༢༠༡༣ ཟླ་ ༧ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༢༩ ཉིན་གྱི་སྔ་དྲོ་༸གོང་ས་མཆོག་ལྡི་ལི་ནས་མཁའ་ལམ་བརྒྱུད་ལ་དྭགས་སུ་ཆིབས་སྒྱུར་བསྐྱངས་ཏེ་ཁུལ་དེའི་ཞི་བའི་ཚལ་ཕོ་བྲང་དུ་ཉིན་གྲངས་ ༢༡ སྐུ་མཚམས་ལ་བཞུགས་ཞག་མཛད་རྒྱུ་ཡིན་འདུག
དེ་ཡང་༸གོང་ས་༸༉སྐྱབས་མགོན་ཆེན་པོ་མཆོག་གོང་ཚེས་ཉིན་ཁུལ་དེར་༸ཞབས་སོར་འཁོད་གཏན་འཁེལ་བར་བརྟེན། ས་གནས་དེའི་དཔོན་རིགས་དང་མི་དམངས་རྣམས་ནས་མགོན་པོ་གང་ཉིད་མཆོག་ལ་ཕེབས་བསུའི་གྲ་སྒྲིག་འཐུས་ཚང་ཞུ་བཞིན་ཡོད་སྐོར་ལ་དྭགས་ནང་པའི་དགོན་ཚོགས་ཀྱི་ཚོགས་འདུའི་ཚོགས་གཙོ་མཆོག་གིས་བརྒྱུད་ལམ་ཁག་གཅིག་ནང་འགྲེལ་བརྗོད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ཟླའི་ཚེས་ ༢༩ ཉིན་ལ་དྭགས་སུ་ཆིབས་སྒྱུར་བསྐྱངས་ཏེ་འདི་གར་༸ཞབས་སོར་འཁོད་སྐབས་ལ་དྭགས་མང་ཚོགས་དང་དགོན་ཚོགས།
དེ་བཞིན་སེར་སྐྱ་མི་དམངས་རྣམས་ནས་གནམ་ཐང་དུ་ཕེབས་བསུར་བཅར་རྒྱུ་ཙམ་མ་ཟད། དེ་ནས་ཕེབས་འགྲོ་བརྒྱུད་ཞི་བའི་ཚལ་ཕོ་བྲང་དུ་ཆིབས་སྒྱུར་བསྐྱངས་སྐབས་ཕེབས་ལམ་གཡས་གཡོན་དུ་དད་ལྡན་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་མཆོད་རྫས་སྣ་ཚོགས་ཐོགས་ཏེ་ཕེབས་བསུ་རྒྱས་པ་ཞིག་ཞུ་རྒྱུ་ཡིན། དེ་བཞིན་ཕེབས་བསུར་བཅར་ཁོངས་སུ་དགའ་ལྡན་ཁྲི་རིན་པོ་ཆེ་མཆོག་དང་འབྲི་གུང་ཆེ་ཚང་རིན་པོ་ཆེ་མཆོག་སོགས་བླ་ཆེན་མང་དག་ཅིག་ཀྱང་ཡོད་འདུག ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་སྤྱན་རས་གཟིགས་ཀྱི་བསྙེན་པའི་ཐོག་ནས་ཞི་བའི་ཚལ་ཕོ་བྲང་དུ་སྐུ་མཚམས་ལ་བཞུགས་ཞག་མཛད་རྒྱུ་དེ་ནི་ང་ཚོ་ལ་དྭགས་ཡུལ་མི་ཚོའི་གཟི་བརྗིད་དང་བསོད་ནམས་ཆེན་པོ་ཡིན་པ་མ་ཟད། ང་ཚོར་གོ་སྐལ་བཟང་པོ་དེ་འདྲ་ཐོབ་པ་ནི་ཧ་ཅང་དགའ་སྤོབས་སྐྱེས་འོས་པ་ཞིག་ཡིན། ཞེས་གསུངས་འདུག་པ་བཅས། །
