༢༠༡༣ ཟླ་ ༨ ཚེས་ ༣ རེས་གཟའ་སྤེན་པ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༨ ཚེས་ ༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནཱག་པུར་གྲོང་ཁྱེར་གྱི་གནམ་ཐང་དུ་ཕེབས་འབྱོར་སྐབས། གྲོང་ཁྱེར་དེའི་ནང་ཡོད་པའི་ཧིན་བོད་མཛའ་འབྲེལ་ཚོགས་པའི་སྐུ་ཞབས་ཨ་ཤི་ཝི་ཀར་ལགས་ཀྱིས་སྣེ་འཁྲིད་འོག་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་དང་། རྒྱ་གར་ནང་པའི་རྗེས་འབྲངས་པ་ཚོས་ཕེབས་བསུའི་སྣེ་ལེན་གཟབ་རྒྱས་ཞུས་པ་དང་འབྲེལ་འཚམས་འདྲི་ཞུས་འདུག
སྐབས་དེར་སྲིད་སྐྱོང་མཆོག་གིས་དེང་སྐབས་རྒྱ་ནག་རྒྱལ་ཁབ་དེ་བཞིན་རྒྱ་གར་ལ་ཉེན་ཚབས་ཆེན་པོ་ཞིག་ཆགས་ཡོད་སྟབས། དུས་སྐབས་དེར་རྒྱ་གར་གྱི་ཡུལ་མི་དང་བོད་མི་ཚོ་མཉམ་འབྲེལ་གྱི་ནུས་པ་བཏོན་ནས་བོད་ལ་རང་དབང་ཐོབ་པ་ཞིག་བྱུང་ན། མ་འོངས་པར་རྒྱ་གར་ལ་ཡང་ཁེ་ཕན་ཆེན་པོ་ཡོང་རྒྱུ་ཡིན། ཞེས་གསུངས་འདུག
དེ་ནས་སྲིད་སྐྱོང་མཆོག་གིས་གྲོང་ཁྱེར་དེའི་ནང་རྟེན་གཞི་བྱས་པའི་དིག་ཤ་བྷུ་མི་ཞེས་པའི་ནང་པའི་གནས་ཆེན་དུ་གནས་གཟིགས་དང་འབྲེལ་རྒྱ་གར་གྱི་མཁས་དབང་ཨམ་བྷེ་དི་ཀར་མཆོག་གི་མཛད་རྗེས་ལ་བསྔགས་བརྗོད་གནང་བ་དང་ཆབས་ཅིག་དམ་པ་ཁོང་གིས་རྒྱ་གར་གཞུང་ཕྱོགས་ནས་གཞུང་འབྲེལ་ཐོག་བོད་དོན་ངོས་འཛིན་ཡང་དག་གནང་དགོས་པའི་རེ་འདུན་བཏོན་ཡོད་སྐོར་གསུངས་པ་དྲན་གསོ་གནང་ཡོད།
ལྷག་པར་ཁོང་གིས་རྒྱ་གར་རྒྱལ་ཁབ་ནི་སངས་རྒྱས་བཅོམ་ལྡན་འདས་ཀྱི་གནས་མཆོག་ཡིན་པ་མ་ཟད། བོད་མི་ཚོས་ཀྱང་རྒྱ་གར་འཕགས་པའི་ཡུལ་འདི་བཞིན་རྩ་ཆེན་ཞིག་ལ་ངོས་འཛིན་བྱེད་བཞིན་ཡོད། ཕྱོགས་མཚུངས་ལོ་རྒྱུས་ཐོག་ནས་རྒྱ་བོད་གཉིས་དབར་འབྲེལ་བ་ཟབ་མོ་ཡོད་སྟབས། རྒྱ་གར་གྱི་ངོས་ནས་བོད་ཀྱི་གནད་དོན་ཐོག་སྔར་ལྷག་རྒྱབ་སྐྱོར་གནང་རྒྱུའི་རེ་འདུན་ཞུ་བཞིན་ཡོད། ཅེས་གསུངས་འདུག
