༢༠༠༩ ཕྱི་ཟླ་ ༦ ཚེས་ ༣༠ རེས་གཟའ་མིག་དམར།
༄༅། །བོད་ཀྱི་དཔེ་མཛོད་ཁང་ནས་གོ་སྒྲིག་ཞུས་ཏེ། བོད་གཞུང་མང་བཙན་བྱོལ་དུ་གྱར་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི་ཞུ་སླད་བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་སྡེ་ཚན་ནས་རང་རེའི་ན་གཞོན་རྒྱ་གར་གྱི་མཐོ་སློབ་གང་རུང་ནས་སྦི་ཨེ་དང་། སྦི་ཀོམ། སྦི་ཨེ་སི་གང་རུང་ཐོན་པ། ཡང་ན་དེ་དང་མཉམ་པའི་དེང་སྐབས་ཀྱི་སློབ་ཚན་གང་རུང་ནང་མཐོ་སློབ་ཐོན་པ། དཔེར་ན་སྨན་ཞབས་པ་ལྟ་བུ་དང་། དེ་མཚུངས་ཧི་མ་ལ་ཡའི་རི་རྒྱུད་ཀྱི་ཁོངས་གཏོགས་འབྲས་ལྗོངས་དང་འབྲུག་བཅས་ཀྱི་ན་གཞོན་ཤེས་རིག་གི་ཉིང་ཁུ་འཐུང་འདོད་ཡོད་རིགས་རྣམས་ལ་བོད་ཀྱི་དཔེ་མཛོད་ཁང་ནས་ཞུ་སྙན་དགོས་སྐོར་གསལ་བསྒྲགས་ ༢༠༠༩ ཕྱི་ཟླ་ ༣ ཚེས་ ༡༦ སྤེལ་བ་ལྟར།
ཕྱི་ལོ་ ༢༠༠༩ ཕྱི་ཟླ་ ༥ ཚེས་ ༡ ནས་ཕྱི་ཟླ་ ༦ པའི་ཚེས་ ༣༠ བར་ཟླ་བ་གཉིས་རིང་བོད་ཀྱི་དཔེ་མཛོད་ཁང་དུ་བོད་ཕྲུག་ན་གཞོན་རྣམས་ལ་བོད་ཀྱི་སྐད་ཡིག་དང་། རྩོམ་རིགས། ལོ་རྒྱུས། རིག་གཞུང་། ནང་ཆོས་བཅས་ཀྱི་ཟབ་སྦྱོང་སྐབས་ལོ་རྒྱུས་ཀྱི་སློབ་དཔོན་དབང་འདུས་ལགས་ནས་རྒྱལ་དབང་སྐུ་ཕྲེང་བཅུ་གསུམ་པའི་དུས་སྐབས་ནས་དུས་རབས་ཉེར་གཅིག་པའི་གནས་སྟངས་བར་སློབ་ཁྲིད་གནང་། ལོ་རྒྱུས་ཀྱི་སློབ་དཔོན་བློ་བཟང་ཤཱསྟྲི་ལགས་ནས་བོད་ཀྱི་སྲིད་པ་ཆགས་པའི་ལོ་རྒྱུས་ནས་བཟུང་ད་ལྟའི་གནས་སྟངས་བར་སློབ་ཁྲིད་གནང་། སྐད་ཡིག་གི་སློབ་དཔོན་ན་ག་སངས་རྒྱས་བསྟན་དར་ལགས་ནས་བོད་ཀྱི་བརྡ་སྤྲོད་པའི་གཞུང་ལུགས་སློབ་ཁྲིད་ཐོག་ཡི་གེ་བྲིས་སྟངས་དང་ཀློག་སྟངས་སོགས་ཀྱི་སྐོར་ལ་སློབ་ཁྲིད་གནང་ཡོད། ནང་ཆོས་ཀྱི་སློབ་སྟོན་དགེ་བཤེས་བློ་བཟང་བརྩོན་འགྲུས་ལགས་ནས་ལག་ལེན་སོ་བདུན་མའི་ཚིག་འགྲེལ་བཅས་ཟླ་བ་གཉིས་རིང་སློབ་ཁྲིད་གནང་ཡོད། ཟབ་སྦྱོང་གི་ཉིན་མཐའ་མར་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་སྐུ་མགྲོན་གཙོ་བོར་གདན་ཞུས་ཀྱིས་སློབ་ཁྲིད་ཁང་དུ་བཀའ་བློན་མཆོག་དབུ་བཞུགས་ཐོག་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་དང་། སྐད་ཡིག་དང་ནང་ཆོས། རིག་གནས། ལོ་རྒྱུས་བཅས་ཀྱི་སློབ་དཔོན་རྣམས་ཞབས་སྟེགས་སུ་འཁོད་རྗེས་ཤེས་རབ་སྙིང་པོ་སོགས་འདོན་སྐུལ་གནས་རྗེས་དཔེ་མཛོད་འགན་འཛིན་ནས་བོད་ཀྱི་རིག་གནས་སྐོར་ལ་གཏམ་བཤད་གནང་བ་དང་། དེ་རྗེས་རིམ་པས་སློབ་ཁྲིད་ཀྱི་སློབ་དཔོན་ཁག་ནས་རང་རང་སོ་སོའི་ཉམས་མྱོང་དང་འབྲེལ་བའི་ལམ་སྟོན་གཏམ་བཤད་གནང་གྲུབ་མཚམས་སློབ་ཕྲུག་གི་མཛད་འཆར་ཡོད་ཁོངས་སློབ་མའི་རྒན་བདག་བློ་བཟང་སྒྲོལ་མ་ལགས་ནས་༸གོང་ས་མཆོག་གི་སྐུ་དཔར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་གནང་བ་དང་། སློབ་མ་འཇིགས་མེད་ནོར་བུ་ལགས་ནས་བཀའ་བློན་མཆོག་ལ་མཇར་དར་འབུལ་མཚམས་སློབ་མའི་རྒན་བདག་བློ་བཟང་སྒྲོལ་མ་ལགས་ནས་བོད་ཀྱི་དཔེ་མཛོད་ཁང་གི་འགན་འཛིན་དང་། སློབ་ཁྲིད་གནང་མཁན་སློབ་དཔོན་ལ་སོགས་པར་སློབ་མ་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུའི་སླད་མཇལ་དར་སྒྲོན་འབུལ་གནང་།
དེ་རྗེས་སྐུ་མགྲོན་གཙོ་བོ་ཕྱི་དྲིལ་བཀའ་བློན་མཆོག་ནས་སློབ་ཁྲིད་གནང་མཁན་གྱི་སློབ་དཔོན་རྣམས་པར་ཐུགས་རྗེ་ཆེ་ཞུའི་སླད་མཇལ་དར་གནང་གྲུབ་མཚམས་སློབ་ཕྲུག་རྣམས་ལ་ཕྱག་འཁྱེར་དང་མཇལ་དར་གནང་རྗེས་གསུང་བཤད་གནང་གསལ། རང་རིགས་མི་རིགས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཉར་ཚགས་གནང་གལ་ཆེ་སྐོར་སོགས་ཀྱི་ལམ་སྟོན་རྒྱ་ཆེ་གནང་བ་བཅས་ཀྱི་གནས་བསྡུས་སུ།
