༢༠༡༣ ཟླ་ ༨ ཚེས་ ༢ རེས་གཟའ་པ་སངས།
༄༅། །ཨ་རིའི་གྲོས་ཚོགས་ཀྱི (Tom Lantos) ཊོམ་ལེན་ཊོ་སེ་འགྲོ་བ་མིའི་ཐོབ་ཐང་ཚོགས་ཆུང་གི་གཙོ་འཛིན་ལས་རོགས་དང་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་ཕ་རན་ཀ་ཝུབ་ (Frank Wolf) ལགས་ཀྱིས་ཨ་རི་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་གི་ཞི་མོལ་ཐོག་ད་བར་དོན་དམ་གྱི་མཇུག་འབྲས་གང་ཡང་ཐོན་མེད་སྐོར་སྐྱོན་བརྗོད་གནང་བ་དང་འབྲེལ་ཨ་རིའི་གཞུང་ཕྱོགས་ནས་གནད་དོན་དེའི་ཐོག་སྔར་ལྷག་འབད་བརྩོན་གནང་དགོས་པའི་སྐུལ་མ་ཞུས་འདུག
དེ་ཡང་ཕྱི་ལོ་ ༢༠༡༣ ཟླ་ ༧ ཚེས་ ༣༠ དང་ ༣༡ ཉིན་རྒྱ་ནག་གི་གྲོང་ཁྱེར་ཁུན་མིང་ནང་ཨ་རི་དང་རྒྱ་ནག་གི་སྐུ་ཚབ་དབར་འགྲོ་བ་མིའི་ཐོབ་ཐང་གི་གླེང་མོལ་གནང་ཡོད་པ་ལྟར། ཕྱི་ཚེས་ ༣༠ ཉིན་སྐུ་ཞབས་ཕ་རན་ཀ་ཝུབ་ལགས་ཀྱིས་ཡོངས་ཁྱབ་གསལ་བསྒྲགས་ཤིག་སྤེལ་བ་དང་ཆབས་ཅིག་ཨ་རི་གཞུང་ཕྱོགས་ནས་རྒྱ་གཞུང་ལ་འཛིན་པའི་སྲིད་བྱུས་ལ་སྐྱོན་བརྗོད་གནང་བ་མ་ཟད། ལོ་འཁོར་གྱི་འགྲོ་བ་མིའི་ཐོབ་ཐང་གི་གྲོས་མོལ་རྣམས་ཕྱི་གསལ་ནང་གསལ་མེད་སྐོར་ཐེར་འདོན་གནང་སྟེ་ཨ་རིའི་གཞུང་ཕྱོགས་ནས་འགྲོ་བ་མིའི་ཐོབ་ཐང་དང་ཆོས་དད་རང་དབང་ནི་ཨ་རིའི་ཕྱི་འབྲེལ་སྲིད་བྱུས་གཙོ་གྲས་ཁོངས་སུ་འཇོག་དགོས་པའི་འབོད་སྐུལ་ཞུས་འདུག
ལྷག་པར་ཁོང་གིས་དེ་སྔ་རྒྱལ་ས་པེ་ཅིང་གི་གནམ་བདེ་སྒོ་མོའི་ཐང་ཆེན་དུ་དོན་རྐྱེན་བྱུང་བ་ནས་བཟུང་ཨ་རི་དང་རྒྱ་ནག་གཞུང་གི་སྐུ་ཚབ་དབར་འགྲོ་བ་མིའི་ཐོབ་ཐང་སྐོར་ལ་ཞི་མོལ་ཐེངས་མང་བྱུང་ཡོད། འོན་ཀྱང་རྒྱ་ནག་ནང་ཆེས་ཞན་པོ་ཡོད་པའི་འགྲོ་བ་མིའི་ཐོབ་ཐང་གི་གནད་དོན་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད། ཨ་རིའི་ནིའུ་ཡོཀ་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ངོས་ནས་ཀྱང་ཨ་རི་དང་རྒྱ་ནག་གཞུང་བར་བྱུང་བའི་ཞི་མོལ་ཡོངས་རྫོགས་ཚིག་སྐམ་པོ་ཙམ་མ་གཏོགས་དོན་དངོས་ཐོག་བོད་ཀྱིས་གཙོས་གྲངས་ཉུང་མི་རིགས་ཀྱི་གཞི་རྩའི་བོད་མིའི་འགྲོ་ཐོབ་ཐང་ཡར་རྒྱས་གཏོང་ཐབས་ཀྱི་འབད་བརྩོན་བྱས་མེད།
དེ་བཞིན་རྒྱ་ནག་གཞུང་གི་བཙན་གནོན་ལ་ཞི་རྒོལ་ཆེད་བོད་མི་མང་དག་ཅིག་གིས་རང་ལུས་མེར་སྲེག་བཏང་ཡོད། རྒྱ་ནག་གཞུང་ནས་བོད་ནང་གི་གྲོང་སྡེ་ཡར་རྒྱས་གཏོང་ཐབས་ཀྱི་ལས་གཞི་འོག་རྒྱ་ནག་གཞུང་གི་ལས་བྱེད་ཁྲི་གཉིས་ཙམ་ཆེད་གཏོང་གིས་བོད་མིར་ཉིན་མཚན་མེད་པར་དཀའ་ངལ་སྤྲོད་བཞིན་ཡོད། ཕྱོགས་མཚུངས་ཨ་རིའི་གཞུང་ཕྱོགས་ནས་རྒྱ་ནག་གཞུང་དང་ལྷན་འགྲོ་བ་མིིའི་ཐོབ་ཐང་གི་ཞི་མོལ་མུ་མཐུད་རྒྱུན་འཛིན་གནང་ཐོག་བོད་ཀྱིས་གཙོས་གྲངས་ཉུང་མི་རིགས་རྣམས་ཀྱི་འགྲོ་བ་མིིའི་ཐོབ་ཐང་གི་ཛ་དྲག་གནས་སྟངས་ཐོག་དོ་དམ་གྱི་འགྱུར་བ་གཏོང་ཐབས་ཀྱི་འབད་བརྩོན་བྱེེད་དགོས། ཞེས་གསུངས་འདུག
