ་བཀག་འགོག་བྱས་འདུག
གཞན་ཡང་གནས་མདོ་དགོན་པ་དང་། གཏེར་སྟོན་དགོན་པ། རྒྱུ་ནེ་དགོན་པ་བཅས་ཀྱི་སྒྲུབ་བླ་ཁག་གཅིག་ལ་མེ་མདའ་འཁུར་བཅུག་སྟེ་རྒྱ་དམག་མཉམ་དཔར་ལེན་བྱས་ཏེ་བེད་སྤྱོད་གང་ཞིག་བྱེད་འཆར་ཡོད་པ་ཆ་མ་རྟོགས་པར་གྱུར་ཡོད་པ་སོགས་འཇོ་མདའ་རྫོང་ཁོངས་སུ་ས་གནས་མང་ཚོགས་དང་དགོན་སྡེ་ཁག་ལ་དམ་བསྒྲགས་དང་བསུན་གཙེར་ཅི་ཆེར་བཟོ་བཞིན་ཡོད་པའི་གནས་ཚུལ་ཐོན་འདུག
