༢༠༠༩ ཕྱི་ཟླ་ ༧ ཚེས་ ༢ རེས་གཟའ་ཕུར་བུ།
༄༅། །བོད་གཞུང་ཆོས་རིག་ལས་ཁུངས་ནས་ལོ་ལྟར་བོད་ཟླ་ ༥ ཚེས་ ༡༠ སྟབས་བསྟུན་གྱིས་ཐེག་ཆེན་ཆོས་གླིང་གཙུག་ལག་ཁང་དུ་མཧཱ་གུ་རུའི་འབུམ་ཚོགས་གོ་སྒྲིག་ཞུ་མུས་ལྟར། འདི་ལོ་ཡང་བོད་རྒྱལ་ལོ་ ༢༡༣༦ རབ་བྱུང་རི་ཟླའི་ས་གླང་ལོའི་བོད་ཟླ་ ༥ ཚེས་ ༦ ནས་ཚེས་ ༡༠ ཕྱི་ལོ་ ༢༠༠༩ ཕྱི་ཟླ་ ༦ ཚེས་ ༢༨ ནས་ཕྱི་ཟླ་ ༧ ཚེས་ ༢ བར་ཉིན་གྲངས་ལྔའི་རིང་༸རྒྱལ་བའི་སྐུ་ཕྱ་དང་། བོད་དོན་བདེན་མཐའ་སེལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་ཞལ་ཕྱེ་ཐོག རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་དང་། སྔགས་འཆང་འོད་ཟེར་རྡོ་རྗེ་རྣམ་གཉིས་དབུ་བཞུགས་ཐོག་རྣམ་གྲྭ་འདུས་ཚོགས་དང་། ཀིརྟི་བྱེས་པ་གྲྭ་ཚང། མཚན་ཉིད་གྲྭ་ཚང་། ཚེ་མཆོག་གླིང་གྲྭ་ཚང་། སྒྲོལ་མ་གླིང་བཙུན་དགོན། དགའ་གདོང་གྲྭ་ཚང་།གནས་ཆུང་གྲྭ་ཚང་། འཆི་མེད་དགའ་ཚལ་གླིང་བཅས་བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པའི་མི་མང་དང་། གློ་བུར་དུ་ལྷགས་པའི་དགེ་བཙུན་སྔགས་གསུམ་བཅས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་ཞུས་ཡོད།
ཉིན་གྲངས་ལྔའི་རིང་བོད་གཞུང་ཆོས་རིག་ལས་ཁུངས་ནས་དགེ་བཙུན་གྲངས་ ༧༠༠ དང་། མང་ཚོགས་གྲངས་ ༤༠༠ བཅས་ལ་བསྙེན་བཀུར་གསོལ་ཇ་དང་། བཞེས་བག གུང་ཚིགས་དཀར་སྐྱོང་། དགེ་བཙུན་སྔགས་གསུམ་ལ་ཉིན་རེ་སྐུ་འགྱེད་སྒོར་ ༡༠༠།༠༠ ཕུལ་ཡོད་འདུག
བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་ཞུས་རྐྱེན་ཆར་ཆུ་དུས་སུ་བབ་པའི་དགེ་མཚན་བླ་མེད་བྱུང་བ་ནི་མཐོང་ཆོས་སུ་འགྱུར། ཉིན་མཐའ་མའི་སྔ་དྲོའི་ཆུ་ཚོད་ ༦།༣༠ ཐོག་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་ཆིབས་སྒྱུར་བསྐྱངས་ཏེ་ཆུ་ཚོད་ ༩ ཡོལ་ཙམ་བར་སྨོན་ལམ་འདོན་སྐུལ་གནང་སྟེ་ཚོགས་མགོན་དུ་སྐུ་བཞུགས་གནང་། དེ་བཞིན་བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན། སྤྱི་འཐུས་རྒྱུན་ལས་རྣམ་པ། ལྷན་ཁང་སོ་སོའི་དྲུང་ཆེ་ཆུང་བཅས་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་མི་སྣ་བཅས་ཆེད་ཕེབས་གནང་བ་བཅས་ཀྱི་གནས་བསྡུས་སོ།
